• “Nizamwimika Muliska Yumoza”
    Yehova Wawezgerapo Kusopa Kutuŵa!
    • Nombo yakwamba ya mu uchimi wa Ezekiyeli yili na mphukira ya sidara

      Nombo yikuru yakwamba yikimiranga Themba Nebukadinezara la Babuloni (Wonani ndime 6)

      6. Longosorani ivyo chinthanguni ichi chikung’anamura.

      6 Kasi chinthanguni ichi chikang’anamurangachi? (Ŵazgani Ezekiyeli 17:11-15.) Mu 617 B.C.E., Nebukadinezara themba la Babuloni (uyo wakwimira “nombo yikuru” yakwamba) wakawukira Yerusalemu. Wakabonthora Yehoyakini, themba la Yuda (“mphukira yapachanya chomene”), kumuwuskapo pa chitengo chaufumu na kuluta nayo ku Babuloni (“msumba wa ŵamalonda”). Nebukadinezara wakatora Zedekiya (yimoza mwa ‘mbuto yachifumu mu charu’) na kumuŵika pa chitengo chaufumu mu Yerusalemu. Themba liphya la Yuda ili likachita chilapo mu zina la Chiuta, kuti liŵenge lakugomezgeka kwa themba la Babuloni. (2 Mid. 36:13) Kweni Zedekiya wakafiska yayi chilapo chira; wakagalukira Babuloni na kukolerana na Farawo wa ku Eguputo (‘nombo yikuru’ yachiŵiri) kuti wamovwire pa nkhondo, kweni vikenda yayi. Yehova wakasuska Zedekiya chifukwa cha kuswa chilapo chira. (Ezek. 17:16-21) Paumaliro, Zedekiya wakapokeka ufumu, ndipo wakafwira mu jele ku Babuloni.—Yer. 52:6-11.