SAMBIRO 15
Kasi Yesu Ni Njani?
Yesu njumoza mwa ŵanthu ŵakumanyikwa chomene pa charu chose chapasi. Ŵanandi ŵakumanya kuti kukaŵa Yesu, kweni ŵakumanya vinandi yayi vyakukhwaskana na iyo. Ŵanyake ŵali na maghanoghano ghakupambana pa nkhani yakuti Yesu wakaŵa njani. Kasi Baibolo likuti Yesu ni njani?
1. Kasi Yesu ni njani?
Yesu ni mungelo wankhongono chomene ndipo wakukhala kuchanya. Yehova wakalenga Yesu pambere wandalenge chilichose. Lekani Yesu wakumanyikwa kuti, “wakwamba kubabika wa chilengiwa chose.” (Ŵakolose 1:15) Baibolo likuti Yesu ni ‘Mwana wapadera’ wa Yehova chifukwa ndiyo wakamulenga mwakudunjika. (Yohane 3:16) Yesu wakagwiranga ntchito na Adada ŵake, Yehova, ndipo wakaŵawovwira pakulenga vinthu vinyake vyose. (Ŵazgani Zintharika 8:30.) Yesu na Yehova ŵali paubwezi wakukhora chomene. Iyo wakumanyikwaso kuti ni “Mazgu” chifukwa wakuyowoya mu malo mwa Chiuta, kweniso wakupeleka uthenga na ulongozgi wa Chiuta ku ŵanthu.—Yohane 1:14.
2. Chifukwa wuli Yesu wakiza pa charu chapasi?
Vyaka 2,000 ivyo vyajumpha Yehova wakachita munthondwe, wakasamuska umoyo wa Yesu kuchanya na kuŵika mu nthumbo ya mwali, zina lake Mariya. Lekani Yesu wakababika nga munthu. (Ŵazgani Luka 1:34, 35.) Yesu wakiza pa charu chapasi kuti waŵe Mesiya, panji kuti Khristu na kuthaska ŵanthu.a Mauchimi ghose ghakukhwaskana na Mesiya ghakafiskikira pa Yesu, ndipo ivi vikawovwira ŵanthu kumanya kuti iyo ni “Khristu, Mwana wa Chiuta wamoyo.”—Mateyu 16:16.
3. Kasi sono Yesu wali nkhu?
Yesu wakati wafwa, Yehova wakamuwuska nga ni mzimu ndipo wakawelera kuchanya. Wakati waluta kuchanya, “Chiuta wakamukwezga pa malo ghapachanya.” (Ŵafilipi 2:9) Sono Yesu ni mungelo wankhongono chomene, ndipo ngwachiŵiri kwa Yehova.
MANYANI VINANDI
Manyani vinandi vyakukhwaskana na Yesu kweniso uwemi wa kusambira vya iyo.
4. Yesu ni Chiuta Wankhongonozose yayi
Baibolo likusambizga kuti Yesu ni mungelo wankhongono chomene kuchanya, kweni wakujilambika kwa Yehova Chiuta, awo Mbadada ŵake. Chifukwa wuli tikuyowoya nthena? Wonelerani VIDIYO kuti mumanye mphambano pakati pa Yesu na Chiuta.
Malemba ghakulondezgapo agha ghakutovwira kumanya ubali wapakati pa Yehova na Yesu. Ŵerengani lemba lililose, kufuma apo dumbiskanani mafumbo agha.
Ŵazgani Luka 1:30-32.
Kasi mungelo wakalongosora kuti ubali wapakati pa Yesu na Yehova Chiuta “Wapachanya Nkhanira” ngwakuti wuli?
Ŵazgani Mateyu 3:16, 17.
Apo Yesu wakabatizikanga, kasi kuchanya kukapulikikwa mazgu wuli?
Kasi mukughanaghana kuti ni njani wakayowoya mazgu agha?
Ŵazgani Yohane 14:28.
