• “Wakamukondweska Chiuta”
    Gongwe la Mulinda (Lakugaŵira)—2017 | Na. 1

    • ENOKI “WAKACHIMA VYA IWO”

      Enoki wakwenera kuti nyengo zinyake wakachitanga phukwa chifukwa wakaŵa yekha munthu wachipulikano. Kweni kasi Yehova wakamanyanga kuti wakuchita phukwa? Enya. Nakuti zuŵa linyake, Yehova wakayowoya na muteŵeti wake wakugomezgeka uyu. Chiuta wakatuma Enoki uthenga wakuti waphalire ŵanthu. Ntheura Enoki yikaŵa ntchimi yakwamba iyo uthenga wake uli mu Baibolo. Tikumanya fundo iyi chifukwa Yuda, munung’una wa Yesu, wakalemba mazgu gha uchimi agho Enoki wakayowoya kale chomene.a

      Kasi uchimi wa Enoki ukaŵa wakuti wuli? Uchimi uwu ukuti: “Wonani, Yehova wakiza na ŵatuŵa ŵake ŵanandi kuzakeruzga wose. Ndipo wose ŵambura kopa Chiuta wakaŵasanga na mulandu pa milimo yawo yose yiheni iyo ŵakayichita kwambura kopa Chiuta, kweniso pa vinthu vyose viheni ivyo ŵakwananga ŵambura kopa Chiuta ŵakamuyowoyera.” (Yuda 14, 15) Chinthu chakwamba icho tawona mu uchimi uwu ntchakuti Enoki wakayowoyanga nga kuti vyachitika kale. Pamasinda, mauchimi ghanandi ghakalembekanga munthowa yakuyana waka. Chifukwa wuli? Ntchifukwa chakuti uchimi para wayowoyeka, ukuŵa wanadi, mwakuti vikuŵa nga vyachitika kale.—Yesaya 46:10.

      Enoki wakapharazganga mwachikanga ku ŵanthu ŵambura kopa Chiuta

      Enoki wakupharazga uthenga wa Chiuta mwachikanga ku ŵanthu ŵakofya

      Kasi vinthu vikaŵa wuli apo Enoki wakayowoyanga uchimi uwu? Uchimi uwu likaŵa chenjezgo lankhongono chomene. Enoki wakazunura kanayi mazgu ghakuti “ŵambura kopa Chiuta” kuti wasuske ŵanthu na milimo yawo yiheni iyo ŵakachitanga. Uchimi uwu ukachenjezganga ŵanthu wose kuti charu chapasi chanangikirathu kufuma waka apo ŵanthu ŵakachimbizgika mu munda wa Edeni. Ntheura Enoki wakati ŵanthu aŵa ŵakumanenge na ngozi yikuru chomene para Yehova wiza na ‘ŵatuŵa ŵake ŵanandi’ awo mbangelo ŵankhongono kuzakaparanya charu. Enoki wakapharazga uthenga uwu mwachikanga nangauli wakaŵa yekha. Panji Lameki wakazizwanga kuwona umo asekuru ŵake ŵakapharazgiranga mwachikanga. Usange wakazizwanga nadi, ipo tingapulikiska chifukwa chake.

      Nase tingasambirako kwa Enoki kuwona charu ichi nga umo Chiuta wakuchiwonera. Uthenga wacheruzgo uwo Enoki wakapharazganga uchali wakovwira nanga ni mazuŵa ghano. Nga umo Enoki wakachenjezgera, Yehova wakaparanya nadi charu na Chigumula. Kweni pharanyiko ilo likwiza kunthazi uku, ndilo ndikuru chomene kuluska Chigumula. (Mateyu 24:38, 39; 2 Petrosi 2:4-6) Yehova na ŵangelo ŵake mbakunozgeka kweruzga charu chiheni ichi. Ntheura waliyose wakwenera kukumbukira chenjezgo la Enoki na kuphalirako ŵanji. Nyengo zinyake ŵabali na ŵabwezi ŵithu ŵangatisuska ndipo tingajipulika nga tili waka tekha. Kweni Yehova wakamuleka yayi Enoki, ndipo walekengeso yayi ŵateŵeti ŵake ŵakugomezgeka.

  • “Wakamukondweska Chiuta”
    Gongwe la Mulinda (Lakugaŵira)—2017 | Na. 1

    • a Ŵakaswiri ŵanyake ŵakuti mazgu agho Yuda wakalemba ghakafuma mu buku la Enoki, kweni mu buku ili muli waka vidokoni vyakuyowoya za Enoki. Buku ili likuzunurapo nadi vya uchimi wa Enoki. Kweni uchimi wa Enoki uwu, ŵakwenera kuti ŵakawukopera waka kufuma mu mupukutu unyake wakale, para apo cha, mbwe ŵakachita kupulika ku ŵanthu ŵanyake. Vingachitika kuti Yuda nayo wakaŵerenga mu mpukutu wakale uwu, para apo cha mbwe wakapulika vya Enoki kufuma kwa Yesu uyo wakawonanga kufuma kuchanya.