SAMBIRO 17
Kasi Yesu Wakaŵa Munthu Wuli?
Para tamanya ivyo Yesu wakayowoyanga na kuchita apo wakaŵa pa charu chapasi, vikutovwira kumanya mikhaliro yinyake iyo wakaŵa nayo. Kweniso vikutovwira kuti tiŵe paubwezi wakukhora na iyo na Adada ŵake, Yehova. Kasi Yesu wakaŵa na mikhaliro wuli yiwemi? Kasi ise tingamuyezga wuli?
1. Kasi Yesu wakuyana wuli na Adada ŵake?
Apo wakaŵa kuchanya, Yesu wakawonanga vyose ivyo Adada ŵake ŵakachitanga kwa vyaka vinandi lekani wali kusambirako vinandi chomene. Ivi vikamovwira kuti wachitenge vinthu, kughanaghana kweniso kujipulika nga Adada ŵake. (Ŵazgani Yohane 5:19.) Yesu wakayezganga mikhaliro ya Adada ŵake, lekani wakayowoya kuti: “Uyo wawona ine wawona na Adada wuwo.” (Yohane 14:9) Apo mukusambira mikhaliro ya Yesu, vimovwiraninge kuti mumumanye makora Yehova. Mwachiyelezgero, Yesu wakachitiranga chiwuravi ŵanthu, ivi vikulongora kuti Yehova wakupwelelera chomene ŵanthu.
2. Kasi Yesu wakalongora wuli kuti wakatemwanga Yehova?
Yesu wakati: “Mwakuti charu chimanye kuti ine nkhutemwa Adada, ntheura nkhuchita nga umo Adada ŵaniphalilira.” (Yohane 14:31) Apo Yesu wakaŵa pa charu chapasi, wakalongora kuti wakatemwanga chomene Adada ŵake chifukwa wakaŵapulikiranga pa chilichose nanga pangaŵa pakusuzga kuchita nthena. Yesu wakatemwangaso chomene kuyowoya vya Adada ŵake kweniso kovwira ŵanthu kuti ŵaŵe nayo paubwezi.—Yohane 14:23.
3. Kasi Yesu wakalongora wuli kuti wakutemwa ŵanthu?
Baibolo likuti Yesu ‘wakakondwanga chomene na ŵanthu.’ (Zintharika 8:31) Iyo wakalongora chitemwa apo wakakhozganga na kovwira ŵanthu mu nthowa zakupambanapambana. Yesu wakachitanga minthondwe kuti walongore waka nkhongono izo wakaŵa nazo yayi, kweni chifukwa chakuti wakachitiranga chitima ŵanthu. (Mariko 1:40-42) Wakatemweranga yayi, wakachitiranga chitima munthu waliyose. Ivyo wakayowoyanga vikakhozganga ŵakusweka mitima awo ŵakamutegherezganga. Yesu wakalolera kusuzgika na kufwa chifukwa chakuti wakatemwanga ŵanthu. Kweni chomene wakatemwanga awo ŵakalondezganga ivyo wakasambizganga.—Ŵazgani Yohane 15:13, 14.
MANYANI VINANDI
Manyani mikhaliro yinyake iyo Yesu wakaŵa nayo, kweniso ivyo tingachita kuti timuyezge.
4. Yesu wakutemwa Adada ŵake
Yesu ntchiyelezgero chiwemi chomene cha umo tingalongolera kuti tikutemwa Chiuta. Ŵazgani Luka 6:12 na Yohane 15:10; 17:26, kufuma apo dumbiskanani fumbo ili:
Kasi tingamuyezga wuli Yesu pa nkhani ya kutemwa Yehova?
Yesu wakaŵatemwanga chomene Adada ŵake ŵakuchanya ndipo wakayowoyanga nawo nyengo zose mu lurombo
5. Yesu wakaghanaghaniranga chomene ŵanthu awo ŵakakhumbikwiranga wovwiri
Yesu wakadangizganga vyakukhumba vya ŵanyake m’malo mwa vyake. Nanga ni apo wakavuka chomene, wakapaturanga nyengo kweniso kugwiliskira ntchito nkhongono zake kuti wawovwire ŵanthu. Ŵazgani Mariko 6:30-44, kufuma apo dumbiskanani mafumbo agha:
Kuyana na ivyo mwaŵerenga mu mavesi agha, kasi Yesu wakalongora wuli kuti wakughanaghanira ŵanji?—Wonani vesi 31, 34, 41, na 42.
Kasi ntchivichi chikapangiska Yesu kovwira ŵanthu?—Wonani vesi 34.
Pakuti Yesu wakayezganga mikhaliro ya Yehova, kasi ivi vikumusambizgani vichi vya Yehova?
Kasi tingamuyezga wuli Yesu pa nkhani yakughanaghanira ŵanthu?
6. Yesu wakaŵa wakupa
Nangauli Yesu wakaŵa na vinthu vichoko waka kweni wakaŵa wakupa, ndipo wakutichiska kuti nase tiŵe na mtima wakupa. Ŵazgani Milimo 20:35, kufuma apo dumbiskanani fumbo ili:
Kuyana na ivyo Yesu wakayowoya, kasi tingachita wuli kuti tiŵe ŵakukondwa?
Wonelerani VIDIYO, kufuma apo dumbiskanani fumbo ili.
Kasi tingachita wuli kuti tipengeko ŵanyithu nanga tingaŵa kuti tili na vinthu vichoko?
Kasi mukumanya?
Baibolo likuti tilombenge kwa Yehova kwizira mwa Yesu. (Ŵazgani Yohane 16:23, 24.) Para tikuchita nthena, tikulongora kuti tikuwonga ivyo Yesu wali kutichitira kuti tiŵe paubwezi na Yehova.
IVYO ŴANYAKE ŴAKUYOWOYA: “Chiuta wakuŵikako mahara yayi ku masuzgo ghithu.”
Pakuti Yesu wakulongora mikhaliro ya Adada ŵake, kasi ivi vikulongora kuti Yehova wakutipwelelera?
MWAKUDUMURA
Yesu wakutemwa Yehova na ŵanthu. Pakuti Yesu wakuyana na Adada ŵake, ntheura para mwamanya Yesu, mumumanyengeso makora Yehova.
Kuweleramo
Kasi tingalongora wuli kuti tikutemwa Yehova nga umo Yesu wakachitiranga?
Kasi tingalongora wuli kuti tikutemwa ŵanthu nga umo Yesu wakachitiranga?
Kasi ni mukhaliro wuli wa Yesu uwo imwe ukumukondweskani chomene?
SANGANI FUNDO ZAKUSAZGIKIRA
Wonani mikhaliro yinyake ya Yesu iyo tingatolerako.
“Kuti Muyezge Yesu” (Yesu—Ni Nthowa, Unenesko, na Umoyo, peji 317)
Wonani chifukwa icho tikwenera kuzunulira zina la Yesu para tikulomba.
“Chifukwa Wuli Tikwenera Kulomba Kwizira mu Zina la Yesu?” (Gongwe la Mulinda, Epulero 1, 2008)
Kasi Baibolo likuyowoya umo Yesu wakawonekeranga?
Kasi tikusambirako vichi kwa Yesu umo wakachitiranga vinthu na ŵanakazi?
“Mbakuzirwa na Ŵakuchindikika kwa Chiuta” (Gongwe la Mulinda, Seputembala 1, 2012)