Kasi mukughanaghana vichi para mwapulika mazgu ghakuti “umaliro uli pafupi”? Kasi mukughanaghana za muliska uyo wakukolomoka pakupharazga uku Baibolo lili mu mawoko? Panji kasi mukughanaghana za muchekuru wavimwembe uyo wimilira mumphepete mwa msewu uku wavwara mukhanjo na kupharazga kuti charu chimalenge? Ŵanyake ŵangafipa mtima, apo ŵanyake ŵangakayika panji kuseka para ŵapulika mazgu agha.

Baibolo likuti: “Umaliro wizenge.” (Mateyu 24:14) Umaliro uwu ukuchemekaso kuti “zuŵa likuru la Chiuta” kweniso “Haramagedoni.” (Uvumbuzi 16:14, 16) Ŵaliska ŵakutimbanizga ŵanthu, ntheura ŵanthu ŵanandi ŵakumanya yayi unenesko. Baibolo, ilo ni Mazgu gha Chiuta likulongosora makora pa nkhani iyi. Likutovwira kumanya usange umaliro uli pafupi. Kweniso likutiphalira umo tingachitira kuti tizakapone. Chakwamba, tiyeni tisuske dankha ivyo ŵanthu ŵakuyowoya, kufuma apo tiwone unenesko weneko pa nkhani iyi. Kasi Baibolo likuti “umaliro” ni vichi?

1. UMALIRO CHIKUNG’ANAMURA KUTI CHARU CHIZAMUPHYA NA MOTO YAYI.

   Baibolo likuti: ‘Chiuta wali kuŵika malufura gha charu mwakuti chileke kusunkhunyika.’ (Salmo 104:5) Lemba ili na ghanyake ghakutisimikizgira kuti Chiuta wazamuparanyapo yayi charu, panji kuzomerezga ŵanthu kuti ŵachinangirethu.—Mupharazgi 1:4; Yesaya 45:18.

2. UMALIRO NI VINTHU IVYO VIZAMUCHITIKA WAKA MWANGOZI YAYI.

   Baibolo likususka fundo yakuti umaliro uzamuchitika mwangozi waka. Chiuta wakumanyirathu nyengo iyo umaliro wizirenge. Baibolo likuti: ‘Vya zuŵa ilo panji ora palije munthu wakumanya, nanga mbangelo kuchanya nesi Mwana, kweni Ŵadada pera. Lutilirani kulaŵiska, muŵenge maso, pakuti mukumanya chara apo nyengo yakutemeka yikwizira.’ (Mariko 13:32, 33) Nadi, Chiuta ndiyo wakumanya “nyengo yakutemeka” apo umaliro wizirenge.

3. UMALIRO UZAMUCHITIKA CHIFUKWA CHA ŴANTHU PANJI VIMALIBWE VYAKUFUMA KUCHANYA YAYI.

   Kasi ntchivichi icho chizamuchitika pa zuŵa laumaliro? Lemba la Uvumbuzi 19:11 likuti: ‘Nkhawona kuchanya kwajulika, ndipo wonani! hachi lituŵa. Ndipo uyo wakakhalapo wakuchemeka Wakugomezgeka na Waunenesko.’ Ndipo vesi 19 likulutizga kuti: ‘Ndipo nkhawona chikoko na mathemba gha charu chapasi na ŵankhondo ŵawo ŵakawungana pamoza kuti ŵarwe nkhondo na uyo wakakhala pa hachi na ŵankhondo ŵake.’ (Uvumbuzi 19:11-21) Panji ivyo vikuyowoyeka apa mungavipulikiska makora yayi, kweni fundo njakuti Chiuta wazamutuma ŵangelo kuparanya ŵaheni wose.

