-
Kasi Ŵakaboni ŵa Yehova Mbanjani?Gongwe la Mulinda—2015 | Seputembala 1
-
-
NKHANI YA PA CHIKOPI
Kasi Ŵakaboni ŵa Yehova Mbanjani?
Becky, wa ku California, U.S.A., wakati: “Tikamanyana na Mike kwa vyaka vinandi. Iyo njumoza wa Ŵakaboni ŵa Yehova. Kweni tchalitchi lake likunitindika chomene. Kasi Yehova ni njani? Chifukwa wuli Ŵakaboni ŵa Yehova ŵakukondwelera yayi maholide? Kasi vingaŵa kuti Mike wali kupusikika waka na kagulu aka?”
Zenon, wa ku Ontario, ku Canada, wakati: “Ŵanyithu ŵanyake awo tikakhalanga nawo pafupi ŵakati ŵamba kusambira Baibolo na Ŵakaboni ŵa Yehova, nkhajifumba kuti: ‘Kasi zina lakuti Ŵakaboni ŵa Yehova likung’anamurachi? Ntchisopa wuli chakuŵa na zina nga ni ili?’”
Kent, wa ku Washington, U.S.A, wakati: “Ine na muwoli wane tikaghanaghananga kuti Ŵakaboni ŵa Yehova ŵakiza ku nyumba yithu chifukwa chakuti ŵakamanya kuti tikusopa yayi. Tikaghanaghananga kuti gulu la Ŵakaboni ŵa Yehova lingatovwira yayi chifukwa tikawona kuti matchalitchi ghakurughakuru ghakatondeka kutovwira.”
Cecilie, wa ku Esbjerg, ku Denmark, wakati: “Kuyowoya unenesko, ŵanthu aŵa nkhaŵamanyanga yayi kweniso ivyo ŵakugomezga.”
Nyengo zinyake muli kuŵawonapo Ŵakaboni ŵa Yehova ŵakupharazga nyumba na nyumba panji ku malo ghanyake. Iwo ŵakugaŵira ŵanthu mabuku, na kuŵapempha kuti ŵasambirenge nawo Baibolo kwambura kulipira. Panji magazini iyi uyo wamupani ni Kaboni wa Yehova. Kweni nyengo zinyake mungajifumba kuti, Kasi Ŵakaboni ŵa Yehova mbanjani chomene? Ivyo mukughanaghana panji vingayanako na vya ŵanthu awo ŵazunulika pachanya apa.
Usange muli na mafumbo ghanthena agha, kasi mazgoro mungaghasanga nkhu? Kasi mungamanya wuli ivyo Ŵakaboni ŵa Yehova ŵakugomezga? Kasi ŵakuzitora nkhu ndalama zakovwira pa ntchito yakupharazga na kuzenga malo ghakusoperapo? Kweniso chifukwa wuli ŵakupharazga nyumba na nyumba panji ku malo ghanyake?
Cecilie, uyo wazunulika pachanya apa wakati: “Nkhasambira vinandi vya Ŵakaboni ŵa Yehova pa Intaneti. Pakwamba nkhapulika ŵanthu ŵakuyowoya vinandi vyakunyoza Ŵakaboni. Ntheura nane nkhamba kuŵatinkha.” Kweni pamanyuma, Cecilie wakafumba Ŵakaboni ŵa Yehova ndipo ŵakamuzgora makora mafumbo ghake.
Kasi mungatemwa kumanya unenesko wakukhwaskana na Ŵakaboni ŵa Yehova? Tikumupemphani kuti mufumbe Ŵakaboni ŵa Yehova ndipo ŵamuphaliraninge. (Zintharika 14:15) Nkhani zakulondezgapo zimovwiraninge kuti muŵamanye Ŵakaboni, ivyo ŵakugomezga, na ntchito iyo ŵakuchita.
-
-
Kasi Ŵakaboni ŵa Yehova Mbanthu Wuli?Gongwe la Mulinda—2015 | Seputembala 1
-
-
NKHANI YA PA CHIKOPI | KASI ŴAKABONI ŴA YEHOVA MBANJANI?
