Maliferensi gha “Uteŵeti na Umoyo Wachikhristu—Kabuku ka Maungano”

Maliferensi gha Uteŵeti na Umoyo Wachikhristu —Kabuku ka Maungano

SEPUTEMBALA 11-17

MAZGU GHA CHIUTA MBUSAMBAZI | ESITERE 3-5

“Wovwirani Ŵanji Kuti Ŵafiske Kuchita Vinandi”

it-2-E 431 ¶7

Modekayi

Wakakana Kumusindamira Hamani. Pamanyuma, Hamani uyo wakaŵa Muagagi wakasoleka na Ahasuweru kuŵa wachiŵiri kwa themba, ndipo Ahasuweru wakalangura kuti ŵateŵeti wose ŵa themba awo ŵakateŵeteranga pa chipata ŵasindamirenge Hamani uyo wakapika udindo uphya. Modekayi wakakana kupulikira ndipo wakaŵaphalira kuti iyo ni Muyuda. (Es 3:1-4) Modekayi wakakana kumusindamira Hamani chifukwa chakuti wakaŵa Muyuda ndipo wakawonanga ubwezi wake na Yehova Chiuta kuŵa wakuzirwa chomene. Iyo wakamanya kuti kusindamira Hamani, kukaŵa waka kusindamira munthu waudindo yayi, nga umo Ŵaisrayeli ŵakachitiranga kumasinda para ŵakukhumba kuchindika muwusi panji munthu waudindo. (2Sa 14:4; 18:28; 1Ma 1:16) Modekayi wakaŵa na chifukwa chakupulikikwa icho wakakanira kumusindamira Hamani. Hamani wakaŵa Muamaleki, ndipo Yehova wakaŵa kuti wayowoya kale kuti warwenge nkhondo na “miwiro yose ya Amaleki.” (Ek 17:16; wonani HAMAN.) Apa Modekayi wakachitanga ndyali yayi kweni wakakhumbanga kugomezgeka kwa Chiuta.

it-2-E 431 ¶9

Modekayi

Wakawovwirapo pa Kuponoska Ŵaisrayeli. Pakuti dango likapelekeka kuti Ŵayuda wose ŵaparanyike, Modekayi wakaphalira Esitere kuti walongore kugomezgeka kwake pa nyengo iyi kuti Ŵayuda ŵaponoskeke. Wakamukumbuska Esitere udindo ukuru uwo wakaŵa nawo ndipo wakamuphalira kuti wakanjire kwa themba na kuŵeyelera m’malo mwa ŵanthu ŵakwake. Nangauli umoyo wake ukaŵa pangozi, kweni Esitere wakazomera pempho la Modekayi.—Es 4:7–5:2.

SEPUTEMBALA 25–OKUTOBALA 1

MAZGU GHA CHIUTA MBUSAMBAZI | ESITERE 9-10

“Wakagwiliskira Ntchito Mazaza Ghake Kovwira Ŵanthu”

