Kugwiriskira Ncito Baibolo Pakuzgora

PARA tafumbika ivyo tikugomezga, ntowa yithu ya umoyo, umo tikuwonera vyakucitika vyasono na cilindizga cithu ca muntazi, tikwenera kuyezgayezga kuti tigwiriskire ncito Baibolo pakuzgora. Cifukwa wuli? Cifukwa ncakuti ni Mazgu gha Ciuta. Vigomezgo vithu nvyakuzikika mu Baibolo. Umoyo withu nawo ngwakuzikika pa Baibolo. Ilo likutovwira kumanya vyakucitika vya caru. Cilindizga cithu ca muntazi ncakuzikika comene pa vilayizgo vyakufunyilirika vya Baibolo.—2 Tim. 3:16, 17.

Tikumanya makora za ncito yithu iyo njakukolerana na zina lithu. Ndise Ŵakaboni ŵa Yehova. (Yes. 43:12) Pa cifukwa ici, para tikuzgora mafumbo, mazgoro ghithu kuti ghakuzikika mu vinjeru vya ŵantu cara, kweni ghakuzikika pa ivyo Yehova wakuyowoya mu Mazgu ghake ghakufunyilirika. Mbunenesko kuti muntu waliyose wali na kaghanaghaniro kake pa nkani zakupambana-pambana, kweni ise tikuskepelera ku Mazgu gha Ciuta kuti ghatovwire cifukwa tili na cigomezgo kuti igho mbunenesko. Baibolo likutipa wanangwa wakusanka na kucita vintu vyakupambana-pambana ivyo tikutemwa. Anteura, mu malo mwakucicizga ŵanji kuti ŵacite vintu nga ni umo tikukhumbira, ise tikwenera kusambizga ŵanyithu marango agho ghali mu Malemba. Kacitiro kanteura aka kapangiskenge ŵategherezgi ŵithu kuti nawo ŵaŵe na wanangwa wakucita vintu uwo tili nawo. Nga ni umo wakacitira mpostole Paulos, ise nase tikukhumbikwira “kuŵakhuŵirizga kuti ŵaŵe na cipulikano.”—Rom. 16:26, NW.

Yesu Kristu wakukonkoskeka pa Civumbuzi 3:14 kuŵa “Kaboni wakugomezgeka na wakuneneska.” Kasi ni mwauli umo iye wakazgolera mafumbo ndiposo umo wakacitira na mikhaliro iyo wakakumana nayo? Nyengo zinyake wakagwiriskiranga ncito ntarika izo zikapangiskanga ŵantu kughanaghana. Nyengo zinyakeso wakafumbanga muntu uyo wamufumba kuti warongosore ivyo iye wakumanya pa nkani iyo wafumba. Kwanyengo zinandi Yesu wakazunuranga ivyo malemba ghakuyowoya ndiposo wakayowoyanga nkani iyo yikukozgana na nkani yinyake mu malemba. (Mat. 4:3-10; 12:1-8; Luka 10:25-28; 17:32) Mu virimika vya mu handiredi lakudanga, mipukutu ya Malemba kanandi yikasungikanga mu masunagoge. Palije ukaboni wakuti Yesu wakaŵa na mipukutu, kweni iye wakamanya Malemba makoraghene ndipo kanandi wakatemwanga kuyazunura apo wakasambizganga ŵantu. (Luka 24:27, 44-47) Ndico cifukwa cake apo wakasambizganga wakayowoya kuti mazgu agho wakasambizganga kuti ghakaŵa ghake cara. Wakayowoyanga ivyo wakapulika kufuma ku Ŵawiske.—Yoh. 8:26.

Khumbo lithu ndakuti tirondezge ivyo Yesu wakacita. Ise tindapulikepo mazgu gha Ciuta mwakudunjika nga ni umo Yesu wakacitira. Kweni Baibolo ni Mazgu gha Ciuta. Para tikuligwiriskira ncito kuzgolera mafumbo, cikung’anamura kuti tikutceŵa kujiwoneska kuti tili na mahara. Tikurongora kuti, mu malo mwakuyowoya maghanoghano gha ŵantu ŵambura ukongorekwa, ise tikuthemba Ciuta kuti wayowoye kwizira mu mazgu ghake ghaunenesko.—Yoh. 7:18; Rom. 3:4.

Kweni ndipera, cilato cithu ncakuti tiŵazge waka Baibolo yayi, kweni tikwenera kuŵazga na kurongosora mu ntowa yakuti mutegherezgi wasange candulo. Tikwenera kuyowoya makora kuti wapulikiske. Mwakuyana na umo kaghanaghaniro ka muntu uyo kaliri, mungamba cidumbirano cakuzikika mu Baibolo mwakuyowoya kuti: “Kasi mukugomezga kuti ivyo wakuyowoya Ciuta ndivyo nvyakuzirwa?” Panji mungayowoya kuti: “Kasi mukumanya kuti Baibolo likurongosora fumbo ilo mwafumba?” Para mukuyowoya na muntu uyo wakugomezga Baibolo yayi, mukwenera kusanka upharazgi unyake. Mungayowoya kuti: “Tiyeni tiŵazgire lumoza ucimi wamwaka uwu.” Panyake mungayowoya kuti: “Tegherezgani ivyo buku ilo lang’anamurika mu viyowoyero vinandi comene mu mdauko wa muntu likuyowoya . . . ”

Nyengo zinyake mu malo mwakuŵazga Baibolo, mungarongosora waka ivyo vesi ilo mwakhumbanga kuŵazga likuyowoya. Kweni para ncamacitiko, nciweme kujura Baibolo na kuŵazga ivyo likuyowoya. Murongorani lemba mu Baibolo lake muntu uyo muli naye usange ncakwenelera. Kugwiriskira ncito Baibolo mwakudunjika kanandi kukuŵa na vyakufumapo viweme comene.—Heb. 4:12.

Ŵarara Ŵacikristu ŵakwenera kuwoneseska comene kuti ŵakugwiriskira ncito Baibolo para ŵakuzgora mafumbo. Cimoza mwa viyeneresko vyakwimikika kuŵa murara ncakuti mbali wanteura uyu “wakukoreska mazgu ghakugomezgeka agho ghakulingana na cisambizgo.” (Tito 1:9) Mutepanji muntu munyake mu mpingo wangapanga cakusanka ca mahara pamanyuma pakuti mbali murara wamupa urongozgi. Mwee, nawo mbuweme usange urongozgi wanteura uwo wazikika mu Malemba! Ciyerezgero ciweme ca mbali murara cingapangiska ŵanji kuti nawo ŵaŵe ŵasambizgi ŵaweme.