Kasi mukukolerana na ivyo mwana uyu wakayowoya? Pasi apa pali ivyo ŵanthu ŵakughanaghana, ndipo kasi ni fundo nji iyo imwe mukuwona kuti njaunenesko? Ŵanji ŵakuti:

• Satana kulije, kweni ni viheni ivyo vikuchitika.

• Satana waliko, kweni ngwakofya yayi ku ŵanthu.

• Satana ntchilengiwa chauzimu icho chili na nkhongono ndipo wakupuluska ŵanthu.

Fundo yiliyose iyo yazunulika pachanya apa, pali ŵanthu ŵanandi awo ŵakuyigomezga. Kasi ntchakuzirwa nadi kumanya fundo iyo njaunenesko pa fundo izi? Enya, chifukwa usange Satana kulije, ndikuti awo ŵakuti waliko ŵapusikika. Ndipo usange Satana waliko kweni ngwambura kofya, ndikuti awo ŵakumopa ŵakuphyoka pawaka. Kweni usange Satana wakupuluska ŵanthu, ndikuti ngwakofya chomene kuluska umo ŵanandi ŵakughanaghanira.

Tiyeni tiwone umo Baibolo likuzgolera mafumbo agha: Kasi Satana ni njani? Ni vinthu waka viheni panji ni munthu wanadi? Usange ni munthu, kasi ngwakofya? Ndipo usange ngwakofya kasi mungajivikilira wuli?

Para tikuŵazga Baibolo, nyengo zinyake tingawona nga Satana ni vinthu waka viheni ivyo vikuchitika. Kweni kasi ndivyo Baibolo likusambizga? Usange mbunenesko, chifukwa wuli pera Baibolo likuti Satana wakayowoyanga na Yesu kweniso Chiuta? Tiyeni tiwone viyelezgero viŵiri pa nkhani iyi.

SATANA WAKAYOWOYA NA YESU

Apo Yesu wakambanga uteŵeti wake pa charu chapasi, Satana wakamuyezga katatu. Kakwamba, Satana wakakhumbanga kuti Yesu wazgore malibwe kuŵa vingwa mwakuti wajikondweske yekha. Kachiŵiri Satana wakakhumbanga kuti Yesu waŵikire dala umoyo wake pangozi kuti watchukirepo. Kachitatu, Satana wakaphalira Yesu kuti wamupenge maufumu ghose gha pa charu usange wangamusopako pachoko waka. Yesu wakakana vyose ivi, ndipo pa chiyezgo chilichose wakazunuranga Malemba.—Mateyu 4:1-11; Luka 4:1-13.

Kasi apa tingati Yesu wakayowoyanga na njani? Kasi tingati wakayowoyanga na uheni uwo ukaŵa mu mtima wake? Baibolo likuti: Yesu ‘wakayezgeka mu vyose nga ndise, ndipo wakakhalilira wambura kwananga.’ (Ŵahebere 4:15) Likutiso: ‘Wakachitapo kwananga chara, nesi upusikizgi kusangikamo mu mulomo wake.’ (1 Petrosi 2:22) Yesu wakalutilira kuŵa murunji na wakugomezgeka. Wakazomerezgapo yayi kuti wambe kuŵa na mtima uheni. Apa Yesu wakayowoyanga na chinthu chiheni icho chikaŵa mwa iyo yayi, kweni wakayowoyanga na Satana.

Ivyo ŵakadumbiskananga vikulongora kuti Satana ni munthu wanadi.

• Kumbukani kuti Satana wakakhumbanga kupa Yesu maufumu ghose gha pa charu chapasi chikuru Yesu wamusopako. (Mateyu 4:8, 9) Ichi mphanyi chikaŵa chambura kupulikikwa Satana ŵaŵenge kuti ni munthu wanadi yayi. Kweniso Yesu wakamususkapo yayi kuti vinthu ivi vili mu mawoko yake.

• Yesu wati wakana viyezgo vyose, Satana “wakafumako kwa iyo kulindilira m’pata unyake uwemi.” (Luka 4:13) Umo tawonera mu nkhani iyi, kasi tingati Satana ni vinthu waka viheni panji ni munthu wanadi?

• Wonani kuti “ŵangelo ŵakiza na kwamba kumuteŵetera.” (Mateyu 4:11) Kasi ŵangelo aŵa, awo ni vilengiwa vyauzimu ŵakaŵa ŵanadi? Enya. Ipo ntchakupulikikwa yayi kuyowoya kuti Satana ni vinthu viheni ivyo vikuchitika, kweni ntchilengiwa chanadi chauzimu.

