Adamu na Eva ŵati ŵafumamo mu munda wa Edeni, ŵakababa ŵana ŵanandi. Mwana wawo wakwamba wakaŵa Kayini. Mwana uyu wakaŵa mulimi. Mwana wachiŵiri wakaŵa Abelu. Iyo wakaŵa muliska wa viŵeto.

Zuŵa linyake Kayini na Abelu ŵakanozga sembe kuti ŵapeleke kwa Yehova. Kasi sembe ukuyimanya? Ni chawanangwa icho munthu wangapeleka. Yehova wakakondwa chomene na chawanangwa icho Abelu wakapeleka. Kweni wakakondwa yayi na chawanangwa cha Kayini. Ivi vikamukwiyiska chomene Kayini. Yehova wakamuchenjezga Kayini kuti wanangenge para wakulutilira na ukali wake. Kweni Kayini wakapulikira yayi.

Zuŵa linyake Kayini wakaphalira Abelu kuti: ‘Tiye tilute kuthondo.’ Apo ŵakaŵa kuthondo, Kayini wakakoma munung’una wake Abelu. Kasi Yehova wakachita wuli? Yehova wakamulanga Kayini. Wakamuchimbizgira kutali na banja lakwake. Wakazomerezgeka yayi kuweleraso kwawo.

Kasi tikusambirapo vichi? Nyengo zinyake tingamba kukwiya para vinthu vikuleka kwenda nga umo ise takhumbiranga. Usange tikuwona kuti takwiya chomene, panji ŵanyithu ŵatichenjezga chifukwa cha kuwona umo takwiyira, tikwenera kujiwezga luŵiro kuti tileke kuchita chinthu chiheni.

Chifukwa chakuti Abelu wakatemwanga Yehova ndipo wakachitanga vinthu viwemi, Yehova wamuluwengepo yayi. Chiuta wazamumuwuska Abelu para wazakapanga charu kuŵa paradiso.

Pakati pajumpha nyengo, pa charu chapasi pakaŵa ŵanthu ŵanandi. Ndipo ŵanandi ŵa iwo ŵakaŵa ŵaheni. Nanga mbangelo ŵanyake kuchanya ŵakazgoka ŵaheni. Iwo ŵakaleka malo ghawo kuchanya na kwiza pa charu chapasi. Kasi ukumanya chifukwa icho ŵakachitira nthena? Ŵakakhumbanga kuti ŵaŵe nga mbanthu ndipo ŵakatora ŵanakazi pa charu chapasi.

Ŵangelo ŵakagona na ŵanakazi aŵa na kubaba ŵana. Ŵana ŵara ŵakakura na kuŵa ŵankhongono chomene kweniso ŵankhaza. Iwo ŵakatimbanga ŵanthu. Yehova wakazomerezga yayi kuti vinthu ivi vilutilire kuchitika. Yehova wakaghanaghana kuti watume chigumula na kukoma ŵanthu wose ŵaheni.

Kweni pakaŵa munthu munyake uyo wakaŵa muwemi. Iyo wakatemwanga Yehova. Zina lake likaŵa Nowa. Wakaŵa na mwanakazi na ŵana ŵanalume ŵatatu. Mazina gha ŵana ŵake ghakaŵa: Shemu, Hamu, na Yafeti. Ŵana ŵa Nowa nawo ŵakaŵa na ŵanakazi. Yehova wakatuma Nowa kuti wazenge chingalaŵa chikuru. Chingalaŵa chikaŵa nga ntchibokosi chikuru icho chingayenjama pa maji. Yehova wakamutuma kuti wapange chibokosi ichi kuti iyo na banja lake ŵazakapone para chigumula chiza. Yehova wakatumaso Nowa kuti wanjizgemo vinyama vinandi mu chingalaŵa kuti navyo vipone.

Nyengo yeneyiyo, Nowa wakayamba kupanga chingalaŵa. Nowa na banja lake ŵakatora vyaka 50 kuti ŵamare kupanga chingalaŵa. Pakupanga chingalaŵa, ŵakachita ndendende nga umo Yehova wakaŵaphalilira. Pa nyengo iyo ŵakazenganga chingalaŵa, Nowa wakachenjezganga ŵanthu kuti kwizenge chivula chikuru. Kweni palije uyo wakapulikira.

Nyengo yakunjilira mu chingalaŵa yikakwana. Tiye tiwone umo vikaŵira.