Kasi Ŵakaboni ŵa Yehova Mbanthu Wuli?
Ŵakaboni ŵa Yehova ni gulu lakukolerana pa charu chose. Ivyo ŵakuchita vikupambana chomene na visopa vyose. Likuru lawo lili ku United States, kweni Ŵakaboni ŵa Yehova ŵaliso mu vyaru vinyake vinandi. Nakuti ŵalipo ŵakujumpha 8 miliyoni. Ŵakusambizga ŵanthu Baibolo mu vyaru vyakujumpha 230. Ŵakulondezga ivyo Yesu wakayowoya kuti: ‘Makani ghawemi agha gha ufumu, ghazamupharazgika mu charu chose kuti uŵe ukaboni ku mitundu yose.’—Mateyu 24:14.
Nangauli ŵali mu vyaru vyakupambana, Ŵakaboni ŵa Yehova ŵakupulikira dango la boma. Kweni ŵakunjilirapo yayi pa ndyali. Ŵakupulikira mazgu gha Yesu ghakuti ŵali ku ‘chigaŵa cha charu chara.’ Lekani ŵakuchitako yayi ndyali. (Yohane 15:19; 17:16) Apo Nkhondo Yachiŵiri ya Charu Chose yikaŵa mukati, Ŵakaboni ŵa Yehova ŵakakakikanga na kutambuzgika chomene chifukwa ŵakakana kunjilirapo pa ndyali na nkhondo. Bishopu munyake wa ku Germany wakati: ‘Ŵakaboni ŵa Yehova mbakwenelera nadi kuyowoya kuti ndiwo ŵekha ŵakachitako yayi nkhondo mu nyengo ya boma la Hitler.’
Nyuzipepara yinyake yikati: ‘Ŵakaboni ŵa Yehova ŵakuyezgayezga kuŵa na nkharo yiwemi. Mbanthu ŵambura sankho ndipo ŵangatovwira chomene para ŵangaŵa na maudindo mu ndyali. Kweni ŵangazomera yayi kunjira ndyali. Ŵakupulikira malango gha boma kweni ŵakugomezga kuti Ufumu wa Chiuta wekha ndiwo uzamumazga masuzgo gha ŵanthu.’—Nová Svoboda newspaper, Czech Republic
Ndipouli, ŵakujipatura chara. Yesu wakalombera ŵalondezgi ŵake kuti: ‘Nkhumulombani imwe, kuti muŵafumyemo mu charu chara.’ (Yohane 17:15) Ntheura mungaŵawona Ŵakaboni ku ntchito, ku msika, panji ku sukulu.
-
-
Kasi Ŵakaboni ŵa Yehova Ŵakugomezga Vichi?Gongwe la Mulinda—2015 | Seputembala 1
-
-
NKHANI YA PA CHIKOPI | KASI ŴAKABONI ŴA YEHOVA MBANJANI?
Kasi Ŵakaboni ŵa Yehova Ŵakugomezga Vichi?
Ŵakaboni ŵa Yehova ŵakugomezga kuti ‘Malemba ghose ngakupelekeka na Chiuta mwa mzimu ndipo ngachandulo.’ (2 Timote 3:16) Baibolo ndilo likuŵawovwira kuti ŵamumanye makora Mlengi na kusanga umoyo uwemi.
Baibolo likuti: ‘Ŵamanye nadi kuti Imwe pera, mwaŵeneimwe zina linu ni Yehova, ndimwe Wapachanyapose mu vyaru vyose.’ (Salmo 83:18) Ntheura pakuŵa Ŵakaboni ŵake, ŵakusopa Yehova Chiuta pera na kumanyiska ŵanthu zina lake.—Yesaya 43:10-12.
