[Bokosi pa peji 6]

Ivyo Tikwenera Kukumbuka pa Ungano wa Cigaŵa

◼ Nyengo ya Ungano: Nyengo yakwambira ungano wa mazuŵa ghose ghatatu ni 8:20 namlenji. Para kwakhala maminiti ghacoko kuti cigaŵa ca mulenji panji ca muhanya ciyambe, ceyamani wazamukhala pa pulatifomu uku sumu zaving’wenyeng’wenye zikwimba. Tose tizakakhale pasi kuti ungano uzakambe makora. Pa zuŵa lakwamba ungano uzamumara pa nyengo ya 4:25 namise, zuŵa laciŵiri uzamumara nyengo ya 3:55 namise, kweni zuŵa lacitatu uzamumara nyengo ya 2:40 namise.

◼ Malo Ghakwimikapo Vyakwendera: Pa ungano uwu pazamuŵa malo ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.

◼ Kusunga Malo: Mungazakasunga malo gha ŵanyinu awo mukwenda nawo mu galimoto yinu panji awo mukukhala nawo. Mungasungiraso awo mukucita nawo sambiro la Baibolo.—1 Kor. 13:5.

◼ Cakurya ca Muhanya: Muzakayeghe cakurya ico muzamurya pa nyengo ya kupumura ya muhanya m’malo mwa kuzakafumapo pa malo gha ungano kuti mukapenje cakurya. Mungazakayegha cakurya ico ŵanandi ŵakurya pa nyengo ya kupumura nga ni buledi, chipisi, mabisiketi, vipasi, mpunga, mboholi, mayawu, skaŵa zakukazinga, na vyakumwa. Phere likuzomerezgeka yayi pa malo gha ungano.

◼ Vyakupeleka: Kuti ungano wa cigaŵa ucitike pakukhumbikwira ndalama zinandi. Tingalongora kuwonga mwa kupeleka vyawanangwa ivyo vikovwira pa nchito ya pa caru cose. Vyawanangwa ivi tingapeleka pa Nyumba ya Ufumu panji pa ungano wa cigaŵa. Usange munthu wakukhumba kupeleka ceke pa ungano wa cigaŵa, wazakalembe pa ceke kuti “Watch Tower.”

◼ Ngozi: Usange pacitika ngozi pa ungano, kumanani na mulinda uyo wali pafupi. Mulinda ndiyo wamuphalira luŵiro Dipatimenti ya Cipatala mwakuti awo ŵali mu Dipatimenti iyi ŵawone umo ngozi iyo yiliri kuti ŵawovwirepo.

◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko ca ku America pa maungano gha Cingelezi agho ghazamucitikira ku Lilongwe na ku Blantyre. Pazamuŵa cipharazgo cakukhwaskana na maungano agha pa zuŵa lakudanga la ungano, ku cigaŵa ca mulenji.

◼ Kutepa Nkhani: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, muzakaleke kutimbanizga ŵanyinu.

◼ Kuwelerako ku Ŵakunweka: Muzakalembe mazina gha awo ŵazamunweka cifukwa ca kuŵapharazgira mwamwaŵi pa nyengo ya ungano wa cigaŵa pa fomu ya Weleraniko kwa Munthu Uyu. (S-43-TB) Ŵapharazgi ŵize ku ungano wa cigaŵa na fomu yimoza panji ghaŵiri. Mafomu agho muzamulemba muzakapeleke ku dipatimenti ya Cipinda ca Mabuku kuti ŵamanye kwakuluta nagho, panji muzakapeleke kwa mulembi wa mpingo winu para mwawera ku ungano wa cigaŵa.

◼ Kujambura Vithuzithuzi: Usange muzamujambura ŵanthu, kamera yinu yizakaleke kumulika pakujambura pa nyengo ya ungano.

◼ Selufoni: Cunani selufoni zinu mwakuti zizakaleke kupanga congo.

◼ Uteŵeti Wakujipeleka: Cimwemwe cithu pa ungano wa cigaŵa cizamusazgikira para tizamujipeleka kovwirapo milimo yinyake. (Mil. 20:25) Usange mukukhumba kuzakacita ntheura, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwirenge lumoza na mupapi wawo panji mulara waliyose uyo wazomerezgeka na mupapi wawo.

Ŵamalonda pa Maungano gha Cigaŵa

¹ Pa maungano ghithu gha cigaŵa gha cilimika camara ghakuti, “Muŵenge Maso!” cikaŵa cakukondweska comene kuwona ŵabali na ŵadumbu, ŵabwezi ŵithu ndiposo ŵakunweka ŵakucezga pa nyengo yakupumura. Ici cikacitika cifukwa ŵanandi ŵakapulikira ulongozgi wakuti tiyegherethu cakurya ca muhanya mwakuti tikaleke kufumapo pa malo gha ungano kukagura cakurya. Tikumuwongani comene ŵabali na ŵadumbu cifukwa ca kupulikira ulongozgi uwu.—Fil. 2:12, 13.

