Ŵikanipo Mtima Kusambira Pamwekha

1. Chifukwa wuli ku ŵanyake chikuŵa chakusuzga kuti ŵasambirenge paŵekha?

MAZUŴA ghano munthu wakwenera kulimbikira chomene kuti wasange vyakukhumbikwa. Ŵabali ŵithu ŵanandi ŵakugwira ntchito maora ghanandi kuti ŵasangire mbumba zawo vyakukhumbikwa. Ŵanyakeso ŵanandi ŵakwenda mitunda yitali kuti ŵakafike uko ŵakugwilira ntchito. Ŵanandi ŵakugwira ntchito zinonono kuti ŵasange ndalama zakovwilira mbumba zawo. Para ŵawera ku ntchito, ŵabali na ŵadumbu aŵa ŵakuŵa kuti ŵavuka chomene, ndipo chikuŵa chakusuzga kuti ŵasambire paŵekha.

2. Kasi imwe mukusambira nyengo wuli?

² Nangauli tikutangwanika chomene, kweni tikwenera kusanga nyengo yakusambilira Mazgu gha Chiuta na vyose ivyo gulu likufumiska. Ntchakukhumbikwa chomene kuchita nthena usange tikukhumba kuŵa paubwezi uwemi na Yehova na kuzakasanga umoyo wamuyirayira. (1 Tim. 4:15) Ŵanyake ŵakuwuka mulenji chomene zuŵa lililose kuti ŵasambire. Ŵakuchita nthena chifukwa pa nyengo iyi kukuŵavya viwawa kweniso maghanoghano ghawo ghakuŵa ghakukhazikika. Ŵanyake ŵakusambira na kughanaghanirapo Mazgu gha Chiuta nyengo yamise.

3-4. Kasi gulu lili kuchepeskako vichi, ndipo chifukwa wuli?

³ Namwe mungazomerezga kuti ntchakuzirwa chomene kuti tisangenge nyengo yakusambilira patekha. Kweni kasi tikwenera kusambira vichi? Panji mungati, ‘pali vinandi ivyo tikwenera kuŵerenga, ndipo chikuniŵira chakusuzga kuŵerenga vyose.’ Ŵabali na ŵadumbu ŵanyake ŵakukwaniska kuŵazga buku lililose ilo lafuma, kweni ŵanandi vikuŵasuzga kuchita nthena. Wupu Wakulongozga ukumanya vyose ivi. Lekani mwasonosono apa uli kuchepeska vinthu ivyo ukufumiska, vyakupulinta na vya pa Intaneti.

⁴ Mwachiyelezgero, gulu likufumiskaso yayi Buku Lapachaka la Ŵakaboni ŵa Yehova, chifukwa nkhani zinandi zakukhozga zikusangika kale pa jw.org kweniso mu pulogiramu ya mwezi na mwezi ya JW Broadcasting. Gongwe la Mulinda lakugaŵira na Wukani! pasono vikufumiskika waka katatu pa chaka. Wupu Wakulongozga uli kuchita nthena kuti tiŵe na nyengo yinandi yakuchitira vinthu vyakuthupi yayi, kweni kuti tiŵike mahara ku “vinthu vyakuzirwa chomene.” (Fil. 1:10) Tiyeni tidumbiskane vinthu ivyo vikwenera kuŵa pakwamba para tikusambira patekha kweniso umo tingachitira kuti tipindurenge para tikuchita sambiro lataŵene.

IVYO TIKWENERA KWAMBA KUSAMBIRA

5-6. Kasi ni mabuku wuli ghanyake agho tikwenera kuwoneseska kuti tikusambira?

⁵ Kasi tikwenera kusambira dankha vichi? Zuŵa lililose tikwenera kusanga nyengo yakusambilira Baibolo. Gulu lili kuchepeska mavesi gha mu Baibolo agho tikusambira mukati mwa sabata ku mpingo mwakuti tiŵe na nyengo yinandi yakuchitira kafukufuku na kughanaghanirapo ivyo tikuŵerenga. Chilato chithu chikwenera kuŵa waka chakuti tiŵazge mavesi gha sabata iyo yayi, kweni kuti uthenga wa mu Baibolo utifikenge pamtima na kutovwira kuti tiŵe pafupi chomene na Yehova.—Sal. 19:14.

