Sonosono apa, Ufumu wa Chiuta umazgenge masuzgo ghose agho tikusangana nagho. Nkhani iyi njiwemi na yakukondweska chomene, ndipo tikwenera kuphalirako ŵanthu. Yesu wakakhumbanga kuti ŵalondezgi ŵake ŵaphalirengeko ŵanthu makani ghawemi agha! (Mateyu 28:19, 20) Kasi Ŵakaboni ŵa Yehova ŵakuchita wuli na dango ilo Yesu wakapeleka?

1. Kasi lemba la Mateyu 24:14 likufiskika wuli mazuŵa ghano?

Yesu wakayowoya kuti: “Makani ghawemi agha gha Ufumu, ghazamupharazgika mu charu chose chapasi.” (Mateyu 24:14) Ŵakaboni ŵa Yehova ŵakukondwa chomene kuchitako mulimo wakuzirwa uwu. Tikupharazga makani ghawemi pa charu chose mu viyowoyero vyakujumpha 1,000! Kuti tichite mulimo ukuru uwu pakukhumbikwira nkhongono kweniso ndondomeko yiwemi. Nakuti Yehova ndiyo wakutovwira kuti tifiske ntchito iyi.

2. Kasi tikuchita wuli kuti tipharazgire ŵanthu?

Tikupharazga kulikose uko tingasanga ŵanthu. Nase tikupharazga “ku nyumba na nyumba” nga umo ŵakachitiranga Ŵakhristu ŵakwambilira. (Milimo 5:42) Nthowa iyi yikutovwira kuti tipharazgirenge ŵanthu mamiliyoni ghanandi chomene chaka chilichose. Tikupharazgaso ku malo uko kukusangika ŵanthu ŵanandi chifukwa ŵanyake ŵakusangika yayi pa nyumba. Nyengo zose tikupenja mipata yakuti tiphalirengeko ŵanthu vya Yehova na khumbo lake.

3. Kasi mbanjani ŵakwenera kupharazga makani ghawemi?

Ŵakhristu ŵaunenesko ndiwo ŵali na udindo wakupharazga makani ghawemi. Tikuwuwona mwakupepuka yayi udindo uwu. Tikuŵikapo mtima pa mulimo wakupharazga, chifukwa tikumanya kuti ni ntchito ya kuponoska umoyo. (Ŵazgani 1 Timote 4:16.) Tikupokera kalikose yayi pa mulimo uwo tikuchita, chifukwa Baibolo likuti: “Mukapokera kwawanangwa, pelekani kwawanangwa.” (Mateyu 10:7, 8) Nanga ŵanthu ŵanyake ŵangakana uthenga withu, kweni ise tikulutilira kupharazga chifukwa para tikuchita nthena tikupulikira Yehova na kukondweska mtima wake.

MANYANI VINANDI

4. Tikuŵikapo mtima kuti tipharazgire ŵanthu ŵanandi

VIDIYO: Kupharazga “ku Vigaŵa Vyakutali Chomene vya Charu Chapasi” (7:33)

• Kasi ntchivichi chikumukondweskani na umo Ŵakaboni ŵa Yehova ŵakuchitira kuti ŵapharazgire ŵanthu ŵanandi?

Ŵazgani Mateyu 22:39 na Ŵaroma 10:13-15, kufuma apo dumbiskanani mafumbo agha:

• Kasi ntchito yakupharazga yikulongora wuli kuti tikutemwa ŵazengezgani ŵithu?

• Kasi Yehova wakuŵawona wuli awo ŵakupharazga makani ghawemi?—Wonani vesi 15.

5. Tili ŵantchito ŵanyake na Chiuta

Maukaboni ghakulongora kuti Yehova ndiyo wakulongozga ntchito ya kupharazga. Mwachiyelezgero, apo mubali munyake zina lake Paul wakapharazganga ku nyumba na nyumba ku New Zealand, wakasangana na mwanakazi munyake. Mwanakazi uyu wakati zuŵa lenelili kumulenji, wakalomba ndipo wakazunura zina la Chiuta lakuti Yehova kumupempha kuti munthu munyake wamwendere. Paul wakati, “Pati pajumpha maora ghatatu kufuma apo wakalombera nkhafika pa nyumba yake.”

Ŵazgani 1 Ŵakorinte 3:9, kufuma apo dumbiskanani fumbo ili:

• Kasi nkhani ya ku New Zealand iyi, yikulongora wuli kuti Yehova ndiyo wakulongozga nadi ntchito ya kupharazga?

