Ufumu Ukutonda Kukhozgera Makani Ghawemi Mwakuyana na Dango

TIYELEZGERE kuti mukupharazga nyumba na nyumba, mbwenu mukupulika kulira kwa galimoto ya polisi pataliko. Chiwawa chikusazgikira. Apo imwe mukwamba kuyowoya na munthu munyake, munyinu uyo mwenda nayo watimbanizgika na chongo cha galimoto. Nakalinga galimoto ya polisi yikwimilira pafupi. Mpolisi wakufuma na kwiza, wakuti: “Kasi mwaŵaŵiri imwe mukwenda nyumba na nyumba kuyowoya vya Baibolo? Ŵanthu ŵadandawurenge waka na imwe!” Imwe mukuzgora mwantchindi, ndipo mukuzomera kuti ndimwe Ŵakaboni ŵa Yehova. Mukughanaghana kuti vingamara wuli?

Vithembenge pa ivyo vili kuchitikapo kumanyuma. Kasi boma la charu chinu likuchita nawo wuli Ŵakaboni ŵa Yehova? Kasi ŵanthu mbanangwa kusopa? Usange mbanangwa, panji ntchifukwa chakuti ŵabali na ŵadumbu ŵinu kumanyuma uku, ŵakagwira ntchito yikuru “pakuvikilira na kukhozgera makani ghawemi mwakuyana na dango.” (Fil. 1:7) Tose, kwali tikukhala nkhu, tingakhozga chipulikano chithu para tingamanya vya milandu iyo Ŵakaboni ŵa Yehova ŵatonda. Mu chigaŵa ichi, tiwonengepo yinyake. Milandu iyo tatonda mbukaboni wakuti Ufumu uliko nadi, chifukwa patekha tingakwaniska yayi.