UNENESKO NGWAKUTI:

1. MABOMA GHOSE GHA ŴANTHU GHAZAMUPARANYIKA.

   Baibolo likuti: ‘Chiuta wa kuchanya wati wimike uthemba [boma], uwo kuti wamkuparanyika chara muyirayira, panji mazaza ghake ghasidike ku fuko linyake chara. Wamkuteketa mauthemba ghose agha na kughamara kweni uwu uzamuŵako muyirayira.’ (Daniel 2:44) Lemba la Uvumbuzi 19:19 likuti ‘mathemba gha charu chapasi na ŵankhondo ŵawo’ ŵazamuwungana pamoza kuti ŵarwe nkhondo na uyo wakakhala pa hachi na ŵankhondo ŵake, ndipo ŵazamuparanyika.

2. NKHONDO, VIWAWA, NA NKHAZA VIZAMUMARA.

   Baibolo likuti Chiuta ‘wazamurekeska nkhondo pa charu chose.’ (Salmo 46:9) Ndipo lemba la Zintharika 2:21, 22 likuti: ‘Ŵakunyoloka ŵazamukhala mu charu, na ŵawemi ŵakufikapo ŵazamukhalamo; kweni ŵaheni ŵazamudumulika mu charu, ndipo ŵaryarya ŵazamuzgulikamo.’ Lemba la Uvumbuzi 21:4, 5 likuti: ‘Wonani! Nkhupanga vinthu vyose kuŵa viphya.’

3. MATCHALICHI GHAUTESI GHAZAMUPARANYIKA.

   Lemba la Yeremiya 5:31 likuti: ‘Zintchimi zikuchima utesi, na ŵapristi ŵakovwirana nawo; ŵanthu ŵane ŵakutemwa kuti kuŵe ntheura, kweni kasi muchitengechi para umaliro wiza?’ Ndipo lemba la Mateyu 7:21-23 likuti: ‘Ni waliyose chara uyo wakuyowoya kwa ine kuti, ‘Fumu, Fumu,’ wazamunjira mu ufumu wa kuchanya, kweni uyo wakuchita khumbo la Ŵadada awo ŵali kuchanya ndiyo. Ŵanandi ŵazamuyowoya kwa ine mu zuŵa lira, ‘Fumu, Fumu, asi tikachimanga mu zina linu, na kufumiska viŵanda mu zina linu, ndiposo kuchita milimo yankhongono yinandi mu zina linu?’ Penepapo nizamuŵaphalira pakweru kuti: Nkhamumanyani chara! Fumaniko kwa ine, imwe ŵakuchita uchikanamalango.’

4. AWO ŴAKUDEMWERA NA VYA CHARU ŴAZAMUPARANYIKA.

   Yesu wakati: ‘Icho ŵanthu ŵeruzgikirenge ntchakuti, ungweru wiza mu charu kweni ŵanthu ŵatemwa chisi m’malo mwa ungweru, pakuti milimo yawo yikaŵa yiheni.’ (Yohane 3:19) Baibolo likulongosora ivyo vikachitika mu nyengo ya Nowa apo charu chikaparanyika. Likuti: ‘Charu icho chikaŵako nyengo yira chikaparanyika apo chikazura na maji. Kweni na mazgu gheneagha pera, machanya na charu chapasi ivyo viliko sono, vyaŵikikira moto, ndipo vikusungikira zuŵa la cheruzgo na la pharanyiko la ŵanthu ŵambura kopa Chiuta.’—2 Petrosi 3:5-7.

Wonani kuti ‘zuŵa la cheruzgo na la pharanyiko’ ilo likwiza ŵaliyaniska na ‘charu icho chikaŵako’ mu nyengo ya Nowa. Kasi ntcharu wuli icho chikaparanyika? “Ŵanthu ŵambura kopa Chiuta” panji kuti ŵaheni ndiwo ŵakaparanyika. Charu chapasi chikaparanyika yayi. Mwakuyana waka, pa zuŵa la cheruzgo la Chiuta ilo likwiza, ŵanthu ŵaheni ndiwo ŵazamuparanyika. Kweni ŵawemi ndiwo ŵazamupona nga umo vikaŵira na Nowa na banja lake.—Mateyu 24:37-42.