⁶ Kasi tikwenera kusambiraso vichi? Tikwenera kunozgekera Sambiro la Gongwe la Mulinda na Sambiro la Baibolo la Mpingo kweniso maungano ghose ghamukati mwa sabata. Tikweneraso kuŵerenga Gongwe la Mulinda lakugaŵira na Wukani!

7. Kasi tikwenera kugongowa usange tikufiska yayi kuŵazga na kuwonelera vyose ivyo vili pa webusayiti yithu na pa JW Broadcasting?

⁷ Nyengo zinyake mungayowoyaso kuti, ‘Kweni wuli pakukhwaskana na vyose ivyo vikusangika pa webusayiti yithu ya jw.org kweniso pa JW Broadcasting? Pali vinthu vinandi chomene.’ Tiyelezgere kuti mwaluta ku chiphikiro, kasi mungarya vyakurya vyose ivyo ŵanozga ku chiphikiro? Yayi. Mungaryapo vichoko waka ivyo mwasankha. Mwakuyana waka, usange mukukwaniska yayi kuŵazga na kuwonelera vyose ivyo vili pa webusayiti yithu kugongowa yayi. Ŵazgani na kuwonelera ivyo mungafiska. Tiyeni sono tiwone ng’anamuro lakusambira patekha kweniso ivyo tingachita kuti tisangenge chandulo na sambiro lataŵene.

NTCHIPUSU YAYI KUSAMBIRA PATEKHA

8. Kasi tikwenera kuchita vichi para tikusambira Gongwe la mulinda, ndipo tisangenge chandulo wuli?

⁸ Kusambira nkhuŵika chomene mahara pa ivyo mukuŵazga kuti musange chandulo. Nkhuŵazga waka mwakuchimbilira yayi panji kugwara waka mazgoro. Mwachiyelezgero, para mukunozgekera Sambiro la Gongwe la Mulinda ntchiwemi kuŵazga chilato cha nkhani icho chikuŵa pakwambilira. Pamanyuma ghanaghaniranipo pa mutu wa nkhani, mitu yichokoyichoko na mafumbo ghakuweleramo. Paumaliro ŵazgani nkhani yose mwakuzikira. Ŵikani mahara pa sentesi iyo yikulongosora ivyo vili mu ndime. Kanandi sentesi iyi yikuŵa kukwambilira kwa ndime yiliyose. Sentesi iyi yikovwira kuti mumanye fundo yikuru ya mu ndime iyo. Apo mukuŵazga wonani kukolerana pakati pa ndime yiliyose na mitu yichokoyichoko kweniso mutu wa nkhani yose. Lembani mazgu na fundo izo pakwamba mukazimanyanga yayi, ndipo paumaliro penjerezgani kuti mumanye vinandi.

9. (a) Chifukwa wuli tikwenera kuŵika chomene mahara pa malemba apo tikusambira patekha Gongwe la Mulinda? (b) Mwakuyana na lemba la Joshuwa 1:8, kasi tikwenera kuchita vichi padera pa kuŵazga malemba?

⁹ Gongwe la Mulinda ilo tikusambira pa mpingo likutovwira kuti tipulikiskenge makora Baibolo. Ntheura ŵikani mahara pa malemba, chomenechomene agho ghamuŵazgika para mpingo ukusambira nkhani iyo. Wonani kukolerana pakati pa malemba agha na fundo zikuru za mu ndime. Kweniso ghanaghaniranipo pa malemba agho mukuŵazga na kuwona umo mungaghalondezgera pa umoyo winu.—Ŵazgani Joshuwa 1:8.

10. Kuyana na lemba la Ŵahebere 5:14, chifukwa wuli ŵapapi ŵakwenera kusambizga ŵana ŵawo umo ŵangasambilira paŵekha na umo ŵangachitira kafukufuku?

