Padera pa Christopher, Hannah, na Gina, paliso ŵanthu ŵanandi pa charu chose awo mbabwezi ŵa Chiuta. Imwe ke? Kasi Chiuta ni mubwezi winu? Kasi mungatemwa kuti waŵe mubwezi winu? Kasi vingachitika kuti munthu waŵe mubwezi wa Chiuta Wankhongonozose? Kasi wangachita wuli?

MUNGAŴA MUBWEZI WA CHIUTA

Baibolo likuti munthu wangaŵa paubwezi na Chiuta. Abrahamu wakachemekanga “mubwezi wa Yehova.” (Yakobe 2:23) Kweniso pa Yakobe 4:8, pakuti: “Sendelerani kwa Chiuta, ndipo iyo wasendelerenge kwa imwe.” Ivi vikulongora kuti ntchamachitiko kuŵa paubwezi na Chiuta. Kweni pakuti Chiuta tikumuwona yayi, kasi ‘tingasendelera’ wuli kwa iyo na kuŵa mubwezi wake?

Kuti tizgore fumbo ili, tiyeni tiwone ivyo ŵanthu ŵakuchita kuti ŵaŵe mabwezi. Ŵakumanyana dankha, ŵakwamba kuchezga, na kuphalirana vyakusingo ndipo ubwezi wawo ukukura. Ŵakuchitirana tuwemituwemi, ndipo ubwezi ukulutilira kukhora. Ndimo tingachitiraso na Chiuta. Tiyeni tiwone.

Kasi vingachitika kuti muleke kumanya zina la mubwezi winu? Yayi. Irina, wa ku Bulgaria, wakati: “Kuti munthu waŵe paubwezi na Chiuta wakwenera kumanya zina lake.” Nga umo tawonera mu nkhani yakwamba, Chiuta wakukhumba kuti muŵe nayo paubwezi. Ntheura wakutiphalira zina lake mu Baibolo. Wakuti: “Ine ndine Yehova; ili ndilo zina lane.”—Yesaya 42:8.

Kasi pangaŵa suzgo usange munthu wakulimanya yayi zina la Chiuta? Enya. Wonani fundo iyi: Mu Malemba Ghachihebere, zina la Chiuta likusangika mu malo pafupifupi 7,000. Palije zina linyake ilo likuzunulika kanandi kuluska ili mu Baibolo. Yehova wakukhumba kuti timanye zina lake na kulizunura.a

Ŵanthu ŵanyake ŵangawona nga ni muyuyuro kuzunura zina la Chiuta chifukwa ni mutuŵa kweniso ngwankhongonozose. Ntchiwemi nadi yayi kuzunura zina la Chiuta bwekabweka. Yehova wakukhumba kuti awo ŵakumutemwa ŵachindikenge zina lake na kuphalirako ŵanji. (Masalmo 69:30, 31; 96:2, 8) Kumbukani kuti Yesu wakati ŵasambiri ŵake ŵalombenge kuti: “Ŵadada ŵithu imwe muli kuchanya, zina linu lituŵiskike.” Nase tingatuŵiska zina la Chiuta para tikumanyiska ŵanthu zina ili. Para tichitenge nthena, tiŵenge nayo paubwezi.—Mateyu 6:9.

Baibolo likulongora kuti Yehova wakuŵategherezga chomene awo ‘ŵakughanaghanira pa zina lake.’ (Malaki 3:16) Yehova wakuŵalayizga kuti: ‘Nimuvikilirenge chifukwa wakumanya zina lane. Wanichemenge, ndipo nimuzgorenge. Niŵenge nayo mu suzgo.’ (Masalmo 91:14, 15) Para tikukhumba kuŵa paubwezi na Yehova, ntchakuzirwa chomene kumanya zina lake na kulizunura.

Ŵanthu awo ŵali paubwezi ŵakuyowoyeskana. Ŵangayimbirana foni, kulemberana kalata, panji kutumirana imelu. Ntheura kuti tiŵe paubwezi na Chiuta tikwenera kuyowoyeskana nayo. Kasi tingayowoyeskana nayo wuli?

Para tikupemphera kwa Yehova, ndikuti tikuyowoyeskana nayo. Kweni para tikuyowoya na Chiuta vikupambana na para tikuyowoya na munthu munyithu. Tikwenera kukumbuka kuti tikuyowoya na Mlengi, uyo Ngwapachanya chomene. Ntheura tikwenera kuyowoya nayo mwantchindi. Kweni pali vinthu vinyake ivyo tikwenera kuchita kuti Chiuta wapulike malurombo ghithu. Tiyeni tiwonepo vitatu.

Chakwamba, tikwenera kupemphera kwa Yehova pera. Tikwenera yayi kupemphera kwa Yesu, kwa munthu, panji ku chikozgo. (Exodus 20:4, 5) Baibolo likuti: “Mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Chiuta.” (Ŵafilipi 4:6) Chachiŵiri, tikwenera kupemphera mu zina la Yesu Khristu. Yesu wakati: “Palije uyo wakwiza ku Ŵadada kweni kwizira mwa ine.” (Yohane 14:6) Chachitatu, tikwenera kupemphera mwakukolerana na khumbo la Chiuta. Baibolo likuti: “Kanthu kalikose ako tingalomba mwakuyana na khumbo lake, wakutipulika.”a—1 Yohane 5:14.

