Kasi muli kughanaghanapo vyakuŵazga Baibolo kweni mukutondeka pa vifukwa nga vyapachanya ivi? Ŵanandi ŵakuwona kuti kuŵazga Baibolo nkhantchito. Kweni wuli usange mwamanya kuti Baibolo lingamovwirani kuŵa ŵakukondwa? Kweniso wuli usange mwamanya kuti pali vinyake ivyo mungachita kuti mukondwenge para mukuŵazga Baibolo? Pali viwemi vinandi ivyo mungasanga chifukwa cha kuŵazga Baibolo.

Wonani uwemi uwo ŵanji ŵasanga chifukwa chakuŵerenga Baibolo.

Ezekiel, wali na vyaka vyakujumpha 20. Iyo wakati: “Kale nkhaŵa nga ni munthu uyo wakwendeska galimoto kwambura kumanya uko wakuluta. Kweni Baibolo lanovwira kukhorwa na umoyo. Lili na fundo zakovwira chomene mazuŵa ghano.”

Frieda nayo wali na vya vyakujumpha 20. Iyo wakulongosora kuti: “Kale nkhachitanga vinthu kwambura kughanaghanirapo. Kweni chifukwa cha kuŵerenga Baibolo, sono nkhukhala makora na ŵanthu ndipo nili na ŵabwezi ŵanandi.”

Mwanakazi munyake wa vyaka vyakujumpha 50 zina lake Eunice wakati: “Baibolo likunovwira chomene kuti nileke vizgoŵi vinyake viheni na kuŵa munthu muwemi.”

Mwakuyana na ivyo ŵanthu aŵa kweniso ŵanyake ŵanandi ŵawona, kuŵerenga Baibolo kungamovwirani kuti muŵe ŵakukondwa. (Yesaya 48:17, 18) Lingamovwiraniso (1) kusankha mwamahara vyakuchita, (2) kusankha ŵabwezi ŵawemi, (3) umo mungachitira para mukwenjerwa, kweniso (4) chakuzirwa chomene ntchakuti mumumanyenge makora Chiuta. Fundo za mu Baibolo zikufuma kwa Chiuta, ntheura zikovwira chomene. Chiuta wangatipa ulongozgi wambura kovwira yayi.

Chakuzirwa chomene ntchakuti imwe muyambepo kuŵazga Baibolo. Kasi mungachita wuli kuti chimuŵirani chipusu kuŵazga Baibolo?

Kasi ni vichi ivyo vingamovwirani kuti chimuŵirani chipusu kuŵerenga Baibolo na kulipulikiska? Wonani masachizgo ghankhondi agho ghawovwirapo ŵanthu ŵanandi.

Ŵerengerani pa malo ghakwenelera. Yezgani kusanga malo ghambura viwawa. Lekani kutimbanizgika na vinyake mwakuti mtima winu uŵe pa ivyo mukuŵerenga. Para mukuŵerengera pa malo agho pali ungweru na tumphepo tuwemi, mungapulikiska ivyo mukuŵerenga.

Ŵani na maghanoghano ghakwenelera. Pakuti Baibolo ni Mazgu gha Ŵadada ŵithu ŵakuchanya, mungalipulikiska makora para mungajitora nga ni mwana muchoko uyo wakukhumba kusambizgika na ŵapapi ŵake. Usange muli na maghanoghano ghambura kwenelera pa nkhani ya Baibolo mungachita makora kusintha mwakuti Chiuta wamusambizgani.—Salimo 25:4.

Pempherani pambere mundambe kuŵerenga. Baibolo ni Mazgu gha Chiuta, ntheura chingaŵa makora chomene kupempha wovwiri kwa iyo kuti tilipulikiske. Chiuta ngwakunozgeka kupeleka ‘mzimu utuŵa ku awo ŵakumulomba.’ (Luka 11:13) Mzimu utuŵa uwu ungamovwirani kuti mupulikiske maghanoghano ghake. Pamasinda ungamovwirani kuti mupulikiske “nanga ni vinthu vyakubisika vya Chiuta.”—1 Ŵakorinte 2:10.