¹⁰ Ŵapapi ŵakukhumba kuti ŵana ŵawo ŵakondwenge pa Nyengo Yakusopera ya Mbumba sabata yiliyose. Nangauli ŵapapi nyengo zose ŵakwenera kunozga ivyo ŵazamudumbiskana pa kusopa kwa mbumba, kweni ntchakukhumbikwa viŵi yayi kuti ŵapapi ŵawonenge kuti ŵakwenera kunozga vyakuchita vyapadera na vyakunozga sabata yiliyose. Nangauli kanandi pa Nyengo Yakusopera ya Mbumba ŵangawonelera pulogiramu ya mwezi na mwezi ya JW Broadcasting kweniso kuchita vinthu vinyake vyapadera, nga nkhuyezgelera kupanga chingalaŵa cha Nowa, kweni ntchakuzirwa chomene kuti ŵapapi ŵasambizgenge ŵana ŵawo umo ŵangasambilira paŵekha. Mwachiyelezgero, ŵana ŵakwenera kumanya kunozgekera maungano gha mpingo, kweniso umo ŵangachitira kafukufuku para munthu waŵafumba fumbo ku sukulu. (Ŵazgani Ŵahebere 5:14.) Para ŵana ŵakusambira paŵekha, chiŵaŵirenge chipusu kutegherezga na kupulikiska ivyo vikusambirika ku maungano gha mpingo, gha dera, na gha chigaŵa nanga pangaŵavya mavidiyo. Utali wa nyengo yakusambilira na ŵana ŵinu yithembenge pa umo ŵana ŵinu ŵaliri.

11. Chifukwa wuli ntchakuzirwa kusambizga awo tikusambira nawo Baibolo umo ŵangasambilira paŵekha?

¹¹ Ŵanthu awo tikusambira nawo Baibolo ŵakwenera kumanya umo ŵangasambilira paŵekha. Para tamba waka kusambira nawo, tikukondwa para tawona kuti ŵagwara mazgoro mu mabuku agho tikusambira nawo panji ŵanozgekera maungano gha mpingo. Kweni tikwenera kuŵasambizga umo ŵangachitira kafukufuku kweniso umo ŵangachitira kuti ŵatorengepo kanthu para ŵakusambira paŵekha. Ntheura para ŵakumana na masuzgo, ŵazamuchimbilira kukafumba ŵanji yayi kuti ŵaŵaphalire chakuchita, m’malo mwake ŵazamupenjerezga dankha fundo izo zingaŵawovwira mu mabuku ghithu.

ŴANI NA CHILATO

12. Kasi tikwenera kuŵa na vilato wuli para tikusambira patekha?

¹² Para mukutemwa yayi kusambira pamwekha, mungawona nga vingachitika yayi kuti mukondwenge para mukusambira. Kweni vingachitika. Yambani kusambira kwa nyengo yichoko, ndipo mwapachokopachoko sazgiraniko nyengo iyo mukusambilira. Ŵani na chilato. Chilato chithu chikuru chikwenera kuŵa chakuti tiŵe paubwezi wakukhora na Yehova. Kweniso tikwenera kuŵa na chilato cha kuzgora fumbo ilo munthu watifumba panji kupenjerezga nkhani yinyake iyo yingatovwira pa suzgo ilo takumana nalo.

13. (a) Longosorani ivyo muwukirano wangachita kuti walongosore ivyo wakugomezga para wali ku sukulu. (b) Kasi mungalondezga wuli ulongozgi uwo uli pa Ŵakolose 4:6?

¹³ Mwachiyelezgero, kasi ndimwe muwukirano uyo wakusambira sukulu? Vingachitika kuti ŵanyinu wose mu kilasi ŵakugomezga kuti taŵanthu tikachita kusintha kufuma ku vinyake. Mungatemwa kuti muŵaphalire ivyo Baibolo likuyowoya pa nkhani iyi, kweni nyengo zinyake mungajikayikira. Para vyaŵa nthena mbwenu mukwenera kuchita kafukufuku. Mungaŵa na vifukwa viŵiri vyakuchitira nthena: (1) kuti mukhozge chipulikano chinu chakuti Chiuta ndiyo wakalenga nadi vinthu vyose ndipo (2) kusambira umo mungachitira kuti mukalongosore ivyo mukugomezga pa nkhani iyi. (Rom. 1:20; 1 Pet. 3:15) Chakwamba mungajifumba kuti, ‘Chifukwa wuli ŵakugomezga kuti taŵanthu tikachita kusintha kufuma ku vinyake?’ Pamanyuma penjerezgani mu mabuku ghithu. Para muchitenge nthena muwonenge kuti ntchakusuzga yayi kulongosora ivyo mukugomezga. Ŵanthu ŵanandi ŵakugomezga chisambizgo ichi chifukwa chakuti munthu uyo ŵakumuchindika ndiyo wakaŵaphalira. Para mwasanga fundo yimoza panji ziŵiri, mungawovwira nazo munthu uyo wali na mafumbo pa nkhani iyi.—Ŵazgani Ŵakolose 4:6.

