Nkhani yakuzirwa chomene mu Baibolo njakukhwaskana na Ufumu wa Chiuta. Yehova wazamugwiliskira ntchito Ufumu wake kuti wazakafiske khumbo lake pa charu chapasi. Kasi Ufumu wa Chiuta ni vichi? Kasi tikumanya wuli kuti sono nthena ukulamulira? Kasi wafiska vichi? Kasi munthazi uzamuchita vichi? Sambiro ili kweniso sambiro 32 na 33 ghazgorenge mafumbo agha.

1. Kasi Ufumu wa Chiuta ni vichi, ndipo Fumu yake ni njani?

Ufumu wa Chiuta ni boma ilo Yehova wali kwimika. Yesu Khristu ndiyo ni Fumu ya Ufumu wa Chiuta, ndipo wakulamulira kuchanya. (Mateyu 4:17; Yohane 18:36) Baibolo likuti Yesu “wazamuwusa nga ni Themba . . . muyirayira.” (Luka 1:32, 33) Pakuŵa Fumu ya Ufumu wa Chiuta, Yesu wazamuwusa waliyose pa charu chapasi.

2. Kasi mbanjani awo ŵazamulamulira na Yesu?

Yesu wazamulamulira yekha yayi. Ŵanthu “kufuma mu fuko lililose na lulimi na ŵanthu na mtundu . . . [ŵazamuwusa] charu chapasi nga ni mathemba.” (Chivumbuzi 5:9, 10) Kasi mbanthu ŵalinga awo ŵazamulamulira na Khristu? Kufuma waka apo Yesu wakizira pa charu chapasi, ŵanthu mamiliyoni ghanandi ŵazgoka ŵalondezgi ŵake. Kweni ŵanthu 144,000 pera ndiwo ŵamulamulira na Yesu kuchanya. (Ŵazgani Chivumbuzi 14:1-4.) Ŵakhristu ŵanyake wose ŵazamuŵa ŵenekaya ŵa Ufumu wa Chiuta pano pa charu chapasi.—Salimo 37:29.

3. Chifukwa wuli Ufumu wa Chiuta nguwemi chomene kuluska maboma gha ŵanthu?

Nangauli awo ŵakulamulira ŵakuyezgayezga kuchita vinthu viwemi, kweni ŵalije nkhongono zakuchitira chilichose icho ŵakukhumba. Kanandi awo ŵakunjira mu malo mwawo ŵakuŵa ŵaryezi, ndipo ŵakuŵavya maghanoghano ghakuti ŵawovwire ŵanthu. Kweni palije uyo wazamunjira mu malo mwa Yesu, uyo ni Fumu ya Ufumu wa Chiuta. Chiuta wali kwimika “ufumu uwo kuti uzamuparanyika chara.” (Daniyeli 2:44) Yesu wazamulamulira charu chose chapasi ndipo wazamutemweranga yayi. Iyo ngwachitemwa, ngwalusungu, kweniso wakuchita vinthu mwaurunji. Ndipo wazamusambizga ŵanthu kuti nawo ŵatemwanenge, ŵaŵenge ŵalusungu, kweniso kuti ŵachitenge vinthu mwaurunji.—Ŵazgani Yesaya 11:9.

4. Boma lankhongono chomene lizamulamulira charu chose chapasi

Yesu Khristu ndiyo wali na nkhongono chomene zakuwusira ŵanthu kuluska waliyose pa charu chapasi. Ŵazgani Mateyu 28:18, kufuma apo dumbiskanani fumbo ili:

• Chifukwa wuli Yesu wali na nkhongono chomene zakuwusira ŵanthu kuluska waliyose?

Maboma gha ŵanthu ghakulamulira mu vigaŵa vichoko ndipo ghakusintha para pajumpha nyengo. Kweni wuli pakuyowoya vya Ufumu wa Chiuta? Ŵazgani Daniyeli 7:14, kufuma apo dumbiskanani mafumbo agha:

• Chifukwa wuli ntchakukondweska kuti Ufumu wa Chiuta “uzamuparanyika chara”?

