Yisake wakaŵa na vyaka 40 apo wakatoranga Rabeka. Yisake wakamutemwanga chomene Rabeka. Nyengo yikati yajumphapo, ŵakaŵa na ŵana ŵanalume ŵaŵiri. Ŵana aŵa ŵakaŵa ŵamaphaska (ŵamileza).

Mulara wakaŵa Esau ndipo muchoko wakaŵa Yakhobe. Esau wakatemwanga kukoma nyama kuthondo. Kweni Yakhobe wakatemwanga kukhala pa nyumba.

Mu nyengo yira, mwana wakwamba wakapikanga malo ghakuru na ndalama para adada ŵake ŵafwa. Vinthu ivyo ŵamupa ŵakavichemanga kuti chiharo. Mu banja la Yisake, layizgo ilo Yehova wakalayizga Abrahamu nalo ŵakaliwonanga kuti ntchiharo chawo. Esau wakaŵa navyo na ntchito yayi ivyo Chiuta wakalayizga Abrahamu. Kweni Yakhobe wakamanyanga kuti ivyo Yehova wakalayizga vikaŵa vyakuzirwa chomene.

Zuŵa linyake, Esau wakawera kuthondo, uku vyalema chomene, wakafuma kukapenja nyama. Wati wafika pa nyumba, wakapulika kasungu kawemi ka chakurya icho Yakhobe wakaphikanga, ndipo wakati: ‘Njara yanikoma! Nipako mphoza ziswesi izo!’ Yakhobe wakati: ‘Nikupenge, kweni nilayizga dankha kuti unipenge chiharo chako.’ Esau wakati: ‘Chiharo chane nilije nacho ntchito! Tora waka. Nkhukhumba kurya ine.’ Kasi ukughanaghana kuti Esau wakachita chinthu chamahara? Yayi. Esau wakapeleka chinthu chakuzirwa chomene chifukwa cha kukhumba waka kurya mphoza.

Yisake wakati wachekura chomene, nyengo yikakwana yakuti watumbike mwana wake wakwamba. Kweni Rabeka wakawovwira mwana wake muchoko Yakhobe kuti ndiyo watumbikike. Esau wakati wamanya kuti Yakhobe ndiyo watumbikika, wakakwiya chomene ndipo wakakhumbanga kumukoma. Yisake na Rabeka ŵakakhumbanga kuvikilira Yakhobe kuti waleke kukomeka. Ŵakamuphalira kuti: ‘Lutanga ukakhale na asibweni ŵako a Labani m’paka ukali wa Esau utune.’ Yakhobe wakapulikira ŵapapi ŵake ndipo wakachimbilira kwa asibweni ŵake kuti waponoske umoyo wake.

Yehova wakalayizga Yakhobe kuti wamuvikilirenge nga umo wakavikililira Abrahamu na Yisake. Yakhobe wakakhala pa malo ghakuchemeka Harani. Pa malo agha, wakatora mwanakazi na kubaba ŵana ŵanandi. Kweniso wakaŵa musambazi chomene.

Nyengo yikati yajumphapo, Yehova wakaphalira Yakhobe kuti: ‘Welera ku charu chako.’ Yakhobe na banja lake ŵakamba ulendo utali wa kuwelera kukwawo. Apo ŵakaŵa mu nthowa, ŵanthu ŵanyake ŵakiza kwa Yakhobe na kumuphalira kuti: ‘Mukuru wako Esau wakwiza, ndipo wali na ŵanalume 400!’ Yakhobe wakawopa chomene. Wakaghanaghananga kuti Esau wazamupweteka iyo na banja lake. Wakapemphera kwa Yehova kuti: ‘Niponoskani kwa mukuru wane.’ Namachero ghake, Yakhobe wakatumira Esau chawanangwa. Wakamutumira mberere zinandi, mbuzi, ng’ombe, ngamila, na mbunda.

Mu usiku wa zuŵa ili, apo Yakhobe wakaŵa yekha, wakawona mungelo. Ndipo ŵakayamba kujunthana. Ŵakajunthana m’paka mulenji. Nangauli Yakhobe wakapwetekeka, kweni wakathera yayi. Mungelo wakati kwa iyo: ‘Nileka nilutenge.’ Kweni Yakhobe wakati: ‘Nimulekaninge yayi m’paka munitumbike dankha.’

Paumaliro mungelo wakamutumbika Yakhobe. Sono Yakhobe wakamanya kuti Yehova wazomerezgenge yayi kuti Esau wamupweteke.

Mulenji wenewuwu, Yakhobe wakalaŵiska patali ndipo wakawona Esau wakwiza pamoza na ŵanalume 400. Yakhobe wakaleka banja lake kumasinda, wakadangira panthazi na kugwada kankhondi na kaŵiri panthazi pa mukuru wake. Esau wakachimbilira Yakhobe na kumuvumbatira. Wose ŵakayamba kulira, ndipo ŵakaŵaso pamtende. Kasi ukughanaghana kuti Yehova wakakondwa na umo Yakhobe wakachitira vinthu?

Pamanyuma, Esau wakawelera ku nyumba yake ndipo Yakhobe nayo wakawelera kwake. Yakhobe wakaŵa na ŵana ŵanalume 12. Mazina ghawo ni agha: Rubeni, Simiyoni, Levi, Yuda, Dani, Nafutali, Gadi, Asheri, Isakara, Zebuloni, Yosefe, na Benjamini. Mwana yumoza wa Yakhobe, Yosefe, Yehova wakamugwiliskira ntchito kuti waponoske ŵanthu ŵake. Kasi ukumanya umo vikendera? Tiye tiwone.