-
Kasi Kuleka Kunjirapo pa vya Charu Chikung’anamurachi?Mungakondwa na Umoyo Kwamuyirayira!—Kusambira Baibolo Mwakudumbiskana
-
-
SAMBIRO 45
Kasi Kuleka Kunjilirapo pa vya Charu Chikung’anamurachi?
Yesu wakaphalira ŵalondezgi ŵake kuti ŵakwenera kuŵa ku “chigaŵa cha charu chara.” (Yohane 15:19) Kuleka kunjilirapo pa vya charu chikung’anamura kuleka kutorapo chigaŵa pa vya ndyali panji kuchitako nkhondo. Kuyowoya unenesko, ntchipusu yayi kuleka kunjilirapo pa vinthu ivyo vikuchitika mu charu. Ŵanthu ŵangatinena panji kutiseka para tikuleka kunjilirapo pa vya charu. Kasi tingachita wuli kuti tileke kunjilirapo pa vya charu na kulutilira kugomezgeka kwa Yehova Chiuta?
1. Kasi Ŵakhristu ŵaunenesko ŵakughawona wuli maboma gha ŵanthu?
Ŵakhristu ŵakughachindika maboma gha ŵanthu. Tikuchita ivyo Yesu wakayowoya, wakati: “Pelekani vinthu vya Kesare kwa Kesare,” lekani tikupulikira malango gha boma, nga kupeleka msonkho. (Mariko 12:17) Baibolo likusambizga kuti Chiuta ndiyo wali kuzomerezga maboma gha ŵanthu kuti ghalamulirenge. (Ŵaroma 13:1) Ntheura tikumanya kuti mazaza gha maboma gha ŵanthu ghali na mphaka. Ndipo tikulindilira waka Ufumu wa Chiuta kuti uzakamazge masuzgo gha ŵanthu.
2. Kasi tingalongora wuli kuti tikunjilirapo yayi pa vya charu?
Nga ni Yesu, nase tikunjilirapo yayi pa ndyali. Ŵanthu ŵakati ŵawona munthondwe uwo Yesu wakachita, ŵakakhumbanga kumukora ufumu kweni Yesu wakakana. (Yohane 6:15) Chifukwa wuli Yesu wakakana? Yesu wakayowoya kuti: “Ufumu wane ngwa charu chino chara.” (Yohane 18:36) Pakuŵa ŵasambiri ŵa Yesu, nase tikulongora kuti tikuleka kunjilirapo pa vya charu mu nthowa zinandi. Mwachiyelezgero, tikurwako yayi nkhondo. (Ŵazgani Mika 4:3.) Tikuchindika yayi vimanyikwiro vya charu, nga ndembera panji kuvisopa. (1 Yohane 5:21) Ndipo tikuŵa ku chigaŵa cha wandyali waliyose yayi. Para tikuchita nthena, tikulongora kuti tikugomezga chomene Ufumu wa Chiuta.
MANYANI VINANDI
Manyani vinthu ivyo vingamupangiskani kuti munjilirepo pa vya charu, kweniso ivyo mungachita kuti musankhe vinthu ivyo vikukondweska Yehova.
3. Ŵakhristu ŵaunenesko ŵakunjilirapo yayi pa vya charu
Yesu na ŵalondezgi ŵake ŵali kutilekera chiyelezgero chiwemi chomene. Ŵazgani Ŵaroma 13:1, 5-7 na 1 Petrosi 2:13, 14. Kufuma apo, wonelerani VIDIYO na kudumbiskana mafumbo agha.
Chifukwa wuli tikwenera kuchindika ŵamazaza ŵa boma?
Kasi tingalongora wuli kuti tikujilambika ku ŵamazaza ŵa boma?
Pa nyengo ya nkhondo, ŵanyake ŵakuti ŵakunjilirapo yayi pa vya charu, kweni ŵakukhozgera kuti ŵanthu ŵalutilire kuchita viwawa. Kasi kuleka kunjilirapo pa vya charu chikung’anamurachi? Ŵazgani Yohane 17:16. Kufuma apo, wonelerani VIDIYO na kudumbiskana fumbo ili.
Kasi kuleka kunjilirapo pa vya charu chikung’anamurachi?
Kasi mungachita wuli para ŵalara ŵa boma ŵamuphalirani kuti muchite vinthu ivyo vikususkana na dango la Chiuta? Ŵazgani Milimo 5:28, 29. Kufuma apo, wonelerani VIDIYO na kudumbiskana mafumbo agha.
Usange malango gha ŵanthu ghakususkana na dango la Chiuta, kasi tikwenera kupulikira malango gha njani?
Kasi ni mpha apo Mkhristu wakwenera yayi kupulikira ŵamazaza ŵa boma?
4. Maghanoghano kweniso vyakuchita vithu vikwenera kulongora kuti tikunjilirapo yayi pa vya charu
Ŵazgani 1 Yohane 5:21. Kufuma apo, wonelerani VIDIYO na kudumbiskana mafumbo agha.
