‘Tegherezgani Mwakupwererera’

‘Tikwenera kutegherezga [mwakupwerera] na mwampu ku ivyo vikapulikikwa, mzire panyake tikukurweko.’—ŴAHEBERE 2:1.

1. Rongosorani umo ngozi zingacitikira cifukwa ca vyakutimbanizga.

CIRIMIKA cilicose ŵantu pafupifupi 37,000 ŵakufwa cifukwa ca ngozi za magalimoto ku United States kwekha. Ŵantu awo ŵakumanya za marango gha pa mseu ŵakuyowoya kuti ngozi izi zingatceŵeka usange madilaivala ghangapwerera comene para ghakwendeska galimoto. Ŵanyake ŵakutimbanizgika cifukwa ca kulaŵiska viphambano ivyo ŵakusaskirapo malonda panji cifukwa ca kuyowoya pa selura (telefoni ya m’mawoko) . Paliso ŵanji awo ŵakutemwa kurya para ŵakwendeska galimoto. Vyakucitika vyose ivi vingacitiska ngozi.

2, 3. Ni urongozgi wuli uwo Paulos wakapereka ku Ŵakristu Ŵacihebere, ndipo ncifukwa wuli urongozgi uwo ukaŵa ŵakwenerera?

² Pafupifupi virimika 2,000 ivyo vyajumpa penepapo kukaŵavye galimoto, mpostole Paulos wakamanya za mtundu unyake wa kutimbanizgika uko kukaŵika Ŵakristu Ŵacihebere ŵanji pangozi. Paulos wakadidimizga kuti, Yesu Kristu uyo wakawuskika wakapika mulimo wakuzirwa kuruska ŵangelo wose, cifukwa wakakhala ku woko la maryero la Ciuta. Mpostole uyu wakayowoyaso kuti: ‘Nteura tikwenera kutegherezga mwakupwererera na mwampu ku ivyo vikapulikikwa, mzire panyake tikukurweko.’—Ŵahebere 2:1.

³ Ncifukwa wuli Ŵakristu Ŵacihebere ŵakakhumbikwiranga ‘kutegherezga mwakupwererera comene na mwampu ku ivyo vikapulikikwa’ vyakukhwaskana na Yesu? Cikaŵa cifukwa cakuti pakajumpa pafupifupi virimika 30 kufumira apo Yesu wakati wafumapo pa caru capasi. Mwanteura, ŵakaŵavye Murongozgi, ndipo Ŵakristu ŵanji Ŵacihebere pacoko-pacoko ŵakayamba kuleka cipulikano ca unenesko. Iwo ŵakatimbanizgika na cisopo ca Ciyuda, ico ŵakasopanga kale.

Cifukwa Ico Ŵakenera Kutegherezga Mwakupwererera Comene

4. Ncifukwa wuli Ŵakristu ŵanji Ŵacihebere ŵakayezgeka kuti ŵawelere ku cisopo ca Ciyuda?

⁴ Ncifukwa wuli Mkristu waliyose wakakhumbanga kuwelera ku cisopo ca Ciyuda? Cikaŵa cifukwa cakuti kasopero ka mu nyengo ya Dango kakaŵa na vintu vyakuwoneka na maso. Ŵantu ŵakawonanga ŵasofi na kunuska sungu liweme la sembe zakotcha. Ndipouli, Cikristu cikaŵa cakupambanako mu vigaŵa vinyake. Ŵakristu ŵakaŵa na Musofi Mukuru, Yesu Kristu, kweni wakaŵa kuti wakuwoneka cara kwa virimika 30. (Ŵahebere 4:14) Ŵakaŵa na tempele, kweni malo ghake ghatuŵa ghakaŵa kucanya. (Ŵahebere 9:24) Mwakupambana na ukotoli uwo ukacitikanga pasi pa Dango, ukotoli wa Ŵakristu ukaŵa wa “mtima mu mzimu.” (Ŵaroma 2:29) Mwanteura ku Ŵakristu Ŵacihebere, Cikristu cikawonekanga kuŵa cambura kuwoneka makora.

5. Kasi Paulos wakarongora wuli kuti kasopero ako kakakhazikiskika na Yesu kakaŵa kakuzirwa kuruska ka mu nyengo ya Dango?

