▪ Apo Yesu wakaŵa pafupi kukomeka, wakacitapo kanthu pa vinthu vyambura urunji ivyo vikacitikanga mu tempele. Baibolo likuti: “Yesu . . . [wakacimbizgira] kuwaro wose awo ŵakaguliskanga na kugura mu tempele, ndipo wakagadabura mathebulu gha ŵakusintha ndalama na vitengo vya ŵakuguliska nkhunda. Ndipo wakati kwa iwo: ‘Kuli kulembeka, “Nyumba yane yicemekenge nyumba ya lurombo,” kweni imwe mukuyizgora mphanji ya ŵakupoka vyaŵene.’”—Mateyu 21:12, 13.

Yesu wakasuska ŵakusintha ndalama aŵa kuti ŵakazgoranga tempele kuŵa “mphanji ya ŵakupoka vyaŵene.” Mazgu agha ghakulongora kuti pakusintha ndalama ŵakachajanga ndalama yinandi yapacanya.