Kuyana na ivyo mwawona mu vidiyo, chifukwa wuli Ayenge wakasankha kuleka kunjilirapo pa vya ndyali panji kusindamira ndembera?
Kasi mukuwona kuti wakachita makora?
Kasi ni vinthu wuli vinyake ivyo vingatiyezga kuti tinjilirepo pa vya charu? Wonelerani VIDIYO, kufuma apo dumbiskanani mafumbo agha.
Kasi tingachita wuli kuti tilutilire kuleka kunjilirapo pa vya charu para tikuwonelera maseŵero?
Kasi tingachita wuli kuti tilutilire kuleka kunjilirapo pa vya charu para ivyo ŵandyali ŵasankha vikutikhwaska ise patekha?
Kasi nkhani izo tikutegherezga panji awo tikuchezga nawo, vingatikhwaska wuli pa nkhani ya kunjilirapo pa vya charu?
Kasi ni vinthu wuli ivyo tikwenera kujinora kuti tilutilire kuleka kunjilirapo pa vya charu?
ŴANYAKE ŴANGAFUMBA KUTI: “Chifukwa wuli mukusindamirako yayi ndembera panji kwimbako sumu ya fuko?”
Kasi mungazgora wuli?
MWAKUDUMURA
Ŵakhristu ŵakuŵikapo mtima kuti ŵaleke kunjilirapo pa vya charu kwizira mu ivyo ŵakughanaghana, kuyowoya kweniso kuchita.
Kuweleramo
Kasi tikwenera kuchita wuli na maboma gha ŵanthu?
Chifukwa wuli tikwenera kulutilira kuleka kunjilirapo pa ndyali?
Kasi ni vinthu wuli ivyo vingatiyezga kuti tinjilirepo pa vya charu?
SANGANI FUNDO ZAKUSAZGIKIRA
Kasi ni vinthu wuli ivyo tikwenera kujinora kuti tilutilire kuleka kunjilirapo pa vya charu?
Kasi mabanja ghangachita wuli kuti ghanozgekere ivyo ghazamuchita para ghayezgeka kuti ghanjilirepo pa vya charu?
Chifukwa wuli tikwenera yayi kupeleka ntchindi zapadera kwa ŵanthu awo ŵakalwera charu chawo?
Wonani ivyo mungachita kuti mulutilire kuleka kuŵa ku chigaŵa cha charu para mukusankha ntchito.
‘Munthu Yose Wayeghenge Mphingo Yake’ (Gongwe la Mulinda, Epulero 1, 2006)
-
-
Mungazizipizga Para Ŵanthu ŴakumutambuzganiMungakondwa na Umoyo Kwamuyirayira!—Kusambira Baibolo Mwakudumbiskana
-
-
Sonosono apa, ŵanthu ŵaheni ŵawukirenge Ŵakhristu ŵaunenesko ndipo ŵaŵatambuzgenge chomene. Kasi tikwenera kufipa mtima na fundo iyi?
1. Chifukwa wuli tikukhazga kuti titambuzgikenge?
Baibolo likuyowoya mwakupulikikwa kuti: “Wose awo ŵakukhumba kusopa Chiuta mwakujipeleka mwakulondezga Khristu Yesu, nawo ŵatambuzgikenge.” (2 Timote 3:12) Yesu wakatambuzgika chifukwa chakuti wakaŵa ku chigaŵa cha charu cha Satana yayi. Nase tili ku chigaŵa cha charu yayi, lekani tikuzizwa yayi para ŵanthu, maboma na visopa ŵakutitambuzga.—Yohane 15:18, 19.
2. Kasi tinganozgekera wuli kutambuzgika?
Sono ndiyo ni nyengo yakuti tigomezgenge chomene Yehova. Ntheura tikwenera kulomba na kuŵerenga Baibolo zuŵa lililose. Tikwenera kuwungana nyengo zose. Ivi ndivyo vingatovwira kuti tizizipizge para ŵanthu ŵakutitambuzga, nanga ŵangaŵa ŵa mu banja lithu. Mpositole Paulosi uyo nayo wakatambuzgikanga kanandi waka, wakayowoya kuti: “Yehova ni movwiri wane, nopenge chara.”—Ŵahebere 13:6.
Tingaŵaso na chikanga para nyengo zose tikupharazga. Kupharazga kukutovwira kuti tigomezgenge chomene Yehova kweniso kuti tileke kopa ŵanthu. (Zintharika 29:25) Para pasono tikuŵa na chikanga kupharazga, vizamutovwira kuti tilutilire kupharazga nanga maboma ghangakanizga mulimo withu.—1 Ŵatesalonika 2:2.
3. Kasi tikutumbikika wuli para tikuzizipizga nthambuzgo?
Palije uyo wakukondwa para wakutambuzgika, kweni para tikuzizipizga nthambuzgo, chipulikano chithu chikukhora chomene. Para Yehova watovwira kuzizipizga chiyezgo, tikuŵa nayo paubwezi wakukhora chomene. (Ŵazgani Yakobe 1:2-4.) Yehova wakukwenyelera chomene para tikusuzgika, kweni wakukondwa para tazizipizga. Baibolo likuti: “Ntchiwemi kwa Chiuta usange mukuzizipizga masuzgo chifukwa chakuti mukuchita viwemi.” (1 Petrosi 2:20) Para tikuzizipizga Yehova wazamutipa umoyo wamuyirayira mu charu icho muzamuŵavya ŵakususka.—Mateyu 24:13.