it-2-E 432 ¶2

Modekayi

Modekayi wakanjira m’malo mwa Hamani na kuŵa wachiŵiri kwa themba ndipo wakapokera mphete yachidindo iyo ŵakagwiliskiranga ntchito pakudindira makalata. Esitere wakaŵika Modekayi pachanya pa nyumba ya Hamani, iyo themba likamupa. Pamanyuma, Modekayi wakagwiliskira ntchito mazaza agho wakapika na themba kusisita dango ilo likaŵapo mwakuti Ŵayuda ŵaŵe na wanangwa wakujivikilira. Apa Ŵayuda ŵakaponoskeka ndipo ŵakakondwa. Ŵanandi mu ufumu wa Peresiya ŵakamba kukolerana na Ŵayuda, ndipo pa zuŵa 13, mwezi wa Adara zuŵa ilo dango lakuti Ŵayuda ŵakomeke likeneranga kugwira ntchito, Ŵayuda ŵakaŵa ŵakunozgeka. Ŵamazaza wose ŵakamba kukolerana na Modekayi chifukwa cha udindo ukuru uwo wakaŵa nawo. Mu Shushani ŵakasazgirako zuŵa lakuti Ŵayuda ŵalwere wanangwa wawo. Ŵalwani ŵa Ŵayuda ŵakujumpha 75,000 pamoza na ŵana 10 ŵa Hamani ŵakaparanyika. (Es 8:1–9:18) Esitere wati wazomerezga, Modekayi wakalangura kuti ŵakondwelerenge zuŵa la 14 na 15 la mwezi wa Adara, agho ghakuchemeka mazuŵa gha “Purimu.” Iyi yikaŵa nyengo yakuchitira chiphikiro na kusekelera, kugaŵana vyawanangwa na kupeleka vyawanangwa ku ŵakavu. Ŵayuda ŵakazomera dango ili ndipo ŵakalangura ŵana ŵawo na wose awo ŵakakolerananga nawo kuti ŵalutilire kulilondezga. Pakuŵa wachiŵiri kwa themba, Modekayi wakachindikikanga na Ŵayuda, awo ŵakaŵa ŵanthu ŵa Chiuta ndipo wakalutilira kuŵalwera.—Es 9:19-22, 27-32; 10:2, 3.

it-2-E 716 ¶5

Purimu

Chilato. Ŵanthu ŵanyake ŵakuti Chiphikiro cha Purimu icho chikuchitika na Ŵayuda mazuŵa ghano chikuŵa cha chisopa yayi, ndipo kanandi pakuchitika vinthu viheni nga kumwa mwakujumphizga, kweni ndimo vikaŵira yayi apo chiphikiro ichi chikambanga. Modekayi na Esitere wose ŵakaŵa ŵateŵeti ŵa Yehova ndipo ŵakambiska chiphikiro ichi kuti chipeleke uchindami kwa Yehova. Yehova Chiuta wakanjilirapo kuti Ŵayuda ŵaponoskeke, nakuti nkhani iyi yikaŵapo chifukwa Modekayi wakakana kumusindamira Hamani chifukwa chakuti wakakhumbanga kusopa Yehova pera. Hamani wakaŵa Muamaleki, mtundu uwo Yehova wakawutemba ndipo wakati wawuparanyenge. Modekayi wakachindikanga dango la Chiuta ndipo wakakana kumusindamira Hamani. (Es 3:2, 5; Ek 17:14-16) Kweniso mazgu agho Modekayi wakaphalira Esitere (Es 4:14) ghakulongora kuti wakagomezga kuti Yehova ndiyo waponoskenge Ŵayuda. Ndipo Esitere pakuziŵizga kurya pambere wandanjire kwa themba kukaliŵeyelera kuti lize ku chiphikiro, vikulongora kuti wakapemphanga wovwiri kwa Chiuta.—Es 4:16.

OKUTOBALA 9-15

MAZGU GHA CHIUTA MBUSAMBAZI | YOBU 4-5

“Chenjerani na Nkhani Zautesi”

it-1-E 713 ¶11

Elifazi

2. Yumoza wa ŵanyake ŵatatu ŵa Yobu. (Yob 2:11) Wakaŵa Mutemani uyo wakwenera kuti wakafuma mu mphapu ya Abrahamu ndipo na Yobu ubali ukaŵako patali. Iyo na mphapu yake ŵakajikuzga kuti ŵali na vinjeru. (Yer 49:7) Pa “ŵasanguluski,” wose ŵatatu ŵara, Elifazi ndiyo wakajiwonanga kuti ngwakuzirwa chomene, kweniso vikulongora kuti ndiyo wakaŵa mulara pa wose. Ndiyoso wakaŵa wakwamba kuyowoyapo pa chidumbirano ichi, nakuti ndiyo wakayowoya mazgu ghatali.

mrt 32 ¶13-17

Jivikilirani ku Nkhani Zautesi

● Ghanaghanirani uko nkhani iyo yafuma kweniso ivyo yikuyowoya

Ivyo Baibolo likuyowoya: “Musande vinthu vyose.”—1 Ŵatesalonika 5:21.

