Tili mu “nyengo zinonono na zakusuzga” ndipo ŵanthu ŵanandi ŵakwenjerwa. (2 Timote 3:1) Ŵanthu ŵanandi ŵakusangana na masuzgo gha vyachuma, nthengwa zikumara, nkhondo, matenda ghakofya, na masoka. Kweniso pali vinthu vinyake ivyo waliyose wakwenjerwa navyo. Mwachiyelezgero, ŵanji ŵangati: ‘Kasi tunthu uto twanitupa tukulongora kuti nili na kansa? Kasi ŵazukuru ŵane ŵazamukhala makora?’

Kwenjerwa kulikose nkhuheni yayi. Tose tikwenjerwa nyengo zinyake. Mwachiyelezgero, tikufipa mtima para tamulemba mayeso, tamuchita vinthu vinyake pa gulu, panji para tamuchita maintavyu gha ntchito. Para tikuchita wofi na vinthu viheni vingawovwira kuti tileke kupwetekeka. Kweni kwenjerwa mwakujumphizga nkhwakofya. Sonosono apa ŵanthu ŵakujumpha 68,000 ŵakati ŵafumbika pa nkhani iyi, vikalongora kuti munthu wangafwa luŵiro nanga wangaŵa kuti wakwenjerwa chomene viŵi yayi. Lekani ntchakupulikikwa kuti Yesu wakati: “Ni njani wa imwe uyo mwa kwenjerwa wangamanya kusazgako mkono umoza ku umoyo wake?” Para munthu wakwenjerwa chomene umoyo wake ukuŵa ufupi. Ntheura Yesu wakati: “Lekani kwenjerwa.” (Mateyu 6:25, 27) Kweni kasi vingachitika kuti tileke kwenjerwa?

Zgoro likusangika para tingalondezga vinjeru vyakovwira, kuŵa na chipulikano mwa Chiuta, na kuŵa na chigomezgo chanadi cha munthazi. Nangauli pasono vinthu vingaŵa makora waka, kweni nyengo yiliyose tingasangana na masuzgo. Tiyeni tiwone vinthu vitatu ivyo vikawovwira Paul, Janet na Alona.

Paul, uyo wali na ŵana ŵaŵiri wakati: “Vyakurya vikadura chomene kweniso vikasoŵa mu charu chithu chifukwa chakuti ndalama yikakhira chomene nkhongono. Tikakhalanga pamzere maora ghanandi, kweni kanandi tikafikanga yayi kunthazi mbwe vyakurya vyamara. Ŵanthu ŵakaghanda na njara kwazanimuwone, ndipo ŵanyake ŵakajiwiranga waka mu msewu. Vinthu vikadura chomene. Paumaliro ndalama yikamara ntchito. Nkhaluza ndalama zane zose izo nkhaŵa nazo ku banki, za penshoni kweniso za inshuwalansi.”

Paul wakamanyanga kuti wakakhumbikwiranga kuchita vinthu ‘mwavinjeru’ mwakuti iyo na banja lake vinthu viŵaŵire makora. (Zintharika 3:21) Paul wakalongosora kuti: “Pakwamba nkhagwiranga ntchito ya vyamagesi. Kweni vinthu vikati vyasuzga, nkhagwiranga ntchito yiliyose iyo yasangika nangauli nkhapokeranga ndalama zichoko chomene. Ŵanyake ŵakanipanga waka chakurya panji vinthu vinyake vya mu nyumba. Usange munthu wanipa sopo zinayi, ziŵiri nkhagwiliskiranga ntchito nekha, zinyake ziŵiri nkhaguliskanga. Pamanyuma nkhaŵeta twana twa nkhuku 40. Tukati twakura, nkhaguliska na kugulirapo tunyake 300. Kufuma apo, nkhasinthiska nkhuku 50 na mathumba gha ufu ghaŵiri gha 50kg. Ufu uwu ukatovwira nyengo yitaliko, ise pa nyumba yithu na ŵanyithu ŵanyake.”

Paul wakamanyangaso kuti chinthu chakukhumbikwa chomene nkhugomezga Chiuta. Chiuta wakutovwira para tikuchita ivyo wakukhumba. Pa nkhani ya vyakukhumbikwa, Yesu wakati: ‘Lekani kufipa mtima; chifukwa Ŵawiskemwe ŵakumanya kuti mukukhumba vinthu ivi.’—Luka 12:29-31.

