Pa lemba la Chivumbuzi 20:11, 12, tikuŵazga mazgu agho mpositole Yohane wakalemba kulongosora Zuŵa la Cheruzgo. Wakati: “Nkhawona chitengo chituŵa chikuru na uyo wakakhalapo. Charu chapasi na machanya vikachimbira kuwukapo panthazi pake, ndipo malo ghawo ghakasangika yayi. Nkhawona ŵakufwa, ŵakuru na ŵachoko ŵimilira panthazi pa chitengo ichi, ndipo mipukutu yikajulika. Kweni mupukutu unyake ukajulika, uwu ni mupukutu wa umoyo. Ndipo ŵakufwa ŵakeruzgika kuyana na milimo yawo iyo yikalembeka mu mipukutu.” Kasi Mweruzgi uyo wayowoyeka apa ninjani?

Mu nyengo ya vyaka 1000, Yesu Khristu “wazamweruzga ŵamoyo na ŵakufwa.” (2 Timote 4:1) “Ŵamoyo” awo ŵazunulika apa ni “mzinda ukuru” uwo uzamupona pa nkhondo ya Aramagedoni. (Chivumbuzi 7:9-17) Mpositole Yohane wakawonaso ‘ŵakufwa . . . ŵakimilira panthazi pa chitengo’ cha kweruzgirapo. Nga umo Yesu wakalayizgira, “awo ŵali mu madindi ŵazamupulika mazgu ghake [gha Yesu] na kufumira kuwaro,” ŵazamuwuskika. (Yohane 5:28, 29; Milimo 24:15) Kasi ŵazamweruzgika mwakuyana na vichi?

Kuyana na mboniwoni iyo mpositole Yohane wakawona, “mipukutu yikajulika,” ndipo “ŵakufwa ŵakeruzgika kuyana na milimo yawo iyo yikalembeka mu mipukutu.” Kasi ivyo vikalembeka mu mipukutu iyi ni ivyo ŵanthu ŵakachitanga pambere ŵandafwe? Yayi. Ŵanthu ŵazamweruzgika kuyana na ivyo ŵakachitanga pambere ŵandafwe yayi. Tikumanya wuli fundo iyi? Baibolo likuti: “Uyo wafwa wafwatuka ku kwananga kwake.” (Ŵaroma 6:7) Ntheura, awo ŵazamuwuka ŵazamuŵavya zakwananga chifukwa zizamuŵa kuti zagowokereka. Mipukutu iyi, yikwenera kuti yikwimira fundo izo Chiuta wazamukhumba kuti ŵanthu ŵayenderenge. Awo ŵazamupona pa Aramagedoni na awo ŵazamuwuskika ku ŵakufwa, ŵakwenera kuzakalondezga fundo izo Yehova wazamuyowoya mu nyengo ya vyaka 1000. Ntheura, ŵanthu ŵazamweruzgika kuyana na ivyo ŵazamuchita mu nyengo ya Zuŵa la Cheruzgo.