Kasi mulara kweniso uyo wali na mazaza ghakuru ni njani? Adada panji mwana?
Kasi Yesu wakang’anamuranga vichi apo wakati Yehova Mbadada ŵake?
Ŵazgani Yohane 12:49.
Kasi Yesu wakuwona kuti iyo na Adada ŵake ni munthu yumoza? Imwe mukuti wuli?
5. Kasi ntchivichi chikulongora kuti Yesu wakaŵa Mesiya?
Mu Baibolo muli mauchimi ghanandi agho ghangawovwira ŵanthu kumanya Mesiya, uyo Chiuta wakamusankha kuti wawombore ŵanthu. Wonelerani VIDIYO kuti mumanye mauchimi ghanyake agho ghakafiskika pa Yesu apo wakaŵa pa charu chapasi.
Ŵerengani mauchimi gha mu Baibolo, kufuma apo dumbiskanani mafumbo agha:
Ŵazgani Mika 5:2 kuti mumanye uko Yesu wakababikira.b
Kasi uchimi uwu ukafiskika?—Mateyu 2:1.
Ŵazgani Salimo 34:20 na Zekariya 12:10 kuti mumanye ivyo Baibolo likayowoyerathu vya nyifwa ya Mesiya.
Kasi mauchimi agha ghakafiskika?—Yohane 19:33-37.
Kasi mukughanaghana kuti Yesu ndiyo wakapangiska kuti mauchimi agha ghafiskike?
Kasi ivi vikumusambizgani vichi vya Yesu?
6. Kasi tikusanga chandulo wuli para tikusambira vya Yesu?
Baibolo likutiphalira uwemi wa kusambira vya Yesu na udindo wake. Ŵazgani Yohane 14:6 na 17:3, kufuma apo dumbiskanani fumbo ili:
Chifukwa wuli ntchakuzirwa kusambira vya Yesu?
Yesu wakajura nthowa yakuti tiŵe paubwezi na Chiuta. Wakasambizga unenesko wakukhwaskana na Yehova, ndipo tizamusanga umoyo wamuyirayira kwizira mwa iyo
IVYO ŴANYAKE ŴAKUYOWOYA: “Ŵakaboni ŵa Yehova ŵakumugomezga yayi Yesu.”
Kasi mungaŵazgora wuli?
MWAKUDUMURA
Yesu ni mungelo wankhongono chomene. Iyo ni Mwana wa Chiuta kweniso Mesiya.
Kuweleramo
Chifukwa wuli Baibolo likuti Yesu ni mwana “wakwamba kubabika wa chilengiwa chose”?
Kasi Yesu wakachitanga vichi kuchanya pambere wandize pa charu chapasi?
Kasi tikumanya wuli kuti Yesu ni Mesiya?
SANGANI FUNDO ZAKUSAZGIKIRA
Sambirani vinandi vyakukhwaskana na udindo wa Yesu pakuŵa Mesiya.
Wonani usange Yehova wakababa Yesu nga umo ŵanthu ŵakuchitira kuti ŵababe mwana.
“Chifukwa Wuli Yesu Wakuchemeka Mwana wa Chiuta?” (Nkhani ya pa Intaneti)
Wonani chifukwa icho tikuyowoyera kuti chisambizgo cha Utatu ntcha mu Baibolo yayi.
Wonani umo umoyo wa mwanakazi munyake ukasinthira wati wamanya ivyo Baibolo likuyowoya vyakukhwaskana na Yesu.
“Mwanakazi Wachiyuda Wakulongosora za Chipulikano Chake”(Wukani!, Meyi 2013)
a Mu sambiro 26 na 27 tizamuwona chifukwa icho ŵanthu ŵakukhumbikwira kuwomboleka kweniso umo Yesu wakachitira kuti watiwombore.
b Wonani Mazgu Ghakuumaliro 2 kuti mumanye nyengo yeneko iyo Baibolo likayowoyerathu kuti Yesu wazamuwonekera pa charu chapasi.