Chachitima ntchakuti Satana uyo ni mulwani mukuru wa Chiuta wapusika ŵanthu ŵanandi mu charu kuti ŵafipenge mtima chomene na vinthu vyakuthupi. Ŵanthu ŵakufipa mtima chomene na vinthu ivyo ŵakughanaghana kuti ni vyakukhumbikwa. Ntheura ŵakutangwanika chomene kuti ŵasange vinthu ivyo nyengo zinyake ni vyakuzirwa viŵi yayi. Ŵanandi ŵakunjira mu ngongoli, kweni paumaliro ŵakukhawura. Apa ndipo ŵakumanya kuti ‘wakukongora ni muzga wa wakumubwereka.’—Zintharika 22:7.

Ŵanthu ŵanyake vinthu vikuŵasuzga chifukwa cha ivyo ŵakuchita. Paul wakati: “Ŵanyithu ŵanandi ŵakaleka mabanja ghawo na ŵabwezi ŵawo na kuluta ku vyaru vinyake kukapenja ndalama. Ŵanyake ŵakaŵavya vimakalata vyakwendera ndipo ntchito ŵakazisangaso yayi. Kanandi ŵakabisamanga ŵapolisi na kugona mu misewu. Ŵakatondeka kumupa m’pata Chiuta kuti waŵawovwire. Kweni ise tikawona kuti ntchiwemi tisuzgikire lumoza, ndipo tikagomezganga kuti Chiuta watovwirenge.”

KUPULIKIRA IVYO YESU WAKAYOWOYA

Paul wakayowoyaso kuti: “Yesu wakati: ‘Kwenjerwa chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake na vyake. Zuŵa lililose ndakukwanira na masuzgo ghake.’ Ntheura zuŵa lililose nkhalombanga Chiuta kuti watipe chakurya cha zuŵa ilo mwakuti tilutilire kuŵa ŵamoyo. Chiuta wakatovwira nadi nga umo Yesu wakayowoyera. Nyengo zinyake ivyo tikakhumbanga ndivyo tikavisanganga yayi. Ulendo unyake, nkhakhala pamzere kuti nigure chakurya, kweni nkhamanyanga yayi ivyo ŵakaguliskanga. Nkhati nafika pafupi nkhasanga kuti ni yogati. Nangauli nkhumutemwa yayi yogati, kweni nkhagura ndipo ndiyo tikagonera usiku uwo. Nkhuwonga chomene Chiuta chifukwa panyengo yakusuzga iyi, banja lane lindagonepo na njara.” a

Paul wakati: “Pasono vinthu vili makorako. Kweni pa ivyo vikachitika, tasambirapo kuti chinthu chakovwira kuti munthu waleke kufipa mtima chomene nkhugomezga Chiuta. Nyengo zose Yehovab watovwirenge chikuru tikulutilira kuchita khumbo lake. Ise tajiwonera tekha kuti ivyo wamasalmo wakayowoya pa Salmo 34:8 ni vyaunenesko. Iyo wakati: ‘Chetani ‘mwe! muwone kuti Yehova ni muwemi, ngwamwaŵi munthu uyo wakumutamira iyo.’ Ntheura nanga suzgo la vyachuma lingizaso, tikopa chara.”

Paul wakatiso: “Sono tikumanya makora kuti chakukhumbikwa pa umoyo, ni ntchito panji ndalama yayi, kweni chakurya. Tikulindilira nyengo iyo Chiuta wazamufiskira layizgo lakuti: ‘Mu charu muzamuŵa vyakurya vinandi.’ Kweni pasono chikuru tili na ‘chakurya na vyakuvwara, tiŵenge ŵakukhorwa na vinthu ivi.’ Ivyo Baibolo likuyowoya vikutipa nkhongono chomene. Likuti: ‘Umoyo winu uŵenge wambura kutemwa ndalama, uku mukukhorwa na vinthu ivyo vilipo. Pakuti iyo wati: “Nikulekenge chara napachoko nesi kukutaya mu nthowa yiliyose.” Mwakuti tiŵenge ŵakukhwima mtima na kuyowoya kuti: “Yehova ni movwiri wane; nopenge chara.”’”c

Kuti munthu ‘wende na Chiuta’ nga umo Paul na ŵamunyumba yake ŵakachitira, wakwenera kuŵa na chipulikano chakukhora. (Genesis 6:9) Kwali pasono tili na suzgo la ndalama panji tisanganenge nalo munthazi, tingachita makora kuŵa na chipulikano kweniso vinjeru ivyo vikawovwira Paul.

Kweni wuli usange tikufipa mtima chifukwa chakuti munyithu mu nthengwa watiyenda pasi?

