Maliferensi gha Uteŵeti na Umoyo Wachikhristu—Kabuku ka Maungano
MEYI 3-9
Ivyo Tasambira
it-2-E 528 ¶5
Sembe
Sembe ya vyakumwa. Sembe ya vyakumwa yikapelekekanga pamoza na sembe zinyake, chomenechomene apo Ŵaisrayeli ŵakati ŵakhazikika mu Charu cha Layizgano. (Maŵ 15:2, 5, 8-10) Sembe iyi yikaŵanga vinyo (“chakumwa chakuloŵezga”) ndipo ŵakayithiranga pa jotchero. (Maŵ 28:7, 14; yaniskani na Ek 30:9; Maŵ 15:10.) Mpositole Paulosi wakalembera Ŵakhristu ŵa ku Filipi kuti: “Nkhujipeleka nga ni sembe ya chakumwa iyo yikupungulika pa sembe ndiposo pa uteŵeti wakupatulika, ivyo namwe mukuchita pakuŵa na chipulikano, nkhukondwa.” Apa Paulosi wakajiyelezgera na sembe ya chakumwa, kuti walongosore kujipeleka kwake pakuteŵetera Ŵakhristu ŵanyake. (Fil 2:17) Kukati kwakhala mazuŵa ghachoko waka kuti wafwe, Paulosi wakalembera Timote kuti: “Nkhupungulika kale nga ni sembe ya chakumwa, ndipo nyengo ya kufwatuka kwane yili pafupi.”—2Ti 4:6.
MEYI 10-16
MAZGU GHA CHIUTA MBUSAMBAZI | MAŴAZGO 30-31
“Fiskani Vilapo Vinu”
it-2-E 1162
Chilapo
Munthu Wakakhumbanga Yekha Kulapa, Kweni Para Walapa Waka Wakeneranga Kufiska. Munthu wakachitanga vilapo mwakukhumba kwake. Kweni para walapa waka, dango la Chiuta likakhumbanga kuti wafiske ivyo walapa, wakhumbe waleke. Ntheura para munthu walapa chilapo ‘wakeneranga kuziŵizga chinthu chinyake pa umoyo wake,’ ndipo umoyo wake ukaŵanga pangozi usange wangatondeka kufiska ivyo wayowoya. (Maŵ 30:2; wonaniso Ro 1:31, 32.) Pakuti umoyo ukaŵanga pangozi, lekani ntchakupulikikwa kuti Malemba ghakati munthu uyo walapenge wakeneranga kuŵa maso chomene pambere wandalape, ndipo wakeneranga kughanaghanira udindo uwo waŵenge nawo. Dango likati: “Para wachita chilapo kwa Yehova . . . Chiuta wako wachikhumbenge nadi kwa iwe. Usange ukufiska chara, uŵenge wakwananga.”—Do 23:21, 22.
Ivyo Tasambira
it-2-E 1162
Chilapo
Chilapo ni para munthu walayizga Chiuta kufumira pasi pamtima kuti wachitenge chinthu chinyake, nga nkhupeleka sembe panji chawanangwa, kuchita uteŵeti unyake panji kulapa kuti wachitenge yayi vinthu vinyake nangauli vingaŵa viwemi waka. Munthu wakachitanga chilapo mwakukhumba yekha. Pakuti munthu wakalayizganga Yehova kufumira pasi pamtima, chilapo chikaŵanga na nkhongono chomene. Ndipo nyengo zinyake mazgu ghaŵiri ghakuti chilapo na layizgo ghakwendera lumoza mu Baibolo. (Maŵ 30:2; Mt 5:33) “Layizgo” ni para munthu wayowoya kuti wachitenge chinthu chinyake ndipo waŵikapo mtima kuti wachitenge chinthu icho, apo “chilapo” ni para munthu wakuyowoya ku wamazaza kuti ivyo wakuyowoya ni vyaunenesko. Kanandi chilapo chikwendera lumoza na phangano.—Ge 26:28; 31:44, 53.
