Kasi Tingacita Wuli kuti Tijivikilire ku Maleriya?

Mu cifuku ndimo tikwenera kupwelelera comene kuti tijivikilire na mbumba yithu ku Maleriya. Para tingacita nthena ndikuti tikuwona umoyo nga umo Yehova wakuwuwonera. (Sal. 36:9) Kuti ŵalongore kuti ŵakuwonga cawanangwa ca umoyo, Ŵakhristu ŵakucita cilicose ico ŵangafiska kuti ŵaleke kuŵika umoyo wawo pa ngozi. Ici cikung’anamura kucita vyose ivyo vingatovwira kuti tigege matenda nga ni Maleriya.

Nthenda ya Maleriya ndiyo yikukoma ŵanthu ŵanandi, comenecomene ŵana ŵa vyaka vinkhondi kukhilira pasi. Uwemi ngwakuti tingagega nthenda iyi usange mbumba zingalondezga ulongozgi. Unduna wa Vyaumoyo ukuciska ŵanthu kuti ŵagonenge mu neti kuti ŵajivikilire ku Maleriya. Maneti agha ngakudura yayi pakuyaniska na ndalama zakugulira munkhwala, kugona ku cipatala panji kutaya umoyo wa munthu.

Ipo ŵapapi ŵakwenera kuwoneseska kuti ŵana ŵakugona mu neti kweniso kuti paluŵaza mphakutowa. Comenecomene mu nyengo ya vula, nchiwemi kuwundira panji kocha vinthu vyose ivyo nyimbo zingababiramo nga ni matayala ghakumara, madengele na cilicose ico cingasunga maji. Cifukwa wuli tikwenera kucita nthena? Nyimbo zikwandana comene mu maji agho ghakuleka kwenda.

Maleriya ghakukaŵa yayi kukoma ŵana ŵa vyaka vinkhondi kukhilira pasi para ŵandapokere munkhwala ŵakwenelera. Usange ŵapapi ŵawona waka vimanyikwiro vya Maleriya nga kocha kwa thupi, kukana cakurya, kufumira na kuwukura, ŵakwenera kucimbilira ku cipatala MWALUŴIRO na ŵana ŵawo. Kafinoro panji Panadoro ni munkhwala wa Maleriya yayi. Usange mwacedwa kuya ku cipatala, mwamukwesana na ŵadokotala pa nkhani ya ndopa, cifukwa para munthu walwara comene Maleriya ŵakumupa ndopa.

Ŵalara na ŵateŵeti ŵakovwira ndiwo ŵakwenera kuŵa pakwamba kupwelelera ŵana ŵawo. (1 Tim. 5:8) Usange ŵalara na ŵateŵeti ŵakovwira ŵakuluta luŵiro na mwana wawo ku cipatala, ŵapapi mu mpingo nawo ndimo ŵacitirenge.

Ŵanyake awo ŵakusuzgika comene para ŵalwara Maleriya mbanakazi awo ŵali na pathupi. Unduna wa Vyaumoyo ukuyowoya kuti ŵanakazi wose awo ŵali na pathupi ŵakwenera kuluta ku cipatala para ŵamanya waka kuti ŵali na nthumbo kuti ŵagege masuzgo, nga nkhumara kwa ndopa. Mama wa nthumbo uyo walije Maleriya wakubaba mwana wankhongono. (Wonani Uteŵeti Withu wa Ufumu wa Ogasiti, 2010, peji 1, na Galamukani! ya Novembala, 2009, peji 26-29).

Ŵapharazgi wose ŵakuciskika kuti ŵaphalirenge ŵalara para yunji mu mbumba yawo wali ku cipatala. Usange pacitika cinthu cinyake camabuci, ŵalara ŵamanyiskenge ŵabali awo ŵali mu Komiti Yakudumbiskana na Cipatala.

Mafumbo Ghakuweleramo

1. Kasi Maleriya ngakofya wuli comenecomene ku ŵana?

2. Kasi tingavikilira wuli mbumba yithu ku Maleriya?

3. Kasi ŵapapi awo Mbakhristu ŵakwenera kucitaci para ŵawona waka vimanyikwiro vya Maleriya?