MUKHUMBISISKENGE KUSAMBIRA

14-16. (a) Kasi mungachita wuli kuti mulimanye makora buku linyake la mu Baibolo? (b) Kasi mabuku ghanyake gha mu Baibolo ghangamovwirani wuli kuti mupulikiske makora buku la Amosi? (Mungawonaso bokosi la mutu wakuti “Ŵani nga Mukuwona Ivyo Mukuŵazga mu Baibolo.”)

¹⁴ Tiyelezgere kuti sabata yikwiza pa maungano gha mpingo tizamusambira mabuku gha uchimi gha mu Baibolo agho tikughamanya makora yayi. Chakwamba icho tingachita, tiŵe ŵakukhumbisiska kumanya vinandi vyakukhwaskana na ntchimi iyo yikalemba buku ilo. Kasi tingachita wuli nthena?

¹⁵ Chakwamba jifumbani kuti: ‘Kasi nkhumanya vichi vyakukhwaskana na uyo wali kulemba buku ili? Kasi wakaŵa njani? Kasi wakakhalanga nkhu? Kasi wakagwiranga ntchito wuli?’ Para tamanya vinandi vya uyo wakalemba buku timanyenge chifukwa icho wakayowoyera mazgu na viyelezgero ivyo vili mu buku ilo wali kulemba. Apo mukuŵerenga Baibolo, sangani mazgu panji fundo izo zingamovwirani kuti mumumanye makora uyo wakalemba.

¹⁶ Para mwamumanya makora uyo wakalemba buku, mungamanyaso na nyengo iyo buku ilo likalembekera. Kuti mumanye mungawona pa chigaŵa cha “Mazina gha Mabuku gha mu Baibolo” icho chili kukwambilira kwa Baibolo la Malemba Ghakupatulika mu Mang’anamuliro gha Charu Chiphya. Kweniso mungawona tchati iyo yikulongosora vya zintchimi na mathemba pa Vyakusazgirapo A6 kuumaliro wa Baibolo ili. Usange buku la mu Baibolo ilo mukusambira likuyowoya vya mauchimi, mungachitaso makora kumanya umo umoyo ukaŵira pa nyengo iyo buku ilo likalembekanga. Kasi ni vinthu wuli ivyo ŵanthu pa nyengo iyo ŵakachitanga ivyo ntchimi yikaŵakanizganga? Ni njani munyake wakaŵako panyengo iyo ntchimi iyi yikaŵirako? Kuti mupulikiske makora, mukwenera kuwonaso mu mabuku ghanyake gha mu Baibolo. Mwachiyelezgero, kuti mumanye makora ivyo vikachitikanga mu nyengo ya ntchimi Amosi, mungachita makora kuŵazga mu mabuku gha 2 Mathemba na 2 Midauko, agho ghali mu maliferensi ghapakati pa lemba la Amosi 1:1. Kweniso mungawona buku la Hoseya uyo wakwenera kuti wakaŵako mu nyengo ya Amosi. Para muŵazgenge mabuku ghose agha mupulikiskenge makora umo umoyo ukaŵira mu nyengo ya Amosi.—2 Mathe. 14:25-28; 2 Mid. 26:1-15; Hos. 1:1-11; Am. 1:1.

ŴIKANI MAHARA KU VYOSE IVYO MUKUSAMBIRA

17-18. Kuyana na viyelezgero ivyo vili mu ndime panji viyelezgero vinyake ivyo muli navyo, longosorani umo fundo zinyake zichokozichoko za mu Baibolo zingamovwilirani kuti mukondwenge para mukusambira pamwekha?