Charu chizamutowa chomene para Chiuta wazakaparanya ŵaheni wose. Ntheura ivyo Baibolo likuyowoya pa nkhani ya umaliro wa charu ni vyakukondweska. Kweni panji mungajifumba kuti: ‘Kasi Baibolo likuyowoya apo umaliro wizirenge? Kasi ungaŵa kuti uli pafupi chomene? Kasi ningachita wuli kuti nizakapone?’

Kasi Chiuta wazomerezgenge kuti ŵanthu ŵalutilire kulamulira na kusuzga ŵanyawo? Yayi. Nga umo tawonera mu nkhani iyo yajumpha, Chiuta wazamunjilirapo na kumazga masuzgo ghose agho tikukumana nagho. Iyo wakukhumba kuti timanye nyengo iyo wazamumazgira masuzgo agha. Kasi wakutimanyiska wuli?

Tiyelezgere kuti muli paulendo ndipo uko mukuluta mukumanyako yayi. Mungafumba ŵanthu awo ŵakumanyako makora kuti ŵamuphalirani umo mungendera. Ŵangamuphalirani vikhwangwani ivyo mwamuwona mu nthowa na vinthu vinyake ivyo vingamovwirani kuti mukafike. Para mukuwona vikhwangwani na vinthu vinyake ivyo ŵangumuphalirani mukuŵa na chigomezgo chose kuti muli pafupi kufika. Mwakuyana waka, Chiuta wali kutipa Baibolo ilo likulongosora ivyo vikuchitika mu charu. Para tikuwona ivyo Baibolo likayowoya vikuchitika, tikumanya kuti umaliro uli pafupi.

Baibolo likulongosora kuti yikwiza nyengo apo vinthu vizamufika paheni chomene ndipo vizamupangiska kuti umaliro wize. Pa nyengo iyo, pa charu pazamuchitika vinthu vyakupambana na ivyo vili kuchitikapo kufuma apo ŵanthu ŵakaŵirako. Tiyeni tiwone vinthu vinyake ivyo vili kulembeka mu Baibolo.

1. VINTHU VIHENI IVYO VIKUCHITIKA MU CHARU: Uchimi uwo uli mu buku la Mateyu chaputara 24, ukulongosora vimanyikwiro vya nyengo yaumaliro. Yesu wakati vimanyikwiro ivi vizamulongora kuti tili ku “umaliro wa mgonezi” ndipo pamasinda “umaliro wizenge.” (Mateyu 24:3, 14) Vinyake mwa vimanyikwiro ivi ni nkhondo, njara, vindindindi mu malo na malo, uchikanamalango, kuleka kutemwana, kweniso ŵaliska ŵakupuluska ŵanthu. (Mateyu 24:6-26) Nangauli kale napo vinthu ivi vikachitikanga, kweni sono apo umaliro uli pafupi vikuchitika chomene. Paliso vimanyikwiro vitatu ivyo tiwonenge.

2. NKHARO YA ŴANTHU: Baibolo likuyowoya kuti mu “mazuŵa ghaumaliro” ŵanthu ŵazamuŵa na nkharo ziheni. Lemba la 2 Timote 3:1-4 likuti: ‘Ŵanthu ŵazamuŵa ŵakujitemwa iwoŵene, ŵakutemwa ndalama, ŵakujituntha, ŵakujikuzga, ŵakuyuyura Chiuta, ŵambura kupulikira ŵapapi, ŵambura kuwonga, ŵambura kugomezgeka, ŵambura chitemwa chakawiro, ŵanonono, ŵakusesa, ŵambura kujikora, ŵakofya, ŵambura kutemwa uwemi, ŵakwendera mphiska, ŵakajilangi, ŵakujitukumura chifukwa cha kunotha, ŵakutemwa vyakusanguluska m’malo mwa kutemwa Chiuta.’ Nangauli kale napo ŵanthu ŵakachindikananga yayi kweni sono mu “mazuŵa ghaumaliro” ndipo vyafika paheni chomene. Lekani Baibolo likuti ni “nyengo zinonono na zakusuzga.” Kasi namwe ndivyo mukuwona kuti vikuchitika mazuŵa ghano?

