Kasi sayansi ni vichi? Dikishonare yinyake yikuti sayansi ni masambiro gha vinthu vya chilengiwa. Pakusambira pakuŵa ntchito yikuru. Ŵakuyezgelera, kupima, kweniso ŵakuwoneseska ivyo vikuchitika. Pakutora masabata, myezi, panji vyaka kuti ŵasayansi ŵamanye vinthu. Nyengo zinyake ŵakuphyoka pawaka. Kweni nyengo zinyake ivyo ŵakusanga vikovwira ŵanthu. Tiyeni tiwone vinyake ivyo ŵasanga.

Kampani yinyake ku Europe yili kupanga kapayipi kakumwera maji ako kakovwira munthu kuti waleke kulwara para wamwa maji ghaheni. Kapayipi aka kakovwira chomene para kwachitika masoka gha chilengiwa. Mu 2010, kakawovwira ŵanthu ku Haiti apo kukachitika chindindindi.

Ŵasayansi ŵali kupayika masetilayiti mu mlengalenga agho ghakovwira madilayivara, ŵakwendeska ndege, ŵakwendeska sitima, na ŵanthu ŵanyake kuti ŵamanyenge uko ŵakuluta. Masetilayiti agha ghakuchemeka kuti GPS. Chifukwa cha masetilayiti agha, magalimoto ghanyake, mafoni, na makompyuta, ghakulongora mapu. Ivi vikovwira munthu kumanya uko wali na uko wakuluta.

Mazuŵa ghano kuli mafoni, makompyuta, ndege, na Intaneti. Kweniso ŵasayansi ŵasanga nthowa zinandi zakuchizgira matenda. Ivi vikovwira chomene ŵanthu.

KASI ŴASAYANSI ŴAKUMANYA VYOSE?

Ŵasayansi ŵachali kusambira vinandi vya chilengiwa. Ŵanyake ŵakusambira vya nkhongono ya nyukiliya. Ŵanyake ŵakusambira umo vinthu vikaŵirako. Pakuti ŵakusambira vyakuwoneka na vyambura kuwoneka wuwo, ŵakuwona kuti Chiuta waŵengeko mphanyi ŵali kumusanga.

Amir D. Aczel wakati: “Ŵasayansi ŵakugomezga kuti Chiuta kulije.” Wasayansi munyake wakati: “Kuyana na ivyo tasambira kweniso ivyo tasanga, palije ukaboni wakuti Chiuta waliko.” Ŵanyake ŵakuti ivyo Baibolo likuyowoya ni vidokoni waka kweniso ni nkhani zautesi.a

Kweni fumbo ndakuti: Kasi ŵasayansi ŵakumanya vyose? Yayi. Steven Weinberg wakati: “Pali vinandi vyakuti tisambire, ndipo tingakwaniska yayi kumanya vyose.” Munyake wakati: “Vinyake tingavipulikiska yayi.” Wonani vinyake ivyo ŵasayansi ŵakuleka kupulikiska.

• 

  Maselo ghakovwira kuti munthu waŵe na nkhongono kweniso kuti wakulenge. Kweni ŵasayansi ŵakumanya makora yayi umo vyose vikwendera.

• 

  Para munthu waponya kanthu muchanya kakuwelera pasi. Kweniso mwezi ukwenda mu nthowa yake para ukuzingilira charu. Vyose ivi vikuchitika chifukwa cha nkhongono ya kuguza iyo yili pa charu chapasi. Ŵasayansi ŵakupulikiska yayi umo nkhongono iyi yikugwilira ntchito.

• 

  Ŵasayansi ŵali na makina ghankhongono ghakupimira vinthu, kweni para ŵakupima ŵakuwona vyose yayi.

Chifukwa wuli ntchiwemi kumanya kuti vinyake ŵasayansi vikuŵatonda? Wasayansi munyake wakati: “Pakuti tikumanya vichoko waka, ipo tikwenera kulutilira kusambira.”

