Kasi Ciuta Ni Njani?

KASI mungazgora wuli fumbo ili? Ŵanthu ŵanandi ŵakugomezga kuti Ciuta waliko ndipo ŵakumutemwa na kumupa nchindi. Kweni ŵakumumanya makora yayi. Usange mukugomezga kuti Ciuta waliko, kasi mungazgora wuli mafumbo agha?

1. Kasi Ciuta ni munthu nadi?

2. Kasi Ciuta wali na zina?

3. Kasi Yesu ni Ciuta Wankhongono Zose?

4. Kasi Ciuta wakunipwelelera?

5. Kasi Ciuta wakuzomerezga visopa vyose?

Usange mungafumba ŵanji mafumbo agha, mungazizwa na mazgoro ghawo. Lekani nchakuzizika yayi kuti pali vidokoni ndiposo maghanoghano ghakubudika ghakukhwaskana na Ciuta.

Mazgoro Ngakuzirwa Comene

Apo Yesu Khristu wakayowoyanga na mwanakazi Musamariya uyo wakagomezganga Ciuta, wakamuphalira kukhumbikwa kwa kumumanya makora Ciuta. Mwanakazi uyu wakamanya kuti Yesu ni nchimi. Kweni pakaŵa cinthu cinyake ico wakapulikiskanga yayi. Yesu na mwanakazi uyu ŵakasopanga mwakupambana. Mwanakazi uyu wakati wayowoya maghanoghano ghake, Yesu wakamuphalira kwambura kubisa kuti: “Mukusopa ico mukumanya cara.” (Yohane 4:19-22) Apa Yesu wakalongora kuti ni ŵanthu wose yayi awo ŵakusopa ŵakumumanya makora Ciuta.

Kasi ivyo Yesu wakayowoya vikung’anamura kuti palije uyo wangamumanya makora Ciuta? Yayi. Yesu wakaphaliraso mwanakazi uyu kuti: “Ŵasopi ŵaunenesko ŵazamusopa Ŵadada mu mzimu na unenesko, pakuti nadi, Ŵadada ŵakupenja ŵakuŵa ntheura kuti ŵaŵasopenge.” (Yohane 4:23) Kasi ndimwe yumoza wa awo ŵakusopa Ciuta “mu mzimu na unenesko”?

Zgoro la fumbo ili ndakuzirwa comene. Cifukwa wuli? Apo Yesu wakalombanga wakayowoya kukhumbikwa kwa kumumanya makora Ciuta, wakati: “Kuti ŵaŵe na umoyo wamuyirayira, ŵakwenera kumumanyani imwe Ciuta waunenesko yekha, ndiposo Yesu Khristu, mweneuyo mukamutuma.” (Yohane 17:3) Kuti muzakasange umoyo wamuyirayira vikuthemba pa kumumanya makora Ciuta.

Kasi nchamacitiko kumumanya makora Ciuta? Enya. Kasi mungamumanya wuli? Yesu wakati: “Ine ndine nthowa na unenesko na umoyo. Palije uyo wakwiza ku Ŵadada kweni kwizira mwa ine.” (Yohane 14:6) Wakayowoyaso kuti: “Palije . . . uyo wakumanya Ŵadada, kweni Mwana na waliyose uyo Mwana wakukhumba kuŵavumbura kwa iyo.”—Luka 10:22.

Ntheura, tingamumanya makora Ciuta kwizira mu ivyo Yesu Khristu, Mwana wa Ciuta wakasambizganga. Nakuti Yesu wakalayizga kuti: “Usange mukukhalilira mu mazgu ghane, muli ŵasambiri ŵane nadi, ndipo mumanyenge unenesko, ndipo unenesko umufwaturaninge.”—Yohane 8:31, 32.

Kasi Yesu wakazgora wuli mafumbo ghankhondi agho ghali kukwambilira kwa nkhani iyi?

Kasi Ciuta Ni Munthu Nadi?

Ŵanandi ŵakuzgora kuti:

◼ “Wali palipose, mu cilicose. Wali nga ni mphepo.”

◼ “Ni nkhongono waka kuti ni munthu nadi yayi.”

Kasi Yesu wakati vici?

◼ “Mu nyumba ya Ŵadada muli malo ghanandi ghakukhalamo.” (Yohane 14:2) Yesu wakayowoya kuti Ciuta wali na malo agho wakukhala.