• Chifukwa wuli ntchakukondweska kuti uzamulamulira charu chose chapasi?

5. Maboma gha ŵanthu ghakwenera kuwukapo

Chifukwa wuli Ufumu wa Chiuta ukwenera kunjira mu malo mwa maboma gha ŵanthu? Wonelerani VIDIYO, kufuma apo dumbiskanani mafumbo agha.

VIDIYO: Kasi Ufumu wa Chiuta Ni Vichi?—Yakudumura (1:41)

• Kasi maboma gha ŵanthu ghapangiska vichi?

Ŵazgani Mupharazgi 8:9, kufuma apo dumbiskanani mafumbo agha:

• Kasi mukuwona kuti ntchiwemi kuti Ufumu wa Chiuta ndiwo uzakalamulire mu malo mwa maboma gha ŵanthu? Chifukwa wuli?

6. Awo ŵazamulamulira mu Ufumu wa Chiuta ŵakutimanya makora

Pakuti Fumu yithu Yesu Khristu yikaŵapo munthu pa charu chapasi, yizamulekapo yayi “kutichitira chitima pa kulopwa kwithu.” (Ŵahebere 4:15) Ŵanalume na ŵanakazi ŵakugomezgeka ŵakukwana 144,000 awo ŵazamulamulira na Yesu, ŵali kusankhika na Yehova “kufuma mu fuko lililose na lulimi na ŵanthu na mtundu.”—Chivumbuzi 5:9.

• Kasi ntchakukhozga yayi kuti Yesu na awo ŵamulamulira nayo, ŵakumanya makora umoyo wa ŵanthu? Chifukwa wuli?

7. Ufumu wa Chiuta uli na malango ghawemi chomene kuluska gha maboma gha ŵanthu

Maboma gha ŵanthu ghakupanga malango ghakuti ghawovwire na kuvikilira ŵanthu ŵawo. Ufumu wa Chiuta nawo uli na malango agho ŵanthu ŵake ŵakwenera kughalondezga. Ŵazgani 1 Ŵakorinte 6:9-11, kufuma apo dumbiskanani mafumbo agha:

• Kasi mukughanaghana kuti vinthu vizamuŵa wuli pa charu chapasi para waliyose wazakamba kulondezga malango gha Chiuta?a

• Kasi mukuwona kuti ntchakwenelera kuti Yehova wakhazgenge kuti ŵanthu ŵazamulondezga malango gha Ufumu wake? Chifukwa wuli?

• Kasi ntchivichi chikulongora kuti awo ŵakulondezga yayi malango gha Chiuta ŵangasintha na kwamba kughalondezga?—Wonani vesi 11.

MWAKUDUMURA

Ufumu wa Chiuta ni boma lanadi ilo lili kuchanya ndipo lizamuwusa pa charu chose chapasi.

Kuweleramo

• Kasi mbanjani ŵazamuwusa mu Ufumu wa Chiuta?

• Chifukwa wuli Ufumu wa Chiuta nguwemi chomene kuluska maboma gha ŵanthu?

• Kasi ni vinthu wuli vinyake ivyo Yehova wakukhazga kuti ŵanthu awo ŵazamuŵa mu Ufumu wake ŵazamuchita?

SANGANI FUNDO ZAKUSAZGIKIRA

Wonani ivyo Yesu wakasambizga vyakukhwaskana na uko kuli Ufumu wa Chiuta.

“Kasi Ufumu wa Chiuta Wuli mu Mtima Winu?” (Nkhani ya pa Intaneti)

Chifukwa wuli Ŵakaboni ŵa Yehova mbakugomezgeka ku Ufumu wa Chiuta m’malo mwa kugomezgeka ku maboma gha ŵanthu?

Ŵakajipeleka ku Ufumu wa Chiuta (1:43)

Wonani ivyo Baibolo likuyowoya vyakukhwaskana na ŵanthu ŵakukwana 144,000 awo Yehova waŵasankha kuti ŵakalamulire na Yesu.

