Maliferensi gha Uteŵeti na Umoyo Wachikhristu—Kabuku ka Maungano
JANYUWALE 10-16
MAZGU GHA CHIUTA MBUSAMBAZI | ŴERUZGI 17-19
“Munthu Wakusangana na Masuzgo Para Waleka Kupulikira Malango gha Chiuta”
it-2-E 390-391
Mika
1. Wakaŵa munthu wa ku Efurayimu. Iyo wakaswa dango la nambara 8 pa Malango 10 (Ek 20:15), ndipo wakiba ndalama za siliva 1,100 za amama ŵake. Wati wazomera kuti wakatora ndiyo na kuwezga, iyo wakayowoya kuti: “Nituŵiskirenge Yehova siliva lakufuma mu woko lane kuti mwana wane wapangire chikozgo chakuŵaja na chikozgo chakusongonora. Sono nkhuwezgera kwa iwe.” Kufuma apo, iyo wakatora masiliva 200 na kukapeleka kwa wakufura siliva ndipo wakapanga “chikozgo chakuŵaja na chikozgo chakusongonora” icho pamanyuma ŵakazakachiŵika mu nyumba ya Mika. Mika uyu wakaŵa na “nyumba ya ŵachiuta,” ndipo wakapanga efodi na vikozgo vya terafimu, ndipo wakimika yumoza wa ŵana ŵake kuŵa wasembe wake. Nangauli iyo wakachita ivi kuti wachindike Yehova, kweni kukaŵa kwananga kukuru chifukwa vikasuskananga na dango la kukanizga kusopa vikozgo (Ek 20:4-6) ndipo wakasulako za chihema cha Yehova pamoza na ŵasembe ŵake. (Ŵer 17:1-6, mazgu ghamusi; Do 12:1-14) Pamanyuma, Mika wakatora Yonatani mwana wa Gerishomu uyo wakaŵa mwana wa Mozesi na kuluta nayo ku nyumba kwake na kumulemba ntchito Mulevi uyu kuŵa wasembe wake. (Ŵer 18:4, 30) Pakuti Mika wakawonanga nga wachita makora waka, iyo wakati: “Sono namanya kuti Yehova wanichitirenge uwemi.” (Ŵer 17:7-13) Kweni Yonatani wakaŵa wa mzere wa Aroni yayi, ntheura wakaŵaso wakwenelera yayi kuchita mulimo wa usembe ndipo wose uwu ukaŵa ubudi uwo Mika wakachita.—Maŵ 3:10.
it-2-E 391 ¶2
Mika
Pamanyuma, Mika pamoza na ŵanthu awo wakakhalanga nawo ŵakawungana na kuŵalondezga Ŵadani. Ŵakati ŵaŵasanga, Ŵadani ŵakafumba chifukwa icho ŵaŵalondezgera ndipo Mika wakati: “Mwatora ŵachiuta ŵane awo nkhapanga, ndipo mwatora na wasembe wane wuwo. Ine nakhala na vichi pera?” Ndipo Ŵadani ŵakachenjezga Mika kuti wangajiziyamo usange walutilirenge kuŵalondezga na kuŵachemerezga. Mika wakawelera ku nyumba yake wakati wawona kuti Ŵadani mbankhongono kuluska gulu lake. (Ŵer 18:22-26) Kufuma apo, Ŵadani ŵakatimba ŵanthu ŵa ku Layishi na kotcha msumba wawo na kuzengapo msumba wa Dani pa malo agha. Yonatani na ŵana ŵake ndiwo ŵakaŵa ŵasembe ŵa Ŵadani, awo “ŵakaŵika chikozgo chakuŵaja icho Mika wakapanga, [ndipo] chikakhala kwenekura mazuŵa ghose agho nyumba ya Chiuta waunenesko [panji kuti chihema] yikaŵira ku Shilo.”—Ŵer 18:27-31.
FEBULUWALE 21-27
MAZGU GHA CHIUTA MBUSAMBAZI | 1 SAMUYELI 6-8
“Kasi Themba Linu Ni Njani?”
it-2-E 163 ¶1
Ufumu wa Chiuta
Ŵanthu Ŵakapempha Themba. Vyaka pafupifupi 400 kufuma apo Ŵaisrayeli ŵakafumira ku Eguputo kweniso vyaka vyakujumpha 800 kufuma apo Chiuta wakachitira phangano na Abrahamu, Ŵaisrayeli ŵakapempha themba kuti liŵalongozgenge nga umo vikaŵira na mitundu yinyake kuti yikaŵanga na mathemba. Pempho lawo ili likang’anamuranga kuti ŵamukana Yehova kuŵa themba lawo. (1Sa 8:4-8) Ŵanthu ŵakakhazganga kuti Chiuta wakhazikiskenge ufumu mwakuyana na ivyo wakalayizga Abrahamu na Yakhobe. Iwo ŵakaŵa na chigomezgo ichi kwizira mu uchimi uwo Yakhobe wakayowoya apo wakaŵa pafupi kufwa wakukhwaskana na Yuda (Ge 49:8-10), mazgu agho Yehova wakayowoya ku Ŵaisrayeli ŵati ŵafuma mu Eguputo (Ek 19:3-6), ivyo vikaŵa mu phangano la Dango (Do 17:14, 15), kweniso kwizira mu uthenga uwo Chiuta wakapangiska ntchimi Balamu kuyowoya. (Maŵ 24:2-7, 17). Hana uyo wakaŵa mama wa Samuyeli nayo wakalongora kuti wakagomezganga ivi kwizira mu lurombo ulo wakalomba. (1Sa 2:7-10) Ndipouli, Yehova wakaŵa kuti wandavumbure “chisisi chakupatulika” chakukhwaskana na Ufumu wake. Kweniso wakaŵa kuti wandavumbureso nyengo iyo Ufumu uwu ukhazikiskirenge panji umo boma ili liŵirenge kwali liŵenge la pa charu chapasi panji kuchanya. Ntheura Ŵaisrayeli ŵakachimbilira kupempha themba lakuti liŵawusenge.
FEBULUWALE 28–MALICHI 6
MAZGU GHA CHIUTA MBUSAMBAZI | 1 SAMUYELI 9-11
“Sauli Wakamba Mwakujiyuyura Chomene”
w95-E 12/15 10 ¶1
Ŵaamoni Ŵakachita Nkhaza pa Lusungu Ulo Yehova Wakaŵalongora
Kachiŵiriso Ŵaamoni ŵakachita mwankhaza na lusungu ulo Yehova wakaŵalongora. Yehova wakalekelera yayi nkhaza ziheni izi. “Mzimu wa Chiuta ukamupa nkhongono Sauli wakati wapulika mazgu agha [gha Nahashi], ndipo wakagolera na ukali.” Mwakulongozgeka na mzimu wa Chiuta, Sauli wakawunganya ŵasilikari 330,000 awo ŵakakoma Ŵaamoni “mwakuti pakaŵavya ŵanthu ŵaŵiri awo ŵakakhala pamoza.”—1 Samuyeli 11:6, 11.