LAYIBULARE YA PA INTANETI ya Watchtower

“Ŵakatumika na Mzimu Utuŵa”

“Kuchitira Ukaboni Mwakukwana vya Ufumu wa Chiuta”
- CHIGAŴA 4 • MILIMO 13:1–14:28
  
  “Ŵakatumika Na Mzimu Utuŵa”
  
  MILIMO 13:4
  
  Mu chigaŵa ichi, tisambirenge vya ulendo wakwamba wa Paulosi wa umishonale. Mu msumba na msumba, mpositole uyu wakatambuzgikanga. Kweni mwakulongozgeka na mzimu utuŵa, wakalutilira kuchitira ukaboni, na kupanga mipingo yiphya. Chigaŵa ichi chitovwirenge kuti tiŵikengepo mtima pa uteŵeti withu.

“Kuzuzgika na Mzimu Utuŵa . . . na Chimwemwe”

“Kuchitira Ukaboni Mwakukwana vya Ufumu wa Chiuta”
- PA MAULENDO
  
  Mu nyengo yakale, ulendo wapasi ukaŵanga wakuchedweska, wakuvuska, kweniso ukamalanga ndalama zinandi kuluska wa pa ngalaŵa. Ndipouli, kuti munthu wende malo ghanandi wakeneranga kwenda pasi.
  
  Munthu wakendanga mtunda wa makilomita pafupifupi 30 pa zuŵa. Wakasuzgikanga na zuŵa, vula, kotcha na kuzizima, kweniso ŵankhungu. Mpositole Paulosi wakayowoya kuti: “Pa maulendo ghane ghanandi, nkhaŵa mu ulwani wa milonga, ulwani wa vigeŵenga, ulwani wakufuma ku ŵanthu.”—2 Kor. 11:26.
  
  Mu vigaŵa vinandi vya Ufumu wa Ŵaroma mukaŵa misewu yinandi. Mu misewu yikuruyikuru, ŵanthu ŵa pa ulendo ŵakasanganga nyumba za ŵalendo zakutalikirana mtunda wa zuŵa limoza kwenda pasi. Pakatikati pa mtunda uwu pakaŵanga masitoro agho munthu wakagulangako vyakukhumbikwira. Ŵakulemba mabuku ŵa mu nyengo iyi ŵakuti nyumba za ŵalendo izi, na masitoro agha vikaŵanga vyakubinkha chomene, ŵanthu ŵakaŵanga ŵanandi chomene, mukaŵanga mtika, ndiposo mphanthi. Ghakaŵa malo ghawemi yayi, ndipo mukatemwanga kukhala ŵanthu ŵaheni chomene. Kanandi awo ŵakasunganga nyumba za ŵalendo izi, ŵakibanga katundu wa ŵalendo, ndipo ŵalendo ŵakaŵapanga mahule kuti ŵagonenge nawo.
  
  Tikukayika yayi kuti Ŵakhristu ŵakayezgayezganga kughagega malo agha. Ndipouli, apo ŵakendanga ku malo agha kukaŵavyanga ŵabali panji ŵabwezi ŵawo. Ntheura chikwenera kuti chikaŵanga chakusuzga kughagega malo agha.