Kasi tikwenera kugomezga chomene sayansi m’malo mwa Baibolo? Ŵasayansi ŵakuyezga nthowa zakupambanapambana kuti ŵamanye vinandi mu chilengiwa, kweni vikuŵatonda. Kasi ivyo ŵakuleka kuvipulikiska tingati ni vyambura ntchito? Kasi ni vyakuti tingavimanya yayi? Mu nyengo yakale ku Babuloni kukaŵa ŵanthu awo ŵakasandanga vya chilengiwa. Buku linyake likuti: “Ŵababuloni ŵakamanyanga vinandi yayi. Sono pajumpha vyaka pafupifupi 4,000, kweni ŵasayansi ŵamazuŵa ghano nawo ŵakumanya vinandi yayi.”—Encyclopedia Britannica.

Waliyose wakwenera kusankha yekha ivyo wagomezgenge pa nkhani iyi. Ŵakaboni ŵa Yehova ŵakulondezga ivyo Baibolo likuyowoya. Likuti: “Mahara ghinu ghamanyikwe ku ŵanthu wose.” (Ŵafilipi 4:5) Para namwe mungasanda, muwonenge kuti vinyake ivyo ŵasayansi ŵakusanga vikukolerana na ivyo vili mu Baibolo.

Ŵasayansi ŵanandi ŵakugomezga kuti Chiuta kulije ndipo ŵali kulemba mabuku ghanandi pa nkhani iyi. Ŵanthu ŵanandi ŵakuŵazga mabuku agha, kweni ŵanyake ŵakukolerana navyo yayi. David Eagleman wakati: “Ŵanyake para ŵaŵazga mabuku agha ŵakugomezga kuti ŵasayansi ŵakumanya vyose, kweni ndimo viliri yayi. Ŵasayansi ŵanyake ŵakumanya kuti ŵangapuvya.”

Ŵasayansi ŵali kupanga vinthu vinandi vyakovwira. Kweni pali vinyake ivyo ŵakubudiska. Isaac Newton wakaŵa wasayansi wamahara chomene. Wakalongosora umo nkhongono yambura kuwoneka yikovwilira kuti nyenyezi, charu chapasi, na mapulaneti ghanyake, vyendenge mu malo ghake para vikuzingilira zuŵa. Wakabowozga masamu agho ghakovwira pakupanga mapulogiramu gha pa kompyuta, kweniso ghakovwira awo ŵakuluta ku mwezi, na awo ŵakusambira vya nyukiliya. Kweni suzgo ndakuti Isaac Newton wakagomezganga vyamizimu. Wakakhumbanga kuzgora malibwe kuti ghaŵe golide.

Vyaka 1,500 pambere Newton wandababike, Ptolemy wakasandanga mapulaneti na vinyake ivyo vili kuchanya kwambura vyakupimira. Kweniso wakamanyanga kujambura mapu. Kweni wakagomezganga kuti charu chapasi chili pakatikati pa mapulaneti ghanyake, kweni ndimo viliri yayi. Carl Sagan wakati: “Kwa vyaka 1,500, ŵanthu ŵakamanyanga kuti charu chili pakatikati pa mapulaneti. Uwu mbukaboni wakuti ŵasayansi ŵangabudiska.”

Mazuŵa ghano napo ŵasayansi ŵakupuvya, ndipo vingachitika yayi kuti ŵamanye vyose. Paul Davies wakati: “Tingakwaniska yayi kumanya vyose vya mu chilengiwa.” Ntheura ŵasayansi awo ŵakuti ŵakumanya vyose ŵakuteta.

Baibolo likuti: ‘Wonani, utu nthuvigaŵa tuchoko twa mendero ghake; ivyo tikupulika vya iyo ni vichoko waka!’ (Job 26:14) Pali vinandi vyakuti ŵanthu ŵasambire. Baibolo likuti: ‘Nako nkhunyang’amira kwa usambazi na vinjeru na kumanya kwa Chiuta! Vyeruzgo vyake ni vyambura mapenjeko na nthowa zake zambura kubowozgeka!’​—Ŵaroma 11:33.