Pakuti Mbakhristu, ŵakugomezga kuti Yesu, uyo ni “Mwana wa Chiuta,”a wakiza pa charu chapasi na kuŵa Mesiya. (Yohane 1:34, 41; 4:25, 26) Yesu wakati wafwa, wakawuka na kukwera kuchanya. (1 Ŵakorinte 15:3, 4) Pamanyuma Chiuta wakamupa Ufumu. (Uvumbuzi 11:15) Ufumu wa Chiuta ni boma lanadi ilo lizamuzgora charu chapasi kuŵa Paradiso. (Daniel 2:44) Baibolo likuti: ‘Ŵakuzika ndiwo ŵazamuhara charu, ŵazamukondwa na kusakata chomene.’—Salmo 37:11, 29.
Munthu munyake wakalemba mu nyuzipepara kuti: ‘Para Ŵakaboni ŵakuŵazga Baibolo, ŵakugomezga kuti Chiuta wakuyowoya nawo. Usange ŵasangana na masuzgo, ŵakusambira Mazgu gha Chiuta kuti ŵawone umo ŵangachitira na masuzgo agho. Iwo ŵakuwona kuti Mazgu gha Chiuta ngakovwira.’—Catholic clergyman Benjamin Cherayath, Münsterländische Volkszeitung newspaper, Germany
Ŵakaboni ŵa Yehova ŵakugomezga kuti fundo za mu Baibolo zingawovwira ŵanthu nanga ni sono. (Yesaya 48:17, 18) Ntheura ŵakupulikira chomene fundo izi. Mwachiyelezgero, ŵakukhweŵa yayi hona panji kumwa minkhwala yakuzweteska wongo chifukwa Baibolo likuchenjezga ŵanthu kuti ŵaleke vinthu ivyo vingananga maghanoghano na mathupi ghawo. (2 Ŵakorinte 7:1) Kweniso ŵakugega nkharo ziheni izo zikuzunulika mu Baibolo, nga mbuloŵevu, uzaghali, na unkhungu.—1 Ŵakorinte 6:9-11.
a Baibolo likutiso Yesu ni ‘Mwana wapadera yekha wa Chiuta’ chifukwa ndiyo ngwakwamba uyo Yehova wakamulenga yekha.—Yohane 3:18; Ŵakolose 1:13-15.
-
-
Kasi Ndalama Izo Ŵakugwiliskira Ntchito Zikufuma Nkhu?Gongwe la Mulinda—2015 | Seputembala 1
-
-
NKHANI YA PA CHIKOPI | KASI ŴAKABONI ŴA YEHOVA MBANJANI?
Kasi Ndalama Izo Ŵakugwiliskira Ntchito Zikufuma Nkhu?
Chaka na chaka, ŵakusindikizga na kutumizga Mabaibolo ghanandi chomene kweniso magazini na mabuku ghakulongosora Baibolo. Ŵali na maofesi pa charu chose kweniso makina ghapachanya ghakusindikizgira mabuku. Ŵaliso na Nyumba za Ufumu zinandi izo ŵakusoperamo. Kasi ndalama zakuchitira vyose ivi zikufuma nkhu?
Ndalama izo ŵakuchitira vyose ivi ni izo ŵanthu ŵakupeleka mwakukhumba kwawo. (2 Ŵakorinte 9:7) Mu 1879, magazini ya Zion’s Watch Tower, iyo sono ni Gongwe la Mulinda yikati: “YEHOVA wali nase, ntheura tizamupempheskapo yayi wovwiri kufuma ku ŵanthu, nesi kuŵaŵeyelera kuti ŵapelekepo wovwiri.” Ndipo nadi, Ŵakaboni ŵandapempheskepo.
Para munthu wakukhumba, wakutumizga yekha ndalama ku maofesi gha Ŵakaboni panji wakuŵika mu mabokosi gha vyakupeleka agho ghakuŵa mu Nyumba ya Ufumu. Kweni ŵakupeleka chakhumi yayi, kwendeska mbale, panji kutchaja mtengo para tapharazga na kupeleka mabuku. Ŵakupokerapo ndalama yiliyose yayi pa ntchito ya kupharazga, kusambizga mu mpingo, panji kuzenga malo ghakusoperapo. Nakuti Yesu wakati: “Mukapokera kwawanangwa, pelekani kwawanangwa.” (Mateyu 10:8) Ŵanthu wose awo ŵakuteŵetera mu maofesi ghawo kweniso awo ŵakulongozga ntchito ya Ŵakaboni ŵa Yehova, ŵakupokera malipiro nga umo vikuŵira na ŵanthu awo ŵalembeka ntchito yayi.
