• Kasi Vikondwelero Vyose Vikukondweska Chiuta?
    Mungakondwa na Umoyo Kwamuyirayira!—Kusambira Baibolo Mwakudumbiskana

    • Ŵazgani Ŵaefeso 5:10, kufuma apo dumbiskanani mafumbo agha:

      • Kasi ntchinthu wuli icho tikwenera kughanaghanirapo chomene para tikusankha kuchitako vikondwelero panji maholide?

      • Kasi ni vikondwelero panji maholide wuli agho ghakutemwa kuchitika uko mukukhala?

      • Kasi mukuwona kuti maholide agha ghakukondweska Yehova?

      Mwachiyelezgero, kasi muli kughanaghanirapo kuti Chiuta wakujipulika wuli para ŵanthu ŵakukondwelera mazuŵa ghakubabikira? Baibolo likuyowoyapo yayi kuti ŵateŵeti ŵakugomezgeka ŵa Yehova ŵakakondweleranga mazuŵa ghakubabikira, m’malo mwake likuyowoya za vikondwelero viŵiri vya ŵanthu awo ŵakasopanga Chiuta yayi. Ŵazgani Genizesi 40:20-22 na Mateyu 14:6-10. Kufuma apo, dumbiskanani mafumbo agha:

      • Kasi ni vinthu wuli vyakuyana ivyo vikachitika pa vikondwelero ivi?

      • Kuyana na ivyo vikachitika pa vikondwelero ivi, kasi mukughanaghana kuti Yehova wakuviwona wuli vikondwelero vya mazuŵa ghakubabikira?

      Kweni panji mungajifumba kuti, ‘Kasi Yehova wangajipulika wuli usange ningachitako vikondwelero vya mazuŵa ghakubabikira panji ivyo vikukolerana yayi na malemba?’ Ŵazgani Ekisodo 32:1-8. Kufuma apo, wonelerani VIDIYO na kudumbiskana mafumbo agha.

      VIDIYO: Maholide na Vikondwelero Ivyo Vikukwiyiska Chiuta (5:07)

      • Chifukwa wuli ntchiwemi kuti nyengo zose tighanaghanirenge vinthu ivyo vikukondweska Yehova?

      • Kasi tingachita wuli nthena?

      Kasi tingamanya wuli usange vikondwelero vinyake vikukwiyiska Chiuta?

      • Kasi vikususkana na fundo za mu malemba? Kuti mumanye vinandi, fufuzani umo vikondwelero ivi vikambira.

      • Kasi vikupeleka ntchindi zambura kwenelera ku ŵanthu, mawupu, panji vimanyikwiro vya charu? Tikwenera kuchindika chomene Yehova na kugomezga kuti iyo ndiyo wazamumazga masuzgo ghose pa charu chapasi.

      • Kasi mitheto yake kweniso ivyo vikuchitika vikususkana na fundo za mu Baibolo? Tikwenera kulutilira kuŵa ŵakutowa mwauzimu.

  • Sankhani Vyakusanguluska Ivyo Vikukondweska Yehova
    Mungakondwa na Umoyo Kwamuyirayira!—Kusambira Baibolo Mwakudumbiskana
    • Sambiro 53. Banja likurya popukoni ndipo likuwonelera TV.

      SAMBIRO 53

      Sankhani Vyakusanguluska Ivyo Vikukondweska Yehova

      Yehova ni “Chiuta wakukondwa.” (1 Timote 1:11) Iyo wakukhumba kuti nase tikondwenge na umoyo. Wakukondwa chomene usange tikupatura nyengo yakusangwapo. Mu sambiro ili, tiwonenge umo tingagwiliskilira ntchito mwamahara nyengo yakupumulira kuti tikondweske Yehova.