Janet wakati: “Pakati pajumpha nyengo yichoko waka adada ŵati ŵafwa, afumu ŵane ŵakaniphalira kuti ŵasanga mwanakazi munyake. Nakalinga ŵakayegha katundu wawo, mbwe wautali. Ise no kutilayira. Nkhakhala nekha joo na ŵana ŵaŵiri.” Janet wakamba ntchito, kweni ndalama izo wakapokeranga zikaŵa zakukwana yayi kuti ziŵawovwire. Kweniso wakasangana na suzgo la ndalama pera yayi. Iyo wakati: “Nkhenjerwanga chomene chifukwa chakuti nkhamba kuchita nekha vinthu vyose vya pa nyumba. Nkhawonanga nga kuti nkhutondeka kovwira ŵana ŵane mwakukwana nga umo ŵapapi ŵanyake ŵakuchitira. Na sono wuwo, nichali kujifumba umo ŵanthu ŵakutiwonera ine na ŵana ŵane. Kasi ŵakughanaghana kuti ine nkhatondeka kuchitapo kanthu kuti nthengwa yane yileke kumara?”

Janet wakutemwa kulomba, ndipo ichi chikumovwira kuti mtima wake ukhazikikenge kweniso kuti wakoleske ubwezi wake na Chiuta. Iyo wakuti: “Usiku ndipo kukuŵa ntchito, para kwati yii nkhwamba kughanaghana ivi na ivi. Kweni para nalomba na kuŵazga Baibolo ndipo nkhusangako tulo. Vesi ilo nkhulitemwa chomene nda Ŵafilipi 4:6, 7, ilo likuti: ‘Mungenjerwanga chara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Chiuta, ndipo mtende wa Chiuta uwo ukuluska maghanoghano ghose, usungilirenge mitima yinu na maghanoghano ghinu.’ Nyengo zinandi usiku nkhulomba, ndipo nkhuwona kuti Yehova wakunisanguluska.”

Fundo iyo Yesu wakayowoya mu Upharazgi wa pa Phiri yikovwira chomene ŵanthu awo ŵakwenjerwa na vinthu vyakupambanapambana. Iyo wakati: ‘Chiuta wakumanya vinthu ivyo mukusoŵerwa pambere imwe mundamulombe.’ (Mateyu 6:8) Ndipouli, tikwenera kumupempha. Kulomba ni nthowa yimoza iyo yingatovwira kuti ‘tisendelere kwa Chiuta.’ Para tasendelera kwa iyo, nayo ‘wasendelerenge kwa ise.’—Yakobe 4:8.

Nadi, pemphero likutovwira kuti tijipulikeko makora para tamuthulira Chiuta ivyo vikutisuzga mu mtima. Kweniso Yehova, uyo ‘wakupulika malurombo,’ wakovwira wose awo ŵakumupempha mu chipulikano. (Salmo 65:2) Lekani Yesu wakasambizga ŵasambiri ŵake kuti “ŵalombenge nyengo zose kwambura kugongowa.” (Luka 18:1) Tilombenge Chiuta kuti watipe mahara na kutovwira, ndipo tigomezgenge kuti watitumbikenge chifukwa cha chipulikano chithu. Tingakayikanga yayi, na kughanaghana kuti wangatovwira yayi. Para tikulomba “kwambura kuleka” tikulongora kuti tili na chipulikano chakukhora.—1 Ŵatesalonika 5:17.

CHIPULIKANO CHAKUKHORA

Kasi munthu wakuŵa wuli na chipulikano? Munthu wakuŵa na chipulikano para ‘wamanya’ Chiuta. (Yohane 17:3) Tingamumanya makora Chiuta para tikusambira Baibolo. Mu Baibolo tikusambira kuti Chiuta wakuwona waliyose wa ise ndipo wakukhumba kutovwira. Kweni chipulikano nkhumanya waka Chiuta yayi. Pakukhumbikwira kuti tiŵe ŵabwezi ŵake. Nga umo vikuŵira na taŵanthu, vingachitika yayi kuti tiŵe ŵabwezi ŵa Chiuta papo na papo. Chipulikano chithu ‘chikusazgikira’ para tikusambira vinandi vya Chiuta na para ‘tikuchita ivyo vikumukondweska,’ kweniso para tikuwona kuti wakutovwira. (2 Ŵakorinte 10:15; Yohane 8:29) Chipulikano chanthena ichi ndicho chikumovwira Janet.