◼ “Nkhafuma ku Ŵadada ndipo nili kwiza mu caru. Kweniso nkhufumamo mu caru ndipo nkhuya ku Ŵadada.” (Yohane 16:28) Yesu wakagomezganga kuti Ciuta ni Munthu nadi ndipo wali na malo ghake agho wakukhalako.

YESU wakayowoyapo yayi kuti Ciuta ni nkhongono waka. M’malo mwake, Yesu wakayowoyanga kwa Ciuta na kumulomba. Kanandi Yesu wakatemwanga kuyowoya kuti Yehova ni Dada wake, lizgu lakuti dada likulongora kuti Yesu wakaŵa pa wene na wene na Ciuta.—Yohane 8:19, 38, 54.

Mbunenesko kuti “palije munthu wali kuwonapo Ciuta umo kuli kuŵira” ndiposo kuti “Ciuta ni Mzimu.” (Yohane 1:18; 4:24) Kweni fundo iyi yikung’anamura kuti Ciuta walije thupi yayi. Baibolo likutiphalira kuti: “Usange kuli thupi lakawiro, ipo kuliso lauzimu.” (1 Ŵakorinte 15:44) Kasi Yehova wali na thupi lauzimu?

Enya. Yesu wakati wawuka ku ŵakufwa, “wakanjira kucanya kweneco, kuti sono wakawonekere pamaso pa Ciuta cifukwa ca ise.” (Ŵahebere 9:24) Lemba ili likutisambizga fundo ziŵiri zakuzirwa zakukhwaskana na Ciuta. Yakwamba, wali na malo agho wakukhala. Yaciŵiri, ni Munthu, kuti ni nkhongono waka yayi iyo yikusangika palipose.

Kasi vingacitika wuli kuti Ciuta ŵawe na nkhongono iyo yikulongozga vinthu palipose? Ciuta wangatumizga mzimu wake utuŵa, panji kuti nkhongono yake palipose. Nga umo dada wakukolera mwana wake pa woko kuti wamupembuzge na kumovwira, Ciuta wakutumizga mzimu wake kuti wafiske cilato cake.—Salmo 104:30; 139:7.

Pakuti Ciuta ni Munthu, nayo wali na vinthu ivyo wakutemwa na kutinkha. Baibolo likutiphalira kuti wakutemwa ŵateŵeti ŵake, wakusangwa na milimo yake, wakutinkha kusopa vikozgo, kweniso vikumuŵinya comene para wakuwona vinthu viheni. (Genesis 6:6; Duteronome 16:22; 1 Mathemba 10:9; Salmo 104:31) Pa lemba la 1 Timote 1:11, wakucemeka kuti ni “Ciuta wakukondwa.” Nchakuzizika yayi kuti Yesu wakati tingamutemwa Ciuta uyu na mtima withu wose.—Marko 12:30.a

[Mazgu ghamusi]

[Mazgu Ghakukhozgera pa peji 5]

Nga umo dada wakukolera mwana wake pa woko kuti wamupembuzge na kumovwira, Ciuta wakutumizga mzimu wake kuti wafiske cilato cake

Kasi Ciuta Wali na Zina?

Ŵanandi ŵakuzgora kuti:

▪ “Zina lake ni Ciuta.”

▪ “Walije zina.”

Kasi Yesu wakati vici?

▪ “Ipo mukwenera kulomba mu nthowa iyi: ‘Ŵadada ŵithu imwe muli kucanya, zina linu lituŵiskike.’” (Mateyu 6:9) Yesu wakagomezganga kuti Ciuta wali na zina.

▪ “Naŵamanyiska zina linu ndipo nilimanyiskenge, mwakuti citemwa ico mwanitemwa naco ciŵenge mwa iwo ndipo ine mu umoza na iwo.” (Yohane 17:26) Yesu wakamanyikwiska zina la Ciuta.

▪ “Muzamuniwonaso cara mpaka muzakayowoye kuti, ‘Ngwakutumbikika uyo wakwiza mu zina la Yehova!’” (Luka 13:35; Salmo 118:26) Yesu wakazunuranga zina la Ciuta.

CIUTA wakutiphalira zina lake. Wakuti: “Ine ndine Yehova; ili ndilo zina lane.”a (Yesaya 42:8) Zina la lakumanyikwa comene la Ciuta mu Citumbuka ni Yehova, ndipo zina ili liri kung’anamulika kufuma ku Cihebere. Mungazizwa kumanya kuti zina ili likusangika mu mavesi ghanandi comene mu mipukutu yakale ya Baibolo. Nakuti pa mazina ghose agho Ciuta wakumanyikwa nagho, zina ili ndilo likusangika mu mavesi ghanandi mu Baibolo.

