Ivyo Ŵakutorana Ŵangachita Kuti Ŵakhozge Nthengwa Yawo

Abrahamu na Sara ŵakatemwananga na kuchindikana, ndipo ntchiyelezgero chiwemi kwa ŵakutorana. (Ge 12:11-13; 1Pe 3:6) Kweni mbumba yawo yikaŵa yakufikapo yayi, ndipo nawo ŵakeneranga kuzizipizga masuzgo. Kasi mbumba zingasambirako vichi kwa Abrahamu na Sara?

Mudumbiskanenge. Muzgorenge mwakuzikira para munyinu wamuyowoyerani uheni chifukwa chakuti wali na masuzgo panji wakhuŵara na vinthu vinyake. (Ge 16:5, 6) Muŵenge na nyengo yakuchitira lumoza vinthu. Ivyo mukuyowoya na kuchita vilongorenge kuti mukumutemwa chomene munyinu. Kuluska vyose, ŵikani Yehova pakwamba mu nthengwa yinu. Kuti muchite nthena mukwenera kusambira Mazgu gha Chiuta, kulomba, na kusopera lumoza. (Mu 4:12) Mbumba zakukhora zikuchindika Yehova uyo wakambiska nthengwa.

WONELERANI VIDIYO YA MUTU WAKUTI UMO TINGAKHOZGERA NTHENGWA YITHU, NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi mu vidiyo iyi, ntchivichi changulongora kuti chitemwa chamba kuchepa pakati pa Shaan na Kiara?

• Chifukwa wuli ntchakuzirwa kuti ŵakutorana ŵadumbiskanenge mwakufwatuka?

• Kasi chiyelezgero cha Abrahamu na Sara, chikawovwira wuli Shaan na Kiara?

• Kasi Shaan na Kiara ŵakachita wuli kuti ŵakhozge nthengwa yawo?

• Chifukwa wuli mfumu na muwoli ŵakwenera yayi kukhazga kuti munyawo wa mu nthengwa wachitenge waka makora kwambura kubudiska?