Kasi apo mukaŵa mwana mukakhuŵarapo na kuwa? Panyake mukajitemura pa woko panji kusupuka pa khongono. Kasi mukukumbuka umo amama ŵinu ŵakamovwilirani? Panji ŵakasukapo na kukakapo bandeji. Mukaliranga, kweni ŵakamupembuzgani na kumuvumbatirani, mbwe imwe mtima losilosi. Pa nyengo yira, munthu wakumusanguluskani wakaŵa pafupi.

Para taŵanthu tikukura, umoyo nawo ukusintha chomene. Masuzgo ghakusazgikira, ndipo chikuŵaso chakusuzga kusanga chisangulusko. Chachitima ntchakuti, masuzgo agho ŵanthu ŵalara ŵakusangana nagho ngakuti nanga munthu wakuvumbatire ghangamara yayi. Wonani viyelezgero vichoko waka ivi.

• Kasi ntchito yili kumumaliranipo? Julian wakuti ŵakati ŵamulekeska ntchito, nkhongono zikamumalira. Wakajifumbanga kuti, ‘Sono nipwelelerenge wuli banja lane? Chifukwa wuli kampani iyi yanilekeska ntchito uku nalimbikiranga kugwira ntchito vyaka vyose ivi?’

• Panyake suzgo linu ndakuti nthengwa yili kumara. Raquel wakuti: “Afumu ŵane ŵakati ŵanileka pa chifukwa chambura kumanyikwa myezi 18 iyo yajumpha, nkhaŵa wachitima chomene. Vikaŵa nga kuti mtima wane wasweka pakati phwee! Thupi na maghanoghano, vyose vikapwetekeka. Apo nakhala mutu zwee!”

• Panyake mukulwara chomene ndipo palije kusintha kulikose. Nyengo zinyake namwe mungaŵa na maghanoghano nga agho wakaŵa nagho Yobu, uyo wakadandawura kuti: “Nkhutinkha umoyo wane, nkhukhumba yayi kukhalilira wamoyo.” (Yobu 7:16) Panji mungajipulika nga ni Luis, wa vyaka 80, uyo wakuti: “Nyengo zinyake nkhuwona nga kuti nkhulindilira waka nyifwa.”

• Panji imwe mukukhumba kusanguluskika chifukwa chakuti wakutemweka winu wali kufwa. Robert wakuti: “Mwana wane wakati wafwa pa ngozi ya ndege, pakwamba nkhagomezga yayi. Kufuma apo, nkhapulika ulwilwi, nga uwo Baibolo likulongosora wakuti munthu wakukugwaza na lupanga lutali.”—Luka 2:35.

Nangauli ŵali mu masuzgo ghose agha, Robert, Luis, Raquel, na Julian, ŵali kusanga chipembuzgo. Ŵali kuchisanga mwa Chiuta Wankhongonozose uyo wakumanya kusanguluska ŵanthu. Kasi Chiuta wakupeleka wuli chisangulusko? Kasi namwe wangamupani chisangulusko para muli mu suzgo?

Mpositole Paulosi wakalongosora kuti Yehovaa ni “Chiuta wa chisangulusko chose, uyo wakutisanguluska mu suzgo yithu yose.” (2 Ŵakorinte 1:3, 4) Ntheura Baibolo likutisimikizgira kuti Chiuta wangawovwira munthu waliyose kweniso wangatipembuzga pa soka lililose ilo lingatiwira.

Usange tikukhumba kuti Chiuta watisanguluske, nase tikwenera kuchitapo kanthu. Kasi dokotala wangatovwira usange ise tindalute kwa iyo? Ntchimi Amosi yikafumba kuti: “Kasi ŵaŵiri ŵangendera lumoza kwambura kupangana?” (Amosi 3:3) Malemba ghakutiphalira kuti: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

Kasi tingagomezga wuli kuti Chiuta wasendelerenge kwa ise? Chakwamba, iyo wakutiphalira kanandi waka kuti wakukhumba kutovwira. (Wonani bokosi.) Chachiŵiri, tili na ukaboni kufuma ku ŵanthu awo Chiuta wali kuŵasanguluskapo. Ŵanthu aŵa mbanadi, ŵanyake ŵaliko sono ndipo ŵanyake ŵakaŵako kale.