Ŵanji para ŵafumbika za zina la Ciuta, ŵakuzgora kuti “ni Ciuta.” Zgoro ili ndakukwana yayi. Mwaciyelezgero, para mungafumbika kuti “Ni njani uyo waluska pa cisora?” kuzgora kuti “ni uyo wakima pa cisora,” kungalongora kuti mundazgore mwakwenelera. Cifukwa mukukhumbikwira kuti muzunure zina la munthu uyo waluska.

Cifukwa wuli Ciuta wali kutivumbulira zina lake? Wakukhumba kuti timumanye makora. Mwaciyelezgero, munthu wangamanyikwa na mazina nga ni Bwana, Msambizgi, Dada, panji Sekuru. Mazina agha ghakulongora udindo uwo munthu uyu wali nawo. Kweni zina leneko la munthu likutikumbuska cilicose ico ise tikumanya pakukhwaskana na iyo. Mwakuyana waka mazina nga ni Ciuta, Fumu, Wankhongono Zose, Dada, na Mlengi ghakutikumbuska milimo yakupambanapambana ya Ciuta. Kweni zina lake leneko lakuti Yehova likutikumbuska cilicose ico tikumanya pakukhwaskana na iyo. Kasi mungayowoya wuli kuti mukumanya Ciuta usange mukutondeka kumanya zina lake?

Tikwenera kumanya waka zina la Ciuta yayi, kweniso tikwenera kulizunura. Cifukwa wuli? Baibolo likutiphalira kuti: “Waliyose uyo wakucema pa zina la Yehova wazamuponoskeka.”—Ŵaroma 10:13; Joel 2:32.

[Mazgu ghamusi]

[Mazgu Ghakukhozgera pa peji 6]

Munthu wangamanyikwa na mazina nga ni Bwana, Msambizgi, Dada, panji Sekuru. Kweni zina leneko la munthu likutikumbuska cilicose ico ise tikumanya pakukhwaskana na iyo

Kasi Yesu Ni Ciuta Wankhongono Zose?

Ŵanandi ŵakuzgora kuti:

▪ “Enya, Yesu ni Ciuta Wankhongono Zose.”

▪ “Yesu wakaŵa cilongolero ca Ciuta.”

Kasi Yesu wakati vici?

▪ “Munitemwenge ine, mphanyi mwasekelera kuti nkhuluta ku Ŵadada, cifukwa Ŵadada mbakuru kuluska ine.” (Yohane 14:28) Yesu wakamanyanga kuti iyo na Ŵawiske ŵakaŵa ŵakuyana yayi.

▪ “Nkhukwelera ku Ŵadada na Ŵawiskemwe ndiposo kwa Ciuta wane na Ciuta winu.” (Yohane 20:17) Yesu wakayowoya kuti iyo ni Ciuta yayi. Wakalongora makora kuti iyo na Ciuta mbakupambana.

▪ “Nayowoya vya namwene cara, kweni Ŵadada iwoŵene awo ŵali kunituma ŵanipa dango pa ico nkhwenera kuphara na kuyowoya.” (Yohane 12:49) Ivyo Yesu wakasambizganga vikaŵa vya iyo yekha yayi, kweni vya Ŵawiske.

YESU wakati iyo ni mwana wa Ciuta, kuti ni Ciuta Wankhongono Zose yayi. Usange Yesu wakaŵa Ciuta, kasi wakalombanga kwa njani apo wakaŵa pano pasi? (Mateyu 14:23; 26:26-29) Cingaŵa cambura kupulikikwa kughanaghana kuti Yesu wakatetezgeranga waka kuti wakayowoyanga na munthu munyake.

Apo ŵasambiri ŵaŵiri ŵa Yesu ŵakamulomba kuti ŵazakapike malo ghapadera mu Ufumu wake, wakazgora kuti: “Kukhala ku woko lane lamalyero na lamazere uku nkhwa ine cara kupeleka, kweni malo agha nga awo Ŵadada ŵali kuŵanozgera.” (Mateyu 20:23) Kasi Yesu wakatetanga apo wakayowoya kuti walije mazaza ghakuŵapa ivyo ŵasambiri aŵa ŵakakhumbanga? Yayi. Kweni wakamanya kuti Ciuta ndiyo wali na mazaza agha. Yesu wakati pali vinthu vinyake ivyo iyo nesi ŵangelo ŵakuvimanya yayi kweni Ŵawiske pera.—Mariko 13:32.

