Chifukwa Wuli Vinthu Viheni Vikutichitikira?

Kanandi para chinthu chiheni chachitika, ŵanthu ŵakutemwa kufumba kuti: “Chifukwa wuli?” Tikukondwa chomene para tamanya zgoro ilo Baibolo likupeleka!

1. Kasi Satana wakachita vichi kuti mu charu muchitikenge vinthu viheni?

Satana Dyabulosi wakagalukira Chiuta. Satana wakakhumbanga kuti ŵanthu ŵasopenge iyo, ntheura wakapangiska Adamu na Eva kugalukira Chiuta. Satana wakaphalira Eva utesi, uwo ukapangiska kuti ŵagaluke. (Genizesi 3:1-5) Satana wakaphalira Eva kuti Chiuta wakuŵanora chinthu chinyake chiwemi chomene. Iyo wakatiso ŵanthu ŵangaŵa ŵakukondwa chomene para ŵangaleka kupulikira Chiuta. Satana wakaphalira Eva utesi wakwamba wakuti ŵangafwa yayi. Lekani Baibolo likuti Satana “ni mutesi ndipo ni wiske wa utesi.”—Yohane 8:44.

2. Kasi Adamu na Eva ŵakasankha vichi?

Yehova wakapeleka chilichose kwa Adamu na Eva. Iyo wakaŵaphalira kuti ŵangarya vipambi vya makuni ghose kuwuskako vipambi vya mu khuni limoza pera. (Genizesi 2:15-17) Kweni iwo ŵakasankha kurya vipambi vya mu khuni ilo Chiuta wakaŵakanizga. Eva “wakatora chipambi chake na kurya.” Pamanyuma, Adamu “nayo wakarya.” (Genizesi 3:6) Wose ŵakagalukira Chiuta. Pakuti Adamu na Eva ŵakaŵa ŵakufikapo, ntheura ŵakenerangaso kuchita vinthu mwaurunji. Kweni ŵakati ŵasankha kuleka kupulikira Chiuta, ŵakananga ndipo ŵakakana kuti Chiuta waŵaphalirenge icho ntchiwemi na chiheni. Ivyo ŵakasankha vikapangiska kuti ŵasanganenge na masuzgo ghakuru chomene.—Genizesi 3:16-19.

3. Kasi ivyo Adamu na Eva ŵakasankha vikutikhwaska wuli ise?

Adamu na Eva ŵakati ŵananga, ŵakaŵa ŵambura kufikapo ndipo ŵakapako ŵana ŵawo kwananga. Pakuyowoya za Adamu Baibolo likuti: “Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose.”—Ŵaroma 5:12.

Pali vifukwa vinandi ivyo taŵanthu tikusuzgikira. Nyengo zinyake tikusuzgika chifukwa cha vinthu viheni ivyo tasankha. Nyengo zinyake tikusuzgika chifukwa cha ivyo ŵanyithu ŵasankha. Nyengo zinyake tikusuzgika chifukwa tili pa malo ghaheni na nyengo yiheni.—Ŵazgani Mupharazgi 9:11.

MANYANI VINANDI

4. Kasi ni njani wakupangiska masuzgo?

Ŵanthu ŵanandi ŵakugomezga kuti Chiuta wakuwusa charu. Kweni kasi uwu mbunenesko? Wonelerani VIDIYO.

VIDIYO: Kasi Ni Njani Wakuwusa Charu? (1:24)

Ŵazgani Yakobe 1:13 na 1 Yohane 5:19, kufuma apo dumbiskanani fumbo ili:

• Kasi Chiuta ndiyo wakupangiska vinthu viheni?

5. Ivyo vyachitika mu charu kufuma apo Satana wakambira kuwusa

VIDIYO: Chifukwa Wuli Chiuta Walekelera Uheni na Suzgo?—Yakudumura (3:07)

Ŵazgani Genizesi 3:1-6, kufuma apo dumbiskanani mafumbo agha:

• Kasi Satana wakayowoya utesi wuli?—Wonani vesi 4 na 5.

• Kasi Satana wakati Yehova wakunora ŵanthu vinthu wuli?

• Kuyana na ivyo Satana wakayowoya, kasi ŵanthu ŵakukhumbikwira Yehova waŵawusenge kuti ŵaŵe ŵakukondwa?

Ŵazgani Mupharazgi 8:9, kufuma apo dumbiskanani fumbo ili:

• Pakuti Yehova ndiyo wakulamulira charu yayi, kasi ni masuzgo wuli agho ghachitika?

