13. (a) Kasi lemba la cilimika ca 2010 ndakuti wuli? (b) Kasi citemwa cikutondeka cara pa fundo wuli?

¹³ Kufuma apo, Paulosi wakutilongosolera ng’anamuro leneco la citemwa. (Ŵazgani 1 Ŵakorinte 13:4-8.) Sono, sandani mwakupwelelera umo mungacitira ivyo citemwa cikukhumba. Wonani vesi 7 kuumaliro na kuuyambiro kwa vesi 8, apo pali mazgu ghakuti: ‘Citemwa cikuzizipizga vinthu vyose. Citemwa cikutondeka cara.’ Mazgu agha ndigho ni lemba la cilimika ca 2010. Wonani kuti mu vesi 8, Paulosi wakayowoya kuti vyawanangwa vya mzimu, nga nkhucima na kuyowoya malulimi, ivyo vikacitikanga apo mpingo Wacikhristu ukambanga, vizamumara. Kuzamuŵavya. Kweni citemwa ciŵengeko nyengo zose. Yehova ndiyo mweneko wa citemwa, ndipo ngwamuyirayira. Ntheura citemwa citondekenge cara nesi kumara. Ciŵengeko muyirayira pakuti ni mukhaliro wa Ciuta withu wamuyirayira.—1 Yoh. 4:8.

Citemwa Cikutondeka Cara

20, 21. (a) Cifukwa wuli citemwa nchakuzirwa comene? (b) Cifukwa wuli mwaŵikapo mtima kulondezga nthowa ya citemwa?

²⁰ Lero, pakati pa ŵanthu ŵa Yehova tikuwona vinjeru vya kulondezga nthowa yakuluska ya citemwa. Nadi, yikuluska mu vyose. Wonani umo mpositole Paulosi wakakonkhoskera fundo iyi. Cakwamba, wakalongora kuti vyawanangwa vya mzimu vimalenge ndipo mpingo Wacikhristu ukurenge na kuŵa wakukhwima. Kufuma apo, wakamalizga na mazgu ghakuti: “Sono vyakhalako nchipulikano, cigomezgo na citemwa, vitatu ivi; kweni cikuru comene pa ivi nchitemwa.”—1 Kor. 13:13.

²¹ Paumaliro, vinthu ivyo tili na cipulikano kuti vizenge vizamufiskika, ntheura tizamukhumbikwira kuŵaso na cipulikano mwa ivyo cara. Cigomezgo ico tili naco mu vinthu vyakulayizgika ivyo tikulindilira kuti vifiskikenge cizamuŵakoso yayi para vinthu vyose vyazakazgoka viphya. Kweni citemwa ke? Ici cizamutondeka cara, nesi kumara. Cizamukhalilira. Para tazakaŵa na umoyo wamuyirayira, tizamuwona na kupulikiska vigaŵa vinandi vya citemwa ca Ciuta. Para mukucita khumbo la Ciuta pakulondezga nthowa yakuluska ya citemwa ico cikutondeka cara, muzamukhala kwamuyirayira.—1 Yoh. 2:17.