Kasi Baibolo Lingawovwira Wuli Ŵanalume Awo Ŵakwenjerwa?
Para tikuti munthu munyake wakwenjerwa,a ŵanyake ŵakughanaghana vya munthu uyo wakuchita chomene wofi, uyo wakukhumba yayi kuwuka para kwacha, panji uyo nkhani zikumara yayi para wamba kuyowoya vya masuzgo ghake.
Vinthu ivi tayowoya pachanya apa, ndivyo ŵanyake ŵakuchita para ŵakwenjerwa. Kweni awo ŵakuchita kafukufuku ŵali kusanga kuti ŵanthu ŵanyake, chomene ŵanalume, ŵakuchita vinthu mwakupambanako para ŵakwenjerwa. Lipoti linyake likuyowoya kuti ŵanalume “ŵakutemwa kuloŵera na kugwiliskira ntchito munkhwala wakutimbanizga wongo para ŵakwenjerwa. Vingawoneka nga kuti mbaloŵevu waka, kweni unenesko ngwakuti ŵakuchita ivi chifukwa chakuti ŵakwenjerwa. Nakuti ŵanalume awo ŵakwenjerwa, ŵakukaŵa yayi kukwiya na kunyanyara.”
Ndipouli, mbanalume wose yayi awo ŵakuchita ivi. Kwali munthu wakuchita wuli, kweni unenesko ngwakuti ŵanthu ŵanandi ŵakwenjerwa chomene mu “nyengo zinonono na zakusuzga” izi. (2 Timote 3:1) Kweni kasi Baibolo lingamovwirani wuli para mukwenjerwa?
Ulongozgi wa mu Baibolo Uwo Ungamovwirani Para Mukwenjerwa
Mu Baibolo muli ulongozgi uwemi chomene uwo ungatovwira para tikwenjerwa. Tiyeni tiwone fundo zitatu izi.
1. “Kwenjerwa chara napachoko vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake. Zuŵa lililose lili na masuzgo ghake.”—Mateyu 6:34.
Ivyo lemba ili likung’anamura: Tikwenera yayi kopa panji kufipa mtima chomene na ivyo vizenge munthazi ndipo panji vingazakachitikaso yayi. Kanandi vinthu ivyo tikufipa navyo mtima vikuzakaŵa umo ise taghanaghaniranga yayi. Nakuti nyengo zinyake vinthu vikwenda makora waka nangauli ise takhazganga nthena yayi.
Yezgani kuchita ivi: Kumbukani nyengo yinyake apo imwe mukaghanaghananga kuti vinthu viheni vichitikenge, kweni vikachitika yayi. Kufuma apo, wonaniso usange ivyo mukopa kuti vingamuchitikirani, vingachitika nadi kweniso usange ni nkhani yikuru.
2. “Nga umo chisulo chikunolera chisulo chinyake, ndimo munthu nayo wakunolera mubwezi wake.”—Zintharika 27:17.
Ivyo lemba ili likung’anamura: Para tikwenjerwa, ŵanthu ŵanyake ŵangatovwira chomene usange tingaŵaphalira. Ŵangatiphalira ivyo ŵakachita apo nawo ŵakenjerwanga. Nakuti nyengo zinyake ŵangatovwira kumanya umo tikwenera kuliwonera suzgo ilo tasangana nalo.
Yezgani kuchita ivi: Ghanaghanirani munthu munyake uyo mukuwona kuti wangamovwirani, wangaŵa mubwezi winu uyo nayo wakakumanapo na suzgo ilo mwasangana nalo. Mufumbani usange ivyo wakachita vikamovwira panji yayi.
3. “Muthulirani vyose ivyo mukwenjerwa navyo chifukwa wakumupwelelerani.”—1 Petrosi 5:7.
Ivyo lemba ili likung’anamura: Chiuta vikumuŵinya chomene para munthu munyake wakusuzgika. Iyo wakutiphalira kuti timulombenge para tikwenjerwa na nkhani yinyake.
Yezgani kuchita ivi: Lembani vinthu vyose ivyo mukwenjerwa navyo. Kufuma apo muthulirani Chiuta vyose ivyo mukwenjerwa navyo, ndipo mumulongosolere suzgo linu na kumupempha kuti wamovwirani.
Nyengo Iyo Kuzamuŵavya Kwenjerwa
Baibolo liliso na fundo zinyake ziwemi chomene izo zingatovwira para tikwenjerwa. Likutilayizga kuti munthazi palije munthu uyo wazamwenjerwaso. Kasi ivi vizamuchitika wuli?
Ufumu wa Chiuta uzamumazga vyose ivyo vikuchitiska kuti tenjerwenge. (Chivumbuzi 21:4) Nakuti mu Ufumu wa Chiuta, tizamukumbukaso yayi vyose ivyo tikenjerwanga navyo.—Yesaya 65:17.
Ivi ndivyo “Chiuta, uyo wakupeleka mtende” wakumukhumbirani. (Ŵaroma 16:20) Iyo wakutisimikizgira kuti: “Nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo.”—Yeremiya 29:11.