Yendani mu Chipulikano, mu Kuwona Chara
Pambere Yerusalemu wandabwangandulike, mpositole Paulosi wakalemba kuti Ŵakhristu pakuŵa ŵasilikari ŵawemi ŵa Khristu, ŵakwenera kukumana na masuzgo. Ndiposo ŵakwenera kuchita vinthu vyakukondweska Chiuta. (2 Tim. 2:3, 4) Chifukwa cha masuzgo agho ghakuchitika mu charu chambura kopa Chiuta ichi, tikwenera kuŵa na chipulikano chakukhora kuti tilutilire kughanaghanira vinthu vyauzimu. (2 Kor. 4:18; 5:7) Apo mukawoneleranga vidiyo yakuti ‘Yendani Mwa Chikhulupiriro Osati Mwa Zooneka Ndi Maso’ mukawona kuti kutemwa vinthu vyakuthupi chikaŵa chipingo chiheni chomene kwa Nahamu na Abita. Para mulije vidiyo iyi mungakopera pa jw.org/ny. (Lutani pa MABUKU > MAVIDIYO) Dumbiskanani mafumbo agha:
(1) Mu nyengo ya Ŵakhristu ŵakwambilira, kasi ‘chinthu chakuseluska . . . icho chikimilira mu malo ghatuŵa’ chikaŵa chivichi? Kasi Ŵakhristu awo ŵakakhalanga mu Yerusalemu ŵakeneranga kuchitachi? (Mat. 24:15, 16) (2) Chifukwa wuli pakakhumbikwanga chipulikano kuti ŵafumemo mu Yerusalemu? (3) Padera pakuchimbira, kasi ŵakenerangaso kuchita vichi? (4) Chifukwa wuli Nahamu na Abita ŵakachedwa kufumamo mu Yerusalemu? (Mat. 24:17, 18) (5) Kasi Rakelo wakakumanaso na chiyezgo wuli apo wakafumanga mu Yerusalemu? (Mat. 10:34-37; Mrk. 10:29, 30) (6) Kasi Etani wakalongora wuli kuti wali na chipulikano kweniso kuti wakugomezga Yehova? (7) Kasi Ŵakhristu wakakumana na masuzgo wuli apo ŵakaŵa ku Pela? (8) Ntchivichi chikapangiska chipulikano cha Nahamu na Abita kuchepa pachoko na pachoko? (9) Kasi Yehova wakapwelelera wuli Ŵakhristu awo ŵakakhala ku Pela? (Mat. 6:33; 1 Tim. 6:6-8) (10) Kasi tingayezga wuli Abrahamu na Sara apo umaliro uli pafupi? (Heb. 11:8-10) (11) Chifukwa wuli Nahamu na Abita ŵakawelera ku Yerusalemu? Chifukwa wuli chikaŵa chiheni chomene kuwelera ku Yerusalemu? (Luka 21:21) (12) Kasi vinthu vikaŵa wuli Nahamu na Abita ŵati ŵawelera ku Yerusalemu? (13) Chifukwa wuli tikwenera kukhozga chipulikano chithu sono pambere umaliro wa charu ichi undize?—Luka 17:31, 32; 21:34-36.
Kwenda mu chipulikano chikung’anamura (1) kugomezga Yehova, (2) kuzomera kuti watilongozge, (3) na kulongora kuti tikuzirwiska vinthu vyauzimu kuluska vyakuthupi. Tiyeni tiŵikepo mtima kwenda mu chipulikano, pakuti “charu chikuluta na makhumbiro ghake, kweni uyo wakuchita khumbo la Chiuta wakukhalilira muyirayira.”—1 Yoh. 2:17.