PARA ŵangati musankhe lizgu limoza kuti mulongosore umo Yehova Ciuta waliri, kasi mungasankha lizgu wuli? Mu vilimika vya m’ma 700 B.C.E., nchimi Yesaya yikawona mboniwoni. Mu mboniwoni iyi, vilengiwa vyauzimu vikathuwuskanga Yehova, ndipo vikayowoya lizgu ilo likulongosora umo Ciuta waliri. Vikati ni mutuŵa. Ivyo Yesaya wakawona na kupulika vikwenera kutipangiska kuti timopenge Yehova ndiposo kuŵa nayo paubwezi. Apo mukusanda mazgu agho ghali pa Yesaya 6:1-3, muŵe nga namwe mukaŵapo.

Pamanyuma Yesaya wakawona vinthu ivyo panji palije munthu waliyose wali kuwonapo mu mboniwoni. Wakalemba kuti: “Pacanya pake [pa Yehova] pakimilira ŵaserafi; yose wakaŵa na mapapindo ghankhondi na limoza; wakabenekelera cisko cake na ghaŵiri, na ghaŵiriso wakabenekelera malundi ghake, ndipo wakawurukanga na ghaŵiri.” (Vesi 2) Ŵaserafi ni vilengiwa vyauzimu vyapacanya comene. Pa ŵalembi wose ŵa Baibolo, ni Yesaya pera wali kuzunurapo za ŵaserafi. Ŵaserafi ŵakimilira, kulongora kuti nyengo zose mbakunozgeka kucita ivyo Yehova wangaŵatuma. Ŵakabenekelera cisko na malundi ghawo kulongora kopa na kucindika Yehova ndiposo kulongora kuti ni mwaŵi ukuru kumuteŵetera.