Sambiraniko Kanthu ku Maubudi gha Ŵaisrayeli
ŴAISRAYELI ŵakamanyanga makora ivyo Yehova wakakhumbanga kuti ŵacite apo ŵakanjiranga mu Caru ca Layizgano. Kwizira mwa Mozesi, Ciuta wakati: “Muŵacimbizge wose ŵenecaru panthazi pinu, muparanye vikozgo vyawo vyose na vyeruzgo vyawo vyose vyakusongonora, ndipo mungofile kuzgulira pasi malo ghose gha pacanya.”—Maŵa. 33:52.
Ŵaisrayeli ŵakeneranga yayi kupanga phangano lililose na ŵanthu ŵa mu caru ca Kenani nesi kutorana nawo. (Dute. 7:2, 3) Nakuti ŵanthu ŵakusankhika ŵa Ciuta ŵakacenjezgeka kuti: “Jicenjelere wekha, mzire ucite phangano na ŵanthu ŵenecaru uko ukuya, kuti liŵe msampha mukati mwinu.” (Ex. 34:12) Ndipouli, Ŵaisrayeli ŵakaleka kupulikira Ciuta, ndipo ŵakakoleka mu cipingo. Kasi nchivici ico cikacitiska kuti ŵacite nthena? Kasi tingasambiraci ku ivyo vikaŵacitikira?—1 Kor. 10:11.
Ubwezi Ukapangiska Kuti Ŵasopenge Vikozgo
Pambere ŵandapoke Caru ca Layizgano, Ŵaisrayeli ŵakathereska dankha ŵanthu ŵa mu caru ici. Ndipouli, ŵana ŵa Israyeli ŵakatondeka kulondezga malango ghose gha Ciuta. Ŵakatondeka kucimbizga ŵalwani ŵawo wose. (Ŵeru. 1:1–2:10) M’malo mwake, Ŵaisrayeli ŵakamba kukhala na “mitundu yinkhondi na yiŵiri” ya ŵanthu ŵa mu caru ici. Kukhala na ŵanthu ŵa mitundu iyi kukapangiska kuti ŵaŵe nawo paubwezi. (Dute. 7:1) Kasi kucita nthena kukakhwaska wuli Ŵaisrayeli? Baibolo likuti: “Ŵakatora ŵanaŵanakazi ŵa iwo kuŵa ŵawoli ŵawo, nawo ŵakapeleka ŵana ŵawo ŵanakazi ku ŵana ŵa iwo ŵanalume; ndipo ŵakateŵetera ŵaciuta ŵa iwo. Ndipo Ŵaisrayeli ŵakacita uheni pamaso pa Yehova, ŵakamuluwa Yehova Ciuta wawo, ŵakateŵetera Baala na Ashterot.” (Ŵeru. 3:5-7) Cifukwa cakuti Ŵaisrayeli ŵakamba kubatikana na ŵanthu ŵa mu caru ici, ŵakamba kutorana nawo ndiposo kusopa vikozgo. Ŵakati ŵamba kutorana nawo, Ŵaisrayeli ŵakatondeka kucimbizga ŵanthu aŵa. Kusopa kwaunenesko kukanangika, ndipo Ŵaisrayeli ŵakamba kusopa vikozgo.
Ŵanthu awo Ŵaisrayeli ŵakaŵa nawo paubwezi mu Caru ca Layizgano, ŵakaŵa ŵakofya comene mwauzimu kuluska apo ŵakaŵa ŵalwani ŵawo. Wonani cinyake ico cikwenera kuti cikapangiska kuti kusopa kwawo kunangike.
Ulimi Ukapangiska Kuti Ŵasopenge Baala
Ŵakati ŵanjira mu Caru ca Layizgano, ŵana ŵa Israyeli ŵakaleka umoyo wakwendendeka, ndipo ŵanandi ŵakamba ulimi. Nthowa za kalimiro izo ŵakagwiliskiranga nchito zikwenera kuti zikayananga na za Ŵakenani. Nchakuwonekerathu kuti Ŵaisrayeli ŵakatolera nthowa za kalimiro pera yayi. Kwendezgana na ŵanthu aŵa kukacitiskaso Ŵaisrayeli kutolera mitheto yawo yakukhwaskana na ulimi.