Janet wakuti: “Chipulikano chane chakhora chifukwa nkhuwona kuti Yehova wakuŵa nane pa chilichose. Ŵanthu ŵakatichitirapo nkhaza kanandi waka. Kweni chifukwa cha kulomba, Yehova wakatipa mahara ghakumazgira masuzgo agha. Para nkhuwonga Chiuta, nkhukumbuka vinandi ivyo wanichitira. Nyengo zose wakutovwira pa nyengo yakwenelera, kweniso pa nyengo yake. Wanovwira kusanga ŵabwezi ŵawemi pakati pa Ŵakhristu ŵanyane, ŵanalume na ŵanakazi. Ŵabwezi aŵa ŵakunovwira nyengo zose ndipo ntchiyelezgero chiwemi ku ŵana ŵane.”a

“Sono nkhupulikiska chifukwa icho Yehova pa Malaki 2:16, wakuyowoyera kuti ‘nkhutinkha kupatana.’ Chikuŵa chinthu chakuŵinya chomene para mfumu panji muwoli wako wakwenda pasi. Sono pajumpha vyaka kufuma apo afumu ŵane ŵakanilekera. Kweni nyengo zinyake nkhujiwona kuŵa wawakawaka. Para vyaŵa nthena, nkhuyezga kovwira munthu munyake, ndipo ichi chikunovwira nyengo zose.” Pasono Janet wakwenjerwa viŵi yayi chifukwa wakulondezga fundo ya mu Baibolo ya kuleka kujipatura.b—Zintharika 18:1.

Janet wakuti: “Icho chikunipembuzga chomene ni fundo yakuti Chiuta ni ‘wiske wa ŵalanda na mweruzgi panji kuti muvikiliri wa vyokoro.’ Watilekenge yayi nga umo afumu ŵane ŵali kuchitira.” (Salmo 68:5) Janet wakumanya kuti Chiuta wakutiyezga na ‘vinthu viheni yayi.’ Kweni iyo wakupeleka vinjeru “mwawanangwa ku wose” na “nkhongono zakuluska zakawiro” mwakuti vitovwire para tikwenjerwa.—Yakobe 1:5, 13; 2 Ŵakorinte 4:7.

Kweni kasi tingachita wuli usange tikwenjerwa chifukwa chakuti umoyo withu uli pangozi?

Alona wakuti: “Para napulika kulira kulongora kuti bomba liphulikenge, mtima wane ukuŵa muchanya ndipo nkhuchimbilira ku malo ghakuvikilirika. Ndipouli, para nafika ku malo agha nkhuŵa wakwenjerwa nipera. Para nili kuwaro, uko kulije malo ghakubisamako ndipo nkhwenjerwaso chomene. Zuŵa linyake, apo nkhendanga mu msewu, nkhamba kulira na kutondeka kuthuta. Pakajumpha maora ghanandi kuti mtima uweleremo. Penepapo nkhapulikaso kulira kulongora kuti bomba liphulikenge.”

Ni nkhondo pera yayi iyo yikufipiska ŵanthu mitima. Paliso vinyake. Mwachiyelezgero, para munthu wamanya kuti wali na nthenda yakofya, vikuŵa nga kuti bomba lamuphulikira. Ŵanthu ŵanyake ŵakufipa mtima chifukwa cha kughanaghanira umo vinthu vizamuŵira munthazi. Ŵakufipa mtima na kujifumba kuti: “Kasi mbwe ŵana panji ŵazukuru ŵane ŵazakakhale mu charu chakuzura na nkhondo, uchigeŵenga, kunangika kwa vinthu, kusintha kwa nyengo, na matenda ghakofya?” Kasi tingachita wuli para tikwenjerwa chifukwa cha vinthu ivi?

Pakumanya kuti vinthu viheni vikuchitika, ‘munthu wakuchenjera wakuwonerathu viheni, ndipo wakubisama.’ (Zintharika 27:12) Nga umo tikuchitira kuti tivikilire umoyo withu, tikwenera kuchitapo kanthu kuti tisungilire maghanoghano ghithu. Ise na ŵana ŵithu tingamba kwenjerwa chomene chifukwa cha kuwonelera mafilimu ghankhaza panji kuwonelera nkhani za pa TV izo zikulongora vithuzi vyakofya. Para tikuleka kuwonelera vinthu vyanthena ivi tikujivikilira. Maghanoghano ghithu Chiuta wali kughalenga kuti ghaŵenge pa vinthu viheni yayi. Kweni tikwenera kuzuzga maghanoghano ghithu na ‘vinthu vyose vyaunenesko, vyaurunji, vituŵa, na vyakutemweka.’ Para tachita nthena, ‘Chiuta wa mtende’ watovwirenge kuŵa na mtende mu mtima na maghanoghano.—Ŵafilipi 4:8, 9.

