Kasi muli kujifumbapo mafumbo agha? Usange ni nthena, ndimwe pera yayi. Ŵanthu pa charu chose ŵakufumba mafumbo ghakuzirwa agha. Kasi mungatemwa kumanya mazgoro gha mafumbo agha?

Ŵanthu ŵanandi ŵasanga mazgoro gha mafumbo agha mu Baibolo. Kasi namwe mungatemwa kumanya mazgoro? Para mungakhumba, Ŵakaboni ŵa Yehova ŵangasambira namwe Baibolo kwambura kulipira.a

Pa nkhani yakusambira Baibolo ŵanthu ŵanyake ŵakuyowoya kuti: “Natangwanika.” “Baibolo ndakusuzga.” “Nkhantchito mwe.” Kweni ŵanyake ndimo ŵakuwonera yayi. Ŵakukhumba kumanya ivyo Baibolo likusambizga. Tiyeni tiwone ivyo ŵanthu ŵanyake ŵakuyowoya:

• Gill wa ku England wakati: “Nili kupempherapo ku Katolika, Purotesitanti, Sikh, Chibuda kweniso nkhasambira vyauliska ku yunivesite. Kweni nkhasangako yayi mazgoro gha mafumbo agho nkhaŵa nagho. Pamasinda Kaboni wa Yehova wakiza kunyumba kwane. Pakuti nkhakhorwa na mazgoro ghakufuma mu Baibolo, nkhazomera kusambira nayo Baibolo.”

• Koffi wa ku Benin wakati: “Nkhaŵa na mafumbo ghanandi kweni ŵaliska ŵakutchalitchi kwane ŵakatondeka kunizgora mwakukhorweska. Kweni Kaboni wa Yehova wakanizgora kufumira mu Baibolo. Nkhazomera wati wanipempha kuti wasambirenge nane Baibolo.”

• José wa ku Brazil wakati: “Nkhakhumbisiska chomene kumanya icho chikuchitika para munthu wafwa. Nkhagomezganga kuti ŵakufwa ŵangapweteka ŵamoyo. Nkhakhumbanga kumanya ivyo Baibolo likuyowoya. Ntheura nkhamba kusambira Baibolo na munyane uyo ni Kaboni.”

• Dennize wa ku Mexico wakati: “Nkhaŵerenganga chomene Baibolo kweni nkhalipulikiskanga yayi. Ntheura Ŵakaboni ŵa Yehova ŵakiza ku nyumba na kunilongosolera makora nkhani za mu Baibolo. Nkhakhumbangaso kusambira vinandi.”

• Anju wa ku Nepal wakati: “Nkhakayikanga usange Chiuta wakunipwelelera nadi. Ntheura nkhalomba kwa Chiuta kuti nipulikiske Baibolo. Zuŵa lakulondezgapo Ŵakaboni ŵakiza kunyumba na kunipempha kuti ŵasambirenge nane Baibolo, ndipo nkhazomera.”

Ivyo ŵanthu aŵa ŵakuyowoya vikutikumbuska mazgu gha Yesu ghakuti: “Mbakukondwa awo ŵakumanya kusoŵerwa kwawo kwauzimu.” (Mateyu 5:3) Taŵanthu tili kubabika na khumbo lakumanya Chiuta. Chiuta yekha ndiyo wangatovwira pa nkhani iyi kwizira mu Baibolo.

Kasi tikuchita wuli pakusambira Baibolo? Kasi pali phindu wuli? Nkhani yakulondezgapo yizgorenge mafumbo agha.

Ŵakaboni ŵa Yehova ŵakumanyikwa chifukwa cha kupharazga.Kweni kasi mukumanya kuti ŵakusambira Baibolo na waliyose uyo wakukhumba?

Mu 2014, Ŵakaboni ŵa Yehova pafupifupi 8,000,000 mu vyaru 240 ŵakasambira Baibolo na ŵanthu pafupifupi 9,500,000 mwezi uliwose.a Tikusambira Baibolo na ŵanthu ŵanandi chomene.