1. Apo Adamu na Eva ŵakaŵa ŵakufikapo ndipo ŵali mu Paradiso. Kweni ŵakapulikira Satana na kugalukira Yehova

2. Ŵakati ŵagalukira Chiuta charu chikazura na kwananga, masuzgo na nyifwa

3. Ŵanthu ŵazamuŵaso ŵarunji na kukhala mu Paradiso

6. Kasi Yehova wakujipulika wuli para tikusuzgika?

Kasi Chiuta wakujipulika wuli para tikusuzgika? Wonani ivyo Themba Davide kweniso mpositole Petrosi ŵakalemba. Ŵazgani Salimo 31:7 na 1 Petrosi 5:7, kufuma apo dumbiskanani fumbo ili:

• Kasi imwe mukujipulika wuli kumanya kuti Yehova wakuwona kweniso wakumupwelelerani para mukusuzgika?

MWAKUDUMURA

Satana Dyabulosi kweniso Adamu na Eva ndiwo ŵali kwambiska masuzgo pa charu chapasi. Yehova wakutipwelelera chomene para tikusuzgika ndipo sonosono apa wamazgenge masuzgo agho tikusangana nagho.

Kuweleramo

• Kasi Satana Dyabulosi wakayowoya utesi wuli kwa Eva?

• Kasi ivyo Adamu na Eva ŵakachita pa kugalukira Chiuta vyambiska masuzgo wuli?

• Kasi tikumanya wuli kuti Yehova wakutipwelelera para tikusuzgika?

SANGANI FUNDO ZAKUSAZGIKIRA

Kasi kwananga ni vichi? Wonani ivyo Baibolo likuyowoya.

“Kasi Kwananga Ni Vichi?” (Nkhani ya pa Intaneti)

Wonani ivyo Satana Dyabulosi wakayowoya mu munda wa Edeni.

“Chifukwa Wuli Chiuta Wazomerezga Kuti Tisuzgikenge?” (Gongwe la Mulinda, Janyuwale 1, 2014)

Sangani mazgoro ghakupembuzga gha mafumbo ghakusuzga agho mukujifumba.

“Chifukwa Wuli Ŵayuda Ŵakakomeka na Ŵanazi ku Germany? Chifukwa Wuli Chiuta Wakalekelera Waka?” (Nkhani ya pa Intaneti)

Wonani ivyo mwanalume munyake wakasambira pa nkhani ya masuzgo agho ghakamuchitikiranga.

Niliso Nekha Yayi (5:09)

Taŵanthu tikwananga, kusuzgika, na kufwa chifukwa chakuti Adamu na Eva ŵakagalukira Chiuta.a Kweni wovwiri ulipo. Yehova watipa Mwana wake Yesu Khristu kuti watiwombore ku kwananga na nyifwa. Baibolo likusambizga kuti nyifwa ya Yesu ni sembe yakuwombora. Sembe yakuwombora ni malipiro agho tikupeleka kuti munthu munyake wafwatulike. Malipiro agho Yesu wakapeleka mbumoyo wake wa urunji. (Ŵazgani Mateyu 20:28.) Apo Yesu wakapeleka umoyo wake, wakajura nthowa kuti taŵanthu tizakasange icho Adamu na Eva ŵakataya. Sembe ya Yesu yikulongoraso umo Yesu na Yehova ŵakutitemwera. Sambiro ili limovwiraninge kumanya ivyo mungachita kuti muwongenge sembe yakuwombora.

1. Kasi nyifwa ya Yesu yikutovwira wuli mazuŵa ghano?

Pakuti ndise ŵakwananga, tikuchita vinthu vinandi ivyo vikumukwiyiska Yehova. Kweni para talapa zakwananga zithu na kulomba Yehova kuti watigowokere, na kumulayizga kuti tiwerezgengeposo yayi, iyo ngwakunozgeka kutigowokera ndipo tingaŵa nayo paubwezi wakukhora. (1 Yohane 2:1) Baibolo likuti: “Khristu wakafwira zakwananga kamoza pera. Munthu murunji wakafwira ŵambura urunji, mwakuti wamulongozgerani kwa Chiuta.”—1 Petrosi 3:18.

2. Kasi nyifwa ya Yesu yizamutovwira wuli kunthazi?

Yehova wakatuma Yesu kuti wapeleke umoyo wake wa urunji “kuti waliyose uyo wakupulikana mwa [Yesu] waleke kuparanyika kweni waŵenge na umoyo wamuyirayira.” (Yohane 3:16) Chifukwa cha ivyo Yesu wakachita, sonosono apa Yehova wafumiskengepo masuzgo ghose agho taŵanthu tikusangana nagho chifukwa cha kuleka kupulikira kwa Adamu. Ichi chikung’anamura kuti para tili na chipulikano mu sembe ya Yesu, tizamukondwa na umoyo wamuyirayira mu paradiso pa charu chapasi!—Yesaya 65:21-23.

