10, 11. (a) Kasi ni vitumbiko wuli ivyo vikwiza kwa ise nga ni mlonga mazuŵa ghano? (b) Kasi vitumbiko ivyo vikufuma kwa Yehova vyasazgikira wuli kuti vikwanire ŵanthu ŵanandi mu mazuŵa ghaumaliro agha?

¹⁰ Mlonga wa vitumbiko. Kasi maji ghakufuma mu nyumba ya Yehova ghakutikumbuska vitumbiko wuli mazuŵa ghano? Ghakutikumbuska vinthu vyose ivyo Yehova watipa kuti vitovwire kukura makora mwauzimu. Chikuru chomene ni nkhongono yakutozga ya sembe ya Khristu, iyo yikovwira kuti zakwananga zithu zigowokereke. Unenesko wa mu Mazgu gha Chiuta nawo ukuyana waka na maji ghakupa umoyo na ghakutozgera. (Efe. 5:25-27) Kasi vitumbiko ivi vikwenda wuli mazuŵa ghano?

Mlonga Ukupeleka Vitumbiko

KALE: Ŵazga ŵakati ŵawelera ku charu chawo, Yehova wakaŵatumbika ndipo ŵakambiraso kusopa kutuŵa mu tempile

MAZUŴA GHANO: Mu 1919, kusopa kutuŵa kukawezgekerapo, ndipo ŵateŵeti ŵakugomezgeka ŵa Yehova ŵakatumbikika chomene mwauzimu

KUNTHAZI: Para Aramagedoni yajumpha, Yehova wazamutumbika ŵanthu ŵake mwakuthupi kweniso mwauzimu