10. (a) Kasi Yehova wakapeleka ulongozgi wuli ku Ŵaisrayeli mu mwezi wa Nisani mu 1513 B.C.E.? (b) Cifukwa wuli Mozesi wakapulikira ulongozgi wa Ciuta?

¹⁰ Mu mwezi wa Nisani mu 1513 B.C.E., Yehova wakaphalira Mozesi na Aroni ulongozgi wacilendo kuti ŵaphalire Ŵaisrayeli, wakuti: Torani mwanamwanalume wa mberere panji mbuzi, mumukome ndipo ndopa zake mumije pa mphanjizgo za milyango ya nyumba zinu. (Ex. 12:3-7) Kasi Mozesi wakacita wuli? Mpositole Paulosi wakalemba kuti: “Na cipulikano, wakacita paska na kumija ndopa, mwakuti wakuparanya waleke kukhwaska ŵana ŵawo ŵakwamba kubabika.” (Heb. 11:28) Mozesi wakamanyanga kuti Yehova ngwakugomezgeka, ndipo wakaŵa na cipulikano mu layizgo la Yehova lakuti wakomenge ŵana ŵakwamba ŵa Ŵaeguputo.

11. Cifukwa wuli Mozesi wakapeleka ulongozgi wa Ciuta ku ŵabali ŵake?

¹¹ Ŵana ŵa Mozesi ŵakaŵa ku Midiyani, ndipo kukaŵa kutali na “wakuparanya.”a (Ex. 18:1-6) Ndipouli, wakapulikira ndipo wakapeleka ulongozgi wa Ciuta ku mbumba za Ŵaisrayeli ŵanyake izo umoyo wa ŵana ŵawo ŵakwamba ukaŵa pa ngozi. Ŵana ŵakwamba ŵakate ŵakomekenge ndipo Mozesi wakalongora citemwa ku ŵabali ŵake. Baibolo likuti: “Penepapo Mozesi wakacema ŵalara wose ŵa Israyeli, wakati kwa iwo, . . . ‘mukome Paska.’”—Ex. 12:21.

12. Kasi Yehova watituma kuti tipharazge uthenga wuli wakuzirwa?

¹² Na wovwiri wa ŵangelo, mazuŵa ghano ŵanthu ŵa Yehova ŵakupharazga uthenga wakuzirwa wakuti: “Mopani Ciuta ndipo mupani ucindami, pakuti ora lakuti wapeleke ceruzgo lafika, ntheura sopani Uyo wakalenga kucanya na caru capasi na nyanja na visimi vya maji.” (Uvu. 14:7) Sono ni nyengo yakuti tipharazge uthenga uwu. Tikwenera kucenjezga ŵazengezgani ŵithu kuti ŵafumemo mu Babuloni Mukuru, kuti ŵaleke “kupokako vilengo vyake.” (Uvu. 18:4) Ŵakhristu ŵakuphakazgika pamoza na ŵa “mberere zinyake,” ŵakupempha ŵanthu awo ŵali kutali na Ciuta kuti: “Phemanani na Ciuta.”—Yoh. 10:16; 2 Kor. 5:20.

13. Kasi nchivici ico cingatovwira kuti tisazgireko mwamphu withu pakupharazga makani ghawemi?

¹³ Tili ŵakusimikizga kuti ‘ora la ceruzgo’ lafika nadi.Kweniso tili na cigomezgo kuti apo Yehova wakutiphalira kuti mulimo withu wa kupharazga na kuzgora ŵanthu kuŵa ŵasambiri ucitike mwaluŵiro, wakuneneska. Mu mboniwoni, mpositole Yohane wakawona “ŵangelo ŵanayi ŵakwimilira pa ngodya zinayi za caru capasi, ŵakakoleska mphepo zinayi za caru capasi.” (Uvu. 7:1) Na cipulikano, kasi mukuwona kuti ŵangelo aŵa ŵakhala pacoko kuti ŵataye mphepo za suzgo yikuru zakuparanyira caru? Usange mukuŵawona ŵangelo aŵa na maso gha cipulikano, mupharazgenge makani ghawemi mwacikanga.