15, 16. Kasi ni nkharo wuli ya mwanakazi Wacikhristu iyo yingawoja mfumu wake wambura kupulikana?

¹⁵ Kasi ni nkharo wuli iyo yingawoja mwanalume? Ni nkharo iyo ŵanakazi Ŵacikhristu ŵali nayo. Petrosi wakuti: ‘Kujitozga kwinu kuleke kuŵa kwa kuwaro, kwa kuluka sisi, na kwa kuvwara vya golide, panji kuvwara minjilira; kweni kwa wunthu wakubisika wa mu mtima, kutozga kwambura kwanangika, kwa mzimu wakujiyuyura na wakuzika, uwo ku maso gha Ciuta ngwakuzirwa comene. Cifukwa ntheura ndimo kale ŵanakazi ŵatuŵa, awo ŵakagomezganga Ciuta, nawo ŵakajitozgeranga pa kulambira ŵafumu ŵaŵo: nga ndi umo Sara wakamupulikilira Abrahamu, ndipo wakamucema fumu: uyo mwazgoka ŵana ŵake, para mukucita uwemi, ndipo kuti mukofiwa na kanthu kakutenthemya cara.’—1 Petros 3:3-6.

17. Kasi Sara nchakuwonerapo wuli ku ŵanakazi Ŵacikhristu?

¹⁷ Sara wazunulika nga nchakuwonerapo, ndipo ngwakwenelera nadi kuti ŵanakazi Ŵacikhristu ŵatolereko, kwali ŵafumu ŵawo mbakupulikana panji yayi. Tikukayika yayi kuti Sara wakawonanga Abrahamu kuŵa mutu. Nanga ni mu mtima wake, wakamucemanga kuti “fumu” yake. (Genesis 18:12) Kweni kuti wakaŵa wakuyuyuka cara. Wakaŵa mwanakazi wakukhora mwauzimu para tikuwona cipulikano ico wakaŵa naco mwa Yehova. Nakuti nayo njumoza wa ‘cibingu cikuru ca ŵapanikizgi’ awo cipulikano cawo cikwenera kuticiska ise kuti “ticimbire mu uzizipizgo ciphalizgano ico caŵikika panthazi zithu.” (Ŵahebere 11:11; 12:1) Para mwanakazi Wacikhristu wangaŵa nga ni Sara ndikuti wagomoka yayi.