“Kasi Mbanjani Ŵakuluta Kuchanya?” (Nkhani ya pa Intaneti)

Kasi ntchivichi icho chikawovwira mwanakazi munyake uyo wakaŵa mu jele kugomezga kuti Chiuta yekha ndiyo wanganozga vinthu pa charu?

“Nkhamanya Chifukwa Icho pa Charu Pakuchitikira Vinthu Vyambura Urunji” (Wukani!, Novembala 2011)

Yesu wakaphalira ŵalondezgi ŵake kuti ŵakwenera kuŵa ku “chigaŵa cha charu chara.” (Yohane 15:19) Kuleka kunjilirapo pa vya charu chikung’anamura kuleka kutorapo chigaŵa pa vya ndyali panji kuchitako nkhondo. Kuyowoya unenesko, ntchipusu yayi kuleka kunjilirapo pa vinthu ivyo vikuchitika mu charu. Ŵanthu ŵangatinena panji kutiseka para tikuleka kunjilirapo pa vya charu. Kasi tingachita wuli kuti tileke kunjilirapo pa vya charu na kulutilira kugomezgeka kwa Yehova Chiuta?

1. Kasi Ŵakhristu ŵaunenesko ŵakughawona wuli maboma gha ŵanthu?

Ŵakhristu ŵakughachindika maboma gha ŵanthu. Tikuchita ivyo Yesu wakayowoya, wakati: “Pelekani vinthu vya Kesare kwa Kesare,” lekani tikupulikira malango gha boma, nga kupeleka msonkho. (Mariko 12:17) Baibolo likusambizga kuti Chiuta ndiyo wali kuzomerezga maboma gha ŵanthu kuti ghalamulirenge. (Ŵaroma 13:1) Ntheura tikumanya kuti mazaza gha maboma gha ŵanthu ghali na mphaka. Ndipo tikulindilira waka Ufumu wa Chiuta kuti uzakamazge masuzgo gha ŵanthu.

2. Kasi tingalongora wuli kuti tikunjilirapo yayi pa vya charu?

Nga ni Yesu, nase tikunjilirapo yayi pa ndyali. Ŵanthu ŵakati ŵawona munthondwe uwo Yesu wakachita, ŵakakhumbanga kumukora ufumu kweni Yesu wakakana. (Yohane 6:15) Chifukwa wuli Yesu wakakana? Yesu wakayowoya kuti: “Ufumu wane ngwa charu chino chara.” (Yohane 18:36) Pakuŵa ŵasambiri ŵa Yesu, nase tikulongora kuti tikuleka kunjilirapo pa vya charu mu nthowa zinandi. Mwachiyelezgero, tikurwako yayi nkhondo. (Ŵazgani Mika 4:3.) Tikuchindika yayi vimanyikwiro vya charu, nga ndembera panji kuvisopa. (1 Yohane 5:21) Ndipo tikuŵa ku chigaŵa cha wandyali waliyose yayi. Para tikuchita nthena, tikulongora kuti tikugomezga chomene Ufumu wa Chiuta.

MANYANI VINANDI

3. Ŵakhristu ŵaunenesko ŵakunjilirapo yayi pa vya charu

Yesu na ŵalondezgi ŵake ŵali kutilekera chiyelezgero chiwemi chomene. Ŵazgani Ŵaroma 13:1, 5-7 na 1 Petrosi 2:13, 14. Kufuma apo, wonelerani VIDIYO na kudumbiskana mafumbo agha.

VIDIYO: Ŵakhristu Ŵaunenesko Ŵakunjilirapo Yayi pa Vyacharu—Chigaŵa 1 (4:28)

• Chifukwa wuli tikwenera kuchindika ŵamazaza ŵa boma?

• Kasi tingalongora wuli kuti tikujilambika ku ŵamazaza ŵa boma?

Pa nyengo ya nkhondo, ŵanyake ŵakuti ŵakunjilirapo yayi pa vya charu, kweni ŵakukhozgera kuti ŵanthu ŵalutilire kuchita viwawa. Kasi kuleka kunjilirapo pa vya charu chikung’anamurachi? Ŵazgani Yohane 17:16. Kufuma apo, wonelerani VIDIYO na kudumbiskana fumbo ili.