Ivyo Tasambira
it-2-E 28 ¶1
Yefita
Ŵanthu ŵakapelekekanga kuti ŵakateŵetere Yehova mu malo ghakupatulika. Ŵapapi ŵakaŵa na wanangwa kuchita nthena. Ndipo Samuyeli wakaŵa yumoza mwa ŵanthu awo ŵakapelekekapo kuti ŵakateŵetere mu malo ghakupatulika. Amama ŵake a Hana ŵakachita chilapo pambere wandababike kuti wamuteŵetera pa chihema. Mfumu wake Elikana wakazomerezga chilapo ichi. Samuyeli wati walumulika waka, Hana wakamupeleka kuti wakateŵeterenge mu malo ghakupatulika. Wakaluta nayo pamoza na ng’ombe yakupeleka sembe. (1Sa 1:11, 22-28; 2:11) Samusoni nayo wakaŵa mwana munyake uyo wakapelekeka kuteŵetera Yehova nga Munaziri.—Ŵer 13:2-5, 11-14; yaniskani mazaza agho dada wakaŵanga nagho pa mwana msungwana nga umo vyalembekera pa Maŵ 30:3-5, 16.
MEYI 17-23
MAZGU GHA CHIUTA MBUSAMBAZI | MAŴAZGO 32-33
“Muŵachimbizge Pamaso Pinu Wose Awo Ŵakukhala mu Charu”
it-1-E 404 ¶2
Kenani
Pa nkhani yakuparanya Ŵakenani, Joshuwa “wakasidako chara vyose ivyo Yehova wakalangulira Mozesi.” (Jos 11:15) Kweni mtundu wa Israyeli ukatondeka kulondezga ulongozgi wake uwemi kuti uwuskemo vyose ivyo vingambiska masuzgo mu charu. Ŵakenani awo ŵakalutilira kukhala nawo lumoza ŵakachemeranga masuzgo Ŵaisrayeli, mwakuti pamanyuma ŵakapangiska kuti Ŵaisrayeli ŵanandi ŵafwe (kweniso pakaŵaso masuzgo gha uchigeŵenga, nkharo ziheni, na kusopa vikozgo). Ŵaisrayeli ŵaparanyirengethu Ŵakenani, mphanyi ŵakasangana nagho yayi masuzgo agha. (Maŵ 33:55, 56; Ŵer 2:1-3, 11-23; Sa 106:34-43) Yehova wakaŵa kuti waŵachenjezgerathu Ŵaisrayeli kuti wazamuŵalanga usange ŵatondekenge kupulikira malango ghake, kweniso kuti usange ŵaŵenge paubwezi na Ŵakenani, kutolerana nawo nthengwa, kweniso kutolera kasopero kawo, panji kuchita mikhaliro yinyake yiheni. Para ŵachitenge nthena, ŵajichemerenge ŵekha suzgo, ndipo ‘charu chiŵawukurenge.’—Ek 23:32, 33; 34:12-17; Le 18:26-30; Do 7:2-5, 25, 26.
Ivyo Tasambira
it-1-E 359 ¶2
Mphaka
Para ŵachita mphenduzga, na kumanya charu icho fuko lililose lipokenge, pamanyuma ŵakawonangaso ukuru wa charu icho fuko lingapokera mwakutolera umo charu chiliri kukura kwake. Chiuta wakaŵaphalira kuti: “Muchite mphenduzga pa kugaŵa charu mu mbumba zinu. Awo mbanandi, muŵasazgireko chiharo, awo mbachoko muŵachepeskereko chiharo chawo. Waliyose wapokerenge chiharo chake kuyana na apo pawira mphenduzga.” (Maŵ 33:54) Malo agho mphenduzga yawirapo ŵakaghasinthanga yayi, m’malo mwake ŵakasazgirangako waka usange ngachoko panji kuchepeskako usange ngakuru chomene mwakuyana na umo fuko liliri. Lekani ŵakati ŵawona kuti charu cha Yuda ntchikuru chomene, chinyake chikapelekeka ku fuko la Simiyoni.—Jos 19:9.