Ŵazgani Milimo 1:8, kufuma apo dumbiskanani fumbo ili:

• Chifukwa wuli tikwenera kugomezga kuti Yehova watovwirenge kuti tifiske mulimo withu wakupharazga?

Kasi mukumanya?

Sabata yiliyose pa maungano gha mukati mwasabata, tikusambira nthowa za umo tingapharazgira. Usange muli kulutako ku maungano agha, kasi ni maluso wuli agho mukasambira?

6. Tikupulikira dango la Chiuta lakuti tipharazgenge

Mu nyengo yakale ŵakususka ŵakayezga kulekeska ŵalondezgi ŵa Yesu kupharazga. Ŵakhristu ŵakavikilira “makani ghawemi mwakuyana na dango” kuti ŵaŵe na wanangwa wakupharazga. (Ŵafilipi 1:7) Ŵakaboni ŵa Yehova ŵakuchita mwakuyana waka mazuŵa ghano.a

VIDIYO: Ŵakavikilira Makani Ghawemi Mwakuyana na Dango (2:28)

Ŵazgani Milimo 5:27-42, kufuma apo dumbiskanani fumbo ili:

• Chifukwa wuli tizamuleka yayi kupharazga?—Wonani mavesi 29, 38, na 39.

MWAKUDUMURA

Yesu wakaphalira ŵalondezgi ŵake kuti ŵapharazgenge makani ghawemi ku mitundu yose. Yehova wakovwira ŵanthu ŵake kuchita mulimo uwu.

Kuweleramo

• Kasi makani ghawemi ghakupharazgika wuli pa charu chose chapasi?

• Kasi para tikupharazga tikulongora wuli kuti tikutemwa ŵanyithu?

• Kasi mukuwona kuti ntchito yakupharazga yingatovwira kuti tiŵe ŵakukondwa? Chifukwa wuli?

SANGANI FUNDO ZAKUSAZGIKIRA

Wonani umo Ŵakaboni ŵa Yehova ŵakupharazgira mu misumba yikuruyikuru.

Kupharazga ku Malo Uko Kukusangika Ŵanthu Ŵanandi ku Paris (5:11)

Kasi Ŵakaboni ŵa Yehova ŵakuchita wuli kuti ŵapharazgire awo ŵachimbira kwawo?

Ŵakapharazgira Ŵanthu Ŵakuchimbira Kwawo (5:59)

Wonani ivyo vikawovwira munthu munyake kuti wapharazgenge nyengo zose.

Nkhukondwa Kuti Nkhasankha Kuteŵetera Yehova (6:29)

Wonani vinthu vinyake ivyo makhoti ghakadumura ivyo vyawovwira kuti tipharazgenge makani ghawemi mwambura kusuzga.

“Ŵakamangara ku Khoti” (Ufumu wa Chiuta Ukuwusa!, mutu 13)

Yesu wakayowoya kuti Mkhristu waliyose wakwenera kubatizika. (Ŵazgani Mateyu 28:19, 20.) Kweni kasi ubatizo ni vichi? Ndipo munthu wakwenera kuchita vichi kuti wabatizike?

1. Kasi ubatizo ni vichi?

Lizgu lakuti “kubatiza” lili kufuma ku lizgu Lachigiriki ilo likung’anamura “kubizga” mu maji. Apo Yesu wakabatizikanga, wakabizgika thupi lose mu Mlonga wa Yorodani, kufuma apo ‘wakazuwuka mu maji.’ (Mariko 1:9, 10) Mwakuyana waka Ŵakhristu ŵaunenesko nawo para ŵakubatizika ŵakubizgika thupi lose mu maji.

2. Kasi para munthu wabatizika wakulongora vichi?

Para munthu wabatizika wakulongora kuti wajipeleka kwa Yehova Chiuta. Kasi munthu wakujipeleka wuli? Pambere wandabatizike, iyo wakumuphalira Yehova mu lurombo kuti wakukhumba kumuteŵetera umoyo wake wose. Wakulayizga Yehova kuti wasopenge iyo pera kweniso kuti wachitenge ivyo iyo wakukhumba. Iyo ‘wakujipata na kulutilira kulondezga’ ivyo Yesu wakasambizganga na kuchita. (Mateyu 16:24) Para wajipeleka na kubatizika wakuŵa paubwezi wakukhora na Yehova kweniso ŵabali na ŵadumbu.