Ŵanthu ŵanandi mazuŵa ghano ŵakukhumba kuti Chiuta waŵawovwire. Ndimo vikaŵiraso na Themba Davide, ilo likasangana na masuzgo ghanandi pa umoyo wake. Davide wakapempha Yehova kuti: “Pulikani kuŵeya kwane apo nkhulira kuti munovwire.” Kasi Chiuta wakamuzgora? Enya. Davide wakatiso: “Napokera wovwiri wake, ndipo mtima wane ukusekelera.”—Salimo 28:2, 7.

IVYO YESU WAKUCHITA PAKUPEMBUZGA AWO ŴAKULIRA

Chiuta wakakhumbanga kuti Yesu nayo wawovwirepo pakusanguluska ŵanthu. Chiuta wakamupa ntchito zinandi Yesu, ndipo yinyake yikaŵa ya “kukaka makora ŵakuphyoka mtima” na “kusanguluska wose awo ŵakutengera.” (Yesaya 61:1, 2) Nga umo Malemba ghakayowoyera kale, Yesu wakakhumbanga chomene kovwira ŵanthu awo ŵakaŵa ‘ŵakuphyoka na kunyekezgeka.’—Mateyu 11:28-30.

Yesu wakasanguluskanga ŵanthu pakuŵapa ulongozgi wavinjeru, kuŵachitira lusungu, ndipo nyengo zinyake wakachizganga nthenda zawo. Zuŵa linyake, munthu wavyoni wakamuŵeya Yesu kuti: “Usange mukukhumba, munganitozga.” Yesu chitima chikamukora ndipo wakati: “Nkhukhumba! Tozgeka.” (Mariko 1: 40, 41) Munthu yura vyoni vikamalira papo.

Lero Mwana wa Chiuta wali pa charu chapasi yayi kuti watipembuzge. Kweni Awiske, a Yehova, “Chiuta wa chisangulusko chose,” ŵachali kovwira awo ŵali mu suzgo. (2 Ŵakorinte 1:3) Wonani nthowa zinayi izo Chiuta wakupembuzgira ŵanthu.

• Baibolo. “Vinthu vyose ivyo vikalembeka kale, vikalembeka kuti vitisambizge, kuti para tazizipizga na kusanguluskika na Malemba, tiŵe na chigomezgo.”—Ŵaroma 15:4.

• Mzimu Utuŵa wa Chiuta. Nyengo yichoko waka Yesu wakati wafwa, mpingo wose wa Ŵakhristu ukanjira mu nyengo ya mtende. Chifukwa wuli? Chifukwa ntchakuti “ukendanga mu kopa Yehova na mu chisangulusko cha mzimu utuŵa.” (Milimo 9:31) Mzimu utuŵa, uwo ukufuma kwa Chiuta, ngwankhongono chomene. Chiuta wangatuma mzimu uwu kuti wasanguluske waliyose uyo wakusuzgika.

• Lurombo. Baibolo likutichenjezga kuti: “Lekani kwenjerwa na chinthu chilichose.” Kweni likutichiska kuti: “Madandawuro ghinu ghamanyikwe kwa Chiuta. Ndipo mtende wa Chiuta uwo ukuluska maghanoghano ghose, uvikilirenge mitima yinu na maghanoghano ghinu.”—Ŵafilipi 4:6, 7.

• Ŵakhristu Ŵanyithu mbabwezi ŵanadi awo ŵangatovwira para vinthu vyatisuzga. Mpositole Paulosi wakalongosora kuti Ŵakhristu ŵanyake ndiwo ‘ŵakamusanguluska chomene’ mu nyengo ya ‘masuzgo ndiposo kukweŵeka.’—Ŵakolose 4:11; 1 Ŵatesalonika 3:7.

Kweni panji mungajifumba usange fundo izi zikovwira nadi. Sono tiyeni tiwone umo fundo izi zawovwilira ŵanthu awo ŵakasangana na masuzgo agho ghazunulika mu nkhani iyo yajumpha. Nga ndiwo, namwe muwonenge kuti Chiuta wakufiska ivyo wali kuyowoya, vyakuti: “Nga ni mama uyo wakupembuzga mwana wake, ndimo ine nimupembuzgiraninge.”—Yesaya 66:13.

PARA MULI PA ULOVA

Setha wakuti: “Ine na muwoli wane ntchito yikamalira nyengo yimoza. Ntheura vyaka viŵiri, tikakhaliranga waka ivyo ŵabali ŵithu ŵakatipangako kweniso tumaganyu. Pa chifukwa ichi, muwoli wane Priscilla, wakamba kusuzgika maghanoghano ndipo ine nkhajiwonanga kuti nili wawakawaka.