MEYI 24-30
Ivyo Tasambira
w91-E 2/15 13 ¶13
Chiwombolero Chakuyana Chakuwombolera Ŵanthu Wose
Adamu na Eva ŵakupindura yayi na sembe yakuwombora. Mu Dango la Mozesi mukaŵa fundo yakuti: “Mungapokanga yayi chiwombolero cha umoyo wa wakukoma ŵanthu uyo wakwenelera kufwa.” (Maŵazgo 35:31) Adamu wakapusikika yayi, kweni wakanangira dala. (1 Timote 2:14) Ichi chikapangiska kuti ŵana ŵake ŵahare kwananga na kupokera chilango cha nyifwa. Nadi, Adamu pakuŵa munthu wakufikapo, wakeneranga nadi kufwa chifukwa wakasankhira dala kuleka kupulikira dango la Chiuta. Sembe yakuwombora yigwirenge ntchito pa Adamu, mphanyi vikupambana na fundo zaurunji za Yehova. Ndipouli, pakuti Yesu wali kulipira kwananga uko Adamu wakachita, vili kupeleka mwaŵi ku ŵana ŵa Adamu kuti ŵaleke kupokera chilango cha nyifwa muyirayira. (Ŵaroma 5:16) Tingayowoyaso kuti Yesu wali kudumura icho chikwambiska kwananga. Iyo ‘wakacheta nyifwa m’malo mwa munthu waliyose,’ na kunyamura zakwananga za ŵana ŵose ŵa Adamu.—Ŵahebere 2:9; 2 Ŵakorinte 5:21; 1 Petrosi 2:24.
MEYI 31–JUNI 6
MAZGU GHA CHIUTA MBUSAMBAZI | DOTORONOME 1-2
“Cheruzgo Ntcha Chiuta”
w96-E 3/15 23 ¶1
Yehova Wakutemwa Urunji na Weruzgi Wakunyoloka
Ŵalara mu mpingo ŵali na mulimo wakweruzga usange munyake wachita kwananga kukuru. (1 Ŵakorinte 5:12, 13) Pakweruzga, ŵakukumbuka kuti Chiuta wakweruzga mwaurunji ndipo ŵakwenera kumulongora lusungu munthu usange ntchakwenelera. Kweni ŵangalongora yayi lusungu usange palije chifukwa chakulongolera lusungu, nga umo vikuŵira ku ŵanthu awo mbambura kulapa. Ndipouli, ŵalara ŵakuwuskamo wakwananga mu mpingo chifukwa chakuti ŵakukhumba kuwezgera yayi. Iwo ŵakugomezga kuti para munthu wasezgeka, vikovwira kuti wajinyumwe kuti wanozge ivyo wakabudiska. (Yaniskani na Ezekiyeli 18:23.) Mwakulongozgeka na Khristu, ŵalara ŵakuwoneseska kuti ŵakulondezga urunji pakweruzga, ndipo ichi chikusazgapo kuŵa nga ni “malo ghakubisamamo mphepo.” (Yesaya 32:1, 2) Ntheura iwo ŵakwenera yayi kutemwera kweniso ŵakwenera kuchita vinthu mwamahara.—Dotoronome 1:16, 17.
JUNI 7-13
MAZGU GHA CHIUTA MBUSAMBAZI | DOTORONOME 3-4
“Malango gha Yehova Ngavinjeru Kweniso Ngaurunji”
it-2-E 1140 ¶5
Kupulikiska
Usange munthu ŵakuŵikapo mtima kuŵerenga Mazgu gha Chiuta na kughalondezga, wangaŵa na mahara kuluska awo ŵakumusambizga kweniso kupulikiska vinthu kuluska ŵanalume ŵalara. (Sa 119:99, 100, 130; Yaniskani na Lu 2:46, 47.) Vili nthena chifukwa chakuti vinjeru na kupulikiska vinthu, ni vyakujintha pa malango gha Chiuta na vyeruzgo vyake. Lekani para Ŵaisrayeli ŵapulikira na kulondezga, ŵanthu ŵamitundu yinyake iyo yakaŵazingilizga ŵakaŵawonanga kuti “mbanthu ŵavinjeru na ŵakupulikiska nadi.” (Do 4:5-8; Sa 111:7, 8, 10; yaniskani na 1Ma 2:3.) Munthu uyo wakupulikiska vinthu wakumanya kuti wakwenera yayi kuswa malango gha Chiuta, ndipo wakuchita vinthu mwakukolerana na malango agha, kweniso wakupempha Chiuta kuti wamovwire pa nkhani iyi. (Sa 119:169) Iyo wakuzomerezga kuti uthenga wa Chiuta ukhazikike mu mwa iyo (Mt 13:19-23), na kulembeka mu mtima mwake, (Zi 3:3-6; 7:1-4), ndipo wakwamba kutinkha “nthowa yiliyose yautesi” (Sa 119:104). Mwana wa Chiuta apo wakaŵa pa charu chapasi, wakalongora kupulikiska vinthu munthowa iyi ndipo wakakana nanga nkhuyezga, kuti wagege nyifwa ya pa khuni lakusuzgikirapo chifukwa wakeneranga kufiska Malemba kuti wazamufwa munthowa iyi.—Mt 26:51-54.
