10. Zunurani ŵanthu awo ŵakalutilira kugomezgeka, ndipo ntchivichi icho chikaŵawovwira?

¹⁰ Mu chaputara 11 cha buku la Ŵahebere, Paulosi wakalongosora viyezgo ivyo ŵateŵeti ŵanandi ŵa Chiuta ŵakazizipizga. Mwachiyelezgero, wakazunura za ŵanakazi ŵachipulikano awo ŵana ŵawo ŵakafwa kweni ŵakawuskika. Wakayowoyaso za ŵanyake awo “ŵakakana kufwatulika na chiwombolero chinyake, mwakuti ŵazakasange chiwuka chiwemi chomene.” (Heb. 11:35) Nangauli tikumanya yayi mazina gha ŵateŵeti ŵanyake awo Paulosi wakanenanga pa lemba ili, kweni ŵanyake nga ni Naboti na Zekariya ŵakaŵadinya na malibwe chifukwa cha kupulikira Chiuta na kuchita khumbo lake. (1 Mathe. 21:3, 15; 2 Mid. 24:20, 21) Daniyeli na ŵanyake ŵatatu ŵakaŵa na mwaŵi wakuti ŵangafwatulika para ŵathera. Kweni tingayowoya kuti chipulikano chawo mwa Chiuta chikaŵawovwira ‘kujara milomo ya nkhalamu,’ ndipo nanga ni “moto ukaŵavya nkhongono pa iwo.”—Heb. 11:33, 34; Dan. 3:16-18, 20, 28; 6:13, 16, 21-23.

12. Kasi ni njani uyo ntchiyelezgero chiwemi chomene pa nkhani ya kuzizipizga viyezgo, ndipo ntchivichi icho chikamovwira?

¹² Paulosi wakati wayowoya za ŵanalume na ŵanakazi awo ŵakaŵa na chipulikano, wakayowoyaso za Yesu Khristu uyo wakaŵa na chipulikano chakukhora kuluska wose. Lemba la Ŵahebere 12:2 likuti: “Chifukwa cha chimwemwe icho chikaŵikika panthazi pake, wakazizipizga khuni lakusuzgikirapo, wakasulako soni, ndipo wakhala pasi ku woko lamalyero la chitengo cha Chiuta.” Nadi, tikwenera ‘kughanaghanira chomene’ chiyelezgero chiwemi cha Yesu uyo wakazizipizga masuzgo ghakofya chifukwa cha chipulikano. (Ŵazgani Ŵahebere 12:3.) Nga ni Yesu, Ŵakhristu ŵakwambilira nawo ŵakathera yayi ku viyezgo kweni ŵakalutilira kugomezgeka. Yumoza wawo wakaŵa Antipasi. (Chivu. 2:13) Ŵakhristu aŵa ŵakaŵa na chilindizga cha kuwuskika na kupokera njombe yawo kuchanya. Chiwuka ichi chikuluska “chiwuka chiwemi chomene” cha ŵateŵeti ŵakugomezgeka ŵakale awo ŵakaŵako pambere Yesu wandize. (Heb. 11:35) Pakati pajumpha kanyengo kufuma apo Ufumu wa Chiuta ukambira kulamulira mu 1914, ŵateŵeti wose ŵakuphakazgika awo ŵakaŵa kuti ŵachali kugona tulo mu nyifwa, ŵakawuskika na kupokera njombe yawo yakukakhala kuchanya na kwamba kuwusa na Yesu.—Chivu. 20:4.