‘Ndalama zose izo Ŵakaboni ŵa Yehova ŵakugwiliskira ntchito ni izo ŵanthu ŵakupeleka umo ŵakhumbira. Waliyose wakudumura mu mtima wake ndalama izo wangakwaniska kupeleka.’—European Court of Human Rights, 2011
Ndalama zinyake izo ŵanthu ŵakupeleka zikovwira para kwachitika masoka. Ŵakhristu ŵakwambilira ŵakakondwanga chomene kovwira ŵanyawo awo suzgo laŵawira. (Ŵaroma 15:26) Lekani Ŵakaboni nawo ŵakovwira awo soka laŵawira na kuŵazengera nyumba, malo ghakusoperapo, kuŵapa chakurya, vyakuvwara, na munkhwala.
-
-
Chifukwa Wuli Ŵakaboni Ŵakupharazga?Gongwe la Mulinda—2015 | Seputembala 1
-
-
NKHANI YA PA CHIKOPI | KASI ŴAKABONI ŴA YEHOVA MBANJANI?
Chifukwa Wuli Ŵakaboni Ŵakupharazga?
Ŵanthu ŵakuŵamanya chomene Ŵakaboni ŵa Yehova chifukwa chakuti ŵakupharazga nyumba na nyumba, kweniso mu malo ghanyake. Chifukwa wuli ŵakupharazga?
Ŵakaboni ŵa Yehova ŵakupharazga kuti ŵachindike Chiuta na kumanyiska ŵanthu zina lake. (Ŵahebere 13:15) Kweniso ŵakupulikira ivyo Yesu Khristu wakayowoya kuti: “Ntheura, lutaninge mukazgore ŵanthu ŵa mitundu yose . . . kuŵasambizga kusungilira vinthu vyose ivyo namulangulirani.”—Mateyu 28:19, 20.
Kweniso ŵakupharazga chifukwa chakuti ŵakutemwa ŵanthu. (Mateyu 22:39) Ŵakaboni ŵa Yehova ŵakumanya kuti ŵanthu ŵanandi awo ŵakuŵapharazgira ŵali kale na matchalitchi ghawo ndipo ni waliyose yayi uyo wakukhumba kupulika uthenga wawo. Kweni ŵakumanya kuti uthenga wa mu Baibolo ngwakuponoska. Nga Mbakhristu ŵakwambilira, nawo ŵakulutilira “kusambizga na kupharazga makani ghawemi ghakuyowoya vya Khristu.”—Milimo 5:41, 42.
Munthu munyake zina lake Antonio Cova Maduro wakayowoya kuti Ŵakaboni ŵa Yehova ‘ŵakulimbikira kupharazga ndipo nyengo zinyake ŵakusuzgikirapo. Kweni icho ŵakukhumba ntchakuti uthenga wakupatulika ufike pa charu chose chapasi.’—El Universal newspaper, Venezuela
Ŵanthu ŵanandi ŵakuŵazga mabuku ghawo. Ndipo ŵanandi awo ŵakusambira nawo Baibolo ŵakusopa kale kunyake. Kweni ŵakukondwa para ŵakusambira Baibolo na Ŵakaboni ŵa Yehova.
Panji muli na mafumbo ghanandi ghakukhwaskana na Ŵakaboni ŵa Yehova. Mungamanya vinandi usange
Mungafumba yumoza wa Ŵakaboni ŵa Yehova.
Mungaluta pa Webusayiti ya www.jw.org/tum.
Mungaluta uko ŵakusopera. Kulije zithero ndipo waliyose ngwakupokelereka.
-