      1. Kasi tikwenera kughanaghanira vichi para tikusankha vyakusanguluska?

      Kasi mukutemwa kuchita vichi pa nyengo yakupumura? Ŵanyake ŵakutemwa kukhala waka phee panyumba kuŵerenga mabuku, kupulikizga sumu, kuwonelera mafilimu, panji kufufuza vinthu pa Intaneti. Ŵanyake ŵakutemwa kutembeya na ŵanyawo, kushuwa (kuskamba) panji kuseŵera magemu. Kwali tikutemwa vyakusanguluska wuli, kweni tikwenera kuwoneseska kuti tikusankha vinthu ivyo ni ‘vyakuzomerezgeka kwa Fumu.’ (Ŵaefeso 5:10) Ntchakuzirwa chomene kumanya fundo iyi, chifukwa vyakusanguluska vinandi mazuŵa ghano vikukhuŵilizga vinthu ivyo Yehova wakutinkha nga nkhaza, uzaghali, panji vyamizimu. (Ŵazgani Salimo 11:5.) Kasi ntchivichi chingatovwira kuti tisankhenge vyakusanguluska mwamahara?

      Para tikuchezga na ŵanthu awo ŵakutemwa Yehova, ŵatovwirenge kuti tisankhenge vyakusanguluska viwemi. Nga umo tikasambilira kale mu sambiro 48, “uyo wakwenda na ŵavinjeru waŵenge wavinjeru.” Ndipo uyo nyengo zose wakuchezga na ŵanthu awo ŵakuleka kutemwa fundo za Chiuta, “wapwetekekenge.”—Zintharika 13:20.

      2. Chifukwa wuli ntchakuzirwa kujiŵikira mphaka pa nyengo iyo tikumalira pa vyakusanguluska?

      Tikwenera kuŵa maso kuti tileke kumalira nyengo yinandi pa vyakusanguluska, nanga vingaŵa kuti ni viwemi waka. Para tingapusa tingamalira nyengo yinandi pa vyakusanguluska, m’malo mwa kuchita vinthu vyakuzirwa chomene. Baibolo likutichiska kuti ‘tigwiliskirenge ntchito makora nyengo yithu.’—Ŵazgani Ŵaefeso 5:15, 16.

      MANYANI VINANDI

      Wonani ivyo mungachita kuti musankhenge mwamahara vyakusanguluska.

      3. Kanani vyakusanguluska viheni

      Chifukwa wuli tikwenera kuŵa maso na vyakusanguluska ivyo tikusankha? Wonelerani VIDIYO, kufuma apo dumbiskanani mafumbo agha.

      VIDIYO: Kasi Ningasankha Vyakusanguluska Wuli? (4:39)

      • Kasi maseŵero agho ghakachitikanga ku Romu ghakuyana wuli na vyakusanguluska vinyake vya mazuŵa ghano?

      • Kuyana na ivyo mwawona mu vidiyo, kasi Danny wakasambira vichi pa nkhani ya vyakusanguluska?

      Ŵazgani Ŵaroma 12:9, kufuma apo dumbiskanani fumbo ili:

      • Kasi lemba ili lingamovwirani wuli kuti musankhenge mwamahara vyakusanguluska?

      Kasi ni vinthu wuli vinyake ivyo Yehova wakutinkha? Ŵazgani Zintharika 6:16, 17 na Ŵagalatiya 5:19-21. Para mwaŵazga lemba lililose, dumbiskanani fumbo ili:

      • Kasi ni vinthu wuli ivyo vyazunulika pa lemba ili, ivyo vyazara chomene mu vyakusanguluska mazuŵa ghano?

      Kasi mungachita wuli kuti musankhenge mwamahara vyakusanguluska?

      Jifumbani kuti:

      • Kasi? Mu vyakusanguluska ivi, muliso vinthu vinyake ivyo Yehova wakutinkha?

      • Pawuli? Viliko zuŵa ilo nkhuchitira vinthu vyakuzirwa chomene?

      • Anjani? Kwamuŵa ŵanthu awo ŵakumutemwa yayi Yehova?