3. ŴANTHU ŴAKUNANGA CHARU: Baibolo likuti Chiuta ‘wazamuparanya awo ŵakunanga charu chapasi.’ (Uvumbuzi 11:18) Mu nyengo ya Nowa napo ŵanthu ŵakananga charu. Baibolo likuti: ‘Charu chikanangika pamaso pa Chiuta, charu chikazura na nkhaza. Ndipo Chiuta wakalaŵiska pa charu chapasi, wonani, chikanangika.’ (Genesis 6:11-13) Kasi namwe mukuwona kuti nkhaza zili palipose mu charu? Ŵanthu ŵananga chomene charu kuluska kumanyuma kose. Kasi ŵachinanga wuli? Ŵali na vilwero vyakofya mwakuti ŵangakoma waliyose pa charu chapasi. Kweniso ŵakunanga mphepo, vyakumera, vinyama na nyanja.

Jifumbani kuti: Kasi vyaka 100 ivyo vyajumpha, ŵanthu ŵakapanganga vilwero vyakofya nthena? Kweni sono ŵanthu ŵaluta panthazi kupanga vilwero vyakofya na kunanga charu. Nangauli ŵaluta panthazi na tekinoloje, kweni vikwambiskaso masuzgo ghanyake. Ntheura munthu walije mazaza ghakuti vinthu viŵe makora pa charu. Pambere ŵanthu ŵandanangirethu charu, Chiuta wanjilirengepo na kuparanya awo ŵakunanga charu. Ivi ndivyo wali kulayizga.

4. NTCHITO YA KUPHARAZGA PA CHARU CHOSE: Lemba la Mateyu 24:14 likuyowoyaso chimanyikwiro chinyake cha mazuŵa ghaumaliro. Likuti: ‘Ndipo makani ghawemi agha gha Ufumu, ghazamupharazgika mu charu chose kuti uŵe ukaboni ku mitundu yose; penepapo ndipo umaliro wizenge.’ Ntchito ya kupharazga iyi yikupambana chomene na umo matchalitchi ghanandi ghakuchitira pakuphenduska ŵanthu. Uthenga uwo ukupharazgika mu mazuŵa ghaumaliro ngwa “makani ghawemi agha gha Ufumu.” Kasi lilipo tchalitchi ilo mukulimanya kuti likupharazga uthenga uwu? Kasi awo mukuŵamanya ŵakupharazga waka mu chigaŵa chinu panji “mu charu chose kuti uŵe ukaboni ku mitundu yose”?

Webusayiti ya www.pr418.com yikovwira kupharazga “makani ghawemi agha gha Ufumu” mu viyowoyero vyakujumpha 700. Kasi paliso ŵanyake awo mukuŵamanya kuti ŵakupharazga nthena pa charu chose? Kale kukaŵavya Intaneti, kweni Ŵakaboni ŵa Yehova ŵakamanyikwanga chomene chifukwa cha kupharazga makani ghawemi gha Ufumu wa Chiuta. Kwambira mu 1939, pa chikopi cha magazini yiliyose ya Gongwe la Mulinda pali mazgu ghakuti “Likupharazga Ufumu wa Yehova.” Buku linyake lakuyowoya vya matchalitchi likati Ŵakaboni ŵa Yehova ŵakupharazga chomene ndipo “palije awo ŵakuyana nawo.” Ntheura mbukaboni wakuti “umaliro wizenge.”

VINTHU MU CHARU VYAFIKA PAHENI CHOMENE

Kasi mukuwona kuti vinthu vinayi ivyo vyalongosoreka vikuchitika nadi? Kwa vyaka vyakujumpha 100, magazini gha Gongwe la Mulinda ghawovwira ŵanthu kumanya kuti nyengo zaumaliro zili pafupi kumara. Nangauli pali ukaboni, ŵanthu ŵanyake ŵakususka kuti tili mu nyengo zaumaliro. Ŵakuti vinthu viheni vinandi ŵanthu ŵakuviwonera waka pa ma TV, mafoni, Intaneti, na vinyake. Mwantheura ŵakugomezga yayi kuti tili mu mazuŵa ghaumaliro. Nangauli ŵanyake ŵakususka, kweni chifukwa cha viheni ivyo vikuchitika ŵanandi ŵakumanya kuti tili mu mazuŵa ghaumaliro.

