SAMBIRO 7

Kuyowoya Unenesko Kweniso Mwakukhorweska

Luka 1:3

FUNDO YIKURU: Gwiliskirani ntchito ukaboni wakugomezgeka kuti muwovwire ŵategherezgi ŵinu kufika pa fundo yeneko.

Chitani kafukufuku. Fundo zinu zikwenera kujintha mu Baibolo, ndipo para ntchamachitiko ŵazgani mu Baibolo. Para muyowoyenge fundo yinyake yakukhwaskana na sayansi, nkhani ya mu nyuzipepara, pa TV, Intaneti, chakuchitika chinyake, panji ukaboni unyake, mukwenera kufufuza dankha usange ni vyaunenesko kweniso vyasono.
Gwiliskirani ntchito makora vyakufufuzira nkhani. Gwiliskirani ntchito malemba kuyana na nkhani iyo ghakuyowoya, uthenga ukuru wa mu Baibolo, kweniso kuyana na ivyo mabuku gha “muzga wakugomezgeka na wavinjeru” ghakuyowoya. (Mat. 24:45) Gwiliskirani ntchito mabuku ghacharu panji vinthu vinyake kuyana na umo vili kulembekera kweniso kuyana na chilato cha uyo wakalemba.

Mungasazgirangako fundo zinu panji kuŵikako tunthendero ku fundo zenecho yayi. Woneseskani kuti mazgu nga ghakuti “ŵanthu ŵanyake” ghaleke kuzgoka “ŵanthu ŵanandi,” “nyengo zinyake” kuŵa “nyengo zose,” na “panyake” kuŵa “ndimo viliri.”
Ghanaghaniranipo maukaboni. Para mwaŵazga lemba panji mwayowoya ukaboni unyake, fumbani mafumbo ghakwenelera panji yowoyani chiyelezgero kuti movwire ŵategherezgi kuti ŵafikepo ŵekha pa fundo yikuru.