Kuti ntchito ya kupharazga yende makora, Ŵakaboni ŵa Yehova ŵakusindikizga Mabaibolo, mabuku, magazini, na vinyake ivyo vikovwira pakusambira Baibolo. Pa chaka vinthu ivi vikukwana pafupifupi biliyoni yimoza na hafu mu viyowoyero 700. Pakuti mabuku agha ghali mu viyowoyero vinandi, ŵanthu ŵakusambira Baibolo mu chiyowoyero icho ŵakhumba.

MAZGORO GHA MAFUMBO AGHO ŴANTHU ŴAKUTEMWA KUFUMBA PA NKHANI YA KUSAMBIRA BAIBOLO

Kasi mukusambizga wuli munthu Baibolo?

Tikudumbiskana nkhani za mu Baibolo na kuŵazga mavesi agho ghakukolerana na nkhani izo. Mwachiyelezgero, Baibolo likuzgora mafumbo nga ni agha: Kasi Chiuta ni njani? Kasi wali na zina? Wakukhala nkhu? Kasi tingaŵa mubwezi wake? Suzgo ndakuti ŵanyake ŵakumanya yayi apo ŵangasanga mazgoro gha mafumbo agha.

Kuti tovwire ŵanthu kuti ŵasange mazgoro, tikusambira nawo buku lakuti Kasi Baibolo Likusambizgaci Comenecomene?b Buku ili likovwira ŵanthu kuti ŵapulikiske Baibolo. Likulongosora makora umo Chiuta na Yesu Khristu ŵaliri. Likulongosoraso kuti ŵakufwa ŵazamuwuka, umo tingalombera, chifukwa icho tikusuzgikira, na vinyake vinandi.

Kasi mukusambizga nyengo wuli ndipo ni nkhu uko mukusambizgira?

Munthu wakusankha yekha nyengo na malo.

Kasi mukusambizga nyengo yitali wuli?

Ŵanthu ŵanandi ŵakutemwa kuti tiŵasambizgenge Baibolo kwa ora limoza panji kujumpha apa sabata yiliyose. Kweni tikusintha para munthu wakhumba. Ŵanyake ŵakutemwa kuti ŵasambirenge kwa maminiti 10 panji 15 sabata yiliyose.

Kasi munthu wakulipira ndalama zilinga kuti wasambire Baibolo?

Munthu wakulipira ndalama yayi. Mabuku ghakusambilira nagho ngakuguliska yayi. Ivi vikukolerana na ivyo Yesu wakaphalira ŵasambiri ŵake apo wakati: “Mukapokera kwawanangwa, pelekani kwawanangwa.”—Mateyu 10:8.

Kasi munthu wakusambira m’paka pawuli?

Munthu wakusambira m’paka apo wawonera kuti wapulikiska. Buku lakuti Kasi Baibolo Likusambizgaci Comenecomene? lili na vipaturo 19. Mungasambira chipaturo icho mwasankha panji lose.

Usange nazomera kusambira Baibolo, kasi ndikuti nanjira mu mpingo winu?

Yayi. Ŵakaboni ŵa Yehova ŵakuchichizga munthu yayi kuti wanjire mpingo wawo. Tikusambizga vya mu Baibolo, ndipo munthu wakusankha yekha mpingo.

Kasi ningamanya wuli vinandi?

Mungajura pa Webusayiti ya jw.org/tum. Mungaŵerenga ivyo Ŵakaboni ŵa Yehova ŵakugomezga na kuchita.

Kasi ningachita wuli kuti nisambirenge Baibolo?

• Filing’ani fomu iyo yili pa www.jw.org/tum.

• Lemberani Ŵakaboni ŵa Yehova pa yimoza mwa maadiresi agho ghali pa peji 2 gha magazini iyi.

• Mungafumba Kaboni wa Yehova wakufupi na imwe. Kweniso mu buku la manambara gha foni (directory) penjani apo palembeka “Ŵakaboni ŵa Yehova” kuti musange manambara gha foni.