MANYANI VINANDI

3. Nyifwa ya Yesu yikutifwatura ku kwananga na nyifwa

VIDIYO: Chifukwa Wuli Yesu Wakafwa?—Chigaŵa 1 (2:01)

• Kasi Adamu wakataya mwaŵi wuli wakati wagalukira Chiuta?

Ŵazgani Ŵaroma 5:12, kufuma apo dumbiskanani fumbo ili:

• Kasi kwananga kwa Adamu kukumukhwaskani wuli?

Ŵazgani Yohane 3:16, kufuma apo dumbiskanani fumbo ili:

• Chifukwa wuli Yehova wakatuma Mwana wake pa charu chapasi?

1. Adamu wakaŵa wambura kwananga, kweni wakaleka kupulikira Chiuta ndipo ivi vikapangiska kuti ŵanthu ŵahare kwananga na nyifwa

2. Yesu wakaŵa munthu wambura zakwananga ndipo wakapulikira Chiuta, ivi vyapangiska kuti ŵanthu ŵazakasange umoyo wamuyirayira

4. Nyifwa ya Yesu yingawovwira ŵanthu ŵanandi

VIDIYO: Chifukwa Wuli Yesu Wakafwa?—Chigaŵa 2 (2:00)

• Kasi vingachitika wuli kuti nyifwa ya munthu yumoza yiwovwire ŵanthu ŵanandi?

Ŵazgani 1 Timote 2:5, 6, kufuma apo dumbiskanani fumbo ili:

• Adamu wakaŵa munthu wambura zakwananga, kweni wakati wananga, ŵanthu wose ŵali kuhara kwananga na nyifwa. Yesu nayo wakaŵa munthu wambura zakwananga. Kasi Yesu wakapeleka wuli “chiwombolero chakuyana”?

5. Sembe yakuwombora ntchawanangwa icho Yehova wali kumupani

Ŵanthu awo ŵali paubwezi na Yehova ŵakuwona kuti sembe yakuwombora, ntchawanangwa icho Yehova wali kuŵapa. Mwachiyelezgero, ŵazgani Ŵagalatiya 2:20, kufuma apo dumbiskanani fumbo ili:

• Kasi mpositole Paulosi wakalongora wuli kuti wakawonanga sembe yakuwombora kuti ntchawanangwa icho Chiuta wali kumupa?

Adamu wakati wananga, iyo na ŵana ŵake wose ŵakapika chilango cha nyifwa. Kweni Yehova wakatuma Mwana wake kuti wazakafwire ŵanthu na kuŵawovwira kuti ŵazakasange umoyo wamuyirayira.

Apo mukuŵerenga mavesi ghakulondezgapo agha, ghanaghanirani umo Yehova wakajipulikira apo Mwana wake wakasuzgikanga. Ŵazgani Yohane 19:1-7, 16-18, kufuma apo dumbiskanani fumbo ili:

• Kasi mukujipulika wuli na ivyo Yehova na Yesu ŵali kumuchitirani?

MWAKUDUMURA

Nyifwa ya Yesu yikovwira kuti Yehova watigowokerenge zakwananga zithu kweniso yikutipa mwaŵi kuti tizakasange umoyo wamuyirayira.

Kuweleramo

• Chifukwa wuli Yesu wakafwa?

• Chifukwa wuli umoyo uwo Yesu wakapeleka ukaŵa chiwombolero chakuyana?

• Kasi nyifwa ya Yesu yingamovwirani wuli?

SANGANI FUNDO ZAKUSAZGIKIRA

Manyani chifukwa icho Baibolo likuyowoyera kuti umoyo wa Yesu ni sembe yakuwombora.

“Kasi Sembe ya Yesu ‘Ntchiwombolero cha Ŵanandi’ mu Nthowa Wuli?” (Nkhani ya pa Intaneti)

Wonani ivyo tikwenera kuchita kuti tizakaponoskeke.

“Kasi Yesu Wakuponoska Wuli Ŵanthu?” (Nkhani ya pa Intaneti)

Kasi Yehova wangamugowokerani nanga mungachita zakwananga zikuru?

“Mafumbo gha Baibolo Ghazgoleka” (Gongwe la Mulinda, Meyi 1, 2013)

Wonani umo kumanya unenesko wakukhwaskana na sembe ya Khristu kukawovwilira mwanalume munyake kuti wasinthe nkharo yake.

“Sono Nili Muzga wa Nkhaza Yayi” (Nkhani ya pa Intaneti)