Yosefe wakaŵa yumoza wa ŵana ŵakuumaliro ŵa Yakhobe. Ŵakuru ŵake ŵakawona kuti adada ŵawo ŵakumutemwa chomene Yosefe. Kasi ukughanaghana kuti ŵakakondwanga? Ŵakamuchitiranga sanji chomene Yosefe na kumutinkha. Nyengo yinyake, Yosefe wakalota maloto ghapadera, ndipo wakaŵaphalira ŵakuru ŵake. Iwo ŵakaghanaghana kuti maloto agho Yosefe wakalota, ghakang’anamuranga kuti zuŵa linyake, ŵazamumusindamira. Kufuma pa zuŵa ili, ŵakamba kumutinkha chomene kujumpha kumanyuma kose.

Zuŵa linyake, ŵakuru ŵa Yosefe ŵakaliskanga mberere kufupi na tawuni yakuchemeka Shekemu. Yakhobe wakatuma Yosefe kuti wakaŵawone umo ŵaliri. Ŵakuru ŵake ŵakamuwona wakwiza patali ndipo ŵakamba kuyowoyeskana. Ŵakati: ‘Wamaloto ghake yura wafika. Tiyeni timukome!’ Ŵakamutora na kumuponya mu chibuwu (chikhuluru). Kweni Yuda, yumoza mwa ŵakuru ŵake, wakati: ‘Kumukoma Yayi! Tiyeni timuguliske waka kuti wakaŵe muzga.’ Ŵakamuguliska na ndalama zasiliva 20 ku ŵamalonda Ŵamidiyani awo ŵakalutanga ku Eguputo.

Pamanyuma, ŵakuru ŵa Yosefe ŵakatora munjilira wake na kuwubizga mu ndopa za mbuzi. Ndipo ŵakawutumizga kwa adada ŵawo. Ŵakati: ‘Kasi uwu ni munjilira wa mwana winu yayi?’ Yakhobe wakaghanaghananga kuti Yosefe waryeka na vinyama vyamuthondo. Yakhobe wakadandawura chomene chifukwa cha mwana wake. Wakakana kupembuzgika.

Ku Eguputo, Yosefe ŵakamuguliska kwa Potifara kuti waŵe muzga. Kweni Yehova wakaŵa na Yosefe. Potifara wakawona kuti Yosefe wakalimbikiranga chomene ntchito ndipo wakaŵa wakugomezgeka. Mwaluŵiro, Potifara wakasankha Yosefe kuti walaŵilirenge vyose vya mu nyumba yake.

Muwoli wa Potifara wakawona kuti Yosefe ngwakuwoneka makora ndipo ngwankhongono. Zuŵa na zuŵa, muwoli wa Potifara wakamunyengeleranga Yosefe kuti wagone nayo. Kasi Yosefe wakachita wuli? Wakakana, ndipo wakati: ‘Yayi! Ningachita yayi chinthu chiheni nthena. Fumu yane yikunigomezga chomene, ndipo imwe ndimwe muwoli wake. Para ningagona namwe, ndikuti nanangira Chiuta!’

Zuŵa linyake, mwanakazi wa Potifara wakakhumba kuchichizga Yosefe kuti wagone nayo. Wakakora chakuvwara cha Yosefe, kweni Yosefe wakachimbira. Potifara wakati wiza pa nyumba, muwoli wake wakamupusika kuti Yosefe wakhumbanga kumukolelera. Potifara wakakwiya chomene na nkhani iyi, ndipo wakamujalira Yosefe mu jele. Kweni Yehova wakamuluwa yayi Yosefe.

Apo Yosefe wakaŵa mu jele, Farawo, fumu ya Eguputo, wakalota maloto agho pakaŵavya munthu uyo wakamanya ng’anamuro lake. Muteŵeti wa Farawo wakamuphalira kuti Yosefe wangamuphalira ng’anamuro la maloto ghake. Nyengo yeneyiyo, Farawo wakachemeska Yosefe kufuma mu jele.