      Ntchiwemi chomene kuleka kusangika pa malo ghaheni. Ntheura tikwenera yayi kusangika pa vyakusanguluska ivyo tikuvikayikira

      Galimoto yikwenda mu mphepete mwa chibuwu. Ndipo kumasinda yamba kuwa.

      4. Gwiliskirani ntchito mwamahara nyengo yinu

      Wonelerani VIDIYO, kufuma apo dumbiskanani fumbo ili.

      VIDIYO: Kasi Ntchivichi Chikumuryerani Nyengo? (2:45)

      • Nangauli mubali wawoneleranga vinthu viheni yayi, kweni kasi suzgo languŵa vichi?

      Ŵazgani Ŵafilipi 1:10, kufuma apo dumbiskanani fumbo ili:

      • Kasi lemba ili lingatovwira wuli kuti tileke kumalira nyengo yinandi pa vyakusanguluska?

      5. Sankhani vyakusanguluska viwemi

      Nangauli vyakusanguluska vinyake vikukwiyiska Yehova, kweni pali vyakusanguluska vinyake ivyo tingachita ivyo Yehova wakukondwa navyo. Ŵazgani Mupharazgi 8:15 na Ŵafilipi 4:8, kufuma apo dumbiskanani fumbo ili:

      • Kasi imwe mukutemwa vyakusanguluska wuli?

      Vithuzi: Ŵanthu ŵa misinkhu yakupambanapambana ŵakukondwa na vyakusanguluska viwemi. 1. Msungwana wakutegherezga sumu na kujambura. 2. Ŵanyamata ŵakuseŵera basketball. 3. Ŵanyamata ŵaŵiri ŵakwendeska njinga. 4. Msepuka wakupanga galimoto. 5. Mwanalume wakulizga ng’oma. 6. Dada na mwana ŵakuseŵera gemu ya pa kompyuta. 7. Mwanakazi wakujambura.

      Mungakondwa na vyakusanguluska viwemi

      IVYO ŴANYAKE ŴAKUYOWOYA: “Palije suzgo kuwonelera vyakusanguluska ivyo muli vyankhaza, uzaghali, panji vyamizimu, chikuru ine nkhuchitako yayi vinthu ivi.”

      • Kasi imwe mukuti wuli?

      MWAKUDUMURA

      Yehova wakukhumba kuti tisankhenge vyakusanguluska viwemi na kukondwa navyo.

      Kuweleramo

      • Kasi ni vyakusanguluska wuli ivyo Ŵakhristu ŵakwenera yayi kuchitako?

      • Chifukwa wuli tikwenera kuŵa maso chomene na nyengo iyo tikumalira pa vyakusanguluska?

      • Chifukwa wuli mukwenera kusankha vyakusanguluska ivyo vikukondweska Yehova?

      Vyakuti Muchite

      SANGANI FUNDO ZAKUSAZGIKIRA

      Kasi ni njani uyo wakwenera kutisankhira vyakusanguluska?

      “Kasi Ŵakaboni ŵa Yehova Ŵakukanizga Mafilimu, Mabuku, na Sumu Zinyake?” (Nkhani ya pa Intaneti)

      Wonani ivyo mungachita kuti musankhenge mwamahara vyakusanguluska.

      “Kasi Vyakusanguluska Vinu Ni Vyachandulo?” (Gongwe la Mulinda, Okutobala 15, 2011)

      Mu nkhani yakuti “Nkhaleka Kutinkha Ŵazungu,” wonani icho chikawovwira mwanalume munyake kuti waleke vyakusanguluska ivyo wakavitemwanga.

      “Baibolo Likusintha Umoyo wa Ŵanthu” (Gongwe la Mulinda, Julayi 1, 2010)

      Wonani umo mwanakazi munyake wakusankhira vyakusanguluska mwamahara.

      Kanani Vyakusanguluska Ivyo Vikukhuŵilizga Vyamizimu (2:02)