Kasi Yesu wakajilambika kwa Ciuta pekha apo wakaŵa pa caru capasi? Yayi. Wakati wawuka ku ŵakufwa, Baibolo likulongosora kuti Yesu wakaŵa wakujilambika kwa Ciuta. Mpositole Paulosi wakutikumbuska kuti “mutu wa Khristu ni Ciuta.” (1 Ŵakorinte 11:3) Baibolo likuti “para vinthu vyose vyazakalambikika kwa iyo, Mwana nayo wazamujilambika kwa Uyo wakalambika vinthu vyose kwa iyo, mwakuti Ciuta waŵe vinthu vyose kwa waliyose.”—1 Ŵakorinte 15:28.

Nchakuwonekerathu kuti Yesu ni Ciuta Wankhongono Zose yayi. Lekani pakucema Awiske, wakati: “Ciuta wane.”—Uvumbuzi 3:2, 12; 2 Ŵakorinte 1:3, 4.a

[Mazgu ghamusi]

[Mazgu Ghakukhozgera pa peji 7]

Yesu wakati pali vinthu vinyake ivyo iyo nesi ŵangelo ŵakuvimanya yayi kweni Ŵawiske pera

Kasi Ciuta Wakunipwelelera?

Ŵanandi ŵakuzgora kuti:

▪ “Ciuta ngwakuzirwa comene mwakuti wakughanaghanako yayi za masuzgo ghane.”

▪ “Nkhukayika usange wakunipwelelera.”

Kasi Yesu wakati vici?

▪ “Asi mpheta zinkhondi zikuguliskika tumanjawala tuŵiri twakuzirwa pacoko? Ndipouli, palije yimoza ya izo iyo yikuluwika panthazi pa Ciuta. Kweni nanga ni masisi gha mitu yinu ghose ghali kupendeka. Kopa cara; imwe muli ŵakuzirwa comene kuluska mpheta zinandi.” (Luka 12:6, 7) Apa Yesu wakasambizga kuti Ciuta wakutipwelelera.

▪ “Kwenjerwa cara napacoko na kuyowoya kuti, ‘Tiryengeci?’ panji, ‘Timwengeci?’ panji, ‘Tivwarengeci?’ Cifukwa vyose ivi ni vinthu ivyo mitundu yikupenjisiska. Pakuti Ŵawiskemwe ŵakucanya ŵakumanya kuti mukusoŵerwa vinthu vyose ivi.” (Mateyu 6:31, 32) Yesu wakagomezganga kuti Ciuta wakumanya masuzgo ghithu.

BAIBOLO likuti Ciuta wakutipwelelera. (Salmo 55:22; 1 Petrosi 5:7) Usange wakutipwelelera, cifukwa wuli tikusuzgika? Usange Ciuta ngwacitemwa ndiposo wankhongono zose, cifukwa wuli wakutondeka kucitapo kanthu kuti wamazge masuzgo?

Mazgoro gha mafumbo agha ghakukhwaska fundo yinyake iyo ŵanthu ŵanandi ŵakuyimanya yayi. Fundo iyi njakuti Satana Dyabulosi ndiyo wakuwusa caru ciheni ici. Apo wakayezganga Yesu, Satana wakati: “Nikupenge mazaza ghose agha na ucindami wake, cifukwa ghali kupelekeka kwa ine, ndipo uyo nakhumba nkhumupa.”—Luka 4:5-7.

Kasi mbanjani ŵakasankha Satana kuŵa muwusi wa caru ici? Apo ŵapapi ŵithu ŵakwamba, Adamu na Eva, ŵakapulikira Satana na kuleka kupulikira Ciuta, ŵakasankha Satana kuti waŵe muwusi wawo. Kufuma pa nyengo iyo, Yehova Ciuta wazomerezga kuti nyengo yijumphepo mwakuti viwoneke pakweru kuti muwuso wa Satana ngwakutondeka. Yehova wakucicizga ŵanthu yayi kuti ŵamuteŵetere, kweni waŵapa mwaŵi kuti ŵawelere kwa iyo.—Ŵaroma 5:10.

Cifukwa cakuti Ciuta wakutipwelelera, wakatuma Yesu kuti watiwombore ku muwuso wa Satana. Ndipo sonosono apa, Yesu ‘wamalizgenge uyo wali na nthowa yakucitiskira nyifwa, uyo ni Dyabulosi.’ (Ŵahebere 2:14) Yesu ‘wazamuparanya milimo ya Dyabulosi.’—1 Yohane 3:8.