LUROMBO NDWAKUZIRWA

Para munthu wali na chipulikano chakukhora wakwenjerwa chomene yayi. Ntheura Baibolo likutiphalira kuti tiŵenge “maso pa nkhani ya kulomba.” (1 Petrosi 4:7) Tingapempha Yehova kuti watovwire, watipe vinjeru na chikanga mwakuti tichite vinthu mwamahara para tili mu suzgo. Nakuti tigomezgenge kuti Chiuta “wakutipulika pa kanthu kalikose ako tikulomba.”—1 Yohane 5:15.

Baibolo likuti ‘muwusi wa charu ichi’ ni Satana, ni Chiuta yayi. Kweniso likuti ‘charu chose chikugona mu nkhongono za muheni.’ (Yohane 12:31; 1 Yohane 5:19) Yesu wakamanyanga kuti Satana waliko nadi, lekani wakati tilombenge kuti: “Mutiwombore kwa muheni.” (Mateyu 6:13) Alona wakuti: “Para napulika kulira kulongora kuti bomba liphulikenge, nkhupempha Yehova kuti wanovwire mwakuti nileke kufipa mtima chomene. Kweniso afumu ŵane ŵakunichema ndipo tikulombera pamoza. Lurombo lukovwira chomene.” Vili nga umo Baibolo likuyowoyera kuti: ‘Yehova wali pafupi na wose awo ŵakumuchema, awo ŵakumuchema mu unenesko.’—Salmo 145:18.

IVYO TIKULINDILIRA MUNTHAZI

Mu Upharazgi wake wa pa Phiri, Yesu wakasambizga ŵasambiri ŵake kulomba kuti: “Ufumu winu wize.” (Mateyu 6:10) Ufumu wa Chiuta uzamuwuskapo vinthu vyose ivyo vikufipiska ŵanthu mtima. Kwizira mwa Yesu uyo ni ‘Karonga wa Chimango,’ Chiuta ‘wazamulekeska nkhondo pa charu chose.’ (Yesaya 9:6; Salmo 46:9) Baibolo likuti: ‘Chiuta wazamweruzga mukati mwa mitundu yinandi. Mtundu uzamuwuskira lupanga mtundu unyake chara, nesi kusambiraso nkhondo. Kuzamuŵavya wakuŵawofya.’ (Mika 4:3, 4) Ŵanthu ŵazamukondwa ‘kuzenga nyumba na kukhalamo; ndipo ŵazamupanda mpheska na kurya vipasi vyake.’ (Yesaya 65:21) ‘Pazamuŵavya na yumoza uyo wazamuyowoya kuti nalwara.’—Yesaya 33:24.

Pasono nanga munthu wangayezgayezga wuli, wangagwentherathu yayi ‘vinthu vyamabuchi.’ (Mupharazgi 9:11) Ŵanthu ŵawemi ŵachali kufwa chifukwa cha nkhondo, vivulupi, na matenda. Kasi ŵanthu ŵawemi aŵa mbwe kwawo kuli kumara?

Ŵanthu ŵawemi awo ŵali kufwa ŵazamuŵaso ŵamoyo. Chiuta ndiyo wakumanya unandi wa ŵanthu aŵa. Pasono ŵanthu aŵa ŵali mu tulo, iyo ni nyifwa, kweni Chiuta wakuŵakumbuka. Zuŵa lizenge apo ‘wose ŵazamufumira kuwaro.’ (Yohane 5:28, 29) Pa nkhani ya chiwuka, Baibolo likutisimikizgira kuti: ‘Chigomezgo icho tili nacho chili nga ni nyanguru wa umoyo, ntchanadi na chakukhora.’ (Ŵahebere 6:19) Nakuti Chiuta ‘wali kupeleka ukaboni ku ŵanthu wose apo wakawuska Yesu ku ŵakufwa.’—Milimo 17:31.

Kweni pasono nanga ni awo ŵakukondweska Chiuta ŵasanganenge na masuzgo agho ghaŵafipiskenge mtima. Paul, Janet, na Alona ŵakwenjerwa chomene yayi pasono. Icho chikuŵawovwira nkhusendelera kwa Chiuta mu lurombo kweniso ŵakugomezga chomene ivyo Chiuta walayizga. Nga umo wachitira na ŵanthu aŵa, ‘mphanyi Chiuta uyo wakupeleka chigomezgo wamuzuzgani na chimwemwe chose na mtende chifukwa muli ŵakugomezga.’—Ŵaroma 15:13.