Farawo wakamufumba kuti: ‘Kasi unganiphalira ng’anamuro la maloto ghane?’ Yosefe wakati: ‘Mu Eguputo muŵenge chakurya chinandi vyaka 7, ndipo pamanyuma pazamwiza vyaka 7 vya njara yikuru. Sankhani munthu yumoza wamahara kuti wasunge chakurya kuti ŵanthu ŵinu ŵazakaleke kufwa na njara.’ Farawo wakati: ‘Nasankha iwe! Uŵenge wachiŵiri kwa fumu ya Eguputo yose!’ Kasi Yosefe wakamanya wuli ng’anamuro la maloto gha Farawo? Yehova ndiyo wakamovwira.

Mu vyaka 7, Yosefe wakasunga chakurya chinandi. Pamanyuma, pa charu chose pakaŵa njara yikuru, nga umo Yosefe wakayowoyera. Ŵanthu ŵakafumanga mu vyaru vyakupambanapambana ndipo ŵakalutanga ku Eguputo kukagura chakurya kwa Yosefe. Yakhobe, dada wa Yosefe nayo wakapulika kuti ku Eguputo kuli chakurya chinandi. Ndipo wakatuma ŵana ŵake 10 kuti ŵakaguleko.

Ŵana ŵa Yakhobe ŵakaluta kwa Yosefe. Yosefe wakaŵamanya kuti mbakuru ŵake. Kweni ŵakuru ŵake ŵakamumanya yayi Yosefe. Ŵakagwada pasi kwa iyo nga umo Yosefe wakalotera apo wakaŵa mwana. Yosefe wakakhumbanga kumanya usange ŵakuru ŵake ŵali kusintha nkharo yawo yiheni. Wakaŵaphalira kuti: ‘Imwe ndimwe mphachi. Mwiza kuzakawona vigaŵa vya charu chithu ivyo chivikiliro ntchichoko.’ Iwo ŵakazgora kuti: ‘Yayi! Tili ŵana ŵa munthu yumoza ndipo tafuma ku Kenani. Tose tikaŵapo 12. Munung’una withu wali kufwa, ndipo muchoko pa tose wali na adada ku nyumba.’ Yosefe wakati: ‘Mukize dankha na munung’una winu ndipo nizamumugomezgani.’ Ŵakawelera kwa adada ŵawo.

Chakurya chikati chamara, Yakhobe wakatumaso ŵana ŵake ku Eguputo kuti ŵakagure chakurya. Pa nyengo iyi ŵakaluta na munung’una wawo waumaliro, Benjamini. Kuti wayezge ŵabali ŵake, Yosefe wakaŵika kapu wake wasiliva mu thumba la Benjamini kuti waŵapusikizgire kuti mbankhungu. Ŵakuru ŵa Yosefe ŵakazizwa chomene apo ŵateŵeti ŵa Yosefe ŵakasanga kapu mu thumba la Benjamini. Ŵakapempha Yosefe kuti walange iwo m’malo mwa Benjamini.

Apa Yosefe wakamanya kuti ŵakuru ŵake ŵali kusintha. Yosefe wakatondeka kujikora. Iyo wakamba kulira, wakati: ‘Ndine munung’una winu, Yosefe. Kasi adada ŵachali ŵamoyo?’ Ŵakuru ŵake ŵakazizwa chomene. Yosefe wakaŵaphalira kuti: ‘Kopa yayi chifukwa cha ivyo mukanichitira. Chiuta ndiyo wakanituma kuno kuti niponoske umoyo winu. Sono welerani luŵiro kwa adada, mukaŵatore mwize nawo kuno.’

Ŵakawelera kukwawo kukaphalira adada ŵawo ivyo Yosefe wakayowoya, na kuŵatora kuluta nawo ku Eguputo. Yosefe wakakumanaso na adada ŵake pakati pajumpha vyaka vinandi.