Caru cizamuŵaso paradiso. Pa nyengo iyi, Ciuta “wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale [vizamufumapo].”—Uvumbuzi 21:4, 5.a

[Mazgu ghamusi]

[Mazgu Ghakukhozgera pa peji 8]

Caru cizamuŵaso paradiso

Kasi Ciuta Wakuzomerezga Visopa Vyose?

Ŵanandi ŵakuzgora kuti:

▪ “Visopa vyose ni nthowa yakulongozgera kwa Ciuta.”

▪ “Cisopa cilije kanthu, cikuru mtima wako.”

Kasi Yesu wakati vici?

▪ “Njirani pa cipata cicoko; cifukwa nthowa yakulongozgera ku pharanyiko njikuru na yisani, ndipo mbanandi awo ŵakwendamo; peneapo cipata nchicoko na nthowa yakulongozgera ku umoyo njifinyi, ndipo mbacoko awo ŵakuyisanga.” (Mateyu 7:13, 14) Yesu wakagomezganga kuti ni nthowa zose yayi izo zikulongozgera kwa Ciuta.

▪ “Ŵanandi ŵazamuyowoya kwa ine mu zuŵa lira, ‘Fumu, Fumu, asi tikacimanga mu zina linu, na kufumiska viŵanda mu zina linu, ndiposo kucita milimo yankhongono yinandi mu zina linu?’ Penepapo nizamuŵaphalira pakweru kuti: Nkhamumanyani cara! Fumaniko kwa ine, imwe ŵakucita ucikanamalango.” (Mateyu 7:22, 23) Yesu wazamupokelera wose yayi awo ŵakuti ŵakumulondezga.

ŴANTHU ŵanandi awo ŵakusopa ŵakuzirwiska comene ivyo ŵakugomezga ndiposo visambizgo vyawo. Kweni kasi nchivici cikucitika usange visambizgo ivi vikukolerana yayi na Baibolo? Yesu wakacenjezga za uheni wakulondezga visambizgo vya ŵanthu apo wakayowoyanga na ŵalongozgi ŵa visopa, wakati: “Mwazgora mazgu gha Ciuta kuŵa ghambura nchito cifukwa ca maluso ghinu.” Iyo wakayowoyaso mazgu gha Ciuta agho ghakuti: “Ŵanthu aŵa ŵakunicindika na milomo yawo, kweni mtima wawo uli kutali nkhanira na ine. Ŵakunisopa pawaka, cifukwa ŵakusambizga malanguro gha ŵanthu nga ni visambizgo.”—Mateyu 15:1-9; Yesaya 29:13.

Padera pa ivyo tikugomezga, nkharo nayo njakuzirwa comene. Pakuyowoya za ŵanji awo ŵakuti ŵakusopa Ciuta, Baibolo likuti: “Ŵakuzomera pakweru kuti ŵakumanya Ciuta, kweni ŵakumukana na milimo yawo.” (Tito 1:16) Pakuyowoya za ŵanthu ŵa mu nyengo yasono, Baibolo likuti: “Ŵakutemwa vyakusanguluska m’malo mwa kutemwa Ciuta, ŵakuŵa na kawonekero ka kusopa Ciuta mwakujipeleka kweni ŵakukana nkhongono zake; ndipo ku aŵa upatukeko.”—2 Timote 3:4, 5.

Pali vinandi ivyo vikukhumbikwa padera pakuŵa na mtima uwemi. Cifukwa wuli? Munthu wangaŵa na mtima uwemi kweni ivyo wakugomezga vingaŵa vyautesi. Ntheura kumumanya makora Ciuta nkhwakuzirwa. (Ŵaroma 10:2, 3) Kuti tikondweske Ciuta tikwenera kumumanya makora kweniso kucita vinthu mwakuyana na ivyo Baibolo likuyowoya. (Mateyu 7:21) Ntheura, kusopa kwakwenelera kukusazgapo kuŵa na cilato cakwenelera, kugomezga vinthu vyaunenesko na kucita vinthu viwemi. Kucita vinthu viwemi kukung’anamura kucita khumbo la Ciuta zuŵa lililose.—1 Yohane 2:17.

Usange mungatemwa kumanya vinandi vyakukhwaskana na Ciuta nga umo Baibolo likusambizgira, kumanani na Ŵakaboni ŵa Yehova mwakuti musambirenge Baibolo kwawanangwa.