“Kasi chikatiwovwira ntchivichi? Nyengo zinandi Priscilla wakajikumbuskanga fundo ya Yesu iyo yili pa Mateyu 6:34. Yesu wakayowoya kuti tingenjerwanga na vya machero yayi, pakuti zuŵa lililose lili na vyenjezgo vyake. Chinyake icho chikamovwira nkhulomba kwa Chiuta kufumira pasi pa mtima. Kweni ine lemba la Salimo 55:22 ndilo likanovwira chomene. Nga ngwamasalimo uyu, nkhamuthwikiska Yehova katundu wane, ndipo nkhawona kuti wakanovwira nadi. Nangauli pasono nili pa ntchito, kweni tachepeskako vyakukhumba pa umoyo withu kuyana na fundo iyo Yesu wakayowoya pa Mateyu 6:20-22. Chikuru chomene ntchakuti sono tikumutemwa chomene Chiuta kweniso nase tikutemwana.”

Jonathan wakuti: “Bizinesi yithu yikati yawa, nkhafipa mtima chomene kuti kwali kuwengechi. Chifukwa cha suzgo la vyachuma, bizinesi iyo tikalimbikira kuyichita vyaka 20, yikamalirathu. Mbwenu tikamba kupindana vya ndalama na muwoli wane. Tikatondekanga na kuti tigure vinthu pa ngongoli.

“Kweni ivyo vyatovwira kuti tichitenge vinthu mwamahara ni Mazgu gha Chiuta na mzimu wake. Nkhasambira kugwira ntchito ya mtundu uliwose, ndipo tikaleka kugura vinthu bwekabweka. Pakuti ndise Ŵakaboni ŵa Yehova, ŵabali ŵithu ŵakatovwira chomene. Ŵakatikwezga nkhongono ndipo ŵakatovwira apo vinthu vikaŵa makora yayi.”

PARA NTHENGWA YAMARA

Raquel wakuti: “Mfumu wane wakati wanileka pa chifukwa chambura kumanyikwa, vikaniŵinya ndipo nkhakwiya chomene. Nkhalwara na chitima. Kweni nkhasendelera kwa Chiuta, ndipo wakanipembuzga. Zuŵa lililose para nayowoya nayo mu lurombo, mtende wake ukavikiliranga mtima wane. Vikaŵa nga kuti wakanozganga mtima wane uwo ukaphyoka.

“Nakuti Mazgu ghake, Baibolo, ghakanovwira chomene kuti nileke kukhalira waka kukwiya. Nkhakumbuka mazgu gha mpositole Paulosi gha pa Ŵaroma 12:21, agho ghakuti: ‘Mungazomeranga yayi kuti uheni umuthereskani, kweni lutilirani kuchita uwemi kuti muthereske uheni.’

“Munyane munyake wakanovwira kuti nileke kukhalira kudandawura. Wakaniŵazgira lemba la Mupharazgi 3:6, ndipo wakaniphalira kuti pali nyengo iyo tikwenera ‘kusulako waka’ ivyo vyachitika. Ukaŵa ulongozgi wakuŵinya, kweni ndiwo nkhakhumbikwiranga. Pasono maghanoghano ghane ghali pa vinthu vinyake vyakuzirwa.”

Elizabeth wakuti: “Para nthengwa yamara, ukukhumbikwira wovwiri. Nkhaŵa na munyane uyo wakanovwiranga nadi, zuŵa na zuŵa. Wakaliranga pamoza nane, wakanipembuzganga, ndipo wakanovwira kuti nijiwonenge kuti ŵanthu ŵakunitemwa m’malo mwa kujiwona kuti najowoleka. Nkhugomezga kuti Yehova ndiyo wakamutuma kuti wanipembuzge.”

PARA MULI ŴALWARI PANJI ŴACHEKURU

Luis, uyo wazunulika mu nkhani yakwamba, wali na suzgo la mtima, ndipo wapona ku dindi kaŵiri kose. Pasono wakuŵa pa okusijini maora 16 pa zuŵa. Iyo wakuti: “Nkhulomba kwa Yehova nyengo zose. Para nalomba kwa Chiuta, nkhuwona kuti mzimu wake ukunipa nkhongono. Malurombo ghakunikhwimiska chifukwa nkhumanya na kugomezga kuti wakunipwelelera.”