w99-E 11/1 20 ¶6-7
Para Ŵanandi Ŵali na Mtima Wakupa
Fumukazi yikati yazizikika na ivyo yikapulika na kuwona, mwakujiyuyura yikayowoya kuti: “Mbakukondwa ŵateŵeti ŵako awo ŵakwimilira pamaso pako nyengo zose, kupulika vinjeru vyako.” (1 Mathemba 10:4-8) Iyo yikayowoyapo yayi kuti ŵateŵeti ŵa Solomoni mbakukondwa chifukwa ŵakazingilizgika na ŵanthu ŵasambazi, nangauli ndimo vikaŵira nadi. M’malo mwake, ŵateŵeti ŵa Solomoni ŵakaŵa ŵakukondwa chifukwa nyengo zose ŵakategherezganga vinjeru vya Solomoni ivyo Chiuta wakamupa. Fumukazi ya ku Sheba ntchiyelezgero chiwemi chomene ku ŵanthu ŵa Yehova mazuŵa ghano, awo ŵakuthemba vinjeru vya Mlengi na Mwana wake Yesu Khristu.
Kweniso wonani fundo yakulondezgapo iyo fumukazi yikayowoya kwa Solomoni. Iyo yikati: “Walumbike Yehova Chiuta wako.” (1 Mathemba 10:9) Ntchakuwonekerathu kuti yikawona kuti Yehova wakamutumbika Solomoni mwakumupa vinjeru kweniso usambazi. Ivi vikukolerana na ivyo Yehova wakalayizga Ŵaisrayeli kukwambilira. Iyo wakati: ‘Usange mwamusungilira malango ghane, mwamuwoneka ŵavinjeru na ŵakupulikiska pamaso pa ŵanthu awo ŵamupulika vya malango ghose agha. Ndipo ŵamuyowoya kuti: ‘Ŵanthu ŵa mtundu ukuru uwu mbanthu ŵavinjeru na ŵakupulikiska nadi.’’—Dotoronome 4:5-7.
JUNI 28–JULAYI 4
Ivyo Tasambira
it-1-E 103
Ŵaanaki
Ukaŵa mtundu wa viŵanthu vikuruvikuru uwo ukakhalanga mu chigaŵa cha mapiri mu charu cha Kenani kweniso mu vigaŵa vinyake vya mumphepete mwa nyanja, chomenechomene chakumwera. Nyengo yinyake ŵanalume ŵatatu ŵakumanyikwa Ŵaanaki awo mazina ghawo ni Ahimani, Sheshayi, na Talimayi, ŵakakhalanga ku Heburoni. (Maŵ 13:22) Kukaŵa ku malo agha uko mphachi 12 za Ŵahebere zikawona Ŵaanaki, ndipo 10 mwa mphachi izi zikapeleka lipoti lakofya kuti ŵanthu aŵa ŵakaŵa mphapu ya Ŵanefili awo ŵakaŵako pambere Chigumula chindachitike, ndipo mphachi izi zikati zikawonekanga nga ni “mphazi” pakuyaniska na Ŵaanaki. (Maŵ 13:28-33; Do 1:28) Pakuti ŵakaŵa ŵamsinkhu ukuru, lekani ŵakaŵazunuranga pakuyaniska na ŵanthu ŵanyake ŵakuru na ŵataliŵatali, Ŵaemimu na Ŵarefayimu. Pakuti ŵakaŵa ŵankhongono, ŵanthu ŵakayowoyanga vya iwo kuti: “Ni njani wangima ku ŵana ŵa Anaki?”—Do 2:10, 11, 20, 21; 9:1-3.