[Mazgu Ghakukhozgera pa peji 9]

Kusopa kwakwenelera kukusazgapo kuŵa na cilato cakwenelera, kugomezga vinthu vyaunenesko na kucita vinthu viwemi

Awo Ŵakasuzgika na Cimphupulu ku Myanmar Ŵakasanga Wovwiri

PA Meyi 2, 2008, cimphupulu cakucemeka Cyclone Nargis cikacitika ku Myanmar ndipo cikananga vinthu vinandi comene.a Ndipo cikati cacitika waka, cikapharazgika pa caru cose. Apo cimphupulu cankhongono ici cikacita ku cigaŵa ca Irrawaddy Delta, ŵakapharazga kuti ŵanthu pafupifupi 140, 000 ŵafwa panji kusoŵa.

Kweni palije yumoza wa Ŵakaboni ŵa Yehova mu cigaŵa ici uyo wakapwetekekapo. Ŵakapona cifukwa cakuti ŵakacimbilira ku Nyumba za Ufumu. Mu muzi unyake, Ŵakaboni ŵa Yehova 20 na ŵanthu ŵanyake 80 ŵakakhala pacanya pa Nyumba ya Ufumu kwa maora ghankhondi na ghanayi apo maji ghakakwera kufika mamita 5. Wose ŵakapona. Cacitima nchakuti mu muzi uwu ŵanthu ŵanyake ŵakukwana 300 ŵakafwa. Mu mizi yinandi Nyumba za Ufumu zekha ndizo zikapona.

Pakati pajumpha mazuŵa ghaŵiri pamanyuma pa cimphupulu ici, ofesi ya Ŵakaboni ŵa Yehova ku Yangon yikatuma gulu la ŵakupeleka wovwiri ku mpingo wa mu muzi wa Bothingone. Apo gulu ili likendanga mu vigaŵa ivyo vikanangika comene, likendanga mwakupwelelera kuti lileke kupokeka ivyo likayegha. Likajumphanga mu vitanda vya ŵanthu ŵakufwa ivyo vikamba kuvunda. Gulu ili likafika ku Bothingone na mpunga, maji, makandulo, na vyakurya vinyake. Gulu ili likaŵa lakwamba kukapeleka wovwiri ku cigaŵa ici. Likati lapeleka wovwiri ku Ŵakaboni ŵa Yehova, likaŵakhozga na nkhani za mu Baibolo na kuŵalekera Mabaibolo ndiposo mabuku ghakulongosora Baibolo, cifukwa cakuti vyose ivyo ŵakaŵa navyo vikanangika na cimphupulu.

Ŵakaboni ŵa Yehova awo vinthu vyawo vyose vikanangika ŵakawonanga vinthu mwakwenelera. Yumoza wa Ŵakaboni ŵa Yehova uyo wakafuma mu mpingo wa ku cigaŵa ico cikanangika comene ku Irrawaddy wakati: “Vinthu vithu vyose vyanangika. Nyumba zithu zose zabwanganduka. Kalikose mu minda kaluta. Maji ghakumwa ghanangika. Ndipouli, ŵabali na ŵadumbu mbakwenjerwa comene yayi nga umo ŵaliri ŵanthu ŵanyake. Ŵakugomezga Yehova na gulu lake. Tipulikirenge ulongozgi uliwose uwo tingapika kwali tikhalenge mu muzi withu panji kuya ku malo ghanyake.”

Ŵakaboni ŵakukwana 30, awo nawo vinthu vyawo vyose vikanangika, ŵakimbanga mwakukondwa sumu za Ufumu pa ulendo wawo wa maora khumi apo ŵakalutanga ku malo uko kukaŵa gulu ilo likapelekanga wovwiri wa vyakurya, malaya ndiposo mahema. Pambere ŵandafike uko ŵakalutanga, ŵakapulika kuti mu msumba wa pafupi kukacitikanga ungano wa dera wa Ŵakaboni ŵa Yehova. Ntheura ŵakaluta dankha ku ungano kuti ŵakapokere cakurya cauzimu ndiposo kucezga na Ŵakhristu ŵanyawo.

Mu vigaŵa vyose umo cimphupulu ici cikacitika, nyumba 35 za Ŵakaboni ŵa Yehova zikabwangandukirathu, apo zakukwana 125 zikabwangandukako pacoko, ndipo Nyumba za Ufumu 8 zikanangika pacoko waka. Mwamwaŵi, ofesi ya Ŵakaboni ŵa Yehova yikakhwaskika comene yayi.