SATANA WAKAYOWOYA NA CHIUTA

Ukaboni wachiŵiri wakulongora kuti Satana waliko nadi tikuwusanga mu buku la Job. Mu buku ili mavesi ghanyake ghakulongora kuti Chiuta na Satana ŵakadumbiskananga. Mu mavesi agha, Chiuta wakalumbanga Yobu chifukwa wakaŵa wakugomezgeka. Satana wakati Yobu wakateŵeteranga Chiuta chifukwa wakasangangapo phindu. Apa tingati Satana wakayowoyanga kuti: “Ine nkhumumanya makora Yobu kuluska imwe a Chiuta.” Yehova wakamuzomerezga Satana kuti wamupoke Yobu usambazi, ŵana, na kwiziska matenda pa iyo.a Nyengo yikati yajumphapo, vikamanyikwa kuti Yehova wakayowoyanga unenesko, apo Satana wakatetanga. Paumaliro Chiuta wakatumbika Yobu chifukwa wakaŵa wakugomezgeka.—Job 1:6-12; 2:1-7.

Kasi mu chidumbirano ichi tingati Chiuta wakadumbiskananga na vinthu viheni ivyo vikaŵa mwa iyo? Yayi, chifukwa Baibolo likuti: ‘Nthowa ya Chiuta waunenesko njakufikapo.’ (2 Samuel 22:31) Likutiso: “Mutuŵa, mutuŵa, mutuŵa ni Yehova Chiuta, Wankhongonozose.” (Uvumbuzi 4:8) Chinthu icho ntchituwa ndikuti ntchakupatulika panji kuti chambura kufipirwa. Yehova ni murunji na wambura kafukwa. Mulije kaheni kalikose mwa iyo.

Ndipouli, ŵanji ŵangati Yobu wakaŵako nadi yayi, na kughanaghana kuti nkhani iyi ntchidokoni waka. Kasi maghanoghano agha, ngaunenesko? Yayi. Mu Baibolo muliso mavesi ghanandi agho ghakulongora kuti Yobu wakaŵako nadi. Mwachiyelezgero, pa Yakobe 5:7-11 pakuyowoya za umo Yobu wakazizipizgira. Ivyo vili kulembeka vikutovwira kuti nase tizizipizge nga ndiyo, kweniso kutikumbuska kuti Yehova wakamutumbika. Kasi chiyelezgero ichi chingaŵa na chandulo wuli usange Yobu wakaŵako nadi yayi? Kweniso pa Ezekiel 14:14, 20, Yobu wakuzunulikaso pamoza na ŵanalume ŵarunji nga Nowa na Daniyeli. Nga Nowa na Daniyeli, Yobu wakaŵako nadi, ndipo wakaŵa munthu wachipulikano. Usange Yobu wakaŵako, asi ndikuti Satana uyo wakamutambuzganga nayo wakaŵako?

Baibolo likulongora kuti Satana ni munthu wanadi kweni tingamuwona yayi. Kweni panji mungajifumba kuti, ‘Kasi mazuŵa ghano Satana ngwakofya kwa ine na ŵamumbumba yane?’

MAZUŴA GHANO KE?

Tiyelezgere kuti mu tawuni yinu mwiza vigeŵenga. Ntchakuwonekerathu kuti umoyo winu na wa ŵanji ungaŵa pangozi. Ivi ndivyo vili kuchitika. Satana na viŵanda vyake ŵali kuchimbizgika kuchanya na kwiza pano pasi. Kasi ni vichi vikuchitika? Para mukuwonelera nkhani pa TV panji para mukutegherezga wayilesi, kasi mukuwona kuti:

• Vinthu vyawakawaka na nkhaza vyazara chomene nangauli maboma pa charu chose ghakuyezgayezga kumazga vinthu ivi?

• Vyakusanguluska vinandi vyazura na vinthu vyamizimu, masalamusi panji ufwiti, nangauli ŵapapi ŵanandi ŵakuvitinkha?

• Ŵanthu ŵakunanga chomene charu nangauli mawupu ghanyake ghakuyezgayezga kuchivikilira?

• Pali munthu munyake wankhongono uyo wakunjizga ŵanthu mu masuzgo?

Baibolo likutiphalira uyo wakuchitiska masuzgo. Likuti: “Chinjoka chikuru chikaponyeka pasi, njoka ya papo kale, iyo yikuchemeka Dyabulosi na Satana, uyo wakupuluska charu chose; wakaponyeka pa charu chapasi, ndipo ŵangelo ŵake ŵakaponyeka pasi pamoza nayo. . . . Soka ku charu chapasi na nyanja, chifukwa Dyabulosi wakhilira pasi kwa imwe, wali na ukali ukuru, pakumanya kuti wali na nyengo yifupi.” (Uvumbuzi 12:9, 12) Pakuwona ukaboni wose uwu, ŵanji ŵawona kuti Satana ngwakofya ndipo ndiyo wakupuluska ŵanthu pa charu chose.

Kweni panji mungafipa mtima kuti muvikilirikenge wuli? Ntchiheni yayi kughanaghana nthena. Nkhani yakulondezgapo yitiphalirenge ivyo vingatovwira.