MANYANI VINANDI
Wonani uwemi wakulutilira kugomezgeka kwa Yehova para ŵanthu ŵakutitambuzga, kweniso vitumbiko ivyo tizamusanga.
4. Mungazizipizga para ŵa mu banja linu ŵakumususkani
Yesu wakamanyanga kuti ni wose yayi mu banja lithu awo ŵangakondwa para tikusopa Yehova. Ŵazgani Mateyu 10:34-36, kufuma apo dumbiskanani fumbo ili:
Kasi ntchivichi chingachitika usange munyake mu banja wasankha kuteŵetera Yehova?
Kuti muwone chiyelezgero, wonelerani VIDIYO, kufuma apo dumbiskanani fumbo ili.
Kasi mungachita wuli usange mubali panji mubwezi winu wakumukanizgani kuteŵetera Yehova?
Ŵazgani Salimo 27:10 na Mariko 10:29, 30. Para mwamara kuŵazga lemba lililose, dumbiskanani fumbo ili:
Kasi lemba ili lingamovwirani wuli para ŵa mu banja panji ŵabwezi ŵinu ŵakumususkani?
5. Lutilirani kusopa Yehova nanga ŵanthu ŵangamutambuzgani
Pakukhumbikwira chikanga kuti tilutilire kuteŵetera Yehova para ŵanthu ŵakutitambuzga. Wonelerani VIDIYO, kufuma apo dumbiskanani fumbo ili.
Kasi ivyo mwawona mu vidiyo, vyamovwirani wuli kuti muŵe na chikanga?
Ŵazgani Milimo 5:27-29 na Ŵahebere 10:24, 25. Para mwaŵazga lemba lililose, dumbiskanani fumbo ili:
Chifukwa wuli ntchakuzirwa kulutilira kuteŵetera Yehova nanga maboma ghangakanizga ntchito yithu yakupharazga panji kuwungana?
6. Yehova wamovwiraninge kuti muzizipizge
Ŵakaboni ŵa Yehova ŵanyake ŵa misinkhu yakupambanapambana, kweniso ŵakufuma mu vyaru vyakupambanapambana, ŵakulutilira kuteŵetera Yehova mwakugomezgeka nangauli ŵakutambuzgika. Kuti muwone ivyo vikuŵawovwira, wonelerani VIDIYO. Kufuma apo dumbiskanani fumbo ili.
Kuyana na ivyo mwawona mu vidiyo, kasi ntchivichi chikawovwira Ŵakaboni aŵa kuti ŵazizipizge?
Ŵazgani Ŵaroma 8:35, 37-39 na Ŵafilipi 4:13. Para mwaŵazga lemba lililose, dumbiskanani fumbo ili:
Kasi lemba ili likumukhozgani wuli kuti mungazizipizga chiyezgo chilichose?
Ŵazgani Mateyu 5:10-12, kufuma apo dumbiskanani fumbo ili:
Chifukwa wuli mungaŵa ŵakukondwa nangauli mukutambuzgika?
Ŵakaboni ŵa Yehova ŵanandi chomene ŵazizipizga nthambuzgo. Namwe mungakwaniska!
IVYO ŴANYAKE ŴAKUYOWOYA: “Ine ningazizipizga yayi nthambuzgo.”
Kasi ni malemba wuli agho ghangaŵakhozga kuti ŵaŵe na chikanga?
MWAKUDUMURA
Yehova wakukondwa chomene para tikuŵikapo mtima kumuteŵetera nanga tingatambuzgika. Iyo watovwirenge kuti tizizipizge nthambuzgo!
Kuweleramo
Chifukwa wuli Ŵakhristu ŵakwenera kukhazga kuti ŵatambuzgikenge?
Kasi mungachita vichi sono, ivyo vingazakamovwirani para mukutambuzgika?
Kasi ntchivichi chingamovwirani kuti muŵe na chikanga pakuteŵetera Yehova nangauli mungasangana na viyezgo?
SANGANI FUNDO ZAKUSAZGIKIRA
Wonani vidiyo iyo yikulongosora umo Yehova wakawovwilira munyamata munyake kuti wazizipizge apo wakaŵa mu jele chifukwa cha kuleka kunjilirapo pa vya charu.
Wonani ivyo vikawovwira banja linyake kuti lilutilire kuteŵetera Yehova mwakugomezgeka kwa vyaka vinandi nangauli likasuskikanga.
Wonani ivyo mungachita kuti muŵe na chikanga para mukutambuzgika.
Kasi tingachita wuli kuti tileke kuthera para ŵa mu banja lithu ŵakutisuska?
“Unenesko Ukwiza na ‘Mtende Chara, Kweni Lupanga’” (Gongwe la Mulinda, Okutobala 2017)
-