Ubwezi ungalutilira yayi para wakuyowoya ni munthu yumoza pera. Ntheura para Chiuta wakuyowoya nase titegherezgenge. Kweni kasi Chiuta wakuyowoya nase wuli?

Mazuŵa ghano, Yehova wakuyowoya nase kwizira mu Baibolo. (2 Timote 3:16, 17) Chifukwa wuli tikuyowoya nthena? Tiyelezgere kuti mubwezi winu wamulemberani kalata. Mwati mwaŵerenga kalata iyi mukuphalirako ŵanyinu kuti: “Mwapulika ivyo waniphalira mubwezi wane?” Nangauli mwayowoya nthena, kweni mwachita kuŵerenga mu kalata. Para mukuŵazga Baibolo, ndikuti Yehova wakuyowoya namwe. Lekani Gina, uyo tamuzunura mu nkhani yakwamba, wakati: “Kuti niŵe paubwezi na Chiuta nkhwenera kuŵazga Baibolo.” Kweniso wakati: “Pakuti nkhuŵerenga Baibolo zuŵa lililose, nili mubwezi wa Chiuta.” Para mukukhumba kuti Yehova wayowoyenge namwe, muŵerengenge Baibolo zuŵa lililose. Para muchitenge nthena, muŵenge paubwezi na Chiuta.

“Chilichose icho ukukhumba, uniphalirenge waka nikuchitirenge.” Mazgu agha mungaphalira munthu wachilendo yayi, kweni mubwezi winu. Ŵanthu awo ŵali paubwezi ŵakuchitirana chilichose icho ŵangapemphana.

Baibolo likulongora kuti Yehova wakuchitira vinthu viwemi awo ŵakumusopa. Davide wakaŵa paubwezi na Chiuta ndipo wakati milimo ya Yehova njakuzizwiska, kweniso ivyo wakutighanaghanira vingapendeka yayi. (Masalmo 40:5) Nanga mbanthu awo ŵakuleka kumumanya, Yehova wakuŵachitira viwemi. Baibolo likuti: ‘Wakuzuzga mitima yawo na vyakurya ndiposo kukondwa.’—Milimo 14:17.

Pakuti Yehova wakuchitira vinthu viwemi ŵanthu, ipo awo ŵakukhumba kuŵa nayo paubwezi, ŵakwenera kuchita vinthu ivyo ‘vingakondweska mtima wake.’ (Zintharika 27:11) Kasi tingachita wuli kuti timukondweske Chiuta? Baibolo likuti: “Mungaluwanga chara kuchita uwemi na kugaŵana vinthu na ŵanji, chifukwa na sembe zantheura Chiuta wakukondweskeka nkhanira.” (Ŵahebere 13:16) Kasi ichi chikung’anamura kuti para tachitira viwemi ŵanyithu mbwenu kwamara?

Baibolo likuti: “Kwambura chipulikano ntchambura machitiko kumukondweska” Chiuta. (Ŵahebere 11:6) Pakuti ‘Abrahamu wakaŵa na chipulikano mwa Yehova, wakachemeka mubwezi wa Yehova.’ (Yakobe 2:23) Yesu Khristu wakati usange tikukhumba kuti Chiuta watitumbike, tikwenera kuŵa na “chipulikano.” (Yohane 14:1) Kasi tingachita wuli kuti tiŵe na chipulikano mwa Chiuta? Chakwamba, tikwenera kusambira Baibolo nyengo zose. Para tichitenge nthena, ‘timanyenge makora khumbo lake, na kumukondweska fikepo.’ Lutilirani kumanya vinandi vya Yehova na kuchita ivyo wakukhumba, ndipo chipulikano chinu chikhorenge kweniso muŵenge nayo paubwezi.—Ŵakolose 1:9, 10.

Kasi mungachita wuli kuti muŵe paubwezi na Chiuta? Tadumbiskana vinandi ivyo vingamovwirani. Tadumbiskana kuti:

1. Mukwenera kumanya zina la Chiuta lakuti Yehova, na kulizunura.

2. Mukwenera kuyowoyeskana na Yehova mu lurombo na kusambira Baibolo.

3. Mukwenera kuŵikapo mtima kuchita ivyo vikumukondweska.

Fundo izi zingamovwirani kumanya usange muli paubwezi na Chiuta. Kasi palipo apo mukukhumbikwira kusintha? Chitanipo kanthu.

Mwanakazi munyake wa ku America, wakati: “Para munthu wakuyezgayezga kuti waŵe paubwezi na Chiuta, ndikuti wakuchita chinthu chakuzirwa chomene. Chiuta wakumutumbika. Munthu wanthena wakumugomezga chomene Chiuta, wakumumanya makora, kweniso wakumutemwa chomene. Palije chinthu chakuzirwa kuluska kuŵa paubwezi na Chiuta.”

Usange mukukhumba kuŵa paubwezi na Chiuta, Ŵakaboni ŵa Yehova ŵangamovwirani. Ŵangamusambizgani Baibolo kwaulere. Kweniso mungaluta ku Nyumba ya Ufumu kukasopa nawo. Ku malo agha mwamukumana na ŵanthu ŵanandi awo ŵali kale paubwezi na Chiuta.a Namwe muzamuyowoya nga ngwamasalimo uyo wakati: ‘Kweni ine nkhuti nkhuwemi kukhala pafupi na Chiuta.’—Masalmo 73:28.