Nga ni mphepo ya poyizoni iyi, Satana nayo wakuwoneka yayi. Ntchakusuzga kuti ŵanthu ŵamumanye, ntheura ngwakofya chomene. Kweni Yehova watileka tekha yayi. Satana tingamuwopa yayi usange tikusangirapo mwaŵi pa vinthu ivyo Chiuta wapeleka. Vinthu ivi vili pasi apa:

Wanangwa wakusankha. Lemba la Yakobe 4:7 likuti: “Mikanani na Dyabulosi, ndipo iyo wamuchimbiraninge.” Nangauli Satana ngwankhongono, kweni wangamuchichizgani yayi kuchita vinthu ivyo imwe mundakhumbe. Vili kwa imwe kusankha. Lemba la 1 Petrosi 5:9 likuti: ‘Mikanani nayo Dyabulosi, ŵani ŵakukhora mu chipulikano.’ Kumbukani kuti Yesu wati wakana mwankhongono viyezgo vitatu vira, Satana wakafumako kwa iyo. (Mateyu 4:11) Namwe mungakana viyezgo vya Satana.

Kuŵa paubwezi na Chiuta. Lemba la Yakobe 4:8 likuti “sendelerani kwa Chiuta.” Yehova wakukhumba kuti tiŵe nayo paubwezi wakukhora. Kasi mungachita wuli kuti muŵe nayo paubwezi? Nthowa yimoza, nkhusambira vinandi vya iyo kufuma mu Baibolo. (Yohane 17:3) Ivyo musambirenge vimovwiraninge kuti mwambe kumutemwa Yehova na kuchita khumbo lake. (1 Yohane 5:3) Kasi Chiuta wachitenge wuli para mwamba kusendelera kwa iyo? Lemba la Yakobe 4:8 likumalizga kuti Chiuta “wasendelerenge kwa imwe.”

Watilayizga kuti wativikilirenge. Lemba la Zintharika 18:10 likuti: ‘Zina la Yehova ntchigongwe chakukhora, murunji wakuchimbilira kwenekuko na kuphokwa.’ Ichi chikung’anamura kuti zina la Yehova litivikilirenge mwamunthondwe yayi. Kweni chikung’anamura kuti awo ŵakuchindika zina la Chiuta, ŵangalomba nyengo yiliyose kwa iyo kuti waŵavikilire.

Ivyo ŵanji ŵakachita kumasinda. Lemba la Milimo 19:19 likutiphalira ivyo ŵanthu ŵanyake ŵa ku Efeso ŵakachita ŵati ŵazgoka Ŵakhristu. Likuti: “Ŵanandi ŵa awo ŵakachitanga masalamusi ŵakawunjika pamoza mabuku ghawo ndipo ŵakaghawotcha panthazi pa waliyose. Ndipo ŵakapendesera mitengo yake, ŵakasanga kuti ghakaŵa ghakukwana masiliva 50,000.”a Ŵanthu aŵa ŵakataya chilichose chakukhwaskana na vyamizimu nanga chiŵe chakudura wuli. Ivyo ŵanthu aŵa ŵakachita vingatovwira chomene mazuŵa ghano. Mazuŵa ghano vinthu vyamayere na vyamizimu vili palipose. Nangauli vinthu vinyake vyamizimu vingawoneka nga ni viwemi waka, kweni vingatichemera viŵanda. Ntheura tikwenera yayi kuŵa navyo panji kuviwonelera, visuzge viti wuli.—Duteronome 18:10-12.

Rogelio uyo wazunulika mu nkhani yakwamba, pakwamba wakagomezganga kuti Satana kulije. Kweni apo wakaŵa na vyaka vya m’ma 50, maghanoghano ghake ghakamba kusintha pa nkhani iyi. Ntchivichi chikamovwira? Iyo wakati: “Nkhati nasanga Baibolo, nkhawona kuti Malemba ghakuti Satana waliko. Ndipo ivyo nkhasambira ndivyo vikunivikilira kuti Satana waleke kunipuluska.”

Kasi namwe mukulindilira mwakunweka kuzakawona kuti Satana wafumapo? Enya. Malemba ghakayowoyerathu kuti kunthazi Satana wazamuponyeka “mu nyanja ya moto na sulefure.” Ndipo wazamupuluskaso ŵanthu yayi. (Uvumbuzi 20:10) Kweni moto na sulefure vingaparanya yayi vilengiwa vyauzimu. Ntheura nyanja ya moto yikwimira pharanyiko lamuyirayira. Satana wazamuŵakoso yayi muyirayira. Awo ŵakutemwa Chiuta ŵazamukondwa chomene pa nyengo iyi.

Pasono, lutilirani kusambira vya Yehova na khumbo lake.b Jitorani kuti muli mu paradiso apo waliyose wazamuyowoya kuti: “Satana kulije!”