PA Epulero 14, 1989, nkhachitiskanga ungano mu tawuni ya Maumere pa Chirwa cha Flores. Mwamabuchi, ŵapolisi ŵakanjira mu nyumba iyo nkhaŵa na kukaka ine na ŵanthu ŵanyake ŵatatu.

Ŵalaŵiliri ŵa jele ŵakatichichizganga kuti tigwadire ndembera. Tati takana, ŵakatitchaya na kutitimba vibakera kweniso ŵakatiyimiska pa zuŵa lakotcha chomene kwa mazuŵa 5. Tikagonanga pa simenti ndipo tikanjenjemeranga usiku chifukwa cha kuzizima. Tikafyenyananga mu tumaselo tuchoko, tikaŵa na malikho ndipo tikavukanga chomene, kweniso vilonda vikaŵinyanga chomene. Mulaŵiliri wa jele wakatichichizga kanandi waka kuti tithere, kweni tikakana. Tikamuzgora kuti, “Tizamugwadirapo yayi ndembera m’paka apo tizamufwira.” Nga umo ŵakachitira Ŵakhristu ŵanyithu kumanyuma, tikakondwa kuti ‘tikasuzgikanga chifukwa cha urunji.’—1 Pet. 3:14.

PA Janyuwale 19, 1999, pakawuka viwawa pakati pa Ŵasilamu na Ŵakhristu ndipo ŵakayamba kutimbana. Kufuma pa nyumba yane kufika apo pakachitikiranga viwawa ivi, pakaŵa pafupifupi makilomita ghatatu. Nyengo iyi yikaŵa yiheni chomene.a

Nati nawona kuti banja lane ndakuvikilirika, nkhayimbira foni ŵabali ŵanyake kuti nimanye usange ŵali makora. Nkhaŵaphalira kuti ŵakwenera kukhazika mtima pasi ndipo ŵaleke kuluta ku malo uko ŵanthu ŵakatimbananga. Pamanyuma, ŵalara ŵakendera ŵabali na kuŵakhozga mwauzimu ndiposo kuŵachiska kuti ŵalutilire kuwungana mu tumagulu.

Ofesi ya munthavi yikatiphalira kuti tiphalire ŵabali awo ŵakakhalanga ku malo uko ŵanthu ŵakatimbananga kuti ŵawukeko. Ntheura tikatuma uthenga ku mabanja ghanandi agho ghakakhalanga ku malo agha. Mubali munyake uyo wakakana kuwukako ku malo agha, ŵakamukoma na futi. Kweni waliyose uyo wakapulikira ulongozgi wakufuma ku ofesi ya munthavi wakapona.