⁵ Ŵakristu Ŵacihebere ŵakenera kukumbukira kuzirwa kwa kasopero ako Kristu wakayambiska. Iko kakazikika pa cipulikano, kuti pa vintu vyakuwoneka na maso cara, ndipo kakaŵa kakuzirwa comene kuruska Dango ilo likapika kwa Moses. Paulos wakati: “Usange ndopa za mbuzi na nkambako, na vyoto vya thokazi, para vyalapulikira ŵeneaŵo ŵakazuzgika, vikutuŵiska kuya kafika ku kuphotoka kwa thupi: Asi comene kwakuruska ndopa za Kristu, Mweneuyo mu mzimu wa muyirayira wakajipereka wambura kalema kwa Ciuta, ziti ziphotole njuŵi zinu ku milimo yakufwa kuti muteŵetere Ciuta wamoyo?” (Ŵahebere 9:13, 14) Enya, kugowokereka uko kulipo kwizira mu cipulikano mu sembe yaciwombolero ya Yesu Kristu nkukuru comene mu ntowa zinandi kuruska sembe izo zikaperekekanga mu nyengo ya Dango.—Ŵahebere 7:26-28.

6, 7. (a) Ni ukhaliro wuli uwo ukapangiska kuti Ŵakristu Ŵacihebere ‘Ŵategherezge mwakupwererera ku ivyo ŵakapulika’? (b) Penepapo Paulos wakaŵalembera karata Ŵahebere, kasi kukakhala nyengo yitali wuli kuti Yerusalemu waparanyike? (Wonani futunoti.)

⁶ Pakaŵaso cifukwa cinyake ico Ŵakristu Ŵacihebere ŵakeneranga kutegherezga mwakupwererera ku ivyo ŵakapulika vyakukhwaskana na Yesu. Iye wakayowoyerathu za kuparanyika kwa Yerusalemu. Yesu wakati: “Mazuŵa ghati ghizirenge pa iwe para ŵalwani ŵako ŵamkukuzengerera ciluŵigho zingirizge, na kukuzingirizga, na kukujarira mukati kosekose, ndipo ŵati ŵagomorenge iwe na ŵana ŵako mwenemumo: ndipo kuti ŵati ŵasidenge mwa iwe cara libwe pacanya pa libwe; cifukwa ukawura kumanya nyengo ya kupempurika kwako.”—Luka 19:43, 44.

⁷ Kasi ici cikacitika pauli? Yesu wakaphara cara za zuŵa na ora. M’malo mwake wakaŵaphalira kuti: “Para mukuwona Yerusalemu wakuzingirizgika na nkondo, penepapo manyani kuti kupankuka kwake kwaneng’enera. Penepapo awo wali mu Yudeya wacimbirire ku mapiri; ndipo awo wali mukati mwake wafumengemo; ndipo awo ŵali mu minda muwaro ŵareke kuya kanjiramo.” (Luka 21:20, 21) Panyuma pa virimika 30 Yesu wakati wayowoya mazgu agha, Ŵakristu ŵanji awo ŵakakhalanga mu Yerusalemu ŵakapwererera yayi mazgu agha, ndipo ŵakatimbanizgika. Kukaŵa nga kuti ŵakaleka kulaŵiska uko ŵakuya na kwamba kulaŵiska kumpepete. Cifukwa cakuti ŵakasinta yayi kaghanaghaniro kawo, ngozi yikaŵa yakusimikizga kuŵawira. Ŵakhumbe panji cara, kuparanyika kwa Yerusalemu kukaneng’enera!a Mwambura kukayika, urongozgi uwo Paulos wakapereka ukaŵa ncenjezgo ku Ŵakristu awo ŵakaŵa mu tulo twauzimu mu Yerusalemu.

‘Kutegherezga Mwakupwererera’ Mazuŵa Ghano

8. Cifukwa wuli tikukhumbikwira ‘kutegherezga mwakupwererera’ ku unenesko wa Mazgu gha Ciuta?

⁸ Nga ni Ŵakristu ŵa mu virimika vya mu handiredi lakudanga, tikwenera ‘kutegherezga mwakupwererera’ ku unenesko wa Mazgu gha Ciuta. Cifukwa wuli? Cifukwa nase tikumanenge na pharaniko ilo laneng’enera comene, kuti lizamucitikira mtundu umoza cara, kweni caru cose. (Civumbuzi 11:18; 16:14, 16) Mbunenesko kuti tikumanya yayi zuŵa leneco na ora ilo Yehova wazamuparanyira caru. (Mateyu 24:36) Ndipouli, tikuwona na maso kufiskika kwa maucimi gha Baibolo agho ghakurongora kuti tikukhala mu “mazuŵa gha ku umaliro.” (2 Timote 3:1-5) Cifukwa ca ici, tikwenera kupwererera comene kuti paŵevye cintu cilicose ico cingatitimbanizga. Tikwenera kupulikira Mazgu gha Ciuta na kurutirizga kuŵa ŵamwampu. Usange ticitenge nteura mbwenu ‘tizamupona vyose vyeneivi vyaneng’enera kucitika.’—Luka 21:36.