6. (a) Chifukwa wuli kovwira ŵanyithu nako nkhusopa? (b) Longosorani umo ntchito ya kovwira pa suzgo yikuchitikira pa charu chose? (Wonani bokosi la mutu wakuti “Para Soka Lachitika.”)

⁶ Paulosi wakakhumbanga kuti Ŵakhristu mu Korinte ŵamanye kuti kupeleka wovwiri mbuteŵeti, kweniso ni nthowa yakusopera Yehova. Fundo yake yikaŵa iyi: Ŵakhristu ŵakovwira ŵanyawo chifukwa ‘ŵakujilambika ku makani ghawemi gha Khristu.’ (2 Kor. 9:13) Iwo ŵakuchita nthena chifukwa ŵakulondezga ivyo Khristu wakasambizga. Paulosi wakati lusungu ulo ŵakachitiranga ŵanyawo ukaŵa ukaboni wa “lusungu lukuru lwa Chiuta.” (2 Kor. 9:14; 1 Pet. 4:10) Lekani Gongwe la Mulinda Lachingelezi la Disembala 1, 1975 likati: “Tikukayika yayi kuti Yehova Chiuta na Mwana wake Yesu Khristu ŵakuwona kuti ntchito iyi njakuzirwa chomene.” Ntheura kovwira ŵanyithu mbuteŵeti wakupatulika.—Rom. 12:1, 7; 2 Kor. 8:7; Heb. 13:16.

7, 8. Kasi chilato chakwamba icho tikovwilira ŵanyithu ntchivichi? Longosorani.

⁷ Chifukwa wuli tikovwira ŵanyithu para ŵasuzgika? Paulosi wakazgora fumbo ili mu kalata yachiŵiri iyo wakalembera Ŵakorinte. (Ŵerengani 2 Ŵakorinte 9:11-15.) Mu mavesi agha, Paulosi wakazunura vinthu vitatu ivyo vikuchitika para tikovwira ŵanyithu. Tiyeni tiviwone vinthu ivi, chilichose pachekha.

⁸ Chakwamba, para tikovwira ŵanyithu Chiuta wakupika uchindami. Mu mavesi 5 agha, Paulosi wakuzunura Yehova Chiuta kanandi waka. Mu vesi 11 na 12, mpositole uyu wakaphalira ŵabali kuti “ŵawongenge Chiuta” ndiposo “ŵanthu ŵanandi ŵawonge Chiuta.” Mu vesi 13 na 14, wakati ntchito ya kovwira ŵanji yikuchiska Ŵakhristu kuti ‘ŵachindikenge Chiuta’ na kulumba “lusungu lukuru lwa Chiuta.” Ndipo wakati walongosora vyose vya ntchito ya kovwira ŵanji, mu vesi 15 wakati: “Tikuwonga Chiuta.”—1 Pet. 4:11.