Petra, uyo sono wali na vyaka vya m’ma 80, wakuti: “Nkhukhumba kuchita vinthu vinandi chomene, kweni nkhutondeka. Chitima chikunikora kuti nkhongono zane zikumara. Nkhuvuka uheni ndipo nkhukhalira waka minkhwala. Kanandi nkhughanaghanira umo Yesu wakapemphera Awiske kuti mphanyi suzgo linyake lamujumphilira, usange vingachitika. Kweni Yehova wakamupa nkhongono Yesu, ndipo nane wakunipa nkhongono. Lurombo ndilo ni munkhwala wane zuŵa lililose. Para nayowoya na Chiuta, nkhongono zikukwera.”—Mateyu 26:39.

Julian, uyo wasuzgika na nthenda yakuchemeka multiple sclerosis kwa vyaka 30, nayo wakuzomerezga. Iyo wakuti: “Pakwamba nkhakhalanga pa mpando wakuzirwa, sono nkhukhala pa mpando wa ŵanthu ŵakupendera. Kweni nkhujipulika makora chifukwa nkhutemwa kovwira ŵanthu. Munthu para ukovwira ŵanyako suzgo likupepukako, ndipo Yehova wakukupa nkhongono mu suzgo nga umo wakulayizgira. Nga ni mpositole Paulosi, nane ningayowoya kuti: ‘Mu vinthu vyose, nkhusanga nkhongono mwa uyo wakunipa nkhongono.’”—Ŵafilipi 4:13.

PARA WAKUTEMWEKA WINU WAFWA

Antonio wakuti: “Nkhati napulika kuti adada ŵafwa pa ngozi, pakwamba nkhagomezga yayi. Nkhawona kuti ni nkhaza chomene, chifukwa ŵeneko ŵakajenderanga pa msewu. Kweni pakaŵavya chakuti ningachitapo. Adada ŵakakhala mazuŵa 5 kwambura kusunkhunyika, mbwe paumaliro ŵakuti namalira pano. Para amama ŵali pafupi nkhaliranga yayi, kweni para nili panekha ndipo nkhachitchayanga chitengero. Nkhajifumbanga kuti, ‘Chifukwa wuli? Chifukwa wuli?’

“Nyengo yose yachitima iyi, nkhapemphanga Yehova kuti wanovwire kuti nileke kuŵa na chitima chakujumphizga kweniso kuti wanipe mtende. Pachoko na pachoko, nkhamba kukhazikika. Nkhakumbuka kuti Baibolo likuyowoya kuti ‘vyakuchitika vyamabuchi’ vingawira waliyose wa ise. Pakuti Chiuta wangateta yayi, nkhugomezga kuti nizamuŵawonaso adada para ŵazakawuka.”—Mupharazgi 9:11; Yohane 11:25; Tito 1:2.

Robert, uyo wazunulika mu nkhani yakwamba, nayo ndimo wakughanaghanira. Iyo wakuti: “Ine na muwoli wane tikasanga mtende wa mu mtima uwo ukuyowoyeka pa Ŵafilipi 4:6, 7. Tikawusanga chifukwa cha kulomba kwa Yehova. Mtende uwu ukatovwira kuti tiyowoye na ŵamtolamakani vya chigomezgo chithu chakuti ŵakufwa ŵazamuwuka. Nangauli ndege yili kutikomera mwana withu, tikukumbuka vinthu vyakukondweska vinandi ivyo tikachitiranga lumoza. Ndivyo kanandi tikughanaghanirapo chomene.

“Apo Ŵakaboni ŵanyithu ŵakatiphaliranga kuti ŵakatiwonanga apo tikalongosoranga vya chipulikano mwakufwasa pa TV, tikaŵaphaliranga kuti ntchifukwa cha malurombo ghanandi agho ŵakatilomberanga. Nkhugomezga nadi kuti Yehova wakatovwira kwizira mu mauthenga ghakupembuzga agho ŵabali aŵa ŵakatitumiranga.”

Nga umo tawonera, Chiuta wangapembuzga ŵanthu awo ŵakusangana na masuzgo ghakupambanapambana. Imwe ke? Nanga mungasangana na suzgo wuli, mungasanga chisangulusko mu nyengo yakusuzga iyi.b Ntheura pemphani Yehova kuti wamovwirani. Iyo ni “Chiuta wa chisangulusko chose.”—2 Ŵakorinte 1:3.