Ŵerengani munthowa yakuti mupulikiske. Lekani kuŵerenga mwakuchimbilira. Kweni ghanaghaniranipo ivyo mukuŵerenga. Pakuŵerenga mujifumbenge mafumbo nga ni agha: ‘Kasi ni makhaliro wuli agho nkhughawona mwa munthu uyo nkhuŵazga apa? Kasi ningamuyezga wuli munthu uyu?

Ŵani na vilato. Kuti Baibolo limovwirani, ŵikanipo mtima kusanga fundo izo nizakovwira kwa imwe. Mungaŵa na vilato nga ni ivi: ‘Kumumanya makora Chiuta na kuŵa munthu muwemi.’ Kufuma apo sankhani chigaŵa cha Baibolo icho chingamovwirani kufiska vilato vinu.a

Masachizgo ghankhondi agha ghangamovwirani kuti mwambe kuŵazga Baibolo. Kweni kasi mungachita wuli kuti mukondwenge chomene para mukuŵazga Baibolo? Nkhani yakulondezgapo yikuzgora fumbo ili.

Ŵanyake ŵakuti vikunozga kuŵazga Baibolo, apo ŵanyake ŵakuti yayi. Imwe mukuti wuli? Manyani kuti pali vinthu ivyo vikukhumbikwa kuti mukondwenge pakuŵazga Baibolo. Tiyeni tiwone ivyo mungachita.

Sankhani Baibolo lakung’anamurika makora. Manyani kuti mungakondwa yayi para mukuŵazga Baibolo ilo lili na mazgu ghakusuzga agho ŵanthu ŵali kuleka kuyowoya. Ntheura mukwenera kusankha Baibolo lipusu. Kweni mukwenera kuwoneseska kuti Baibolo ilo mukuŵazga lili kung’anamulika makora kwambura kuwuskako fundo zinyake.a

Ŵerengerani pa vinthu vyasono. Mazuŵa ghano mungaŵerengaso Baibolo pa kompyuta, foni panji pa tabuleti. Mungaŵerengera pa Intaneti panji mungachita dawunilodi. Nyengo zinyake mungawona umo fundo iyo mukuŵazga yili kulembekera pa vesi linyake panji mu Mabaibolo ghanyake. Kweniso mu viyowoyero vinyake, Baibolo likusangika lakuti mungategherezga waka. Ŵanyake ŵakutemwa kutegherezga para ŵali paulendo, ŵakuchapa, panji ŵakugwira kantchito kanyake. Namwe mungayezga nthowa iyo mukuwona kuti njiwemi kwa imwe.

Gwiliskirani ntchito vinthu ivyo vingamovwirani kupulikiska Baibolo. Mabaibolo ghanyake ghali na vinthu ivyo vingamovwirani kupulikiska ivyo mukuŵerenga. Mwachiyelezgero, ghanyake ghali na mapu. Mapu ghangamovwirani kumanya malo agho ghakuzunulika mu Baibolo na kuŵa na chithuzi cha ivyo mukuŵazga. Nkhani izo zikusangika mu magazini gha Gongwe la Mulinda na pa webusayiti ya jw.org, pa chigaŵa cha “Ivyo Baibolo Likusambizga,” zingamovwiraniso kupulikiska Baibolo.

Mungasintha. Usange mukuwona kuti mungafiska yayi kuŵazga Baibolo kufuma waka pakwamba m’paka paumaliro, mungasankha kwamba na nkhani izo mukuzitemwa chomene. Panji mungamba kuŵazga nkhani ya munthu munyake wakumanyikwa uyo wakuzunulika mu Baibolo uyo mwakhumba. Pa kabokosi kakuti “Ŵamanyani Makora Ŵanthu Awo Ŵakuzunulika mu Baibolo,” pali mazina gha ŵanthu ŵanyake awo ŵakuzunulika Baibolo. Panyake mungasankha kwamba na nkhani kuyana na nyengo iyo vinthu vikachitikira. Wuli muyezge kuŵazga nkhani za ŵanthu aŵa kuti muŵamanye makora?