Pakwamba, cimphupulu ici cikapangiska kuti munthu waliyose waleke kuluta panji kufuma ku ofesi ya Ŵakaboni ŵa Yehova cifukwa makuni ghakawira mu misewu. Kweni pakati pajumpha maora ghacoko waka cimphupulu cikati cacepako, ŵanthu ŵakujumpha 30 awo ŵakugwira nchito pa ofesi iyi ŵakawovwira kuwuskamo makuni agho ghakawira mu misewu. Apo ŵakacitanga mulimo uwu, ŵanthu ŵanyake ŵakazizwanga waka. Pakati pajumpha nyengo yicoko waka, Ŵakaboni ŵanakazi ŵakiza na vyakumwa vyakuzizimiska ku singo ndiposo vipambi na kuŵapa wose awo ŵakagwiranga nchito. Apo mutolamakani wakawonanga ivyo vikacitikanga, wakafumba kuti: “Kasi mbanjani ŵanthu aŵa ŵakugwira nchito mwakulimbikira nthena?” Ŵakati ŵamuzgora, wakati: “Mphanyi ŵanthu ŵanandi ŵalongora mzimu wakukolerana nga umo ŵacitira Ŵakaboni ŵa Yehova.”

Mwaluŵiro, Ŵakaboni ŵa Yehova ŵakapanga makomiti ghaŵiri kuti ŵapeleke wovwiri ku ŵanyawo awo ŵakasuzgika na cimphupulu ici. Ŵanandi ŵakajipeleka pakovwira awo ŵakasuzgika. Pakati pajumpha mazuŵa ghacoko waka, Ŵakaboni ŵa Yehova awo nyumba zawo zikabwanganduka ŵakaŵazengeraso ziphya. Apo gulu linyake lakupeleka wovwiri likiza kuti lizenge nyumba ya yumoza wa Ŵakaboni ŵa Yehova, ŵazengezgani wakazizwa comene. Yumoza wa ŵazengezgani wakati: “Mwanakazi uyu ŵakumuzengera nyumba mba chalichi lake. Na yumoza wa ŵanyane wa ku chalichi la Cibuda wizapo kuzakanovwira. Nane niŵenge yumoza wa Ŵakaboni ŵa Yehova usange mwanakazi uyu wanipharazgirenge.”

Apo ŵakuzenga na ŵa mu komiti yakupeleka wovwiri ŵakaluta kuti ŵakawone nyumba izo zikabwanganduka ku Thanlyn, ŵakazizwa comene apo ŵakapulika mbumba yinyake ya Ŵakaboni ŵa Yehova yikuŵaphalira kuti: “Nyumba yithu yanangika viŵi yayi, njakuti tingakhalamo kwambura suzgo. Ŵakaboni ŵa Yehova ŵanyake ŵalije nyumba. Lutani mukaŵawovwire.”

Mu cigaŵa cinyake ku Yangon, ŵanthu ŵanyake ŵakakhumbanga kukabisama mu chalichi. Ndipouli, ŵakasanga kuti cijaro nchakujalika mwakuti munthu waliyose waleke kunjiramo. Ŵanthu ŵakakwiya comene ndipo ŵakakhumba kupankhura cijaro. Kweni Ŵakaboni ŵa Yehova ŵakawovwira ŵanthu ŵanandi pa nyengo ya cimphupulu ici kuti ŵasange malo ghakuvikilirika mu Nyumba za Ufumu. Mwaciyelezgero, pa Nyumba ya Ufumu ku Dala, mbumba yinyake ya Ŵakaboni ŵa Yehova yikapwelelera ŵazengezgani 20 awo ŵakacimbilira ku nyumba iyi. Namulenji ŵazengezgani aŵa ŵakawona kuti nyumba zawo zabwanganduka ndipo ŵakaŵa na njara. Mfumu wa mbumba iyi wakasanga munthu munyake wakuguliska mpunga ndipo wakagura unandi wakukwana ŵanthu wose awo ŵakacimbilira ku nyumba iyi.