² Pakuti Maungano gha Cigaŵa gha cilimika cino gha mutu wakuti, “Skepelerani kwa Yehova!” ghaneng’enera, nchiwemi kuti tiwoneso mazgu gha mpositole Petrosi agho ghali pa 2 Petrosi 1:12, 13, agho ghakuti: “Niŵenge wakunozgeka nyengo zose kumukumbuskani vinthu ivi, nangauli mukuvimanya kale ndipo mwakhozgeka mu unenesko uwo uli mwa imwe. Kweni nkhuwona kuti nchakwenelera, apo nicali mu cihema ici, kumuwuskani mwa kumukumbuskani.” Nase tili ŵakukondwa kumukumbuskani vinthu vinyake vyakukhwaskana na umo tikwenera kuzakacitira pa maungano agha. Malipoti gha maungano gha cigaŵa ghakumanyuma ghakulongora kuti ŵabali ŵanyake ŵakafumangapo pa malo gha ungano kukagura vyakurya ku ŵamalonda awo ŵakaŵa pafupi na malo gha ungano panji ku maresitiranti. Ŵanji ŵakacitanga nthena uku ungano uli mukati. Kweniso, ŵabali na ŵadumbu ŵanyake ŵakaryanga pa nyengo yakuti nkhani zikuyowoyeka. Kucita nthena kukulongora kuti tikuyuyura maungano.

³ Ku malo ghanyake, ŵamalonda ŵakakoseranga kuti ŵapike malo pafupi na malo gha ungano kuti ŵaguliskirengepo malonda ghawo, mwakuti awo ŵiza pa ungano ŵaŵagurenge. Para tingaŵazomerezga ŵamalonda, mbwenu ŵanthu awo Mbakaboni yayi ŵasazgikanenge nase na kutimbanizga mtende pa maungano ghithu.

⁴ Pa maungano gha cigaŵa ghanyake, ŵabali ŵanyake ŵakadumbiskananga nkhani za malonda. Ŵanyake ŵakizanga na malonda ghawo nga ni mijuŵa, mphatata zakuphika na ziŵisi, vikhawu, mpunga, mandazi, vitumbuwa, matoci, mphangwe na vinyake. Ŵakacitanga nthena kuti ŵabali ndiwo ŵaŵagurenge. Ici nchakwenelera yayi. Tileke kucita cilicose cakukhwaskana na malonda pa malo gha ungano. Kucita nthena kukukolerana yayi na vifukwa vya mu Malemba ivyo tikuwunganirana pamoza.—Heb. 10: 24, 25.

⁵ Citani Vinthu Mwakwenelera: Waliyose uyo wazamuluta ku Maungano gha Cigaŵa gha mutu wakuti, “Skepelerani kwa Yehova!” wakwenera kukumbukira fundo izi: Ŵabali na ŵadumbu ŵaleke kwiza na malonda pa malo gha ungano. Ŵabali na ŵadumbu, kusazgapo ŵakunweka, ŵangazakaguranga yayi vyakurya ku ŵamalonda awo ŵangazakaŵapo pa malo gha ungano, pakuti nchambura kukayikiska kuti ŵanji ŵazamwiza na malonda. Pakuti tikukhumba kuzakasunga malo ghithu gha ungano kuŵa ghakutowa, ndiposo kuti vinthu vizakende makora, ipo nchakwenelera kuti ŵamalonda ŵazakaleke kuguliska vinthu vyawo pafupi na malo gha ungano. Usange ŵabali ŵazamukhumba kugura kanthu, ŵazakagure ku musika, panji ku masitoro pambere ungano undambe panji para wamara. Ŵalinda ŵazakapemphe ŵamalonda mwanchindi kuti ŵazakaleke kuguliska malonda ghawo pa malo ghithu ghakusoperapo. Usange ŵazamukhumba kuguliska malonda ghawo, ŵazakaguliskire kutali na malo gha ungano.—1 Pet. 1:12.

⁶ Tili ŵakukondwa comene kuti Maungano gha Cigaŵa gha mutu wakuti, “Skepelerani kwa Yehova” ghaneng’enera. Tose tinozgekere kuti tizakaŵepo mazuŵa ghose ghatatu, mwakuti tizakasangwe na ciphikiro cauzimu ico Yehova watinozgera kwizira mu gulu lake. Para tizamucita nthena, tizamuŵa ‘ŵakunozgekera nkhanira mulimo uliwose uwemi.’—2 Tim. 3:17.