¹⁷ Para tikuŵerenga Baibolo ntchakuzirwa chomene kuti tiŵenge na khumbo lakumanya vinandi. Tiyelezgere kuti mukuŵazga uchimi wa Zekariya mu chaputara 12 cha buku ili, uwo ukayowoyerathu za nyifwa ya Mesiya. (Zek. 12:10) Para mwafika pa vesi 12, pali mazgu ghakuti “Mbumba ya nyumba ya Natani” yizamutengera chifukwa cha nyifwa ya Mesiya. M’malo mwa kujumphapo waka pa mazgu agha, mungayima dankha na kujifumba kuti: ‘Kasi pali kukolerana wuli pakati pa nyumba ya Natani na Mesiya? Kasi ningachita wuli kuti nimanye vinandi pa nkhani iyi?’ Para vyaŵa nthena mungachita kafukufuku kuti mumanye vinandi. Pa lemba la Zekariya 12:12 pali liferensi lapakati lakukolerana na 2 Samuyeli 5:13, 14 apo pakuyowoya kuti Natani wakaŵa mwana wa Themba Davide. Pa liferensi ili paliso lemba la Luka 3:23, 31 ilo likuyowoya kuti Yesu wakaŵa mwana wa Natani kwizira mwa Mariya. (Wonani “Mafumbo Ghakufuma ku Ŵaŵazgi” mu Gongwe la Mulinda la Ogasiti 2017, peji 32 ndime 4.) Tikukayika yayi kuti mwakondwa kumanya fundo zakusazgirapo izi. Mukamanyanga kale kuti uchimi ukayowoyerathu kuti Yesu wazamuŵa mwana wa Davide. (Mat. 22:42) Kweni Davide wakaŵa na ŵana ŵanalume ŵakujumpha 20. Ntheura ntchakuzizika kuti Zekariya wakayowoya kuti nyumba ya Natani yizamutengera nyifwa ya Yesu.

¹⁸ Wonani chiyelezgero chinyake. Mu chipaturo chakwamba cha buku la Luka, tikuŵazga kuti mungelo Gabriyeli wakawonekera kwa Mariya na kumuphalira za mwana uyo wababenge. Wakati: “Iyo wazamuŵa mukuru, wazamuchemeka Mwana wa Wapachanya Nkhanira. Ndipo Yehova Chiuta wazamumupa chitengo cha Davide, awiske. Wazamuwusa nga ni Themba pa nyumba ya Yakhobe muyirayira.” (Luka 1:32, 33) Panji tingaŵika mahara pa mazgu ghakwamba pera agho Gabriyeli wakayowoya, kuti Yesu wazamuchemeka “Mwana wa Wapachanya Nkhanira.” Kweni Gabriyeli wakayowoyaso kuti Yesu “wazamuwusa nga ni Themba.” Ntheura tingajifumba kuti, kasi Mariya wakamanya ng’anamuro la ivyo Gabriyeli wakayowoya? Kasi wakamba kughanaghana kuti Gabriyeli wakang’anamuranga kuti Yesu wazamunjira m’malo mwa Themba Herode panji m’malo mwa Fumu yinyake ya Israyeli? Viŵenge nthena, Mariya wakatenge wapikenge ntchindi zapadera pakuŵa mama wa Themba, ndipo mbumba yake yikatenge yikhalenge mu nyumba ya themba. Kweni palije apo Baibolo likuyowoyapo kuti Mariya wakayowoyapo ivi kwa Gabriyeli, panji kupempha malo mu Ufumu wa Chiuta nga umo ŵakachitira ŵasambiri ŵa Yesu. (Mat. 20:20-23) Ivi vikutovwira kumanya kuti Mariya wakaŵa wakujiyuyura chomene.

19-20. Nga umo pakulongosolera pa Yakobe 1:22-25 na 4:8, kasi tikwenera kuŵa na chilato wuli para tikusambira patekha?

¹⁹ Tikumbuke kuti chilato chikuru icho tikusambilira Mazgu gha Chiuta na mabuku ghithu ntchakuti tisendelere kwa Yehova. Kweniso tijimanye umo tiliri na kusintha kuti tikondweske Chiuta. (Ŵazgani Yakobe 1:22-25; 4:8.) Nyengo yiliyose para tisambirenge, tikwenera kumulomba Yehova kuti watovwire na mzimu wake utuŵa. Tikwenera kumulomba kuti watovwire kupulikiska vinthu ivyo tisambirenge na kuwona apo tikwenera kusintha.

²⁰ Mphanyi tose taŵa nga ni muteŵeti wakugomezgeka wa Chiuta uyo wamasalimo wakumulongosora kuti: “Wakukondwa na dango la Yehova, wakuŵazga dango ili na kughanaghanirapo muhanya na usiku. . . . Ndipo chilichose icho wakuchita chendenge makora.”—Sal. 1:2, 3.