Kasi Ndine Wakwenelera Kupharazga?
1. Cifukwa wuli tikwenera cara kujikayikira kuti ndise ŵambura kwenelera kupharazga?
1 Kasi muli kujifumbapo fumbo ili? Usange ni nthena, kwenjerwa yayi. Kuti tiŵe ŵateŵeti ŵakwenelera, tikukhumbikwira masambiro ghapacanya yayi nesi luso lwapadera. Ŵasambiri ŵanji ŵakwambilira ŵakayowoyekanga kuti ‘mbambura kusambira ndiposo ŵanthu bweka.’ Kweni, ŵakapharazganga makora makani ghawemi cifukwa ŵakaŵikapo mtima kulondezga umo Yesu wakacitiranga.—Mil. 4:13; 1 Pet. 2:21.
2. Kasi Yesu wakasambizganga wuli?
2 Umo Yesu Wakasambizgiranga: Yesu wakasambizganga mu nthowa yipusu, ndiposo mwakupulikikwa makora. Ŵanthu ŵakanwekanga comene kutegherezga kwa iyo cifukwa ca mafumbo agho wakafumbanga, viyelezgero ivyo wakayowoyanga, ndiposo umo wakambiranga kuyowoya nawo. (Mat. 6:26) Yesu wakatemwanga comene ŵanthu. (Mat. 14:14) Kweniso, wakayowoyanga mwakusimikizga ndiposo mwamazaza, cifukwa wakamanyanga kuti Yehova ndiyo wamupa mulimo uwu ndiposo nkhongono zakuwucitira.—Luka 4:18.
3. Kasi Yehova wakutovwira wuli kuti tifiske uteŵeti withu?
3 Yehova Wakutovwira: Kwizira mu Mazgu ghake ndiposo gulu lake, Msambizgi withu Mukuru wakutisambizga umo tingapharazgira makora makani ghawemi. (Yes. 54:13) Tingasanda na kulondezga umo Yesu wakasambizgiranga cifukwa Yehova wali kusunga mu Baibolo ivyo Yesu wakasambizganga. Yehova wakutipa mzimu utuŵa ndipo wakutisambizga kwizira mu maungano gha mpingo. (Yoh. 14:26) Kweniso, wakutisambizga kwizira mu ŵapharazgi ŵaluso awo ŵakutovwira kuti tipharazgenge mwakucontha.
4. Cifukwa wuli tikwenera kujiwona kuti ndise ŵakwenelera kupharazga makani ghawemi?
4 Tili na cifukwa cakupulikikwa ca kujiwonera kuti ndise ŵakwenelera kupharazga pakuti “kuŵa kwithu ŵakwenelera nkhanira kukufuma kwa Ciuta.” (2 Kor. 3:5) Para tikugomezga Yehova na kulondezga ivyo wakutisambizga, tiŵenge ‘ŵakukwana fikepo, ŵakunozgekera nkhanira mulimo uliwose uwemi.’—2 Tim. 3:17.