11. Kasi Yesu wakati ntharika ya dada na mwana wake yikukolerana wuli na lurombo?

¹¹ Ntharika ya Yesu yakuyowoya za munthu wacikosa uyo wapokera mulendo yikulongora umo wakucitira uyo wakulomba. Ntharika yaciŵiri yikulongora umo wakucitira uyo wakupulika malurombo, Yehova Ciuta. Yesu wakafumba kuti: “Ndi nju wa imwe uyo ndi wiske, para mwana wake wakulomba cingwa, wakumupa libwe? panji somba, ndipo kuti wakumupa somba cara kweni njoka ndiyo? Panji wakulomba sumbi, kasi wakumupa kalizga?” Pamanyuma Yesu wakalongosora ng’anamuro la ntharika iyi, wakati: ‘Ntheura usange imwe, mwa ŵaheni, mukumanya kuŵapa ŵana ŵinu vyawanangwa viweme, asi comene kwakuluska Ŵawiskemwe ŵa kucanya ŵati ŵaŵapenge mzimu utuŵa awo ŵakuŵalomba?’—Luka 11:11-13.

12. Kasi ntharika ya dada uyo wakupulika pempho la mwana wake yikulongora wuli kuti Yehova wakuzgora malurombo ghithu?

¹² Mwakuyowoya ciyelezgero ca umo dada wakucitira na mwana wake, Yesu wakavumbura umo Yehova wakucitira kwa awo ŵakumulomba. (Luka 10:22) Cakwamba, wonani mphambano pakati pa ntharika ziŵiri izi. Mwakupambana na munthu wa mu ntharika yakwamba uyo wakuziwulika kovwira mubwezi wake, Yehova wali nga ni mupapi walusungu, uyo nyengo zose ngwakunozgeka kupulika pempho la mwana wake. (Salmo 50:15) Kuti Yesu walongore umo Yehova wakukhumbira kutovwira, wakayowoya mphambano pakati pa dada wa pa caru na dada withu wakucanya. Wakayowoya kuti usange dada wa pa caru capasi, nangauli ‘ni muheni’ cifukwa ca kwananga uko wali kuhara, wakupeleka vyawanangwa viwemi ku ŵana ŵake, asi kwakuluska tingalindilira kuti Dada withu wakucanya, uyo ngwambura kwananga, wapelekenge mzimu utuŵa ku mbumba ya ŵasopi ŵake!—Yakobe 1:17.

14. (a) Ni maghanoghano wuli ghambura kwenelera agho ŵanyake ŵakusuzgika nagho para ŵakuyezgeka? (b) Para tikuyezgeka, cifukwa wuli tingalomba kwa Yehova na cisimikizgo cose?

¹⁴ Ntharika ya Yesu ya dada uyo wakupa mwana wake ico walomba yikulongoraso kuti Yehova ni muwemi kuluska mupapi waliyose pa caru capasi. Mwantheura, paŵavye waliyose wa ise uyo wakwenera kughanaghana kuti viyezgo ivyo tikukumana navyo nchilongolero cakuti Ciuta wanyanyara nase. Mulwani withu Satana ndiyo wakukhumba kuti tighanaghanenge nthena. (Job 4:1, 7, 8; Yohane 8:44) Palije lemba lililose ilo likutiphalira kuti tighanaghanenge nthena. Yehova wakutiyezga na “uheni” cara. (Yakobe 1:13) Iyo wakutipa viyezgo vya nga ni njoka yayi, nesi kalizga. Adada ŵithu ŵakucanya ŵakuŵapa “viweme awo ŵakuŵalomba.” (Mateyu 7:11; Luka 11:13) Enya nadi, tilombenge na cisimikizgo cose kwa Yehova usange tamanya kuti ni muwemi ndipo wakukhumba comene kutovwira. Apo tikucita nthena, nase tizamuyowoya mazgu nga ni agho wakayowoya wamasalmo apo wakalemba kuti: “Kweni nadi Ciuta wakandipulika na kutegherezga ku mazgu gha lurombo lwane.”—Salmo 10:17; 66:19.