Ku Yangon, ŵa mu mbumba yinyake ŵakaŵa mu machalichi ghakupambana. Ŵanyake ŵakaŵa Ŵakaboni ŵa Yehova kweni ŵanyake ŵakaŵa ŵa machalichi ghanyake. Pamanyuma pa cimphupulu, mbumba yose yikaluta kukategherezga maungano ku Nyumba ya Ufumu. Cifukwa wuli? Yumoza wa iwo wakati: “Ŵa ku chalichi kwithu ŵakatenge ŵizenge kuzakatiwona para cimphupulu camara kweni ŵandizeko. Ŵakaboni ŵa Yehova ŵekha ndiwo ŵakiza. Mukatipa mpunga na maji. Imwe mukupambana na ŵa machalichi ghanyake.” Ŵa mu mbumba iyi awo ŵakaŵa Ŵakaboni ŵa Yehova yayi, ŵakasangwa na nkhani ya mu Gongwe la Mulinda yakuti “Yehova Wakupulika Kulira Kwithu,” ndipo nawo ŵakazgorangapo.

Mwanakazi munyake uyo wakasambiranga Baibolo na Ŵakaboni ŵa Yehova, wakaluta ku maungano pakati pajumpha sabata yimoza kufuma apo cimphupulu cikacitikira. Pa maungano agha pakaŵazgika kalata yakufuma ku ofesi ya Ŵakaboni ŵa Yehova iyo yikalongosoranga ivyo vyacitika pakovwira awo ŵakasuzgika ndiposo ivyo ŵakayowoya awo ŵakapona pa cimphupulu. Apo kalata iyi yikaŵazgikanga, mwanakazi uyu wakamba kulira. Wakakondwa comene kupulika kuti Ŵakaboni ŵa Yehova wose ŵasangika ndipo wose ŵali makora. Paumaliro, wakapokera vinthu vyakukhumbikwira ndiposo hema likajinthika pafupi na apo pakaŵa nyumba yake. Wakati Ŵakaboni ŵa Yehova ŵamupwelelera makora comene.

Yesu wakati: “Na ici, wose ŵamanyenge kuti ndimwe ŵasambiri ŵane, usange muli na citemwa pakati pinu.” (Yohane 13:35) Ndiposo msambiri Yakobe wakati cipulikano ceneko cikulongoreka na milimo. (Yakobe 2:14-17) Ŵakaboni ŵa Yehova ŵakulondezga mazgu agha ndipo ŵakuyezgayezga kulongora citemwa mwakovwira na kukhozga ŵanthu awo ŵakusuzgika.

[Mazgu ghamusi]

[Mazgu Ghakukhozgera pa peji 11]

Baibolo likuti cipulikano ceneko cikulongoreka na milimo

Vifukwa Vinkhondi Vyakopera Ciuta M’malo mwa Kopa Munthu

MUNYAMATA wakakondwa comene. Ivyo vikacitika ndivyo wakalindizganga yayi. Apo wakadumbirananga na Ŵakaboni ŵa Yehova wakajulika kumaso. Kwa vilimika vinandi wakajifumbanga cifukwa ico Ciuta wazomerezgera masuzgo. Kweni pa nyengo iyi wakazgoreka makora kufuma mu Baibolo. Pakwamba wakamanyanga yayi kuti Baibolo liri na fundo zakuzirwa comene ndiposo zakukondweska.

Ŵalendo ŵakati ŵaluta waka, mama uyo wakaŵa mweneko nyumba wakakwiya na kwiza ku cipinda ca munyamata uyu. Wakamufumba kuti: “Kasi ŵanthu ŵara mbanjani?”

Munyamata uyu wakazizwa ndipo wakazgora cilicose yayi.

Mama uyu wakakalipa kuti: “Nkhuŵamanya, ndipo para uzamuŵapokeleraso uzamufuma mu nyumba yane kuti ukapenje malo kunyake.”

Mama uyu wakajara cijaro na kufumapo.

Ŵakhristu Ŵaunenesko Ŵakumanya Kuti Ŵasuskikenge

Ivyo vikacitikira munyamata uyu ni vyacilendo yayi. Mazgu gha Ciuta ghakulongosora kuti: “Wose awo ŵakukhumba kuŵa na umoyo wa kusopa Ciuta mwakujipeleka mwa Khristu Yesu, nawo ŵatambuzgikenge.” (2 Timote 3:12) Ŵakhristu ŵaunenesko ŵakutemweka yayi ndipo ŵazamutemwekapo yayi. Cifukwa wuli? Mpositole Yohane wakaphalira Ŵakhristu ŵanyake kuti: “Tikumanya kuti tili ŵakufuma kwa Ciuta, kweni caru cose cikugona mu nkhongono za muheni.” Satana Dyabulosi wakuyowoyekaso