Ŵakenani ŵakasopanga Ŵabaala ŵanandi awo ŵakagomezganga kuti mbaciuta ŵakucitiska vundira mu munda. Padera pa kulima na kuvuna mbuto zawo, mukuluta kwa nyengo, Ŵaisrayeli ŵakamba kucindika ŵaciuta ŵa Ŵakenani kuti ndiwo ŵakacitiskanga vuna kuŵa yinandi. Ŵanthu ŵanandi mu Israyeli ŵakajilongoranga waka nga ŵakusopa Yehova, kweni ŵakaŵa ŵakugaruka.
Cenjezgo Lankhongono kwa Ise
Nchakuwonekerathu kuti apo Ŵaisrayeli ŵakamba kukorana ubwezi na ŵanthu ŵa mu Caru ca Layizgano, ŵakaŵavya maghanoghano gha kusopa Baala ndiposo kucita vinthu vinyake viheni. Kweni ndivyo vikacitika cifukwa ca mendezgano ghawo. Asi ndivyo nase tikwenera kulindizga para tikubatikana na ŵanthu awo ŵangawoneka ŵaubwezi kweni kuti Mbakhristu ŵanyithu yayi? Mbunenesko kuti nyengo zinyake cingaŵa cakwenelera kucitira vinthu lumoza na ŵanthu awo tikuleka kusopa nawo, kwali nkhu nchito, ku sukulu, panji panyumba. Ndipouli, ivyo vikacitikira Ŵaisrayeli vikuticenjezga kuti kubatikana na ŵanthu awo tikuleka kusopa nawo kungaticemera masuzgo. Baibolo likuyowoya fundo yambura kususkika iyo yikuti: “Kwendezgana na ŵaheni kukwananga makhaliro ghawemi.”—1 Kor. 15:33.
Mazuŵa ghano tikusangana na viyezgo vinandi nga ni ivyo Ŵaisrayeli ŵakasangana navyo. Ŵanthu mazuŵa ghano napo ŵakusopa ŵaciuta ŵanandi. Ŵaciuta aŵa ŵakusazgapo ndarama, ŵasanguruski, ŵakucita maseŵera, ndyali, ŵalongozgi ŵanji ŵa visopa, nanga ŵangaŵa ŵanji ŵa mu mbumba. Tingamba kusopa ŵanyake mwa ŵaciuta awo ŵazunurika apa. Kubatikana na ŵanthu awo ŵakuleka kutemwa Yehova kungananga umoyo withu wauzimu.
Kugonana kwambura kuzomerezgeka ndico cikaŵa cigaŵa cikuru pa kusopa Baala, ndipo ndiko kukapuluska Ŵaisrayeli ŵanandi. Cipingo cakuyana waka ndico mazuŵa ghano cikukora ŵanthu ŵanyake ŵa Ciuta. Mwaciyelezgero, nchambura kusuzga mazuŵa ghano kuti munthu wawone vithuzithuzi vyamuziro pa kompyuta panji TV para wali yekha mu nyumba, ndipo vingananga njuŵi yake yiwemi. Cingaŵa cacitima comene usange Mkhristu wakukoreka na cipingo ca kuwonelera vithuzithuzi vyamuziro pa Intaneti.
“Mbakutumbikika awo Ŵakusunga Visimikizgo Vyake”
Munthu wakwenera kusankha yekha usange wapulikirenge Yehova panji yayi pa nkhani ya kusankha ŵanthu ŵakwendezgana nawo. (Dute. 30:19, 20) Mwantheura, tikwenera kujifumba kuti: ‘Kasi nkhutemwa kucezga na anjani? Kasi ŵakughawona wuli malango gha Ciuta, ndipo ŵali na nkharo wuli? Kasi ŵakusopa Yehova? Kasi kucezga nawo kunikhozgenge kuti niŵe Mkhristu muwemi?’
Wamasalmo wakimba kuti: “Mbakutumbikika awo mbakufikapo mu mendero ghawo, ŵeneawo ŵakwenda mu dango la Yehova! Mbakutumbikika awo ŵakusunga visimikizgo vyake, ŵeneawo ŵakumupenjisiska na mtima wose.” (Sal. 119:1, 2) Enya, “ngwakutumbikika yose uyo wakopa Yehova na kwenda mu nthowa zake!” (Sal. 128:1) Pa nkhani ya kusankha mabwezi, mphanyi tasambirako kanthu ku maubudi agho Ŵaisrayeli ŵakacita. Tiyeni timupulikirenge comene Yehova.—Zinth. 13:20.
[Cithuzithuzi pa peji 26]
Kubatikana na awo ŵakuleka kutemwa Yehova kungapangiska kuti tisopenge vikozgo