Pambere mundagomezge ivyo nkhani yikuyowoya panji kutuma kwa ŵanthu ŵanyake, nanga yingaŵa kuti yatchuka chomene panji yalembeka kanandi waka, mukwenera kusimikizga dankha kuti njaunenesko. Mungachita wuli nthena?

Sandani dankha usange mungaŵagomezga awo ŵalemba nkhani iyo. Makampani ghakulemba nkhani na mawupu ghanyake ghangasintha nkhani yinyake kuti ivyo ŵakukhumba viŵayendere panji ŵakhozgere chipani chinyake. Yaniskani nkhani iyo mwaŵerenga pa malo ghanyake na nkhani zinyake izo zilipo. Nyengo zinyake ŵabwezi ŵithu ŵangatitumira nkhani yautesi mwangozi pa imelu panji pa malo ghakuchezgera gha pa Intaneti. Ntheura kugomezga waka nkhani yiliyose yayi, fufuzani dankha kuti mumanye uko yafumira.

Woneseskani kuti ivyo vyalembeka ni vyasono kweniso ni vyaunenesko. Wonani madeti, fufuzani ivyo vyalembeka na kusanga maukaboni ghakukhorweska usange ghakukhozgera ivyo vikuyowoyeka. Muŵe maso, chomenechomene para nkhani yinyake yalongosoreka munthowa yipusu chomene panji usange lipoti ilo layowoyeka lingamupangiskani kuti muchite kanthu kanyake.

OKUTOBALA 30–NOVEMBALA 5

MAZGU GHA CHIUTA MBUSAMBAZI | YOBU 11-12

“Nthowa Zitatu Izo Tingasangira Vinjeru na Kusanga Navyo Chandulo”

it-2-E 1190 ¶2

Vinjeru

Vinjeru vya Chiuta. Vinjeru vyenecho vikufuma kwa Yehova Chiuta, uyo ndiyo “yekha wavinjeru.” (Ro 16:27; Chiv 7:12) Umanyi ukwendezgana na kumanya unenesko wa chinthu, chifukwa chakuti Yehova ndiyo Mlengi, “kufuma muyirayira m’paka muyirayira” (Sa 90:1, 2), wakumanya chilichose chakukhwaskana na chilengiwa, umo chiliri na umo chili kulengekera kweniso mdauko wake m’paka sono. Ndiyo wali kupanga ndondomeko ya umo vinthu vyose vikwendera, malango agho chilengiwa chose chikulondezga kweniso malango agho awo ŵakufufuza na kupanga vinthu ŵakulondezga. Kwambura malango agha kweniso ndondomeko iyi, palije icho ŵangachitapo. (Yob 38:34-38; Sa 104:24; Zi 3:19; Yer 10:12, 13) Kweni malango gha umo tingakhalira ndigho ngakuzirwa chomene, chifukwa ndigho ghakovwira kuti ŵanthu ŵalutilire kukhala makora, ŵasankhenge vinthu mwamahara kweniso kuti ŵalutilire kuŵa na umoyo. (Do 32:4-6; wonani JEHOVAH [A God of moral standards].) Palije icho wakuleka kuchimanya. (Yes 40:13, 14) Nangauli nyengo zinyake wangazomerezga kuti vinthu vinyake ivyo vikukolerana yayi na fundo zake zaurunji vichitike panji kwenda makora kwakanyengo, kweni umoyo withu wamunthazi ukuthemba pa iyo ndipo wazamuchita vinthu ivyo vikukolerana na khumbo lake, nakuti ivyo wayowoya ‘vichitikenge.’—Yes 55:8-11; 46:9-11.