VIDIYO: Ŵakhristu Ŵaunenesko Ŵakunjilirapo Yayi pa Vyacharu—Chigaŵa 2 (3:11)

• Kasi kuleka kunjilirapo pa vya charu chikung’anamurachi?

Kasi mungachita wuli para ŵalara ŵa boma ŵamuphalirani kuti muchite vinthu ivyo vikususkana na dango la Chiuta? Ŵazgani Milimo 5:28, 29. Kufuma apo, wonelerani VIDIYO na kudumbiskana mafumbo agha.

VIDIYO: Ŵakhristu Ŵaunenesko Ŵakunjilirapo Yayi pa Vyacharu—Chigaŵa 3 (1:18)

• Usange malango gha ŵanthu ghakususkana na dango la Chiuta, kasi tikwenera kupulikira malango gha njani?

• Kasi ni mpha apo Mkhristu wakwenera yayi kupulikira ŵamazaza ŵa boma?

4. Maghanoghano kweniso vyakuchita vithu vikwenera kulongora kuti tikunjilirapo yayi pa vya charu

Ŵazgani 1 Yohane 5:21. Kufuma apo, wonelerani VIDIYO na kudumbiskana mafumbo agha.

VIDIYO: Chifukwa Wuli Ŵakhristu Ŵaunenesko Ŵakukhumbikwira Chikanga Kuti—Ŵaleke Kunjilirapo pa Vyacharu? (2:49)

• Kuyana na ivyo mwawona mu vidiyo, chifukwa wuli Ayenge wakasankha kuleka kunjilirapo pa vya ndyali panji kusindamira ndembera?

• Kasi mukuwona kuti wakachita makora?

Kasi ni vinthu wuli vinyake ivyo vingatiyezga kuti tinjilirepo pa vya charu? Wonelerani VIDIYO, kufuma apo dumbiskanani mafumbo agha.

VIDIYO: Ivyo Nili Kusambira mu Gongwe la Mulinda, Kuleka Kunjilirapo pa Vya Charu, mu Charu Chakugaŵikana (5:16)

• Kasi tingachita wuli kuti tilutilire kuleka kunjilirapo pa vya charu para tikuwonelera maseŵero?

• Kasi tingachita wuli kuti tilutilire kuleka kunjilirapo pa vya charu para ivyo ŵandyali ŵasankha vikutikhwaska ise patekha?

• Kasi nkhani izo tikutegherezga panji awo tikuchezga nawo, vingatikhwaska wuli pa nkhani ya kunjilirapo pa vya charu?

MWAKUDUMURA

Ŵakhristu ŵakuŵikapo mtima kuti ŵaleke kunjilirapo pa vya charu kwizira mu ivyo ŵakughanaghana, kuyowoya kweniso kuchita.

Kuweleramo

• Kasi tikwenera kuchita wuli na maboma gha ŵanthu?

• Chifukwa wuli tikwenera kulutilira kuleka kunjilirapo pa ndyali?

• Kasi ni vinthu wuli ivyo vingatiyezga kuti tinjilirepo pa vya charu?

SANGANI FUNDO ZAKUSAZGIKIRA

Kasi ni vinthu wuli ivyo tikwenera kujinora kuti tilutilire kuleka kunjilirapo pa vya charu?

Yehova Wakatilekapo Yayi (3:14)

Kasi mabanja ghangachita wuli kuti ghanozgekere ivyo ghazamuchita para ghayezgeka kuti ghanjilirepo pa vya charu?

Kuleka Kunjilirapo pa Vya Charu (4:25)

Chifukwa wuli tikwenera yayi kupeleka ntchindi zapadera kwa ŵanthu awo ŵakalwera charu chawo?

“Vinthu Vyose Ni Vyamachitiko kwa Chiuta” (5:19)

Wonani ivyo mungachita kuti mulutilire kuleka kuŵa ku chigaŵa cha charu para mukusankha ntchito.

‘Munthu Yose Wayeghenge Mphingo Yake’ (Gongwe la Mulinda, Epulero 1, 2006)