3. Kasi munthu wangachita wuli kuti wabatizike?

Munthu wakwenera kusambira dankha vya Yehova na kuŵa na chipulikano mwa iyo kuti wabatizike. (Ŵazgani Ŵahebere 11:6.) Para mwamumanya makora Yehova mumutemwenge chomene na kuŵa na chipulikano chakukhora mwa iyo. Ivi vimovwiraninge kuti muphalirengeko ŵanji vya iyo na kwendera fundo zake pa umoyo winu. (2 Timote 4:2; 1 Yohane 5:3) Para munthu wakuchita ivyo Yehova wakukhumba, ‘wakwenda mwakwenelera na kumukondweska pa chilichose,’ ndipo wangasankha kujipeleka kwa Yehova na kubatizika.—Ŵakolose 1:9, 10.a

MANYANI VINANDI

4. Kasi tingasambirako vichi ku ubatizo wa Yesu?

Ŵazgani Mateyu 3:13-17 kuti mumanye vinandi vya ubatizo wa Yesu. Kufuma apo dumbiskanani mafumbo agha:

• Kasi Yesu wakaŵa bonda apo wakabatizikanga?

• Kasi Yesu wakabatizika wuli? Kasi ŵakamumijira waka maji?

Yesu wakamba kuchita uteŵeti uwo Chiuta wakamutuma pa charu chapasi wakati wabatizika. Ŵazgani Luka 3:21-23 na Yohane 6:38, kufuma apo dumbiskanani fumbo ili:

• Kasi Yesu wakati wabatizika, wakaŵikanga pakwamba ntchito wuli pa umoyo wake?

5. Namwe mungabatizika

Nyengo zinyake mungachita wofi kuti mujipeleke kwa Yehova na kubatizika. Ndipouli vingachitika kuti muleke kuchita wofi na kufika pa kubatizika. Kuti muwone ŵanyake awo ŵakachitanga wofi kweni ŵakabatizika, wonelerani VIDIYO.

VIDIYO: Khozgani Ubwezi Winu na Yehova (1:11)

Ŵazgani Yohane 17:3 na Yakobe 1:5, kufuma apo dumbiskanani fumbo ili:

• Kasi ntchivichi chingawovwira munthu kuti wabatizike?

1. Tikujipeleka kwa Yehova para tikumuphalira kuti tikukhumba kumuteŵetera umoyo withu wose

2. Para tikubatizika tikulongora awo ŵakuwonelera kuti tili kujipeleka kwa Chiuta

6. Para munthu wabatizika wakuŵa mu mbumba ya Yehova

Para munthu wabatizika wakuŵa mu mbumba ya pa charu chose iyo njakukolerana. Nangauli tikufuma mu vyaru panji mitundu yakupambanapambana, kweni tose tikuchita vyakuyana waka ndipo tikwendera fundo za Yehova. Ŵazgani Salimo 25:14 na 1 Petrosi 2:17, kufuma apo dumbiskanani fumbo ili:

• Kasi munthu wakuŵa paubwezi wuli na Yehova kweniso Ŵakhristu ŵanyake para wabatizika?

MWAKUDUMURA

Yesu wakati Ŵakhristu ŵakwenera kubatizika. Kuti munthu wabatizike wakwenera kukhozga chipulikano chake mwa Yehova, kulondezga fundo zake na kujipeleka kwa Iyo.

Kuweleramo

• Kasi ubatizo ni vichi, ndipo chifukwa wuli ngwakuzirwa?

• Kasi kujipeleka na kubatizika vikulongora vichi?

• Kasi munthu wakwenera kuchita vichi pambere wandajipeleke na kubatizika?

SANGANI FUNDO ZAKUSAZGIKIRA

Wonani ivyo ubatizo ukung’anamura.

“Kasi Ubatizo Ni Vichi?” (Nkhani ya pa Intaneti)

Wonani vinthu vinyake ivyo vingawovwira kuti munthu waŵe wakwenelera kubatizika.

“Para Mukumutemwa Yehova na Kumuwonga Mubatizikenge” (Gongwe la Mulinda, Malichi 2020)

Wonani vinthu vinyake ivyo mwanalume munyake wakachita kuti wasankhe kubatizika.

“Ŵakakhumbanga kuti Nibowozge Nekha Unenesko” (Gongwe la Mulinda, Febuluwale 1, 2013)

Wonani chifukwa icho tikuyowoyera kuti ubatizo ngwakuzirwa kweniso ivyo mungachita kuti mubatizike.

“Kasi Nkhwenera Kubatizika?” (Mazgoro gha Ivyo Ŵachinyamata Ŵakufumba, Buku Lachiŵiri, mutu 37)