Kasi Tingaŵawovwira Ŵabali Ŵithu?
1 Taŵanandi tili na ŵabali awo Mbakaboni ŵa Yehova yayi. Ndipo tikukhumba kuti tiyendere lumoza pa nthowa yakuya ku umoyo. Tikukhumbisiska chomene kuti nawo ŵazakasange umoyo wamuyirayira, chomene para mbabali ŵithu ŵa ndopa yimoza. Tingagongowanga yayi nanga tingaŵa kuti taŵapharazgira vyaka vinandi.
2 Apo Yesu wakapharazganga, ‘ŵanung’una ŵake ŵakapulikananga mwa iyo chara.’ (Yoh. 7:5) Panyengo yinyake, ŵabali ŵake ŵakaghanaghananga kuti wafuntha. (Mrk. 3:21) Kweni Yesu wakaleka yayi kuŵapharazgira. Pamanyuma, ŵabali ŵake ŵakasambira unenesko. (Mil. 1:14) Munung’una wake Yakobe wakazakaŵa mzati wa mpingo Wachikhristu. (Gal. 1:18, 19; 2:9) Namwe para mukukhumba kuti ŵabali ŵinu ŵasambire unenesko, kuleka yayi kuŵapharazgira.
3 Ŵasamphuskani: Ŵanthu ŵakasamphuskikanga na ivyo Yesu wakaŵasambizganga. (Mat. 11:28, 29) Wakaŵasambizganga vichoko waka ivyo ŵangapulika. Nase tikwenera kusambizga ŵabali ŵithu vichoko waka kuti ŵapulikiske. Mulaŵiliri wa dera munyake wakati: “Vikuŵa makora chomene para munthu wakupharazgira ŵabali ŵake kwa nyengo yifupi. Ivi vikovwira ŵabali ŵake kuti ŵakhumbe kupulika vinandi.” Para tachita nthena, vikovwira kuti awo ŵakususka nawo ŵambe kufumba mafumbo na kuzomera unenesko.—1 Pet. 2:2; yaniskani na 1 Kor. 3:1, 2.
4 Ŵakhristu ŵanandi ŵakupharazgira munyawo wa mu nthengwa uyo ni kaboni yayi. Ndipo nyengo zinyake ŵakujura nkhani yakukondweska mu buku, na kulileka nthena kuti munyawo wazakaŵazgepo. Ndivyo mudumbu munyake wakachitanga. Iyo wakasambizganga ŵana ŵake uku mfumu wake wakupulika, na kulongosora fundo zakuti zingawovwiraso mfumu wake. Nyengo zinyake wakamufumbanga kuti: mwahuno nasambira ivi. Imwe mukutipo wuli? Paumaliro, mfumu wake wakazomera unenesko.
5 Ŵani Ŵantchindi Kweniso Ŵakuzikira: Mupharazgi munyake wakati: “ŵabali ŵithu nawo ŵali na wanangwa wakusankha.” Ntheura tikwenera kuŵachindika para ŵakuyowoya maghanoghano ghawo panji para ŵatikanira kudumbiskana nawo fundo za mu Baibolo. (Muph. 3:7; 1 Pet. 3:15) Para tichitenge vinthu mwakuzikira, kuŵatemwa na kuŵategherezga para ŵakuyowoya, tingasanga nthowa yinyake yiwemi yakuti tiŵapharazgire kwambura iwo kumanya. Vinthu vikuŵa makora chomene para mwazikira. Ndivyo mubali munyake wakachita uyo wakakhala na muwoli wake uyo ni kaboni yayi vyaka 20. Mwanakazi uyu wakamusuzganga chomene mfumu wake. Kweni wati wamba kusintha, mfumu wake wakati: “Nkhuwonga chomene Yehova chifukwa wanovwira kuchita vinthu mwakuzikira, ndipo pasono muwoli wane wamba kwenda pa nthowa yakuya ku umoyo.”
6 Kasi mungaŵawovwira wuli ŵabali ŵinu? Para muli na nkharo yiwemi kweniso mukuŵalombera, ŵangamba kuteŵetera Yehova.—1 Pet. 3:1, 2.