Ŵanthu ŵanyake awo ŵakumanya umo vinthu vikwendera ŵakuti sonosono apa vinthu visinthenge chomene pa charu chapasi. Mwachiyelezgero, mwakuyana na magazini yinyake ya mu 2014, ŵasayansi ŵakachenjezga wupu wa wakuwona vya chivikiliro pa charu chose (United Nations Security Council) za masuzgo agho ŵanthu ŵangakumana nagho. Ŵakati: “Mwakuyana na ivyo tasanga, tawona kuti tekinoloje yikwambiska masuzgo ghanandi chomene.” (The Bulletin of the Atomic Scientists Science and Security Board) Ŵanthu ŵanandi ŵakusimikizga kuti vinthu mu charu vyafika paheni chomene. Awo ŵakulemba magazini gha Gongwe la Mulinda na ŵanandi awo ŵakuyiŵerenga, ŵakugomezga kuti tili mu mazuŵa ghaumaliro kweniso kuti umaliro uli pafupi. M’malo mwa kopa kuti umaliro uli pafupi, mungaŵa ŵakukondwa. Chifukwa wuli? Mungazakapona para mungachitapo kanthu.

Pa zuŵa laumaliro kuzamuŵa pharanyiko. Lekani Baibolo likuti: ‘Kuzamuŵa suzgo yikuru, iyo yindachitikepo yantheura kufuma ku mtendeko wa charu mpaka sono . . . Nakuti, kwambura kuti mazuŵa agho ghadumulizgike, palije munthu uyo wangazakaponoskeka.’ (Mateyu 24:21, 22) Kweni Chiuta walayizga kuti ŵanthu ŵanandi ŵazamupona. Lemba la 1 Yohane 2:17 likuti: ‘Charu chikuluta, ntheura pera makhumbiro ghake, kweni uyo wakuchita khumbo la Chiuta wakukhalilira muyirayira.’

Kasi mungachita wuli kuti muzakapone pa zuŵa laumaliro na ‘kuzakakhala kwamuyirayira?’ Kasi mungamba kusunga vinthu vyakuti vizakamovwirani kweniso kujinozgera vinthu vinyake kuti muzakapone? Yayi. Baibolo likutichiska kuti tikwenera kuchita vinthu ivyo ni vyakuzirwa chomene. Likuti: “Pakuti vinthu vyose ivi vizamusongonoka ntheura, mughanaghanire mtundu wa ŵanthu uwo mukwenera kuŵa. Muŵe ŵanthu ŵa makhaliro ghatuŵa na kuchita milimo ya kusopa Chiuta mwakujipeleka, uku mukulindilira na kukumbuka nyengo zose kuŵapo kwa zuŵa la Yehova.” (2 Petrosi 3:10-12) Nkhani yose yikulongora kuti “vinthu vyose” ivyo vizamusongonoka ni machanya, kung’anamura maboma agho ghalipo mazuŵa ghano. Kweniso charu kung’anamura ŵanthu awo ŵakusankha kulondezga maboma agha m’malo mwa Chiuta. Vinthu ivyo tingasunga vingazakatovwira yayi kuti tizakapone pa zuŵa ili.

Usange tikukhumba kuti tizakapone pa zuŵa ili, tikwenera kusambira Baibolo na kuchita vinthu ivyo vikukondweska Yehova. (Zefaniya 2:3) M’malo mwa kulondezga ivyo ŵanthu ŵanandi ŵakuchita mazuŵa ghano kweniso kuzerezga kuti tili mu mazuŵa ghaumaliro, tikwenera “kukumbuka nyengo zose kuŵapo kwa zuŵa la Yehova.” Para mukukhumba kuti muzakapone, Ŵakaboni ŵa Yehova ŵangamulongorani mu Baibolo ivyo mukwenera kuchita.