Baibolo ni buku lapadera chomene. Lili na ulongozgi wakufuma kwa Mlengi withu. (2 Timote 3:16) Fundo za mu Baibolo zingatovwira chomene. Nakuti Baibolo likuti: “Mazgu gha Chiuta ngamoyo na ghankhongono.” (Ŵahebere 4:12) Baibolo lili na nkhongono zakusinthira umoyo withu munthowa zikuruzikuru ziŵiri. Yakwamba, likutipa ulongozgi uwo ukutovwira pa umoyo. Yachiŵiri, likutovwira kumumanya makora Chiuta na ivyo watilayizga.—1 Timote 4:8; Yakobe 4:8.

Lingasintha umoyo winu. Baibolo lingawovwira waliyose payekha kuyana na suzgo lake. Lingatovwira umo:

• Tingakhalira makora na ŵanji.—Ŵaefeso 4:31, 32; 5:22, 25, 28, 33.

• Tingaghanaghanira makora na kuŵa na umoyo uwemi.—Salimo 37:8; Zintharika 17:22.

• Tingaŵira na nkharo yiwemi.—1 Ŵakorinte 6:9, 10.

• Tingachitira kuti tisange vyakukhumbikwa.—Zintharika 10:4; 28:19; Ŵaefeso 4:28.a

Banja linyake ku Asia likawovwirika chomene na ulongozgi wa mu Baibolo. Pakwamba, ŵanthu ŵa banja ili ŵakasuzgikanga kuti ŵasinthe tunkharo tunyake kweniso kuti ŵayowoyeskanenge mwakufwatuka. Kweni ŵati ŵamba kulondezga ivyo ŵakasambiranga mu Baibolo, vinthu vikasintha chomene. Vicent uyo ni mutu wa banja ili, wakati: “Ivyo nkhuŵazga mu Baibolo vikunovwira chomene kumazga masuzgo ghithu mwachitemwa. Pakuti tikulondezga ivyo tikusambira tikukondwa.” Muwoli wake Annalou, wakati: “Nkhani izo tikuŵazga mu Baibolo zatovwira chomene. Sono nkhukhorwa na umoyo ndipo nkhukondwa chomene na nthengwa yithu.”

Lingamovwirani kumumanya makora Chiuta. Vicent wakayowoyaso kuti: “Para nkhuŵerenga Baibolo, nkhujipulika kuti nili pafupi chomene na Yehova kuluska kale.” Ivyo Vicent wakayowoya vikulongora kuti Baibolo lingamovwirani kumumanya makora Chiuta. Baibolo lingamovwirani kusanga ulongozgi wakovwira kweniso kuti muŵe paubwezi na Chiuta. Mumanyengeso kuti Chiuta walayizga “umoyo wanadi” uwo ngwamuyirayira. (1 Timote 6:19) Palije buku linyake ilo lili na fundo zanthena izi.

Ntheura usange namwe mulutilirenge kuŵazga Baibolo, limovwiraninge kusintha umoyo winu na kumumanya makora Chiuta. Kweni mukwenera kumanya kuti para mukuŵerenga Baibolo, fundo zinyake muzipulikiskenge yayi. Para vyamuchitikirani, kumbukirani ivyo vikachitikira nduna ya ku Etiyopiya vyaka 2000 ivyo vyajumpha. Nduna iyi yikaŵa na mafumbo ghanandi chomene pa ivyo yikaŵazganga mu Baibolo. Filipu wati wayifumba usange yikapulikiskanga ivyo yikaŵazganga, iyo yikati: “Ningapulikiska wuli kwambura kuti munthu wanilongozge?”b Iyo yikazomera kovwirika na Filipu uyo wakamanyanga makora Malemba. Filipu uyu wakaŵa msambiri wa Yesu. (Milimo 8:30, 31, 34) Usange namwe mukukhumba kupulikiska Baibolo, tikumupemphani kuti mulembe zina linu pa kafomu ako kali pa webusayiti ya www.jw.org. Panji mungalemba zina linu na kutumizga ku adiresi yakwenelera pa maadiresi agho ghakusangika mu magazini iyi. Kweniso mungapempha Ŵakaboni ŵa Yehova ŵakufupi na uko mukukhala panji mungaluta ku Nyumba ya Ufumu yapafupi. Ntheura mungachita makora kuti namwe mwambe kuŵazga Baibolo na kuzomerezga kuti limulongozgani.